Bokhabane ba Moriri o Moputsoa

ETLA ba ho hlasimollang hakaakang ho bua le banna le basali ba tšepahalang ba boholo-holo! Ak’u nahane u bua le banna ba joaloka Noe, Abrahama, Moshe, le Johanne Mokolobetsi, hammoho le basali ba kang Sara, Rahaba, Ruthe, le Debora! Na u ne u ke ke ua khahloa ke ho ba mamela ba pheta litlaleho tseo ba li boneng tsa liketsahalo tse hlaheletseng tsa boholo-holo?

Esita le kajeno, na u ne u ke ke ua thabela ho utloa batho ba hōlileng ba tšepahalang ba pheta liphihlelo tse bontšang kamoo bona le ba bang ba ileng ba boloka botšepehi ba bona ho Molimo tlas’a liteko, ho akareletsa lithibelo, ho shapuoa, le ho kenngoa teronkong ka lebaka la ho loka? Ka sebele u ne u tla thabela ho utloa hoo! Lerato la rōna bakeng sa Molimo le tlhompho ea rōna ho bona li tla hōla ha ba re bolella ka maikutlo a bona ’me haholo-holo ka kananelo ea bona e tsoang pelong bakeng sa tlhokomelo e lerato ea Jehova.

Har’a batho ba Molimo, ka mehla banna le basali ba hōlileng ba tšepahalang ba ’nile ba hlomphuoa bakeng sa phihlelo ea bona, tsebo, le bohlale. Ha e le hantle, keletso e latelang e ile ea akaretsoa Molaong oo Molimo o o nehileng Baiseraele: “U eme pel’a moriri o moputsoa, ’me u hlomphe ea hōlileng. Tšaba Molimo oa hao. Ke ’na Jehova.” (Levitike 19:32) Lentsoe la Seheberu bakeng sa ho tsofala kapa lilemo tsa boholo le hlaha motsong o bolelang “ho ba moputsoa” ’me hape le boleloa e le “moriri o moputsoa.” Kahoo Baiseraele ba ne ba lebeletsoe hore ba eme e le pontšo ea ho hlompha motho e moholo, ba etsa joalo ka tšabo e nang le tlhompho ea Molimo.

Na boikutlo bo joalo ba tlhompho bo teng kajeno? Ka mohlala, na batho ba bacha ka tlhompho ba bulela batho ba hōlileng menyako? Na ka tloaelo bacha kapa batho ba baholo ba bacha ba neha batho ba hōlileng sebaka sa bona ka har’a lift e tletseng? Kapa na batho ba bacha ka ho tloaelehileng ba neha ba hōlileng litulo tsa bona beseng e tletseng kapa tereneng? Ho hlōleha ho etsa lintho tse joalo ho hlokometsoe esita le har’a Bakreste.

Leha ho le joalo, hore Bakreste ba thabise Jehova Molimo ba tlameha ho etsa lintho tumellanong le pono ea hae ’me ba qobe monahano, puo, le liketso tsa bao e leng ‘baithati, ba sa utloeng batsoali, ba hlokang teboho, le ba sa rateng se molemo.’ (2 Timothea 3:1-5, NW) Joale, Lentsoe la Molimo le re’ng ka bocha kamanong le moriri o moputsoa?

Matla a Bocha

Bibele e elelloa matla a bocha le melemo ea bona, ka ho re: “Tlōtla ea banna ba bacha ke matla a bona.” (Liproverbia 20:29, NW) Iseraeleng ea boholo-holo matla a Balevi ba bacha a ne a sebelisoa tempeleng, hangata bakeng sa mesebetsi e mengata e boima. Kajeno, mosebetsi o mongata lifekthering, mahaeng a Bethele, le mesebetsi ea kaho ea Mokhatlo oa Watch Tower e etsoa ke banna le basali ba bacha ba nehetseng matla a bona le ho khona ho ntšetsa lithahasello tsa ’Muso pele. (Mattheu 6:33) Ka hona ba na le litokelo tse ntle tšebeletsong ea Molimo.

Maele a sa tsoa qotsoa a qetella ka mantsoe ana, “moriri o moputsoa ke bokhabane ba maqheku.” Ha matla a bocha a kopanngoa le phihlelo le bohlale ba lilemo tse ngata, ho etsoa kopano e matla haholo.

