Manģosa a Khotso ea Bomolimo aa Bokana
MOHOLO e mong oa Mokreste United States o re: “Kopano e ’ngoe le e ’ngoe ea setereke eo re bileng ho eona e ’nile ea re haha. Leha ho le joalo, selemong sena e bile ka tsela e hlollang. Letsatsi ka leng re ile ra tloha re ipotsa kamoo lenaneo la letsatsi le latelang le neng le tla phahamela seo re se lebeletseng, ’me ha rea ka ra soetseha!”
Haeba u bile teng ho e ’ngoe ea Likopano tsa Setereke tsa “Manģosa a Khotso ea Bomolimo,” ha ho pelaelo hore u ne u tla lumellana le enoa ea chesehang ea bileng teng kopanong. Letsatsi ka leng la kopano le ne le lebisa tlhokomelo tšobotsing e fapaneng ea mosebetsi oo Lipaki tsa Jehova li o etsang e le manģosa a Molimo. A re hlahlobeng lenaneo lena la matsatsi a mararo.
‘A Matle Hakakang Maoto a ba Bolelang Khotso’
Sena e ne e le sehlooho sa letsatsi la pele la kopano. Se ne se thehiloe ho Esaia 52:7. Linakong tsena tse thata, ba bangata ba sebeletsa Jehova tlas’a maemo a phephetsang. Puo “Ho Utloa ho Baboleli ba Khotso ba Chesehang” e ne e e-na le lipuisano tse etsoang le ba bang ho bana ba tšepahalang. Ho utloa lipolelo tseo ba li etsang ka bobona ka sebele ho ne ho khothatsa, ’me ba tlileng kopanong ba ile ba tiisetsoa ka tsela eo hore le bona Jehova a ka ba matlafatsa, le ho ba fa “matla a ka ’nģane ho se tloaelehileng.”—2 Bakorinthe 4:7.
Seo Jehova a se hlokang ha se boima. (1 Johanne 5:3) Sena se ile sa hlakisoa puong ea ho qetela lenaneong la hoseng, e ileng ea fihla tlhōrōng ea eona ka ho lokolloa ha bukana e maqephe a 32 eo sehlooho sa eona se reng Ke Eng Seo Molimo a se Hlokang ho Rōna? Bukana ena e nang le litšoantšo tse ntle eo e leng thuso ea ho ithuta, ha ho pelaelo hore e tla phetha karolo e khōlō ho thuseng ba bangata ho ithuta ka merero ea Molimo. Litlhaloso mabapi le tšebeliso ea sengoliloeng sena se secha li fumanoa sehloohong sa ho qetela se ithutoang makasineng ena le leqepheng la 16 le la 17.
Puo e reng “Ho Mamella Mosebetsing o Molemo” e ile ea hatisa hore Jehova o elelloa liteko tsa rōna haholo. Ho mamella ho bolela hore re eme re tiile ’me re se ke ra lahla tšepo. Jehova o re file Lentsoe la hae, moea oa hae le mokhatlo oa hae o hlophisitsoeng ho re thusa. Ho etsa mosebetsi oa boboleli ho hloka mamello, empa ho o etsa ho re thusa ho mamella, hobane ho etsa hore tumelo ea rōna e lule e phela. Ha e le mona re le haufi hakana le ho tsoa kholeng, ha rea lokela ho lumella mathata a rōna ho tapisa cheseho ea rōna, hobane ke ba mamellang ho fihlela qetellong feela ba tla bolokeha.—Matheu 24:13.
