Setsi sa Thuto sa Watchtower se Romela Baromuoa
SEKOLO SA BIBELE SA GILEADE SA WATCHTOWER se ’nile sa tšoarela litlelase libakeng tse sa tšoaneng. Pakeng tsa 1943 le 1960, litlelase tse 35, tse entsoeng ka liithuti tse tsoang linaheng tse 95, li ile tsa fumana koetliso e khethehileng mehahong e South Lansing, New York, U.S.A. Eaba sekolo se fallela ntlo-khōlō ea lefatše e Brooklyn, New York, moo se ileng sa sebeletsa teng ka lilemo tse ka bang 28. Ho tloha ka 1988 ho fihlela mathoasong a 1995, Sekolo sa Gileade se ile sa tšoarela litlelase Wallkill, New York.
Nakong ea lilemo tsena sekolo se ile sa atolosa boholo ba tšebetso ea sona. Tlas’a tsamaiso ea sona ho ile ha fanoa ka thupelo ea thuto ka libeke tse leshome litlelaseng tse tharo Mexico; litlelase tse hlano tse joalo li ile tsa tšoareloa Jeremane; tse peli India. Ho tloha ka 1987 sekolo sa tlatsetso se tsejoang e le Sekolo sa ho Koetlisetsoa Bosebeletsi se se se tšoere litlelase linaheng tse 34, se fana ka thupelo ea libeke tse robeli tsa koetliso ho bahlankana ba tšoanelehang. Leha ho le joalo, thupelo e filoeng tlelase ea bo99 ea Gileade, Setsing sa Thuto sa Watchtower se Patterson, New York, se sa tsoa hahuoa, e ne e le thupelo ea libeke tse 20, e neng e akareletsa thuto e pharaletseng ea Bibele kaofela, puisano ka histori ea mehleng ea kajeno ea Lipaki tsa Jehova le mokhatlo oa tsona o hlophisitsoeng hammoho le keletso e batsi ka mosebetsi oa boromuoa linaheng lisele.
Ka la 2 September, tlelase eo ea bo99 e ile ea fumana mangolo. Lenaneo la lihora tse tharo la ho fana ka mangolo le ile la tšoareloa holong e ncha Setsing sa Thuto sa Watchtower. E ne e tletse tsoete! Bamameli ba eketsehileng ba mehahong ea Bethele Patterson, Wallkill le Brooklyn ba ne ba hokahantsoe ka mehala. Lena e ne e le letsatsi le thabisang haholo e seng feela ho tlelase e fumanang mangolo hammoho le beng ka bona le metsoalle e haufi empa hape le ho ba makholo ba neng ba ile ba kopanela e le baithaopi ho haheng mehaho ena ea sekolo e mecha e metle.
Lipolelong tsa hae tse bulang, Carey Barber oa Sehlopha se Busang o ile a lebisa tlhokomelo bohlokoeng ba se neng se etsahala. O ile a re: “Sena e lokela ho ba setsi sa tšebetso e khōlō ka ho fetisisa ea thuto ea bomolimo e kileng ea ntšetsoa pele lefatšeng lena.” O ile a hlalosa hore re atamela tlhōrō ea ntoa pakeng tsa peō ea mosali le peō ea noha. (Genese 3:15) O ile a bontša hore batho feela ba tlang ho pholoha ntoeng e tšabehang nakong ea mahlomola a maholo a tlang, e tla ba ba nang le tsebo e nepahetseng ea Lentsoe la Molimo ebile ba le mamela.
O ile a phatlalatsa: “Lenaneo la rōna la thuto la hona joale, le reretsoe hore batho ba Jehova kaofela hohle ba be boemong bo botle ba ho hōla moeeng bo hlalosoang ho Liproverbia 1:1-4—e leng ba ho tseba bohlale le taeo, ho khona ho lemoha kutloisiso, ho amohela taeo e fanang ka temohisiso, ho loka, kahlolo e molemo, ho otloloha le matla a ho nahana.” Ke tšireletso e kaakang ho ba le matlotlo a joalo a moea!
