Ho Profeta se Tla Etsahala Haufinyane

HA Moapostola Petrose a bua ka bokamoso ba motho le ba lefatše, o itse: “Ho na le maholimo a macha le lefatše le lecha tseo re li letetseng ho ea ka tšepiso ea hae [Molimo], ’me ho loka ho tla aha ho tsona.” (2 Petrose 3:13) Tšepiso ea pele ea “maholimo a macha le lefatše le lecha” e ile ea fanoa ka moprofeta Esaia. (Esaia 65:17; 66:22) Ha Petrose a qotsa boprofeta bona o ne a bontša hore bo ne bo e-s’o phethahale ka ho feletseng mehleng ea hae.

Hamorao, hoo e ka bang ka selemo sa 96 C.E., Tšenolo e ileng ea fuoa moapostola Johanne e ile ea bontša hore “lefatše le lecha” le amana le mahlohonolo a ’Muso oa Molimo. (Tšenolo 21:1-4) Mantsoe a Jesu le a moapostola Pauluse a buang ka maemo a neng a tla ba teng lefatšeng pele ’Muso oa Molimo o fihla aa phethahala kajeno. Ka lebaka leo, re ka lebella hore haufinyane ’Muso oo o tla tlisa lefatše le lecha. Ho tla ba joang lefatšeng leo le lecha? Buka ea Bibele ea Esaia e re beha leseling.

Mahlohonolo a Lefatše le Lecha

Khotso Lefatšeng Lohle le Bolumeli bo le Bong. “Ba tla lokela ho tea lisabole tsa bona hore e be mehoma le marumo a bona hore e be likere tse faolang limela. Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa.”​—Esaia 2:2-4.

Khotso Pakeng Tsa Batho le Liphoofolo. “Phiri e tla lula ka nakoana le konyana e tona, lengau le bothe le potsanyane, ’me namane le taoana e moetse le phoofolo e fepehileng hantle li be hammoho; moshanyana o tla li etella pele. Khomo e tla fula le bere; manamane a tsona a tla botha hammoho. Le tau e tla ja joang joaloka poho. . . . Li ke ke tsa ntša kotsi leha e le efe kapa tsa baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.”​—Esaia 11:6-9.

Khora Bakeng sa Bohle. “Ka sebele Jehova oa mabotho o tla etsetsa lichaba tsohle, thabeng ena, mokete oa lijo tse nang le oli e ngata, mokete oa veine e nang le litšifa, oa lijo tse nang le oli e ngata tse tletseng moko, oa veine e nang le litšifa, e tlhotliloeng.”​—Esaia 25:6.

Lefu ha le sa Tla ba Teng. “[Molimo] o tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle. O tla tlosa nyeliso ea batho ba hae lefatšeng lohle, etsoe Jehova o boletse hoo.”​—Esaia 25:8.

Bafu ba Tla Tsosoa. “Bafu ba hao baa phela, litopo tsa bona li tla tsoha hape. Ba robetseng lefatšeng ba tla tsoha ’me ba hooe ka thabo . . . Lefatše le tla boela le hlahisa bao e leng khale ba shoele.”​—Esaia 26:19, The New English Bible.

Mesia ke Moahloli ea Lokileng. “A ke ke a ahlola ka se bonahalang mahlong a hae, kapa a khalemela feela ho ea ka ntho e utloiloeng ke litsebe tsa hae. O tla ahlola ba tlaase ka ho loka, ’me o tla fana ka khalemelo ka ho loka molemong oa ba bonolo ba lefatše.”​—Esaia 11:3, 4.

Ba Foufetseng le ba sa Utloeng Litsebeng ba Tla Folisoa. “Mahlo a lifofu a tla tutuboloha, ’me litsebe tsa ba sa utloeng litsebeng li tla buleha.”​—Esaia 35:5.

Naha e Omeletseng e se e Beha Haholo. “Lefeella le sebaka se se nang metsi li tla thaba, le thota ea lehoatata e tla thaba ’me e thunye joaloka safrone. Ruri e tla thunya, ’me ka sebele e tla thaba ka nyakallo le ka mohoo oa nyakallo.”​—Esaia 35:1, 2.

Lefatše le Lecha. “Ke bōpa maholimo a macha [’muso o mocha o leholimong] le lefatše le lecha [sechaba se secha sa batho ba lokileng]; ’me lintho tsa pele li ke ke tsa hopoloa, kapa tsa fihla ka pelong. Empa thabang, ’me le nyakalle ka ho sa feleng ka lebaka la seo ke se bōpang. . . . Ka sebele [baahi ba lefatše le lecha leo Molimo a le tšepisitseng] ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. Etsoe matsatsi a sechaba sa ka a tla ba joaloka matsatsi a sefate; ’me bakhethoa ba ka ba tla sebelisa mosebetsi oa matsoho a bona ka botlalo. Ba ke ke ba sehlela lefeela, kapa ba tsoalla pherekano; kahobane ke bana ba entsoeng ka ba hlohonolofalitsoeng ba Jehova, hammoho le litloholo tsa bona. Etlare pele ba hoeletsa ke tla araba; ha ba sa ntse ba bua, ke tla utloa.” “‘Feela joalokaha maholimo a macha le lefatše le lecha tseo ke li etsang li eme ka pel’a ka,’ ho bolela Jehova, ‘kahoo bana ba lōna le lebitso la lōna ba tla ’ne ba eme.’”​—Esaia 65:17-25; 66:22.

Ho Profeta Bokamoso bo Hlollang

Ka Bibeleng, buka ea Esaia hase eona feela e profetang mahlohonolo a nakong e tlang. Bibele e na le boprofeta bo bongata bo hlalosang lintho tse tsotehang tseo Molimo a tla li finyella ka ’Muso oa hae o laoloang ke Kreste.a Na u ka rata ho phela paradeiseng e joalo? U ka khona! Inoese ka nkho hore na ha e le hantle ke eng seo Bibele e se rutang ka seo Molimo a rerileng ho se etsa nakong e tlang, ’me u ithute hore na u ka etsa’ng hore u fumane molemo ho sona. Lipaki Tsa Jehova li ka thabela ho u thusa.

[Mongolo o botlaaseng ba leqephe]

[Setšoantšo se leqepheng la 8]

Batho ba tla phelisana ka khotso ba be ba phele ka khotso le liphoofolo

[Setšoantšo se leqepheng la 9]

Bafu ba tla phela hape

[Setšoantšo se leqepheng la 10]

Lefatše lohle e tla ba paradeise