Kopano ea “Manģosa a Khotso ea Bomolimo” ea 1996

MEHLENG ea boholo-holo, batho ba Jehova ba ne ba keteka mekete ea bohlokoa e meraro selemo le selemo. Ka ho tšoanang, mehleng ea kajeno batho ba lebitso la Jehova ba kopana hararo ka selemo bakeng sa mekete. Ba thabela ho bokana bakeng sa letsatsi la kopano le khethehileng, kopano ea potoloho ea matsatsi a mabeli, le kopano ea setereke ea matsatsi a mararo kapa a mane. Selemong sena, sehlooho sa kopano ea setereke ke “Manģosa a Khotso ea Bomolimo.”

Sehlooho seo se loketse hakaakang! Molimo oa rōna, Jehova, ke “Molimo oa khotso,” e, “Molimo ea fanang ka khotso.” Moeta-pele oa rōna Jesu Kreste, ke “Morena oa Khotso,” ’me molaetsa oo bahlanka ba Jehova ba o tlisang ke molaetsa oa khotso ea bomolimo. (Bafilippi 4:9; Baroma 15:33; Esaia 9:6; Nahume 1:15) Lenaneo le molemo la kopano le se le hlophisitsoe le tlang ho thusa bohle ho ananela ka ho feletseng haholoanyane bohlokoa ba khotso ea bomolimo.

Selemong sena, United States feela, ho tla ba le likopano tse 198. Ho ka etsahala hore ho be le kopano haufi le moo u leng teng. Ke hobane’ng ha u sa batlisise ho Lipaki tsa Jehova tse tikolohong ea haeno hore na e tla ba teng neng, hona hokae, ’me joale u etse litokisetso tsa ho ba teng? Bohle ba thahasellang khotso ea sebele, e tšoarellang ba tla fumana kamohelo e mofuthu.