Ho etsa mohlala: ’Metli ea mocha oa seithuti ea kōpiloeng ho kenya lipanele tsa lehong o batla ho phethahatsa kabelo ea hae ka matla a bocha. ’Metli ea hōlileng ea nang le phihlelo o hlokomela hore ho sa tsotellehe matla a hae, mothusi e mocha o otla sepekere ka makhetlo a ’maloa pele se ka kenella hare. Mosebeletsi ea hōlileng o khothaletsa mohlankana ho tšoara hamore qetellong ea mofeng ho e-na le ho e tšoara haufi le karolo e ka pele ea tšepe. Hona ho etsa hore motho e mocha a khone ho otla sepekere ka matla a maholoanyane, ho bolokang nako le matla.

Ka ho tšoanang, mosali e mocha ea nang le matla a ka ithuta ho fumana tsela e molemo ka ho etsa liphoso hore masela a mang a tla senyeha haeba a sa hlatsuoe ho latela litaelo. Leha ho le joalo, mosali ea nang le phihlelo o tseba bohlokoa ba ho nka nako ea ho khetha liaparo le ho hlatsoa liaparo ka ho fapana ha tsona. Hape o ithutile hore a ka qoba ho tereka liaparo tse ling ka ho li mena ha a li tlosa terateng ea liaparo kapa a li ntša mochening o omisang liaparo.

Ho ithuta bathong ba nang le phihlelo ho ka etsa bophelo bo nolofale haholoanyane. Leha ho le joalo, nako e-ea fihla eo esita le motho ea nang le phihlelo e ngata a sitoang ho etsa mesebetsi eo a neng a e phethahatsa habonolo lilemo tse ’maloa tse fetileng. Mongoli e mong ka ho nepahala o ile a hlokomela: “Hoja bacha ba na le tsebo, ’me ba hōlileng ba na le matla.” Empa ke ho molemo hakaakang ha batho ba hōlileng ba ananela matla a ba bacha ’me ka mamello ba ba neha phihlelo e fumanoeng lilemong tse ngata—’me bacha ka boikokobetso ba amohela litlhahiso! Ka tsela ena, ba hōlileng le ba bacha ba rua molemo.

Ho Fumana Bokhabane

Lilemo feela ha lia lekana. Elihu ea mocha o itse: “Hase feela ba lilemo tse ngata ba leng bohlale, leha e le hore ke ba hōlileng ba utloisisang kahlolo.” (Jobo 32:9, NW; Moeklesia 4:13) Hore motho ea hōlileng e be oa bohlokoa kannete ka lebaka la moriri o moputsoa, o tla lokela hore ebe o entse ho hongata ka bophelo ba hae ho e-na le ho qeta matsatsi a hae ka botsoa a shebile thelevishene, a le lipapaling, kapa ho seng joalo a ithabisa. ’Me esita le lilemong tsa morao, ho hlokahala hore ba hōlileng ba tsoele pele ba ithuta.

Batho ba bangata ba ithorisa ka ho etsa lintho ka tsela ea bona, kapa ba re: “Phihlelo ke tichere e molemo ka ho fetisisa.” Leha ho le joalo, Lentsoe la Molimo lea eletsa: “Motho ea bohlale o tla mamela ’me a eketse ho ithuta, ’me monna oa kutloisiso ke ea fumanang tataiso e molemo.” (Liproverbia 1:5, NW; bapisa le 1 Ba-Korinthe 10:11.) Phihlelo hase ka mehla e leng tichere e molemo ka ho fetisisa, kahobane re ka ithuta liphosong tsa ba bang ntle le ho etsa liphoso tse tšoanang. Ho feta moo, Mokreste o tla hopola hore “moriri o moputsoa, ha o fumanoa tseleng ea ho loka, ke mokhabo oa hlompho.” (Liproverbia 16:31) Bophelo bo sebelisitsoeng tšebeletsong e tšepahalang ho Jehova bo botle ponong ea hae ’me bo tšoaneloa ke tlhompho ea ba bang joaloka mohlala o motle. Ka ho hlakileng, ho ithuta ka Molimo le ho fumana phihlelo “tseleng ea ho loka” ho ka qala pelenyana bophelong ’me ho lokela hore e be tšebetso e sa feleng.—Ba-Roma 11:33, 34.

Mohlala oa taba ena o bonoa phihlelong e amang moshemane oa Sweden ea lilemo li supileng. O ile a botsa molebeli oa Sekolo sa Tšebeletso sa Puso ea Molimo phuthehong hore na a ka ngolisa sekolong. Molebeli o ile a botsa, “Hobane’ng?” Mocha enoa o ile a arabela ka ho re: “Motho a ke ke a lula a sa etse letho bophelo ba hae bohle!” (Moeklesia 12:1) Ke mohlala o motle hakaakang bakeng sa bacha le ba hōlileng!