Puo ea sehlooho, “Karolo ea Rōna Joaloka Manģosa a Khotso ea Bomolimo,” e ile ea lebisa tlhokomelo ho lokolloeng ha batlamuoa ba Bajuda Babylona le ho tsosolosoeng ha borapeli bo hloekileng Jerusalema ka 537 B.C.E. Sebui se ile sa hlalosa hore ketsahalo ena e ne e le selelekela sa seo haufinyane ’Muso oa Molimo o tla se finyella tekanyong ea lefatše ka bophara. (Pesaleme ea 72:7; Esaia 9:7) Kabelo ea rōna ea hona joale ke ho bolela litaba tse molemo tse mabapi le ’Muso ona le ho phela tumellanong le molaetsa oo. Ho rata Molimo le moahisani ho lokela ho re susumelletsa ho tsoela pele re sa khaotse mosebetsing ona.—Liketso 5:42.
Ntlha e ka sehloohong lenaneong la Labohlano e ne e le neheletsano “Itebele Khahlanong le Maraba a Patehileng a Boithabiso.” ’Mino, libaesekopo, livideo, mananeo a thelevishene, lipapali tsa video, libuka, limakasine le libuka tsa lipale tse qabolang tsa kajeno hangata li bontša monahano oa bodemona. Ka lebaka leo, ho hlokahala hore re ‘nyonye se khopo’ ’me re “khomarele se molemo.” (Baroma 12:9) E, re tlameha ho talima boithabiso bo litšila bo le manyala ’me re bo qobe, ha re ntse re nahanisisa ka lintho tse hloekileng, tse khabane le tse lokeloang ke thoriso. (Bafilippi 4:8) Lingoliloeng le likofuto tsa patlisiso tseo mokhatlo o hlophisitsoeng oa Jehova o fanang ka tsona li hōlisa menahano e hahang likelellong tsa rōna le ho re koetlisetsa ho khetholla se nepahetseng ho se fosahetseng. (Baheberu 5:14) Re lokela ho khomarela litokisetso tsena joalokaha re ne re ka khomarela balaka leoatleng le befileng.
Ho ile ha latela puo e reng “Hanyetsa Diabolose—U se Mamelle Tlhōlisano.” Nakoana pele ba ka kena Naheng e Tšepisitsoeng, Baiseraele ba likete ba ile ba tšoasoa ke leraba la boitšoaro bo bobe. Finease o ne a sa mamelle tlhōlisano leha e le efe mabapi le borapeli ba ’nete. O ile a nka bohato bo tiileng khahlanong le bafosi, ’me boinehelo ba hae bo ikhethang bo ile ba thabisa Jehova. (Numere 25:1-13) Pakane ea Satane ke ho etsa hore e mong le e mong oa rōna a se tšoanelehele ho kena lefatšeng le lecha la Molimo. Ka lebaka leo, joaloka Finease, re tlameha ho hanyetsa boiteko ba Diabolose ba ho re silafatsa. Ebang re lenyalong kapa re masoha, re tlameha ho ‘balehela bohlola.’—1 Bakorinthe 6:18.
Puo ea ho qetela letsatsing la pele la kopano e ne e re “Ho Tšehetsa Botšepehi ba Lentsoe la Molimo ka ho sa Sekisetseng.” Bafetoleli ba bangata ba fetola likarolo tsa Mangolo kapa baa li siea. Ka mohlala, ho thabisa babuelli ba litokelo tsa basali, bafetoleli ba The New Testament and Psalms: An Inclusive Version ha ba bue ka Molimo e le Ntate, empa ba bua ka eena e le Ntate-’Mè le ka Jesu e le “Eo e Leng Motho” ho e-na le “Mora oa motho.” Ho fapana le hoo, New World Translation e khomarela tabeng e ngotsoeng ea puo ea pele ka botšepehi hoo e sebelelitseng ho hlakisa monahano oa rōna litabeng tsa Mangolo tse ’maloa. Ka mohlala, sebui se itse: “Ke tlhaloso e nepahetseng ea New World Translation e ileng ea fana ka motheo bakeng sa ho hlophisa liphutheho bocha ka ho khetha lihlopha tsa baholo, ho iphaphathiloe haufi-ufi le mohlala o ileng oa behoa phuthehong ea Bokreste ea lekholong la pele la lilemo.” Re bontša botšepehi ba rōna bo sa sekisetseng Lentsoeng la Molimo ka ho le bala kamehla le ka ho sebelisa keletso ea lona. Sebui se ile sa boela sa re: “Re bontša hore re babuelli ba tšepahalang ka ho sa sekisetseng ba Lentsoe la Molimo ka ho le bolella ba bang ka cheseho le ka ho le sebelisa ka hloko ha re ruta ba bang, le ka mohla re sa leke ho etsa hore le lumellane le likhopolo tsa rōna ka ho le sotha kapa ho eketsa seo le se bolelang.”
