“Lintho Tse Lakatsehang” li Tlala ka Tlung ea Jehova

“[’Na Jehova] ke tla sisinya lichaba tsohle, ’me lintho tse lakatsehang tsa lichaba tsohle li tla kena; ’me ke tla tlatsa ntlo ena ka khanya.”—Haggai 2:7, NW.

1. Nakong ea boemo ba tšohanyetso, ke hobane’ng ha re nahana pele ka baratuoa ba rōna?

NTLO ea hao e tletse ka lintho life tse lakatsehang? Na u na le thepa ea ka tlung e theko e boima, k’homphieutha ea morao-rao, koloi e ncha ka karacheng? Esita le haeba u na le lintho tsena kaofela, na u ke ke ua lumela hore lintho tsa bohlokoa ka ho fetisisa tseo u nang le tsona ha hao ke batho—litho tsa lelapa la hao? Nahana haeba ka bosiu bo bong u tsosoa ke monko oa mosi. Ntlo ea hao e e-cha ’me u e-na le metsotso e seng mekae feela hore u pholohe! Ntho ea pele eo u tla ameha ka eona ke eng? Na e tla ba thepa ea hao ea ka tlung? K’homphieutha ea hao? Koloi ea hao? Ho e-na le hoo, na u ke ke ua nahana ka baratuoa ba hao? Ho hlakile hore u ne u tla etsa joalo kaha batho ke ba bohlokoa ho feta lintho tse ling.

2. Pōpo ea Jehova e khōlō hakae, ’me ke karolo efe ea eona eo Jesu a neng a e rata ka ho fetisisa?

² Joale nahana ka Jehova Molimo le Mora oa hae, Jesu Kreste. Jehova ke eena “Ea entseng leholimo le lefatše le leoatle le lintho tsohle tse ho tsona.” (Liketso 4:24) Mora oa hae, e leng “mosebetsi ea hloahloa,” e bile eena eo Jehova a ileng a mo sebelisa ho etsa lintho tsohle. (Liproverbia 8:30, 31, NW; Johanne 1:3; Bakolose 1:15-17) Ka sebele, Jehova le Jesu ba nka ntho e ’ngoe le e ’ngoe e bōpiloeng e le ea bohlokoa. (Bapisa le Genese 1:31.) Empa ke karolo efe ea pōpo eo u nahanang hore ke ea bohlokoahali ho bona—thepa kapa batho? Moo bohlale bo mothofalitsoeng, Jesu o re: “Lintho tseo ke neng ke li rata li ne li le ho bara ba batho,” kapa joalokaha phetolelo ea William F. Beck e e fetolela, Jesu o ne a “thabisoa ke batho.”

3. Jehova o fane ka boprofeta bofe ka Haggai?

³ Kantle ho pelaelo, Jehova o nka batho e le ba bohlokoa haholo. Pontšo e ’ngoe ea sena e fumanoa mantsoeng a boprofeta ao a ileng a a bua selemong sa 520 B.C.E. ka moprofeta oa hae Haggai. Jehova o ile a re: “Ke tla sisinya lichaba tsohle, ’me lintho tse lakatsehang tsa lichaba tsohle li tla kena; ’me ke tla tlatsa ntlo ena ka khanya. . . . Khanya ea ntlo ena ea morao e tla ba khōlō ho feta ea ea pele.”—Haggai 2:7, 9, NW.

4, 5. (a) Ke hobane’ng ha e ne e ke ke ea e-ba ho utloahalang ho etsa qeto ea hore “lintho tse lakatsehang” li bolela botle ba lintho tse bonahalang? (b) U ka hlalosa “lintho tse lakatsehang” joang, hona hobane’ng?

⁴ Ke “lintho” life “tse lakatsehang” tse neng li tla tlala ka tlung ea Jehova ’me li tlise khanya eo ho seng mohla e kileng ea e-ba teng? Na e ne e tla ba thepa ea ka tlung e ngata le lintho tse khabisang tse majabajaba? Khauta, silevera le mahakoe? Sena e ne e ka ba se sa utloahaleng. Hopola hore tempele ea pele, e ileng ea neheloa lilemo tse makholo a mahlano tse fetileng, e ne e le mohaho oa liranta tse limilione-milione!a Ka sebele, Jehova o ne a ke ke a lebella hore tempele e hahiloeng ke sehlopha sena sa Bajuda ba khutletseng naheng ea habo bona, seo ha ho bapisoa se leng senyenyane, e fete tempele ea Solomone ka botle ba lintho tse bonahalang!

