Lintho tse ka Bonoang Naheng e Tšepisitsoeng

E-ja Lijo—E-ja Bohobe

KA LEKHETLO le leng ha Jesu le barutuoa ba hae ba ne ba le ka tlung, “ba ile ba sitoa le ho ja lijo” ka baka la letšoele. (Mareka 3:20, NW) Ka nako e ’ngoe Jesu o ile a kena tlung ea Mofarisi “ho ea ja lijo.” (Luka 14:1, NW) Ke lijo tsa mofuta ofe tse tlang monahanong oa hao?

Mohlomong Baiseraele ba boholo-holo ba ka nahana ka bohobe hobane ha e le hantle mantsoe a Seheberu le Segerike bakeng sa “ho ja lijo” a ne a bolela “ho ja bohobe.” Hona ke ho utloahalang, kaha bohobe bo entsoeng ka koro kapa harese e ne e le karolo e khōlō ea lijo tsa bona.

Batho ba bangata kajeno ba nahana ka bapatriareka ba Baheberu joaloka balisa le barutuoa ba Jesu joaloka batšoasi ba litlhapi. ’Me ba bang ba ne ba etsa mosebetsi o joalo empa ha e le hantle ha se bohle. Koro e ne e le ea bohlokoa bophelong ba batho ba bangata. Kamoo ho bonahalang ka teng ho ne ho le joalo ka Isaaka le Jakobo linakong tse ling, joalokaha re ka fihlela qeto eo ho ea ka Genese 26:12; 27:37; le 37:7. ’Me kaha temo e ne e le mosebetsi oa bohlokoa ka nako ea Jesu Galilea, na mohlomong ba bang ba fetohileng baapostola ba Jesu e ne e kile ea e-ba balemi ba koro?

Ho ka ’na ha e-ba joalo, hobane ho lema koro ho ne ho atile Naheng e Tšepisitsoeng, ’me litšupiso tsa hona li tletse ka Bibeleng. (Deuteronoma 8:7-9; 1 Samuele 6:13) Se neng se ameha ke eng?

Ka mor’a hore lipula tsa pele li ngobetse mobu ka October le November, molemi oa koro o ne a tla lema le ho jala peō ea hae. Lipula tse nang hamorao li tla thusa koro ea hae ho hōla ’me ebe, ka April le May, e butsoitse ho ba le ’mala o mosootho pele ho mocheso oa lehlabula. Kotulo ea koro e ne e tsejoa hoo re balang ka eona e le letšoao la nako ea selemo. (Genese 30:14; Baahloli 15:1) Na u ka bolela hore na setšoantšo se letsohong le letšehali se nkiloe neng?a ’Me e ne e le nako efe selemong ha barutuoa ba Jesu ba ne ba kha liqoapi tse sa butsoang?—Mattheu 12:1.

Ho kotula ho ne ho bolela mosebetsi o mongata bakeng sa balemi. Bakotuli ba ne ba khaola litlhaka ka sekele ea letsoho ’me ba li tlame lingata, joalokaha u bona ka tlaase. Ho hlakile hore litlhaka tse ling li ka ’na tsa fetoa kapa tsa oela fatše, e leng lebaka leo Ruthe a neng a tseba ho thonaka koro e setseng ka katleho. (Ruthe 2:2, 7, 23; Mareka 4:28, 29) Lingata tsa koro joale li ne li isoa seotlong, joaloka sa Arauna. Se etsoang moo ke eng? Bibele e bua ka ‘lilei tsa ho pola le lijoko tsa lipholo.’ (2 Samuele 24:18-22, NW; 1 Likronike 21:23) Lingata tsa koro li ne li behoa sebakeng se bataletseng sa lejoe kapa mobung o hatakiloeng. Poho kapa phoofolo e ’ngoe e ne e tla potoloha, e hatakela koro. Phoofolo e ka hula selei sa ho pola sa lehong se neng se thusa ho roba koro ebe lithollo lia tsoa.—Esaia 41:15.

Joale lithollo li ne li se li loketse ho olosoa, ho neng ho etsoa ka hore li lahleloe moeeng ka kharafu kapa ka fereko, joalokaha ho bontšitsoe ka holimo. (Mattheu 3:12) Molemi a ka olosa ka nako ea mantsiboea ha moea o ne o ka fefola ’moko (makhapetla a tsoang liqoaping) ’me a behe tlhaka ka lehlakoreng. Ha koro e se e bokelletsoe, ’me e se e tšekiloe ho tlosa mahlohlojane leha e le afe, e ne e se e loketse ho behoa molikong—kapa ho etsa lijo tsa bohlokoa bo boholo, bohobe.—Mattheu 6:11.

Haeba u le ’mè oa lelapa ea nang le mosebetsi oo, letsatsi le leng le le leng u ne u tla sebelisa leloala le tšilo ho sila koro ho ba phoofo, mohlomong phoofo ea koro e litlheferetsi. Kapa u ka sila “phofo e thumisitsoeng,” joaloka eo Sara a ileng a e sebelisa ho etsa “linkhoana” bakeng sa mangeloi a iphetotseng batho kapa eo Baiseraele ba e sebelisitseng bakeng sa linyehelo tsa koro ho Jehova. (Genese 18:6; Exoda 29:2; Levitike 2:1-5; Numere 28:12) Sara o ne a tšela phoofo ea koro ka metsinyana ’me a e lube ho etsa hlama.

Ka tlaase, u ka bona lipolokoe tsa hlama le lofo e le ’ngoe e sepapetloa e tšesaane e emetseng ho phehoa. Likuku tse joalo tse khōlō le tse polokoe li ne ka phehoa lipaneng tse behoang letsatsing tsa majoe kapa tsa tšepe, joalokaha mosali eo a etsa. Na sena se u thusa ho bona seo Sara a ileng a se etsa joale bakeng sa baeti ba hae ba mangeloi le seo lelapa la Lota le ileng la se etsa hamorao? Rea bala: “[Mangeloi a] fapohela ho eena, [a] kena ka tlung ea hae; ’me a [a] etsetsa selallo, a [a] apehela linkhoana tse se nang litomoso, ’me [a] e-ja.”—Genese 19:3.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 24]

Pictorial Archive (Near Eastern History) Est.

[Tlhaloso ea Moo Setšoantšo se Nkiloeng Teng e leqepheng la 24]

Pictorial Archive (Near Eastern History) Est.

[Tlhaloso ea Moo Setšoantšo se Nkiloeng Teng e leqepheng la 25]

Pictorial Archive (Near Eastern History) Est.

[Tlhaloso ea Moo Setšoantšo se Nkiloeng Teng e leqepheng la 25]

Garo Nalbandian