Ho Fumana Matšeliso Tsebong e Nepahetseng ea Molimo
BATHO ba bang ba na le lipotso tse ba tšoenyang ka lebaka la seo Bibele e se bolelang ka lerato la Molimo le mohau oa hae. Baa botsa: Haeba Molimo a batla ho felisa bobe, a tseba hore na bo felisoa joang, hape a e-na le matla a ho bo felisa, ke hobane’ng ha bobe bo ntse bo ja setsi? Ba sitoa ho nyalanya lintlha tse tharo tseo ho bonahalang li sa lumellane: (1) Molimo o matla ’ohle; (2) Molimo o lerato hape o molemo; le (3) litlokotsi li ntse li tsoela pele. Ba beha lebaka la hore kaha ntlha ea boraro ke ’nete e tsoileng matsoho, e ka ’na eaba e ’ngoe ho tse peli tsa pele hase ’nete. Ba nka hore Molimo o sitoa ho thibela bobe kapa ha a tsotelle.
Matsatsi a mangata ka mor’a hore ho senngoe World Trade Center, New York, moeta-pele e mong ea tsebahalang oa bolumeli oa United States o ile a re: “Ke botsitsoe . . . ka makhetlo a makholo bophelong ba ka hore na ke hobane’ng ha Molimo a lumella litlokotsi le mahlomola. Ke tlameha ho bolela hore ha ke tsebe karabo.”
Moprofesa e mong oa thuto ea bolumeli o ile a ntša maikutlo a hae ka tlhaloso ena, ’me a ngola hore o khahliloe ke “thuto e utloahalang” ea moeta-pele enoa oa bolumeli. Hape o ile a thoholetsa maikutlo a ileng a ngoloa ke setsebi se seng, se reng: “Ha re khone ho utloisisa mahlomola hobane ha re khone ho utloisisa Molimo.” Empa na kannete ha ho khonehe ho utloisisa hore na ke hobane’ng ha Molimo a lumeletse bobe?
Kamoo Bobe bo Simolohileng Kateng
Ho fapana le seo baeta-pele ba bolumeli ba ka se buang, Bibele e bontša hore hoa khoneha ho utloisisa hore na ke hobane’ng ha Molimo a lumeletse bokhopo. Ntlha ea bohlokoa e thusang ho utloisisa taba e amang bobe, ke ho hlokomela hore Jehova ha aa ka a bōpa batho ba khopo. O bōpile batho ba pele ba babeli ba phethahetse, ba se na sebe. Jehova o ile a sheba lintho tseo a li bōpileng ’me a fumana li le “molemo haholo.” (Genese 1:26, 31) E ne e le morero oa hae hore Adama le Eva ba atolosetse meeli ea Paradeise ea Edene lefatšeng ka bophara le hore ba e tlatse ka batho ba thabileng ba laoloang ke bobusi ba hae bo lerato.—Esaia 45:18.
Bobe bo qaliloe ke sebōpuoa sa moea se qalileng se tšepahala ho Molimo, empa hamorao sa ba le takatso ea hore se rapeloe. (Jakobo 1:14, 15) Borabele ba sona bo bonahetse lefatšeng ha se susumetsa batho ba pele ba babeli hore ba ikopanye le sona ha se hanyetsa Molimo. Ho e-na le hore Adama le Eva ba ikokobeletse taelo ea Molimo e hlakileng ea hore ba se ke ba ja kapa ba ama litholoana tsa sefate sa tsebo ea botle le bobe, ba ile ba nka tse ling ’me ba li ja. (Genese 3:1-6) Ka ho etsa joalo, ba ile ba bontša hore ba hlompholla Molimo le hore ba lakatsa ho ipusa ntle ho eena.
Ho Ile ha Tsosoa Khang e Mabapi le se Nepahetseng
Borabele bona ba Edene bo ile ba tsosa khang e mabapi le se nepahetseng, phephetso ea tonanahali bokahohleng. Batho bana ba marabele ba ile ba belaela hore Jehova ha a buse libōpuoa tsa hae hantle. Na ’Mōpi o na le tokelo ea ho batla hore batho ba mo mamele ka ho feletseng? Na batho ba ka atleha haeba ba iketsetsa lintho?
Jehova o ile a sebetsa phephetso ena ea bobusi ba hae ka tsela e ileng ea bontša teka-tekano e feletseng ea lerato la hae, toka ea hae, bohlale ba hae le matla a hae. A ka be a ile a sebelisa matla a hae ho felisa borabele hang-hang. Hoo ho ne ho ka bonahala ho nepahetse, kaha o ne a e-na le tokelo ea ho etsa joalo. Empa ho etsa joalo ho ka be ho sa araba lipelaelo tse matla tse neng li phahamisitsoe. Ka lehlakoreng le leng, Molimo a ka be a ile a iphapanyetsa sebe. Kajeno batho ba bang ba ka ’na ba bona eka ho iphapanyetsa sebe e ka be e bile khetho e lerato. Empa, sena le sona se ne se sa tl’o araba polelo ea Satane ea hore batho ba ne ba ka atleha ha ba ipusa. Ho feta moo, na tsela e joalo e ne e sa tl’o khothalletsa ba bang hore ba khelohe tsela ea Jehova? Phello e ne e tla ba mahlomola a sa feleng.