⁵ Ka hona, “lintho tse lakatsehang” tse tla tlala ka tlung ea Jehova ke eng? Ho hlakile hore e tlameha ebe ke batho. Etsoe se thabisang pelo ea Jehova ke batho ba mo sebeletsang ka lerato, eseng silevera le khauta. (Liproverbia 27:11; 1 Bakorinthe 10:26) E, Jehova o nka bohle ba mo rapelang ka tsela e amohelehang e le ba bohlokoa, banna, basali le bana. (Johanne 4:23, 24) Bana ke bona “lintho tse lakatsehang,” ’me ho Jehova ke ba bohlokoa haholo ho feta mekhabiso eohle e neng e khabisitse tempele ea Solomone.

6. Tempele ea Molimo ea boholo-holo e ne e sebeletsa morero ofe?

⁶ Ho sa tsotellehe khanyetso e matla, tempele e ile ea phethoa ka 515 B.C.E. Ho fihlela ha Jesu a etsoa sehlabelo, tempele e Jerusalema e ne e ntse e le setsi sa borapeli bo hloekileng bakeng sa “lintho tse lakatsehang” tse ngata, tse akarelletsang Bajuda ba tlhaho le basokolohi ba Balichaba. Empa joalokaha re tla bona, tempele eo e ne e emela ho hong ho hoholoanyane.

Phethahatso ea Lekholong la Pele la Lilemo

7. (a) Tempele ea boholo-holo ea Molimo e Jerusalema e ne e tšoantšetsa eng? (b) Hlalosa mesebetsi ea moprista ea phahameng ka Letsatsi la ho Koahela Libe.

⁷ Tempele ea Jerusalema e ne e tšoantšetsa tokisetso e khōloanyane ea borapeli. Ke tempele ea Molimo ea moea, eo Jehova a e thehileng ka 29 C.E. ka Jesu e le Moprista ea Phahameng. (Baheberu 5:4-10; 9:11, 12) Nahana ka ho tšoana ho teng lipakeng tsa mesebetsi ea moprista ea phahameng oa Iseraele le liketso tsa Jesu. Selemo se seng le se seng ka Letsatsi la ho Koaheloa ha Libe, moprista ea phahameng o ne a atamela aletare e ka lebaleng la tempele ’me a nyehela poho bakeng sa ho koahela libe tsa baprista. Hamorao, o ne a kena tempeleng ka mali a poho ena, a fete mamating a arolang lebala ho Sehalalelo ebe o feta lesireng le arolang Sehalalelo ho Sehalalelisiso. Ha a le ka har’a Sehalalelisiso, moprista ea phahameng o ne a fafatsa mali ka pel’a areka ea selekane. Ka mor’a moo, a ntse a etsa ka mokhoa oo, o ne a nyehela pōli bakeng sa ho koahela libe tsa meloko e 12 ea Iseraele eo e seng ea lesika la boprista. (Levitike 16:5-15) Tšebeletso ee e amana joang le tempele ea Molimo ea moea?

8. (a) Ke ka kutloisiso efe Jesu a ileng a nyeheloa mathoasong a 29 C.E.? (b) Jesu o ne a e-na le kamano efe e khethehileng le Jehova nakong eohle ea tšebeletso ea hae moo lefatšeng?

⁸ Ha e le hantle, Jesu o ile a nyeheloa aletareng ea thato ea Molimo ha a ne a kolobetsoa le ho tlotsoa ka moea oa Molimo o halalelang ka 29 C.E. (Luka 3:21, 22) Ka sebele, ketsahalo ena e ile ea tšoaea qaleho ea bophelo ba Jesu ba boitelo bo ileng ba nka lilemo tse tharo le halofo. (Baheberu 10:5-10) Nakong eo, Jesu o ne a thabela kamano ea ho tsoaloa ka moea ke Molimo. Boemo bona bo khethehileng boo Jesu a neng a e-na le bona le Ntate oa hae oa leholimo bo ne bo ke ke ba utloisisoa ka ho feletseng ke batho ba bang. Ho ne ho le joalokaha eka lesira le sirile mahlo a bona a ho lemoha, joalo feela kaha lesira le ne le sirelelitse Sehalalelo hore se se bonoe ke ba ka lebaleng la tabernakele.—Exoda 40:28.

