Mamello ea Molimo e Tla Tšoarella Halelele Hakae?
LILEMONG tse fetileng tse ka bang 3 000, monna ea bohlale o ile a ngola: “Motho o hatelletse motho e mong ho mo ntša kotsi.” (Moeklesia 8:9, NW) Haesale ho tloha ha monna eo ea bohlale a hlokomela seo, maemo ha a e-s’o ntlafale. Ho theosa le histori, batho ka bomong kapa e le lihlopha ba ’nile ba ikhapela matla, ka ho latellana, ba hatella le ho qhekella batho ba bang. Jehova Molimo o ’nile a mamella sena.
Jehova o ’nile a mamella hore e be mebuso e ’nile ea ikarabella bakeng sa limillione tsa batho ba shoeleng nakong ea lintoa ’me ea lumella ho hloka toka ho tebileng ha moruo. Kajeno, o sa ntsane a bontša mamello ha batho ba senya moea oa ozone ’me ba silafatsa moea le leoatle. E tlameha e be ho mo utloisa bohloko hakaakang ho bona tšenyo ea lefatše le letle le behang le tšenyo e se nang mabaka ea meru le liphoofolo tse hlaha!
Ke Hobane’ng ha Molimo o Bontša Mamello e Kaale?
Papiso e bonolo e ka ’na ea re thusa ho arabela potso ena. Nahana ka phello e ka bang teng khoebong haeba ka phehello mohiruoa a fihla ka morao ho nako. Mong’a khoebo o lokela ho etsa joang? Toka e ka ’na ea hloka hore a leleke mohiruoa hang-hang. Empa a ka ’na a hopola maele ana a Bibele: “Ea liehang ho halefa o na le kelello e kholo, empa ea pelo e befang kapele o hlahatsa bothoto.” (Liproverbia 14:29) Masene a ka ’na a etsa hore rakhoebo a lete pele a nka khato. A ka ’na a etsa qeto ea ho fana ka nako bakeng sa hore motho ea tla nkela mohiruoa eo sebaka a koetlisoe e le hore khoebo e se ke ea sitisoa ka ho eketsehileng.
Kutloelo-bohloko e ka ’na ea boetse ea mo etsa hore a lete. Ho thoe’ng ka ho lemosa mohiruoa ea sa tsotelleng hore a bone haeba a ka lokisa mekhoa ea hae? Ke hobane’ng ha a sa bue le eena ’me a tsebe haeba ho fihla ka mor’a nako ha hae ho bakoa ke bothata bo ka rarolloang kapa ke tloaelo e mpe e ke keng ea rarolloa? Le hoja rakhoebo a ka ’na a etsa qeto ea ho bontša mamello, ho ntse ho le joalo, mamello ea hae e tla ba le meeli. Mohiruoa o ne a tla lokela ho fetoha kapa qetellong a lelekoe. Hoo e ne e tla ba ho loketseng molemong oa khoebo ka boeona le ho bahiruoa ba bang ba latelang litaelo.
Ka tsela e batlang e tšoana, Jehova Molimo o bontša mamello ha a tobane le liphoso e le hore a ka fana ka nako bakeng sa ho fana ka tharollo e lokileng mathateng a itseng. Ho feta moo, mamello ea hae e neha bafosi monyetla oa ho fetola litsela tsa bona le ho fumana melemo ea ka ho sa feleng. Kahoo, Bibele e re khothalletsa hore re se soabisoe ke mamello ea Molimo. Ho e-na le hoo, e re: “Le lemohe hobane mamello ea Morena oa rōna, ke poloko.”—2 Petrose 3:15.
Mohlala oa Mamello ea Molimo
Jehova Molimo o ile a bontša mamello pele ho Moroallo o moholo oa mehleng ea Noe. Lefatše la nakong eo le ne le tletse pefo ’me le le khopo haholo. Re bala hore: “Jehova a bona bolotsana ba batho hoba bo boholo lefatšeng . . . Jehova a re: Ke tla timetsa lefatšeng batho bao ke ba bōpileng.” (Genese 6:5, 7) E, Jehova o ne a hopotse ho tlisa tharollo ea ho qetela bothateng ba bokhopo nakong eo: ho tlosoa ha batho ba babe. Empa ha aa ka a nka khato hang-hang. Hobane’ng?
Hobane hase e mong le e mong ea neng a le khopo. Noe le lelapa la hae ba ne ba lokile mahlong a Molimo. Kahoo molemong oa bona, Jehova o ile a leta ka mamello ho lumella batho ba ’maloa ba lokileng hore ba itokisetse pholoho. Hape, ho leta hoo ha hae ka nako e telele ho ile ha neha Noe monyetla oa ho ba “’moleli oa ho loka,” ha neha batho bao ba khopo monyetla oa ho fetola mekhoa ea bona. Bibele e re: “Molimo o no o sa mameletse ka sebete, e leng mehleng ea Noe, ha ho no ho hahuoa areka, eo batho ba seng bakae, e leng ba robileng meno e le ’meli, ba pholositsoeng ka eona metsing.”—2 Petrose 2:5; 1 Petrose 3:20.