Ho Hlompha Moriri o Moputsoa

Tšekamelo e utloisang bohloko ea mokhatlo oa batho kajeno ke ho khothalletsa haholo ’mele o shahlileng le o matla ’me o hlokomoloha ba hōlileng. Boikutlo ba Bakreste e lokela ho ba bofe ho ba moriri o moputsoa ka phuthehong?

Ho e-na le ho hlokomoloha Bakreste ba hōlileng, re lokela ho ba nahanela le ho qeta nako le bona. Ka mohlala, libokeng tsa beke le beke tsa Lipaki tsa Jehova Holong ea ’Muso, na u etsa boiteko ba ho lumelisa ba hōlileng? Kannete ba ananela litumeliso tsa ba banyenyane le ba bang. ’Me ba hōlileng ba thaba hakaakang ho ba teng ’mokeng oa boithabiso oa balumeli-’moho ba lilemo tse fapaneng! Le hoja banyalani ba bacha ba ka ba le lithahasello tse tšoanang le batho ba bang ba nyetseng ba lilemo tsa bona, e ka ba ho putsang ho akareletsa ba hōlileng ’mokeng o joalo o thabisang.—1 Ba-Thessalonika 3:12; 5:15.

Ke habohlokoa hakaakang ho nahanela ha re bua le ba hōlileng! Ha moena ea nang le lilemo tse 40 tšebeletsong ea Jehova a ne a bua le moholo e mong ka hore na a ka sebelisoa joang phuthehong, monna ea mocha o ile a re: “Ha u na ho hongata hakaalo hoo u ka thusang ka hona.” Eo ke polelo e se nang mosa hakaakang! Moena ea hōlileng o ne a na le matla a fokolang ho feta ao a kileng a ba le ’ona, karolo ea hae tšebeletsong ea tšimo e fokotsehile, ’me kamoo ho bonahalang ka teng litokelo tse ling tsa bolebeli li le ka ’nģane ho matla a hae a hona joale; leha ho le joalo, o ne a na le ho hongata hoo a ka thusang ka hona. O ne a na le bohlale le phihlelo e bokeletsoeng ka lilemo tse ngata tseleng ea ho loka. Kahobane ba hōlileng ba joalo ba sebelitse ka thata e le baboleli ba ’Muso, ba mamella tlhoriso, ba jara mojaro o boima oa boikarabelo ba Bokreste, ’me ba koetlisa ba bang, hona joale batho ba Molimo ba na le mokhatlo o hlophisitsoeng o matla o tšehelitsoeng ke moea oa hae. Ka hona, eka re ka bontša bana ba hōlileng tlhompho joaloka baeletsi ba bohlale, balisa ba lerato, le litichere tse atlehang.

Hape ho na le lebaka le molemo la ho nahanela ka ho teba litlhahiso tse etsoang ke batho ba hōlileng. Ka mohlala, moena ea nang le phihlelo o ile a hlahisa hore monyako oa Holo ea ’Muso e itseng o se behoe ka lehlakoreng le ka bophirimela la moaho. Baena ba bacha ba amehile haholo ka botle ba moaho ha baa ka ba latela tlhahiso ea hae. Leha ho le joalo, ka mor’a lilemo tse ’maloa, ho ile ha lokela hore monyako o tlosoe o behoe sebakeng se seng ka lebaka la moea le pula tse tsoang ka bophirimela tse entseng hore o senyehe. Bohlale bo sebetsang ba phihlelo bo ne bo feta mabaka a cheseho ea botle. Haeba batho ba bacha ba hlompha ba hōlileng ka ho mamela ho hlahisa maikutlo ha bona le bohlale bo sebetsang, hona ho ka boloka nako le chelete. Esita le haeba tlhahiso ea motho ea hōlileng e sa lateloe, a ka hlomphuoa ka hore a tsebisoe hore e ile ea nahaneloa, empa mabaka a mang a ile a lebisa qetong e fapaneng.—Bapisa le Liproverbia 1:8.

Sheba Pele, Eseng Morao

Batho ba bang ba hōlileng ba na le pono ena: “Ha ho nako e tšoanang le nako ea pele ha ’na le uena re sa le bacha.” Leha ho le joalo, ho e-na le ho phela nakong e fetileng, batho ba hōlileng ba joalo ba ka khothatsoa ke ho sheba pele nakong eo ba tlang ho amohela moputso oa bona ebang ke oa leholimo kapa matla a bocha tlas’a puso ea ’Muso oa Molimo. Khabareng, ba lokela ho elelloa likhaello tsa bona tse bakoang ke botsofali. Ho elelloa hona le boikutlo ba ho tšeha ke tsa bohlokoa ha ho bonahala eka motho ea hōlileng o hlokomolohuoe litokelong tsa tšebeletso.