9. Ke hobane’ng ha Jesu a ne a ke ke a kena leholimong e le motho oa nama, ’me boemo boo bo ile ba rarolloa joang?

⁹ Le hoja e ne e le Mora oa Molimo ea tlotsitsoeng ka moea, Jesu o ne a ke ke a fumana bophelo leholimong. Hobane’ng? Hobane nama le mali li ke ke tsa rua ’Muso oa Molimo oa leholimo. (1 Bakorinthe 15:44, 50) Kaha ’mele oa nama oa Jesu e ne e le oona o mo thibelang, o ile oa tšoantšetsoa hantle ke lesira le neng le arola Sehalalelo ho Sehalalelisiso tempeleng ea boholo-holo ea Molimo. (Baheberu 10:20) Empa matsatsi a mararo ka mor’a lefu la hae, Jesu o ile a tsosoa ke Molimo e se e le motho oa moea. (1 Petrose 3:18) Joale o ne a ka kena karolong ea Sehalalelisiso sa tempele ea Molimo ea moea—leholimong ka bolona. ’Me sena ke sona hantle se etsahetseng. Pauluse oa ngola: “Kreste o ile a kena, eseng sebakeng se halalelang [ho hlakile hore o bua ka Sehalalelisiso] se entsoeng ka matsoho, seo e leng setšoantšo sa ntho ea sebele, empa leholimong ka bolona, joale ho hlaha ka pel’a Molimo ka boeena bakeng sa rōna.”—Baheberu 9:24.

10. Jesu o ile a etsa eng ha a khutlela leholimong?

¹⁰ Leholimong, Jesu o ile a ‘fafatsa mali’ a sehlabelo sa hae ka ho hlahisa ho Jehova mali a hae a bohlokoa e le thekollo. Leha ho le joalo, Jesu o ile a etsa ho fetang hoo. Pejana ho lefu la hae, o ne a ile a bolella balateli ba hae: “Kea tsamaea ho ea le lokisetsa sebaka. Hape, haeba ke tsamaea ’me ke le lokisetsa sebaka, ke boetse kea tla ’me ka sebele ke tla le amohela lapeng ho ’na, e le hore moo ke leng teng le lōna le ka ba teng.” (Johanne 14:2, 3) Ka hona, ka ho kena Sehalalelisisong, kapa leholimong, Jesu o ile a bula tsela bakeng sa ba bang hore ba mo latele. (Baheberu 6:19, 20) Batho bana bao palo ea bona e neng e tla ba 144 000, ba ne ba tla sebetsa e le baprista ba tlaasana tokisetsong ea Molimo ea tempele ea moea. (Tšenolo 7:4; 14:1; 20:6) Joalo feela kaha moprista ea phahameng oa Iseraele a ne a qala ka ho isa mali a poho ka Sehalalelisisong bakeng sa ho koahela libe tsa baprista, bohlokoa ba mali a tšolotsoeng a Jesu bo ile ba sebetsa pele ho baprista bana ba tlaasana ba 144 000.b

“Lintho Tse Lakatsehang” Tsa Mehleng ea Kajeno

11. Moprista ea phahameng oa Iseraele o ne a nyehela pōli bakeng sa bo-mang, ’me hoo ho ne ho tšoantšetsa eng?

¹¹ Ho bonahala eka ka selemo sa 1935, ho bokelloa ho akaretsang ha batlotsuoa ho ne ho phethiloe.c Empa Jehova o ne a e-s’o qete ho nea ntlo ea hae khanya. Che, e ne e le hona “lintho tse lakatsehang” li kenang ka har’a eona. Hopola hore moprista ea phahameng Iseraeleng o ne a nyehela liphoofolo tse peli—poho bakeng sa libe tsa baprista le pōli bakeng sa libe tsa meloko eo e seng ea lesika la boprista. Kaha baprista ba ne ba tšoantšetsa batlotsuoa ba neng ba tla ba le Jesu ’Musong oa leholimo, meloko eo e seng ea lesika la boprista e ne e emela bo-mang? Karabo e fumanoa mantsoeng a Jesu a tlalehiloeng ho Johanne 10:16: “Ke na le linku tse ling, tseo e seng tsa lesaka lena; tseo le tsona ke lokela ho li tlisa, ’me li tla mamela lentsoe la ka, ’me e tla ba mohlape o le mong, molisa a le mong.” Ka hona, mali a Jesu a tšolotsoeng a tsoela lihlopha tse peli tsa batho molemo—sa pele ke Bakreste bao tšepo ea bona e leng ho busa le Jesu leholimong, ’me sa bobeli ke ba lebeletseng ka thabo bophelo bo sa feleng lefatšeng la paradeise. Ho hlakile hore sehlopha sena sa bobeli ke sona se tšoantšetsoang ke “lintho tse lakatsehang” tsa boprofeta ba Haggai.—Mikea 4:1, 2; 1 Johanne 2:1, 2.