Lebaka Leo Molimo o Mamelletseng ka Lona Hona Joale
Kajeno, boemo boa tšoana. Lefatše le boetse le tletse pefo. Joaloka mehleng ea Noe, Molimo o se o ahlotse lefatše lena, leo, Bibele e bolelang hore, le “boloketsoe letsatsi la kahlolo, le la tšenyeho ea batho ba nyefolang.” (2 Petrose 3:7) Ha seo se etsahala, ho ke ke ha hlola ho e-ba le ho senya tikoloho hape, ho e-ba le khatello ea ba fokolang, kapa tšebeliso e mpe ea matla.
Joale, ke hobane’ng ha Molimo o sa ka oa felisa batho ba babe khale? Hobane ho ’nile ha e-ba le litseko tse lokelang ho rarolloa le litaba tsa bohlokoa tse lokelang ho lokisoa. Ha e le hantle, Jehova o lebile tharollong ea ka ho sa feleng ea bothata ba bokhopo e amang lintho tse ngata, ho kopanyelletsa ho pholosa batho ba pelo li lokileng bokhobeng ba ho kula le lefu.
Jehova a nahanne ka batho ba pelo li lokileng, o ile a rera ho fana ka ’Moloki ea tla fana ka topollo bakeng sa libe tsa rōna. Mabapi le molopolli eo, Bibele e re: “Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) Ho ile ha nka lilemo tse likete ho lokisa tsela bakeng sa Jesu hore a tle ’me a tl’o etsa bophelo ba hae sehlabelo molemong oa batho. Lilemong tseo tsohle, ka lerato Molimo o ne o ntse o mamelletse. Empa na ho ne ho se bohlokoa ho latela tokisetso e joalo?
Jesu o fane ka topollo bakeng sa batho hoo e ka bang lilemong tse likete tse peli tse fetileng. Joale, ke hobane’ng ha Molimo o ntse o bontša mamello? Lebaka le leng ke hore lefu la Jesu le ile la supa qaleho ea phutuho ea thuto. Batho ba ne ba tlameha ho ithuta ka tokisetso ena e lerato le ho fuoa monyetla oa ho e amohela kapa ho e hana. Hoo ho ne ho tla nka nako, empa e ne e tla ba nako e sebelisitsoeng hamolemo. Bibele e re: “Morena [Jehova] ha a liehise lipallo tsa hae, joale ka ha ba bang ba lekanya hobane tieho e teng; empa o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong.”—2 Petrose 3:9.
Tseko ea ’Muso
Taba e ’ngoe ea bohlokoa le eona e ne e tla nka nako. Ho ne ho hlokahala hore ho rarolloe bothata ba puso ea batho. Qalong, motho o ne a le tlas’a puso ea Molimo. Empa serapeng sa Edene, batsoali ba rōna ba pele ba ile ba lahla tokisetso eo. Ba ile ba ikhethela ho se busoe ke Molimo, ba batla ho ipusa. (Genese 3:1-5) Leha ho le joalo, ha e le hantle motho o ne a sa bōpeloa ho ipusa. Moprofeta Jeremia o ile a ngola: “Oho! Jehova, kea tseba hobane tsela ea motho ha e matleng a hae, ’me motho ea tsamaeang a ke ke a lokisa lika tsa hae.”—Jeremia 10:23; Liproverbia 20:24.
Ho sa tsotellehe hoo, kaha tseko ea ’muso e ile ea phahamisoa, ka mamello Jehova o lumelletse nako hore e fete ho e rarolla. Ha e le hantle, ka seatla se bulehileng o fane ka lilemo tse likete hore motho a leke mofuta o mong le o mong oa puso. Ka phello efe? Ho hlakile hore ha ho ’muso oa motho o ka felisang khatello, ho hloka toka, kapa lisosa tse ling tsa ho hloka thabo.
Ha e le hantle, ho itšetlehiloe ka histori ea motho, na ho na le mang kapa mang eo kannete a ka bolelang hore Molimo ha o na toka ha o phatlalatsa morero oa oona oa ho felisa mebuso ea batho le ho e nkela sebaka ka oa oona? Ho hang! Re amohela ka pelo eohle phethahatso ena ea boprofeta ba Bibele: “Empa mehleng ea marena ao, Molimo oa leholimo o tla hloma ’muso o ke keng oa senyeha ka ho sa eeng kae, ’me borena ba oona bo ke ke ba fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.”—Daniele 2:44.
