Atamela ho Molimo
Bopaki bo Boholo ka ho Fetisisa ba Lerato la Molimo
ABRAHAMA o ne a rata Molimo. Mopatriareka eo ea tšepahalang o ne a boetse a rata Isaka, mora oa hae eo a neng a mo fumanetse botsofaling. Empa ha Isaka a ka ba lilemo li 25, Abrahama o ile a tobana le teko eo ka tlhaho e neng e ka thatafalla ntate leha e le ofe—Molimo o ile a re a etse sehlabelo ka mora oa hae. Leha ho le joalo, Isaka ha aa ka a bolaoa. Eitse moo Abrahama a kokositseng thipa, eaba Molimo o romela lengeloi hore le mo thibe. Tlaleho ena ea Bibele, e ngotsoeng ho Genese 22:1-18, e ne e le boprofeta bo tšoantšetsang lerato le leholo ka ho fetisisa leo Molimo a neng a tla re bontša lona.
Temana ea 1 e re: “Molimo . . . a leka Abrahama.” Abrahama o ne a e-na le tumelo e matla, empa joale tumelo ea hae e ne e tla lekoa ho feta leha e le neng pele. Molimo o ile a re ho eena: “Ka kōpo, nka mora oa hao, mora oa hao ea mong eo u mo ratang haholo, Isaka, . . . u mo nyehele e le nyehelo ea secheso ho e ’ngoe ea lithaba tseo ke tla u bontša tsona.” (Temana ea 2) Hopola hore Molimo ha a lumelle bahlanka ba hae hore ba lekoe ho feta seo ba ka se jarang. Kahoo, teko ena e ile ea bontša hore Molimo o ne a tšepa Abrahama.—1 Bakorinthe 10:13.
Abrahama o ile a mamela Molimo hang-hang. Re bala ho re: “Abrahama a tsoha hoseng haholo a qhaneha esele ea hae eaba o nka bahlanka ba hae ba babeli le mora oa hae Isaka; eaba o ratha patsi bakeng sa nyehelo ea secheso. Joale a ema eaba o nka leeto.” (Temana 3) Ho bonahala Abrahama a sa ka a bolella motho e mong ka teko eo.
Joale o ile a nka leeto la matsatsi a mararo, le ileng la mo fa monyetla oa ho nahanisisa ka taba ena. Empa Abrahama o ne a ikemiselitse ho tobana le teko eo. Seo a ileng a se bua se bontša hore o ne a e-na le tumelo. Ha a bonela hōjana thaba eo Molimo a e khethileng, o ile a re ho bahlanka ba hae: “Salang mona . . . , empa ’na le moshanyana re batla ho ea mane ho ea rapela ’me re tla khutlela ho lōna.” Ha Isaka a botsa hore na nku ea nyehelo e kae, Abrahama o ile a re ho eena: “Molimo o tla iphumanela nku.” (Temana ea 5, 8) Abrahama o ne a lebeletse hore o tla khutla le mora oa hae. Hobane’ng? Hobane “o ile a lekanya hore Molimo o ne a khona ho . . . tsosa [Isaka] bafung.”—Baheberu 11:19.
Ha Abrahama a le thabeng ’me a nkile “thipa . . . hore a bolaee mora oa hae,” lengeloi le ile la mo thiba. Eaba Molimo o fana ka pheleu, e neng e tšoasitsoe moferong, e le hore Abrahama a ka e nyehela “sebakeng sa mora oa hae.” (Temana ea 10-13) Ho Molimo, ho ne ho tšoana le ha eka Isaka o ne a hlile a entsoe sehlabelo. (Baheberu 11:17) Setsebi se seng se re: “Mahlong a Molimo, boikemisetso ba Abrahama bo ne bo le joalokaha eka o se a ntse a entse sehlabelo ka mora oa hae.”
Ho ile ha hlaka hore Jehova o tšepa Abrahama ka lebaka le utloahalang. Abrahama o ile a putsoa ka lebaka la ho tšepa Jehova, etsoe Molimo o ile a pheta mantsoe a selekane seo a ileng a se etsa le Abrahama a ba a akarelletsa le lintho tse eketsehileng selekaneng seo ho sona a neng a tšepisa hore batho ba lichaba tsohle ba tla hlohonolofatsoa.—Temana ea 15-18.
Le hoja Molimo a ile a thibela Abrahama ho etsa sehlabelo ka mora oa hae, qetellong eena o ne a tla etsa sehlabelo ka mora oa hae. Hore ebe Abrahama o ne a ikemiselitse ho nyehela Isaka ho ne ho tšoantšetsa nyehelo eo Molimo a neng a tla e etsa ka Mora oa hae ea tsoetsoeng a ’notši, Jesu, bakeng sa libe tsa rōna. (Johanne 3:16) Sehlabelo sa Kreste ke bopaki bo boholo ka ho fetisisa ba hore Molimo oa re rata. Kaha Molimo o re etselitse sehlabelo se joalo, re tšoanela ho ipotsa potso ena, ‘Ke ikemiselitse ho tela eng e le hore ke khahlise Molimo?’