Liphetolelo tsa Bibele Afrika

Liphetolelo tsa pele tsa Bibele eohle puong ea Seafrika li ile tsa etsoa Egepeta. Li tsejoa e le liphetolelo tsa Coptic, ho lumeloa hore ke tsa lekholong la boraro kapa la bone la lilemo C.E. Hoo e ka bang makholo a mararo a lilemo hamorao, Bibele e ile ea fetoleloa ka Seethiopia.

Lipuo tse makholo tse sa ngoloeng tse buuoang ka boroa ho Ethiopia le Sahara li ile tsa lokela ho emela ho fihla ha baromuoa lekholong la bo 19 la lilemo. Ka 1857 ho ile ha finyelloa sehlohlolo ha Robert Moffat a phetha phetolelo ea Bibele ea Setswana, puo ea Afrika e ka boroa. Hape o ile a hatisa likarolo tsa eona khatisong ea letsoho. Ena e ne e le Bibele ea pele e felletseng ea ho hatisoa Afrika ’me e le phetolelo ea pele e felletseng puong ea Afrika e neng e sa ngoloe pele. Ho thahasellisang ke hore Moffat o ile a sebelisa lebitso la Molimo Yehova phetolelong ea hae. Phetolelong ea 1872 e hatisitsoeng ke Mokhatlo oa Bibele oa Brithani le Linaha Lisele, lebitso Yehova le sebelisitsoe lipolelong tsa sehlooho tse entsoeng ke Jesu joalokaha li tlalehiloe ho Mattheu 4:10 le Mareka 12:29, 30.

Ka 1990 Bibele eohle e ne e se e fetoletsoe lipuong tse 119 tsa Afrika, ’me likarolo tsa eona li fumaneha ka lipuo tse ling tse 434.