Keletso ho Tlelase e Fumanang Mangolo
Litlhaloso tseo tsa selelekela li ile tsa lateloa ke letoto la lipuo tse hlano tse khutšoanyane tse tobisitsoeng tlelaseng e fumanang mangolo. Harold Jackson, eo pele e neng e le morupeli oa Gileade ’me hona joale e le setho sa basebetsi ba ntlo-khōlō Brooklyn, o ile a khothaletsa tlelase, “Tšoarellang ka Tieo Khotsofalong ea Lōna ea Bomolimo.” Lloyd Barry, moromuoa oa nako e telele ’me hona joale e le setho sa Sehlopha se Busang, o ile a bua ka “Ho Sebeletsa Jehova ka Boikokobetso.” O ile a hlalosa hore tšoaneleho ena e tla ba ea bohlokoa ho liithuti tse fumanang mangolo ha li itokisetsa ho tloaelana le maemo a macha hammoho le likamano tsa tsona le baromuoa-’moho, liphutheho tseo li tlang ho sebeletsa le tsona le batho ba libaka tseo li tla ea ho tsona.
Karl Adams, eo hona joale a sebeletsang lefapheng la thuto la Gileade, o ile a tšetlehela tlelase mabaka ka potso e reng “Tumelo e Tla le Lebisa ho Etseng Eng?” O ile a ba khothaletsa hore ba se ke ba tšoana le Baiseraele bane ba neng ba belaela mabapi le maemo a lefeelleng ’me ba laba-labela ho khutlela Egepeta, empa ho e-na le hoo, ba be joaloka Abrahama, ea neng a lebeletse ’Muso oa Molimo ho e-na le ho khutlela Ure oa Bakalde e le tharollo ea mathata. (Exoda 16:2, 3; Ba-Heberu 11:10, 15, 16) Ulysses Glass, mongolisi oa sekolo, o ile a sebelisa phihlelo ea Asafe e tlalehiloeng ho Pesaleme ea 73 ho eletsa tlelase e fumanang mangolo ka hore, “Ananelang Seo le Nang le Sona.” ’Me Albert Schroeder, setho sa Komiti e Rutang ea Sehlopha se Busang, o ile a bua ka sehlooho se reng “Jehova O-oa Lokisetsa.” E le bopaki ba tokisetso e joalo, o ile a supa Sekolo sa Gileade ka bosona le karolo ea sona ho phethahatseng mosebetsi o moholo oa ho bolela le ho etsa barutuoa.
Hamorao bamameli ba ile ba mamela ka thahasello e khōlō ha Milton Henschel, mopresidente oa Mokhatlo oa Watch Tower, a ne a bua ka “Litho Tse Sebelisanang Hammoho.” O ile a bala le ho hlalosa Ba-Roma khaolo ea 12 ka mokhoa o batsi. Har’a tse ling, o ile a re: “Re tlameha ho nahanela taba ea hore re be le kamano e haufi-ufi le bahlanka-’moho le rōna ka phuthehong.” O ile a phaella: “Ho molemo ho rōna hore kamehla re nahane ka e mong le e mong e le thepa ea Jehova, ’me ho e-na le ho ba ba nyatsa-nyatsang, ho e-na le ho tšoaea liphoso, kamehla a re faneng ka thuso. Rea ithusa ha re boloka bonngoe ba moea ba phutheho ea Bokreste.” O ile a bontša hore na thuso e joalo e ka bonahatsoa joang ha ho lokisetsoa lijo lehaeng la baromuoa, ho nahaneloa ’nete ea hore hase bohle ba ka khonang ho ja ntho e tšoanang. O ile a boela a khothaletsa ho thusa ho e-na le ho nyatsa-nyatsa ha ho kopaneloa tšebeletsong ea tšimo le Bakreste-’moho ba futsanehileng. Moena Henschel o ile a totobatsa hore haeba ka ’nete re le ba thusanang, ba hahanang le ba khothatsanang, “Jehova o tla re ratela sena.” E ne e le keletso e babatsehang hakaakang ho baromuoa ba neng ba tla be ba sebeletsa linaheng tse fapaneng haholo le linaha tseo ba neng ba li furalla!