‘Khotso ea Molimo e Feta Monahano Oohle’
Sehlooho sena, se thehiloeng ho Bafilippi 4:7, se ile sa hleka sebae bakeng sa letsatsi la bobeli la kopano. Boitsebiso bo bongata bo ileng ba fanoa bo ne bo sebetsana le pono e loketseng ea motho ka tšebeletso ea hae, lelapa la hae, boinehelo ba hae le litšobotsi tse ling tsa bophelo ba hae ba letsatsi le letsatsi.
Ka mor’a puisano ea temana ea letsatsi, ho ile ha e-ba le neheletsano eo sehlooho sa eona se reng “Manģosa a Tlisang Litaba Tse Molemo Tsa Khotso.” Molaetsa oa rōna ke oa khotso, ’me o lokela ho ajoa ka khotso. (Baefese 6:15) Pakane ea rōna ke ho rua lipelo, eseng ho hlōla likhang. Koetliso le lingoliloeng tseo re li fumanang mokhatlong o hlophisitsoeng oa Jehova li re thusa ho etsa sona seo. Ha rea lokela ho lumella boiphapanyo kapa ho se thahaselle hore li re nyahamise. Ho e-na le hoo, re lokela ho tsoela pele ho ‘etsa sohle se matleng a rōna,’ ho ba le kemiso e molemo ea thuto ea botho, ho ba teng libokeng le ho kopanela mosebetsing oa ho bolela. (2 Timothea 2:15) Se sa lokelang ho hlokomolohuoa ke ho etsetsa ba bang se molemo, haholo-holo ba amanang le rōna tumelong. (Bagalata 6:10) Ho hlakile hore ho etsa sohle se matleng a rōna ha ho bolele ho feteletsa litaba. Seo motho ka mong a khonang ho se etsa ho latela matla a hae le maemo sea amoheleha ho Jehova.
Batho ba Molimo ba fana ka nako ea bona, matla le matlotlo ho ntšetsa pele lithahasello tsa ’Muso. Puo e reng “Ho Fana Re Thabile ka Har’a Mokhatlo o Hlophisitsoeng oa Jehova” e ile ea bontša hore ha ba eketsehileng ba kang linku ba arabela hamolemo molaetseng oa ’Muso, ho hlokahala thepa e eketsehileng, libaka tse eketsehileng tsa liboka le mehaho ea makala e eketsehileng. Menehelo ea rōna e nolofalletsa mokhatlo o hlophisitsoeng ho ba le sohle se hlokahalang ho etsa mosebetsi oa ho bolela lefatšeng ka bophara. Ho fana ka seatla se bulehileng le hona ho tlotlisa Jehova ’me ho thabisa ea fanang. Ka lebaka leo, joaloka Bakreste, re tlameha ho se hlokomolohe tšobotsi ena ea bohlokoa ea borapeli ba rōna.—2 Bakorinthe 8:1-7.
Puo e koalang lenaneo la hoseng e ne e le ea kolobetso—kamehla ke eona e ka sehloohong lipokanong tse khōlō tsa Lipaki tsa Jehova. Ke thabo e kaakang ho bona ba sa tsoa inehela ba latela mehato ea Jesu ka ho lumela ho kolobetsoa metsing! (Matheu 3:13-17) Bohle ba nkang bohato bona ba rutiloe ka mohloli oa bohlale bo boholohali—Bibele. Ho feta moo, ba fumane morero oa sebele bophelong, ’me ba hlohonolofalitsoe ka khotso e tlisoang ke ho tseba hore ba etsa se nepahetseng.—Moeklesia 12:13.
