Babali ba Batla ho Tseba
Ke Hobane’ng ha re Lokela ho Sebelisa Lebitso la Molimo Empa re sa Tiisehe Hore na le ne le Bitsoa Joang?
Kajeno ha ho na motho ea tsebang hantle hore na lebitso la Molimo le ne le bitsoa joang ka Seheberu sa pele. Leha ho le joalo, hoa tsebahala hore lebitso la Molimo le hlaha ka makhetlo a ka bang 7 000 ka Bibeleng. Ha Jesu a le lefatšeng, o ile a tsebahatsa lebitso la Molimo, ’me a ruta barutuoa ba hae ho rapella hore le halaletsoe. (Matheu 6:9; Johanne 17:6) Kahoo, ho hlakile hore Bakreste ba nka ho sebelisa lebitso la Molimo e le habohlokoa haholo. Joale, ke hobane’ng ha kajeno ho sa tsejoe hantle hore na lebitso leo le ne le bitsoa joang? Ho na le mabaka a mabeli a bohlokoa.
La pele ke hore lilemong tse ka bang likete tse peli tse fetileng, har’a Bajuda ho ile ha hlaha tumela-khoela ea hore ke phoso ho bitsa lebitso la Molimo. Ha motho ea balang Bibele a fihla lebitsong leo, o ne a re “Morena.” Kahoo, ka mor’a lilemo tse makholo lebitso la Molimo le sa sebelisoe, batho ba ile ba lebala hore na le bitsoa joang.
La bobeli ke hore Seheberu sa khale se ne se ngoloa ntle ho liluma-nosi, se ngoloa ka tsela e tšoanang le ea likhutsufatso tsa mantsoe a Senyesemane le a lipuo tse ling. Motho ea balang o ne a tseba hore na o lokela ho ikenyetsa liluma-nosi life. Ha nako e ntse e ea, ho ile ha qaptjoa tsela ea ho etsa hore ho se ke ha lebaloa ka ho feletseng hore na mantsoe a Seheberu a bitsoa joang. Ho ne ho kenngoa matšoao a neng a emela liluma-nosi lentsoeng le leng le le leng Bibeleng ea Seheberu. Leha ho le joalo, lebitsong la Molimo ho ile ha kenngoa matšoao a emelang liluma-nosi tsa lentsoe “Morena” e le hore motho ea balang a ka hopola ho bitsa lentsoe leo, kapa ho hang ha hoa ka ha kenngoa matšoao a emelang liluma-nosi.
Joale ho ne ho setse liluma-’moho tse ’nè feela tse bitsoang Tetragrammaton eo dikishinari e ’ngoe e reng ke “litlhaku tse ’nè tsa Seheberu tse atisang ho fetoleloa e le YHWH kapa JHVH tse bōpang lebitso la Molimo.” Ho bonolo ho bona kamoo JHVH, e kentsoeng matšoao a liluma-nosi le a bontšang molumo oa tsona, e fetohang “Jehova” kateng, e leng mokhoa o tloaelehileng le o amoheloang ka ho fetisisa oa ho bitsa lebitso la Molimo ka Sesotho.
Leha ho le joalo, litsebi tse ling li khothalletsa hore lebitso lena e be “Yahweh.” Na e tšoana haholoanyane le tsela eo le neng le bitsoa ka eona pele? Ha ho motho ea ka tsebang hantle. Ha e le hantle, litsebi tse ling li fane ka mabaka a hore le se ke la bitsoa ka tsela ena. Ho hlakile hore mabitso a Bibele, ha a bitsoa ka puo ea kajeno, ha a bitsoe ka tsela e tšoanang le ea Seheberu sa pele, ’me ha ho motho ea hanyetsang seo. Lebaka ke hore mabitso ana a fetohile karolo ea puo ea rōna ’me a tloaelehile. Ho joalo le ka lebitso la Jehova.
Bakreste ba lilemong tse ka bang 2 000 tse fetileng ba ne ba bitsoa batho ba lebitso la Molimo. Ba ne ba ruta ba bang lebitso lena ’me ba ba khothalletsa ho ipiletsa ho lona. (Liketso 2:21; 15:14; Baroma 10:13-15) Ho hlakile hore ke habohlokoa ho Molimo hore re sebelise lebitso la hae ka puo leha e le efe eo re e buang, re utloisise hore ke la bohlokoa, ’me re phele tumellanong le seo le se bolelang.
[Ntlha e Qolotsoeng e leqepheng la 31]
Hoa tsebahala hore lebitso la Molimo le hlaha ka makhetlo a ka bang 7 000 ka Bibeleng