Jesu Bophelo le Tšebeletso tsa Hae
SEHLOOHO “Jesu o Phetha Sohle Seo Molimo o se Batlang,” se leng maqepheng a latelang, ke karolo ea ho qetela ea letoto la rōna le ’nileng la e-ba teng ka nako e telele la “Jesu Bophelo le Tšebeletso tsa Hae.” Karolo ena e ’nile ea hlaha ka har’a Molula-Qhooa ka nako e fetang lilemo tse tšeletseng, ka lihlooho tse 149 tse latellanang, tse qalileng ho ba teng tokollong ea April 1, 1985.
Re tšepa hore letoto lena le fumanehang ka har’a Molula-Qhooa le u thusitse ho latela keletso ea moapostola Pauluse ea ho ‘talima Jesu ka morero’ le ho ela hloko taelo ea Molimo ea ho “mo utloa.” (Ba-Heberu 12:2, 3, NW; Mattheu 17:5, NW) Ho theosa le lilemo, ba bangata ba ’nile ba ngola ba bolela hore ba thusitsoe ho etsa sena. ’Mali e mong o ile a ngola: “Ho joaloka hoja ke ne ke le teng ke mo mametse le ho shebella seo a se etsang. Ke se ke mo rata haholoanyane ka baka la ho bala lihlooho tsena.”
’Mali e mong o ngotse: “Ho bonahala hore tokollo e ’ngoe le e ’ngoe e tšoere ntlha e ntahlehetseng nakong eo ke neng ke bala tlaleho ea Bibele. Ke thabetse ho boloka liketsahalo tse sa tšoaneng tsa bophelo ba Jesu ka kelellong ho latela lenaneo le molemo haholoanyane la nako eo li etsahetseng ka eona ka ho bala sehlooho ka seng.” Ba bangata ba bontšitse kananelo e tšoanang ka ho ithuta hore na ke neng le hokae moo Jesu a ileng a ruta le ho etsa lintho tsena nakong ea tšebeletso ea hae.
Mosali e mong oa Spain o itse: “Ke bolokile lihlooho tsohle ho tloha qalong. Li koetlisa batho ba baholo esita le bana. Ke lilemo li 44, ’me ke thaba haholo ha ke bala litlaleho tsena. Ho joaloka hoja ke ne ke le teng ketsahalong ka ’ngoe ea histori.”
’Mè e mong oa United States o ngotse: “Ka baka la bokhutšoaane ba lihlooho tsena le ho beha litaba habonolo ha tsona, monna oa ka o ile a kopanela thutong ea rōna ea lelapa. Mora oa ka ea lilemo li robeli o ile a nkōpa hore ke le ngolle lengolo le le lebohang hobane joale ntate oa hae o ithuta Bibele. O kōpa hore nako eo ka eona letoto lena le tla beng le phethiloe lihlooho tsena li hatisoe bukeng e le hore a tle a khone ho arolelana litaba tsa eona le bao a kenang sekolo le bona.”
Mohlomong u na le mehopolo e tšoanang le ea ’mali eo haufinyane a ileng a hlomoha: “Ke ikutloa ke soabile ha ke nahana hore letoto lena le tla fela haufinyane joalokaha ho se ho hlahlojoa taba e buang ka matsatsi a ho qetela a bophelo ba Kreste. Ruri ke tla hloloheloa ho li bona sebakeng sa tsona ka har’a Molula-Qhooa.” Re tšepa hore u tla thabela karolo ena ea ho qetela ea letoto la rōna la “Jesu Bophelo le Tšebeletso tsa Hae.”