Morena oa leholimo oa ’Muso oo ke Jesu ea tsositsoeng. Ho mo lokisetsa boemo boo—haesita le ho khetha batho ba tla busa le eena—ho nkile nako. Nakong eo eohle, Molimo o bontšitse mamello.
Ithuele Molemo Hona Joale Mamellong ea Molimo
Kajeno, batho ba limillione ba leng linaheng tse ka bang 212 ba rua molemo mamellong ea Molimo. Ba kopane takatsong ea bona ea ho utloa Molimo le ho sebeletsa puso ea oona ea leholimo. Ha ba bokana ’moho Liholong tsa bona tsa ’Muso, ba ithuta kamoo ho leng molemo ka teng ho sebelisa melao-motheo ea Bibele bophelong ba bona. Ha ba kopanele lipolotiking tse arolang tsa lefatše lena, le hoja ba ikokobelletsa mebuso ea batho hafeela ka mamello Molimo o ntse o e lumelletse ho sebetsa.—Mattheu 22:21; Ba-Roma 13:1-5.
Tšebelisano-’moho e joalo har’a batho ba bangata hakana e phahamisa Jehova e le Ea ka etsang hore ho be le kutloano pakeng tsa batho ba nang le boikhethelo ba ithutang ho mo rata le ba batlang ho mo sebeletsa. Ha ho pelaelo hore u ’nile ua teana le batho bana ha ba ntse ba tsoela pele ka mosebetsi o tšoanang le oo Jesu ka boeena a o qalileng, e leng oa ho bolela litaba tse molemo tsa ’Muso oa Molimo. Jesu o ile a bolela esale pele ka tlhōrō ea mosebetsi ona ha a re: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.”—Mattheu 24:14.
Ha e sa Tla ba Halelele!
Bopaki bo bonahalang bo bontša hore litokisetso tsa puso e lokileng ea Molimo tsa hore o nke taolo ea letsatsi le letsatsi ea lefatše li se li batla li phethiloe. Ka mor’a ho hlalosa liphello tse sisimosang tsa ho hlōleha ha puso ea batho tseo re li boneng lekholong lena la lilemo, Jesu o itse: “Etlare ha le bona tseo li hlaha, le tsebe hoba ’muso oa Molimo o haufi.”—Luka 21:10, 11, 31.
Haufinyane, Molimo o tla felisa ba khopo lefatšeng. Mantsoe a mopesaleme a tla phethahala ka sebele: “Ba bolotsana ba tla felisoa . . . Ho se ho se hokae, ’me molotsana o tla ba sieo; u tla qamaka tulo tsa hae, empa o tla be a setse a le sieo.” (Pesaleme ea 37:9, 10) Na u ka nahana ka lefatše le se nang bokhopo? Nakong eo ke mang ea tla tsamaisa litaba tsa batho? Bibele e re: “Bonang, morena [Kreste Jesu ea behiloeng teroneng maholimong] o tla busa ka ho lōka, mahosana [bakhethoa ba hae ba tšepahalang ba lefatšeng] le ’ona a lise ka ho loka. Moputso oa ho loka e tla ba khotso, tholoana ea ho loka e be phomolo le boiketlo ka ho sa eeng kae. Sechaba sa ka se tla aha moahong oa khotso, le matlung a tšepehang, nģalong tsa boiketlo le phomolo.”—Esaia 32:1, 17, 18.
Ka hona, ’muso oa Molimo oa leholimo o tla etsolla liphello tse mpe tsa liketso tse fosahetseng tsa motho ’me o hlophise batho ba O tšepileng hore e be mokhatlo oa batho o lumellanang. Bibele ha e hlalosa tumellano ena, e re: “Phiri e tla lula le konyana, lengau le bothe le potsanyane; namane le taoana le khomo e nontšitsoeng li tla ba hammoho, li sotetsoe ke moshanyana . . . ha ho sa tla etsoa hampe, ha ho sa tla hlola ho senngoa thabeng eohle e halalelang ea ka, hobane lefatše le tla tlala tsebo ea Jehova, joale ka ha metsi a aparetse leoatle.”—Esaia 11:6-9.
Ke phello e babatsehang hakaakang ea ho bontša mamello ha Molimo! Kahoo, ho e-na le ho belaela ka hore Molimo o letile nako e telele haholo, ke hobane’ng ha u sa sebelise monyetla oa mamello ea oona ho ikokobelletsa ’Muso oa oona? Ithute litekanyetso tsa oona ka Bibeleng ’me u ipapise le tsona. Kopana le ba bang bao ka kutloano ba ikokobelletsang oona. Joale, mamello ea Molimo e tla fella ka mahlohonolo a ka ho sa feleng ho uena.