Kaha Jehova o bohlale, o lumeletse batho hore ba ipuse ka nakoana. Le hoja sena se entse hore ho lumelloe bobe ka nakoana, batho ba fumane monyetla oa ho bontša hore na ba ka atleha ho ipusa ntle ho Molimo, ba phela ka melao ea bona ea se nepahetseng le se fosahetseng. Phello e bile efe? Histori ea motho ntle ho phetoho e tsebahetse ka lintoa, leeme, khatello le mahlomola. Khang e ileng ea tsosoa Edene e tla khaoloa ka ho feletseng ha borabele bo ileng ba etsoa khahlanong le Jehova bo hlōleha qetellong.
Khabareng, Molimo o bonahalitse lerato la hae ka ho fana ka Mora oa hae, Jesu Kreste, ea ileng a tela bophelo ba hae hore e be sehlabelo sa thekollo. Sena se etsa hore ho khonehe hore batho ba mamelang ba lokolloe tsuong ea sebe le lefu e hlahisitsoeng ke ho se mamele ha Adama. Thekollo e butse tsela e isang bophelong bo sa feleng bakeng sa bohle ba bontšang tumelo ho Jesu.—Johanne 3:16.
Jehova o re tšelisa ka ho re tiisetsa hore mahlomola a batho ke a nakoana. Mopesaleme o ile a ngola a re: “Ho setse nakoana e seng kae, ’me ea khopo ha a sa tla hlola a e-ba teng; ka sebele u tla lebisa tlhokomelo sebakeng sa hae, ’me o tla be a le sieo. Empa ba bonolo ba tla rua lefatše, ka sebele ba tla fumana thabo e phethehileng khotsong e ngata.”—Pesaleme ea 37:10, 11.
Bokamoso ba Tšireletseho le Thabo
Boprofeta bo phethahalang ba Bibele bo bontša hore nako e haufi ea hore Molimo a felise ho kula, masoabi le lefu. Ela hloko pono e hlollang ea lintho tse tlang eo moapostola Johanne a ileng a e bona ponong. O ile a ngola, a re: “Ka bona leholimo le lecha le lefatše le lecha; etsoe leholimo la pele le lefatše la pele li ne li fetile, ’me leoatle ha le sa le eo. . . . Molimo o tla ba le [moloko oa batho]. O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.” Polelong e neng e hatisa hore litšepiso tsena lia tšepahala, Johanne o ile a bolelloa: “Ngola, hobane mantsoe ana aa tšepahala ’me ke a ’nete.”—Tšenolo 21:1-5.
Ho thoe’ng ka matšoele-tšoele a batho ba se nang tsebo ba ’nileng ba e-shoa ho tloha nakong ea borabele ba Edene? Jehova o tšepisitse hore o tla tsosa batho bao hona joale ba robetseng lefung. Moapostola Pauluse o ile a re: “Ke na le tšepo ho Molimo . . . hore ho tla ba le tsoho ea ba lokileng le ba sa lokang.” (Liketso 24:15) Bana ba lebeletse hore ba tla phela lefatšeng leo ‘ho loka ho tla aha ho lona.’—2 Petrose 3:13.
Ntate ea lerato ha a tseba hore ngoana oa hae o tla fola, o lumela hore a buuoe le hoja a tseba hore ho tla ba bohloko, kahoo, Jehova o lumeletse hore bobe bo be teng ka nakoana lefatšeng. Ba batlang ho etsa thato ea Molimo ba letetsoe ke litlhohonolofatso tsa ka ho sa feleng. Pauluse o hlalositse taba ena tjena: “Pōpo e ile ea behoa tlas’a lefeela, eseng ka thato ea eona empa ka ea ileng a e beha tlaase, ka tšepo ea hore pōpo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.”—Baroma 8:20, 21.
Litaba tsena hase tsa mofuta oo re o bonang thelevisheneng kapa oo re o balang likoranteng, ke litaba tse molemo. Ke litaba tse molemohali tse tsoang ho “Molimo oa matšeliso ’ohle,” ea re tsotellang kannete.—2 Bakorinthe 1:3.
[Litšoantšo tse leqepheng la 6]
Nako e bontšitse hore moloko oa batho o ke ke oa atleha ho ipusa ntle ho Molimo
[Litlhaloso Tsa Moo Litšoantšo li Nkiloeng Teng]
Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo