Khatiso e Ncha e Ithutoang ea Molula-Qhooa
MAKASINE eo u ntseng u e bala ke khatiso ea pele e ithutoang ea Molula-Qhooa. Re lakatsa ho hlalosa tse ling tsa libōpeho tsa makasine ena e ncha.
Khatiso ena e ithutoang e hatisetsoa Lipaki Tsa Jehova le liithuti tsa Bibele tse hatelang pele. E tla tsoa hanngoe ka khoeli ’me e ka ’na ea e-ba le lihlooho tse ithutoang tse ’nè kapa tse hlano. Kemiso e bontšang hore na ho tla ithutoa lihlooho life e hlaha leqepheng le ka ntle la makasine ena. Ho fapana le khatiso ea Molula-Qhooa ea batho ka kakaretso, khatiso e ithutoang e ke ke ea e-ba le litšoantšo tse fapa-fapaneng leqepheng le ka ntle la khatiso ka ’ngoe, kaha e ke ke ea tsamaisoa tšimong.
Leqepheng la 2 la makasine ena, ho tla ba le kakaretso e khutšoanyane e molemo haholo e hlalosang morero oa sehlooho ka seng se ithutoang kapa letoto la lihlooho tse ithutoang, ’me ho tla boela ho be le lethathamo la lihlooho tse ling. Sena se tla thusa bakhanni ba Thuto ea Molula-Qhooa haholo ha ba lokisetsa hore lihlooho tsena li tšohloe ka tsela e molemo sebokeng sa phutheho.
U tla hlokomela hore lihlooho tse ithutoang li khutšoanyane ho feta kamoo li neng li le kateng pele. Kahoo, ho tla ba le nako e ngatanyana ea hore ho tšohloe mangolo a sehlooho Thutong ea Molula-Qhooa. Re hlile re u khothalletsa hore beke le beke u bale mangolo ’ohle a sa qotsoang. Pele ho mangolo a mang a sa qotsoang ho ngotsoe “bala” ’me a lokela ho baloa le ho tšohloa Thutong ea Molula-Qhooa. Ha nako e lumela le mangolo a mang a ka ’na a baloa. Lihloohong tse ling, pele ho mangolo a mang u ka ’na ua fumana ho ngotsoe “bapisa.” Kaha mangolo ao ha a amane ka ho toba le lintlha tse khōlō tse serapeng, hangata ha a na ho baloa sebokeng sa phutheho. Leha ho le joalo, mangolo a etelloang pele ke “bapisa” a na le taba e tlatsetsang ea bohlokoa, kapa ka mokhoa o sa tobang a ka ’na a tšehetsa lintlha tseo ho ntseng ho buisanoa ka tsona. Re u khothalletsa hore u a bale ha u ntse u lokisetsa Thuto ea Molula-Qhooa. Mohlomong u tla a akarelletsa ha u fana ka litlhaloso.
Tlaleho ea selemo le selemo ha e sa tla hlaha Molula-Qhooeng. Ho qala ka 2008, e tla hlaha e le kenyelletso Tšebeletsong ea Rōna ea ’Muso ebe e hlahe le Bukeng ea Selemo. Empa joalokaha ho boletsoe ka holimo, khatiso e ithutoang e tla ba le lihlooho tse ling. Le hoja tse ngata tsa tsona li ke ke tsa tšohloa sebokeng sa phutheho, re u khothalletsa hore u li bale ka hloko. Le tsona e ntse e le lijo tsa moea tse tsoang ho “lekhoba le tšepahalang le le masene.”—Mat. 24:45-47.
Ha re lihela likhala, khatiso e ithutoang le khatiso ea batho ka kakaretso ea Molula-Qhooa hase limakasine tse peli tse fapaneng. Ka bobeli ke Molula-Qhooa o Tsebahatsa ’Muso oa Jehova. Leqepheng la 2, li na le lirapa tse tšoanang tse hlalosang morero oa Molula-Qhooa. Volume ea selemo le selemo e tla ba le limakasine tseo ka bobeli. Sehloohong sa “Na U sa Hopola?” se tla hlaha khatisong e ithutoang, ho tla akarelletsoa boitsebiso bo tsoang likhatisong tsena ka bobeli.
Ho tloha ka 1879, ka botšepehi Molula-Qhooa o ’nile oa phatlalatsa linnete tsa ’Muso oa Molimo linakong tsa lintoa, tsa mathata a moruo le tsa mahloriso. Re rapela hore Jehova a ’ne a o hlohonolofatse hore o tsoele pele ho etsa sena sebōpehong sena sa oona se secha. Re boetse re rapela hore Jehova a u hlohonolofatse, uena ’mali, ha u ntse u sebelisa hamolemo khatiso ena e ncha e ithutoang ea Molula-Qhooa.