12. “Lintho tse lakatsehang” tse ngata li huleloa tlung ea Molimo joang kajeno?

¹² ‘Lintho tsena tse lakatsehang’ li ntse li tlala ka tlung ea Jehova. Lilemong tsa morao tjena, ho ’nile ha tlosoa lithibelo Europe Bochabela, likarolong tse ling tsa Afrika le linaheng tse ling, sena se ile sa etsa hore litaba tse molemo tsa ’Muso oa Molimo o hlomiloeng li boleloe ka katleho masimong ao ho fihlela nakong ena a neng a e-s’o sebetsoe. Ha ba lakatsehang ba tla tokisetsong ea Molimo ea tempele, le bona ba loanela ho etsa barutuoa ba eketsehileng, tumellanong le taelo ea Jesu. (Matheu 28:19, 20) Ha ba etsa joalo, ba teana le batho ba bangata, ba bacha le ba hōlileng, ba nang le monyetla oa ho fetoha “lintho tse lakatsehang” tse tla neha ntlo ea Jehova khanya. Bona mehlala e seng mekae feela ea kamoo sena se etsahalang ka teng.

13. Ngoanana e monyenyane oa Bolivia o ile a bontša cheseho ea hae joang bakeng sa ho hasa molaetsa oa ’Muso?

¹³ Bolivia, ngoanana ea lilemo li hlano ea hōlisitsoeng ke batsoali ba Lipaki o ile a kōpa mosuoe oa hae hore a mo lumelle ho ba sieo sekolong bekeng ea ketelo ea molebeli oa potoloho. Hobane’ng? O ne a batla ho kopanela tšebeletsong bekeng eo eohle ea tšebeletso e khethehileng. Sena se ile sa makatsa batsoali ba hae, empa ba ile ba thabela hore ebe o na le boikutlo bo botle joalo. Ngoanana enoa e monyenyane hona joale o khanna lithuto tsa lehae tsa Bibele tse hlano, ’me tse ling tsa liithuti tsena li kopanela libokeng tsa Bokreste. Hape o kile a tlisa mosuoe oa hae Holong ea ’Muso. Mohlomong ha nako e ntse e feta tse ling tsa liithuti tsa hae tsa Bibele li tla iponahatsa e le “lintho tse lakatsehang” tse tla nea ntlo ea Jehova khanya.

14. Korea, mamello ea morali’abo rōna ha a kopana le motho eo ho neng ho bonahala a sa thahaselle e ile ea putsoa joang?

¹⁴ Ha mosali e mong oa Mokreste Korea a ntse a eme seteisheneng sa terene, o ile a atamela seithuti se seng se neng se mametse ’mino ka li-headphone. O ile a se botsa: “Na u setho sa bolumeli bo itseng?” Seithuti sena se ile sa araba: “Ha ke thahaselle bolumeli bofe kapa bofe.” Sena ha sea ka sa nyahamisa morali’abo rōna. O ile a tsoela pele, “Ha nako e ntse feta, motho a ka ’na a batla ho khetha bolumeli. Empa haeba a se na tsebo ka bolumeli, a ka ’na a khetha bo fosahetseng.” Boikutlo ba seithuti seo bo ile ba fetoha ’me a qala ho mamela morali’abo rōna ka thahasello. O ile a se fa buka ea Is There a Creator Who Cares About You? ’me a se bolella hore buka ena e tla se thusa haholo nakong eo se seng se batla ho khetha bolumeli. Se ile sa amohela buka ena ka liatla tse peli. Bekeng e hlahlamang, se ile sa qala ho ithuta Bibele le Lipaki tsa Jehova, ’me hona joale se kopanela libokeng tsohle tsa phutheho.