Keletso e tobileng e ile ea fanoa puong e reng “Lumella Temoho e U Sireletse.” Temoho ke ea bohlokoa haholo litšebelisanong tsa khoebo. Ha rea lokela ho etsa mesebetsi ea khoebo Holong ea ’Muso, leha e le hona ho hanyapetsa Bakreste-’moho le rōna bakeng sa ho fumana phaello. (Bapisa le Johanne 2:15, 16.) Temoho e boetse ea hlokahala ha re qala khoebo ka chelete kapa ha re alima chelete kapa re alimana ka eona. Sebui se ile sa hlalosa: “Ho hlōleha ha likhoebo tsena tseo Bakreste ba lekang letsoho hammoho ho tsona, ho lebisitse ho nyahameng esita le ho fokoleng ha ba bang moeeng ba ileng ba potlakela ho kena mererong ena e kotsi ea ho etsa chelete.” Le hoja ho se phoso hore Mokreste a etse khoebo le e mong, ka sebele ho ba le temoho ke bohlale. ’Me ha tumellano ea khoebo e etsoa lipakeng tsa mahlakore a mabeli, kamehla maemo a eona a lokela ho ngoloa fatše.
Ho ile ha buuoa ka tekanyetso ea Molimo bakeng sa banna le basali puong e reng “O ba Bōpile e le e Motona le e Motšehali.” Likarolo tse phethoang ke batho ba bong bo sa tšoaneng li ile tsa khopamisoa ho pholletsa le histori eohle. Sebui se ile sa re: “Ba bangata ka phoso ba lekanya bonna le puso e thata, ho ngangella kapa boikhohomoso bo fetelelitsoeng ba bonna. Mekhoeng e meng ea bophelo e ka ba ka seoelo ebile e le ho hlabisang lihlong, hore monna a lle phatlalatsa kapa esita le ka sephiring. Empa, Johanne 11:35 e pheta hore ha a ntse a le har’a letšoele, ka ntle ho lebitla la Lazaro, ‘Jesu o ile a ntša meokho.’” Ho thoe’ng ka basali? Bosali hangata bo amahanngoa le ho khahleha ’meleng. Empa sebui se ile sa botsa: “Haeba mosali a le motle empa a hloka kelello ’me a le khang, e le ea phoqang, kapa moikhohomosi, na ka sebele a ka ba motle ka kutloisiso ea sebele ea lentsoe leo, ea e-ba ea nang le tšobotsi ea sebele ea bosali?” (Bapisa le Liproverbia 11:22; 31:26.) Puong ea bona, boitšoarong ba bona le boitlhophong ba bona, banna le basali ba Bakreste ba leka ka matla ho latela litekanyetso tsa Bibele. Sebui se ile sa re: “Ho bonolo ho hlompha monna ea bonahatsang litholoana tsa moea, ’me ho bonolo ho rata mosali ea etsang joalo.”—Bagalata 5:22, 23.
Ho ile ha latela neheletsano e reng “Molimo oa Khotso oa U Hlokomela.” Bakreste ba bangata ba na le matšoenyeho a lichelete. Leha ho le joalo, Jehova oa tšepisa: “Ho hang ha nka ke ka u tlohela leha e le hore ka mokhoa leha e le ofe nka u furalla.” (Baheberu 13:5) Ho sa tsotellehe mathata a moruo, ba bang ba bontšitse ho tšepa tšepiso ena ka ho kenela tšebeletso ea bopula-maliboho bo thusang kapa ba kamehla. Ba bang bao hona joale ba sa khoneng ho bula maliboho ba beha lithahasello tsa ’Muso pele ka ho sebelisa monyetla o mong le o mong bakeng sa ho paka. (Matheu 6:33) Boiteko bohle bo joalo bo lokela ho babatsoa! Mokhatlo o hlophisitsoeng oa Jehova o fane ka lingoliloeng tse ngata ho re thusa tšebeletsong ea rōna le ho re thusa ho sebetsana ka katleho le mathata a rōna. Haeba re bontša kananelo bakeng sa litokisetso tsa Jehova tsa moea, o tla re hlohonolofatsa ka khotso linakong tsena tse sa tsitsang moruong.—Pesaleme ea 29:11.