Ka mohlala, e ka ’na eaba moena ea hōlileng o ne a sebelisoa ka mehla mananeong a likopano tsa setereke lilemong tse fetileng. Hona joale ho na le baholo ba bangata ba khonang le banna ba bangata bao ho ka khethoang ho bona ba nang le matla a ho ruta. Le hoja ba bonahala ba le bacha, ba bang ho baholo bana ba ipakile ba cheseha ebile ba na le matla, ba ka ruta hantle le ho fana ka keletso e mosa, ’me ba khona ho khothatsa ba bang. (1 Ba-Thessalonika 5:12, 13; 1 Timothea 5:17) Ka lebaka leo, moena ea hōlileng ea sa hlahelleng lenaneong la kopano e khōlō a ka ikutloa a hlokomolohiloe ’me a ka ’na a se thabe hore litokelo li filoe baholo ba bacha. Leha ho le joalo, boikutlo boo bo fosahetseng bo bakoang ke ho se phethahale ha batho bo ka hlōloa. Ha e le hantle, bohle phuthehong ba ka thusa ka ho tsebisa ba hōlileng hore baa hlokahala, hore baa ratoa bakeng sa botšepehi ba bona, le hore likhopolo tsa bona ke tsa bohlokoa.

Hape, motho ea hōlileng o hloka ho hopola hore barapeli-’moho ba tlameha ho hlomphuoa joalokaha le eena a rata ho hlomphuoa. (Mattheu 7:12; Ba-Roma 12:10) Ho e-na le ho ikutloa hore ba hatelloa ho tlohela litokelo ka lebaka la lilemo tsa bona le ho ba le pono e fosahetseng, ba hōlileng ba lokela ho ithabela lilemong tsa bona tsa tšebeletso e tšepahalang. ’Me ruri, kaofela ha rōna re lokela ho leboha hore ka lebaka la tlhohonolofatso ea Jehova, ho na le palo e eketsehang ea balebeli ba tšoanelehang ho arolelana boima ba mosebetsi le ho nka boikarabelo ba phutheho joalokaha bongata ba “linku tse ling” bo phallela mokhatlong o hlophisitsoeng oa Bakreste.—Johanne 10:16; Esaia 60:8, 22; 2 Timothea 2:2.

Ka lebaka la bohloko, bophelo bo fokolang, kapa mabaka a mang, ka nako tse ling ba moriri o moputsoa ba ka halefa kapele. Hona ho hloka litho tsa lelapa kapa tsa phutheho ho ba le kutloisiso le kutloelo bohloko. Hape ho hloka hore ba hōlileng ba sebetse ka thata ho boloka boikutlo bo nepahetseng, ho ipoloka ba le bacha pelong le kelellong. Ha moena e mocha ea neng a lula ka kamoreng e le ’ngoe le setho sa Sehlopha se Busang sa Lipaki tsa Jehova a ne a tloha Bethele lilemo tse ’maloa tse fetileng, monna ea hōlileng o ile a mo kōpa hore a etse tlhahiso ea motho ea tla nka sebaka sa hae ’me a re a ka rata moena ea mocha ea hōlileng tsebong hore a mo thuse ho lula a le mocha a bile a le mafolo-folo. Moena ea hōlileng oa motlotsuoa o ne a sa ikemisetsa ho tlohela mosebetsi kapa ho fokotsa lebelo, hobane ho na le mosebetsi o lokelang ho etsoa. Ke mohlala o motle hakaakang oa ho sheba pele le ho boloka pono e nepahetseng!

Ka ntle ho pelaelo, “tlōtla ea banna ba bacha ke matla a bona, moriri o moputsoa ke bokhabane ba maqheku.” Ke ho tsotehang hakaakang ha batho ba bacha ba sebelisa matla a bona le ba hōlileng ba sebelisa bohlale ba bona ho phehelleng tsela ea ho loka! Bakreste ba hōlileng le ba bacha ba ba le thabo e khōlō ha ba kopane ho ntšetseng pele borapeli ba ’nete ba Jehova Molimo, “Moholo oa matsatsi.”—Daniele 7:13.

[Setšoantšo se leqepheng la 28]

Bakreste ba moriri o moputsoa ba na le ho hongata hoo ba ka thusang ka hona bakeng sa molemo oa ba bang