15. Ngoanana e monyenyane oa Japane o qalisa lithuto tsa Bibele joang, ’me boiteko ba hae bo ’nile ba putsoa joang?

¹⁵ Japane, Megumi ea lilemo li 12 o nka sekolo sa hae e le tšimo ea ho bolela le ho ruta e behang litholoana. O se a bile a khonne ho qalisa lithuto tse ngata tsa Bibele. Megumi o etsa see joang? Kaha o bala Bibele kapa o lokisetsa liboka nakong ea khefu ea sekolo ea lijo tsa motšehare, liithuti-’moho le eena li atisa ho mo botsa hore na o etsa eng. Ba bang ba botsa Megumi hore na ke hobane’ng ha a sa kopanele mesebetsing e meng ea sekolo. Megumi o araba lipotso tsa bona ebe o ba bolella hore Molimo o na le lebitso. Hangata sena se tsosa thahasello ea ba mo mametseng. Joale o kōpa ho ithuta Bibele le bona. Hona joale Megumi o khanna lithuto tse 20—tse 18 ho tsona ke liithuti-’moho le eena ka tlelaseng.

16. Mor’abo rōna oa Cameroon o khonne joang ho qalisa lithuto tsa Bibele har’a ba bang ba neng ba le sehlopheng sa basomi?

¹⁶ Cameroon, sehlopha sa banna ba robeli ba neng ba sebetsa setšeng sa mosebetsi se ile sa hoeletsa mor’abo rōna ea neng a fa batho ba fetang ka tsela lingoliloeng tsa Bibele. Kaha ba ne ba batla ho soma mora enoa oabo rōna, ba ile ba mo botsa hore na ke hobane’ng ha a sa lumele Boraro-bo-bong, mollo oa lihele kapa ho se shoe ha moea. Mor’abo rōna o ile a sebelisa Bibele ho araba lipotso tsa bona. Ka lebaka leo, ba bararo ho banna bana ba ile ba amohela thuto ea Bibele. E mong oa bona, e leng Daniel, o ile a qala ho kopanela libokeng a ba a senya le lintho tsohle tsa hae tse amanang le ho sebelisana le meea. (Tšenolo 21:8) O ile a kolobetsoa le pele selemo se fela.

17. Barab’abo rōna ba El Salvador ba ile ba sebelisa masene joang ha ba pakela monna eo pele a neng a sa rate ho utloa molaetsa oa ’Muso?

¹⁷ El Salvador, monna e mong o ne a fasa ntja ea hae e bohale ka pel’a monyako neng le neng ha a bona Lipaki tsa Jehova haufinyane. Monna enoa o ne a emela hore Lipaki li fete, ebe o khutlisetsa ntja ena ka tlung. Ho ne ho se mohla barab’abo rōna ba khonang ho bua le monna enoa. Ka hona, ka letsatsi le leng ba ile ba etsa qeto ea ho leka mokhoa o mong. Ka ho tseba hore monna enoa o ne a ka utloa seo ba se buang, ba ile ba etsa qeto ea ho pakela ntja ena. Ba ile ba tla ntlong eo, ba lumelisa ntja, ’me ba bolela kamoo ba thabetseng monyetla oa ho buisana le eona kateng. Ba ile ba bua ka nako eo ho tla ba le paradeise lefatšeng, nakong eo ka eona ho se nang motho ea tla ba bohale—e, esita le liphoofolo li tla ba le khotso. Eaba ba salisa ntja ena hantle ka tlhompho ’me baa tsamaea. Ba ile ba makala ha monna enoa a tsoa ka tlung ’me a kōpa tšoarelo ka hore ebe ha ho mohla a kileng a neha Lipaki monyetla oa ho buisana le eena. O ile a nka limakasine, ’me ho ile ha qalisoa thuto ea Bibele. Hona joale monna eo ke mor’abo rōna—e mong oa “lintho tse lakatsehang”!

“Le se ke la Tšoha”

18. Bakreste ba bangata ba tobana le mathata afe, empa Jehova o talima barapeli ba hae joang?

¹⁸ Na u kopanela mosebetsing oa bohlokoa oa ho bolela ka ’Muso le ho etsa barutuoa? Haeba ho joalo, u filoe tokelo e le kannete. Ka sebele, ke ka mosebetsi ona Jehova a hulelang “lintho tse lakatsehang” ka tlung ea hae. (Johanne 6:44) Ke ’nete hore ka linako tse ling u ka ’na oa khathala kapa oa nyahama. Ka linako tse ling, ba bang—esita le har’a bahlanka ba tšepahalang ba Jehova—ba loantšana le maikutlo a ho ikutloa ba se na thuso. Empa u se ke ua tela! Jehova o talima morapeli e mong le e mong oa hae e le ea lakatsehang, ’me o na le thahasello ea sebele polokong ea hao.—2 Petrose 3:9.