Ha puo e qetellang letsatsing leo e reng, “Phehella Khotso ea Bomolimo Bophelong ba Lelapa” e fela, ba tlileng kopanong ba ile ba thabela ho fumana buka e ncha ea Lekunutu la Thabo ea Lelapa. Sebui se ile sa phehella: “Ithuteng buka ena ka mafolo-folo motho ka mong hape le le lihlopha tsa malapa. Ikemisetse ka tieo ho sebelisa keletso ea eona e thehiloeng Bibeleng, ’me ka sebele u tla eketsa khotso le thabo ea lelapa la hao.”
“Ho Boloka Bonngoe . . . ka Tlamo e Kopanyang ea Khotso”
Sehlooho sena se thehiloeng ho Baefese 4:3 e ne e le se loketseng bakeng sa letsatsi la ho qetela la kopano. Lipaki tsa Jehova, li bokeletsoe lichabeng tsohle tsa lefatše, li ’nile tsa rutoa ke Molimo. Ka lebaka leo, li rata khotso. Li latela mohlala oa Jesu ’me li leka ka tieo “ho boloka bonngoe ba moea ka tlamo e kopanyang ea khotso.”
Khotso e tletseng hohle mokhatlong oa Molimo o hlophisitsoeng e ile ea totobatsoa neheletsanong e reng “Ho Khetholla Mofuta o Nepahetseng oa Manģosa.” Baprofeta ba bohata ba ne ba le teng Iseraeleng ea boholo-holo. Leha ho le joalo, manģosa a Molimo a ’nete—baprofeta ba kang Esaia, Ezekiele le Jeremia—ka nepo ba ile ba bolela esale pele ka ho oa ha Jerusalema, nako ea botlamuoa le tokoloho ea batho ba Molimo qetellong. Boemo bo tšoanang bo teng kajeno. Manģosa a bohata a mangata tikolohong ea lipolotiki le ea bolumeli ba bohata. Empa, Jehova o hlahisitse Lipaki tsa hae hore li bolele morero oa hae mabapi le tsamaiso ena ea lintho. Haholo-holo ho tloha ka 1919, bahlanka ba Jehova ba ’nile ba sebelisoa ho bolela molaetsa oa Molimo. Ba fapane hakaakang le manģosa a bohata a Bokreste-’mōtoana! E se eka re ka phetha karolo ea rōna ka mafolo-folo mosebetsing ona ho fihlela Jehova a re o phethiloe.
Puo e reng “Mamela Lentsoe la Molimo ’Me U le Utloe” e ne e hatisa hore Mangolo ke mohloli o moholo ka ho fetisisa oa tataiso, matšeliso le tšepo. (Esaia 30:20, 21; Baroma 15:4) Lefatše la kajeno le ntse le eketsa ho lumella ntho e ’ngoe le e ’ngoe. Ka lebaka leo, hona joale ho feta leha e le neng pele, ho hlokahala hore re mamele keletso e tsoang Lentsoeng la Molimo le mokhatlong o hlophisitsoeng. Jehova o tseba mefokolo ea rōna, ’me ka Lentsoeng la hae o bontšitse ka ho hlaka tsela e tla re tsoela molemo. Ho tseba hore Jehova oa re tšehetsa ho re fa kholiseho ea ho tsoela pele ka eng kapa eng eo a re kōpang eona.
Sena se ile sa lokisa likelello tsa bamameli bakeng sa tšoantšiso e ileng ea latela. Sehlooho sa eona se ne se re “Ke Hobane’ng ha Re Lokela ho Hlompha Litokisetso Tsa Puso ea Molimo?” E sebelisa tlaleho ea Bibele ea Gideone e le motheo, tšoantšiso ena e ile ea hatisa haholo thuto e matla—re tlameha ho latela litaelo tsa Molimo ’me re se ke ra li nkela sebaka ka monahano oa rōna kapa ra leka ho koekoetla keletso ea puso ea Molimo.
Puo ea phatlalatsa e ne e e-na le sehlooho se reng “Khotso ea ’Nete Qetellong!—E Tsoa Mohloling Ofe?” Khotso eo Molimo a e tšepisang e phahametse ntho leha e le efe eo lefatše lena le ka e nahanang. Sebui se ile sa re: “Khotso ea ’nete e bolela khotso letsatsi le leng le le leng. Khotso ea Molimo e bolela lefatše le se nang ho kula, bohloko, masoabi le lefu.” Bibele e re bolella hore Jehova “o felisitse lintoa le ho isa pheletsong ea lefatše.” (Pesaleme ea 46:9) O tla etsa see joang? Ka ho tlosa mohlohlelletsi oa ntoa, Satane Diabolose. (Tšenolo 20:1-3) Sena se tla bulela ba bonolo tsela ea ho “rua lefatše, ba iketle khotsong e khōlō.”—Pesaleme ea 37:11.
Ka mor’a kakaretso ea sehlooho sa Molula-Qhooa se neng se ithutoa bekeng eo, ho ile ha latela puo ea kopano e koalang. E e-na le sehlooho se reng “Ho Hatela Pele Re le Manģosa a Khotso ea Bomolimo,” puo ena e susumetsang e ile ea hatisa hore mosebetsi oa rōna oa ho bolela ke o ikhethang le o potlakileng. Hona joale hase nako ea ho khoehlisa, ho hulanya maoto kapa ho khutlela morao maikutlong a fosahetseng. Re hlomeletsoe ka seo re se hlokang—molaetsa oa Molimo, moea oa hae o halalelang le litokisetso tse ngata tse tsoang mokhatlong oa hae o hlophisitsoeng oa puso ea Molimo o lerato. Ka lebaka leo, joaloka bahlanka ba Jehova, e se eka re ka tsoela pele ho hatela pele re le manģosa a khotso ea bomolimo!
[Lebokose/Litšoantšo tse leqepheng la 9]
Tokisetso e Lerato Bakeng sa Malapa
Ba neng ba le teng letsatsing la bobeli la Kopano ea Setereke ea “Manģosa a Khotso ea Bomolimo” ba ne ba thabetse ho amohela sengoliloeng se secha seo sehlooho sa sona se reng Lekunutu la Thabo ea Lelapa. Buka ena e fupere boitsebiso ba Mangolo bo tla tsoela malapa ’ohle a ratang Molimo molemo.
Moholo oa Connecticut, U.S.A., o re: “Ka la 15 June, re ile ra amohela buka ea rōna ea Thabo ea Lelapa. Ka la 16 June, ke ne ke balile halofo ea eona. Ka la 17, re bile le thuto ea rōna ea lelapa ea pele ho eona, ’me re ile ra khothatsoa hakaakang! Letsatsing lona leo, ke ile ka qeta ho bala buka ena. Ha ho pelaelo hore sengoliloeng sena se molemo se tla ipaka ho ba sa bohlokoa ho bohle ba se sebelisang. Boitsebiso ba buka ena bo tobang taba le bo nakong bo fana ka bopaki bo eketsehileng ba hore ‘lekhoba le tšepahalang le le masene’ le fana ka ‘lijo ka nako e tšoanetseng’ ’me le elelloa haholo hore na re hloka eng linakong tsena tse lekang.”—Matheu 24:45-47.
[Setšoantšo se leqepheng la 7]
Ba bacha le ba hōlileng ka ho tšoanang ba batla ho tseba seo Molimo a se hlokang