Ho Tseba Tlelase Hamolemo
Liithuti tse 48 tsa tlelase ea bo99, ka karolelano li ne li e-na le lilemo tse 32 ’me li se li qetile lilemo tse fetang 11 tšebeletsong ea nako e tletseng.
Lipuisano ka lipotso tseo e neng e le karolo ea lenaneo la ho fumana mangolo li ile tsa fa bamameli monyetla oa ho tseba liithuti tse seng kae hamolemo. Nikki Liebl, oa United States, le Simon Bolton, oa Engelane, ba ile ba pheta liketsahalo tse neng li lekile tumelo ea bona ea hore Jehova o ne a tla hlokomela litlhoko tsa bona tsa nama. Ka sebele ba ile ba latsoa tlhokomelo ea Jehova ha ba ntse ba beile tšebeletso ea nako e tletseng pele.
Isabelle Kazan, eo puo ea hae ea tsoalo e leng Sefora, o ile a bolela hore o ne a ithutile Searabia e le hore a tle a pakele batho ba buang Searabia naheng ea habo. Ha a ne a qala seo ka 1987, ho ne ho e-na le sehlopha se le seng se senyenyane Paris se neng se entsoe ka baena ba bane ba buang Searabia, ho kopanyeletsa le eena le khaitseli e mong ba neng ba ithuta puo eo. (Ho ne ho se bonolo. Beke ka ’ngoe ba ne ba qeta lihora tse robeli ba lokisetsa thuto ea bona ea Molula-Qhooa e le hore ba ka khona ho araba.) Na boiteko boo e ne e le ba bohlokoa? Ha e le hantle, kajeno ho na le Lipaki tse buang Searabia tse hlophisitsoeng ka lipotoloho tse hlano ho pholletsa le Fora. Seithuti se seng, Miko Puro, o ile a bolela kamoo Sefora seo a ithutileng sona sekolong se ileng sa mo nolofaletsa ho bolela ho baphaphathehi ba Maafrika naheng ea habo ea Finland, ’me hape e tla ba sa bohlokoa kabelong ea hae ea boromuoa Benin. Bonny Bowes o ile a pheta boiteko ba hae ba ho bua Sefora ka mokhoa o phollatsi e le hore a khone ho sebeletsa ka katleho Quebec, Canada. ’Me Bjarki Rasmussen, oa Denmark, o ile a pheta liphihlelo tseo eena le mosali oa hae ba seng ba bile le tsona nakong ea lilemo tse ngata tsa tšebeletso Lihleke-hlekeng tsa Faeroe. E, baromuoa bana ba bacha ke basebeletsi ba nako e tletseng ba nang le phihlelo.
Liithuti tse fumanang mangolo li ile tsa abeloa linaheng tse 19—Afrika, Amerika Bohareng le Boroa, Europe Bochabela le Bochabela. Liithuti tse fumaneng mangolo litlelaseng tse tlileng pele li se li sebelelitse linaheng tse fetang 200. Boholo ba liithuti tseo bo ntse bo tšoarehile likabelong tsa tsona. Baromuoa bana ba bacha joale ba kopanela le bona ho atoloseng bopaki ba ’Muso ka ho eketsehileng ho isa lipheletsong tsa lefatše.—Liketso 1:8.
[Litšoantšo tse leqepheng la 25]
Ponahalo ea phaposi ea tlelase Setsing sa Thuto sa Watchtower
[Setšoantšo se leqepheng la 26]
Tlelase ea Bo99 e Fumanang Mangolo ea Sekolo sa Bibele sa Gileade sa Watchtower
Lethathamong le ka tlaase, mela e baloa ho tloha ka pele ho ea morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.
[Litšoantšo tse leqepheng la 27]
Ba ntse ba le likabelong tsa bona: (ka ho le letšehali) Charles Leathco le mosali oa hae, Fern, Brazil, liithuti tse fumaneng mangolo tlelaseng ea pele le ea botšelela ea Gileade; (ka tlaase) Martha Hess, a le Japane, seithuti se fumaneng mangolo sa tlelase ea bosupa ea Gileade