19. Jehova o fane ka khothatso efe ka Haggai, ’me mantsoe aa a ka re matlafatsa joang?

¹⁹ Ha re ikutloa re nyahame, e-bang ke ka lebaka la khanyetso kapa maemo a mang a sa thabiseng, mantsoe a Jehova ho Bajuda ba khutletseng naheng ea habo bona a ka re matlafatsa. Ho Haggai 2:4-6, (NW) rea bala: “‘Empa joale e-ba matla, Uena Zorobabele,’ ho bolela Jehova, ‘’me u be matla, Uena Joshua mora oa Jozadake moprista ea phahameng. ’Me le be matla, lōna batho bohle ba naha,’ ho bolela Jehova, ‘’me le sebetse. Etsoe ke na le lōna,’ ho bolela Jehova oa mabotho. ‘Hopolang ntho eo ke ileng ka lumellana le lōna ka eona ha le ne le tsoa Egepeta, le ha moea oa ka o ne o eme har’a lōna. Le se ke la tšoha.’ Etsoe sena ke seo Jehova oa mabotho a se boletseng, ‘Hang hape—ka nakoana—’me ke sisinya maholimo le lefatše le leoatle le mobu o omileng.’” Hlokomela hore Jehova ha a re khothalletse feela ho ba matla empa o boetse o re fa mokhoa oa ho fumana matla. Joang? Hlokomela mantsoe a re tiisetsang: “Ke na le lōna.” Ho matlafatsa tumelo hakaakang ho lemoha hore ho sa tsotellehe hore na re tobane le litšitiso life, Jehova o na le rōna!—Baroma 8:31.

20. Ke ka tsela efe khanya eo ho seng mohla e kileng ea e-ba teng e tlalang ka tlung ea Jehova hona joale?

²⁰ Ruri Jehova o bontšitse hore o na le batho ba hae. Ka sebele, ho joalo ka ha ho boletsoe ka moprofeta Haggai: “Khanya ea ntlo ena ea morao e tla ba kholo ho feta ea ea pele . . . ’Me sebakeng sena ke tla fana ka khotso.” (Haggai 2:9, NW) Ka sebele, khanya e khōlo ka ho fetisisa kajeno e fumanoa tempeleng ea moea ea Jehova. Batho ba likete tse makholo ba phallela borapeling ba ’nete selemo le selemo. Bana ba feptjoa hantle moeeng, ’me hona lefatšeng lena le likhathatso, ba thabela khotso e tla fetoa feela ke e tla fumanoa lefatšeng le lecha la Molimo.—Esaia 9:6, 7; Luka 12:42.

21. Re lokela ho ikemisetsa ho etsa eng?

²¹ Ho sisinya lichaba ha Jehova ka Armagedone ho larile ka pele. (Tšenolo 16:14, 16) Ka lebaka leo, a re sebeliseng nako e setseng bakeng sa ho thusa ho pholosa bophelo ba batho ba bangata. E se eka re ka ba matla ’me ra ba le tšepo e feletseng ho Jehova. E se eka re ka ikemisetsa ho tsoela pele ho rapela tempeleng ea hae e khōlō ea moea, re e tlatse ka “lintho tse lakatsehang” tse ngata ho fihlela ha Jehova a re mosebetsi oa rōna o phethiloe.

[Mongolo o botlaaseng ba leqephe]

Na U sa Hopola?

• Ke eng eo e leng ea bohlokoa ho Jehova ho feta lintho tse bonahalang?

• Mali a tšolotsoeng a Jesu a tsoela lihlopha life tse peli molemo?

• “Lintho tse lakatsehang” tse neng li tla neha ntlo ea Jehova khanya ke bo-mang?

• Re na le bopaki bofe ba hore boprofeta ba Haggai boa phethahala kajeno?

[Setšoantšo se Qanollang se leqepheng la 16]

(Ha u batla ho bona boitsebiso bo hlophisitsoeng hantle, sheba sengoliloeng)

Na u tseba bohlokoa ba se neng se tšoantšetsoa ke tempele ea Jehova ea boholo-holo?

Sehalalelisiso

Lesira

Sehalalelo

Mathule

Aletare

Lebala

[Setšoantšo se leqepheng la 17]

Moprista ea phahameng o ne a nyehela poho bakeng sa libe tsa baprista ’me a nyehela pōli bakeng sa libe tsa meloko ea Iseraele eo e seng ea lesika la boprista

[Setšoantšo se leqepheng la 18]

Mosebetsi oa lefatše lohle oa ho bolela ka ’Muso o hulela ba bangata ka tlung ea Jehova