Amohela ka Kananelo Fana ka Pelo Eohle
JEHOVA, Ntate oa rōna ea lerato ea leholimong, o tsotella e mong le e mong oa rōna. Lentsoe la Molimo le re tiisetsa hore ka sebele o tsotella bahlanka bohle ba hae. (1 Pet. 5:7) Tsela e ’ngoe eo Jehova a bontšang ka eona hore oa re tsotella, ke ka ho re thusa ka mekhoa e fapa-fapaneng hore re mo sebeletse ka botšepehi. (Esa. 48:17) Jehova o batla hore re sebelise thuso eo a re fang eona, haholo-holo ha re tobane le mathata a re sithabetsang. Re bona mohlala oa seo Molaong oa Moshe.
Mehleng ea Molao oa Moshe, ka lerato Jehova o ne a thusa “ea hlorileng,” e leng khutsana, mohlolohali le mojaki. (Lev. 19:9, 10; Deut. 14:29) Oa tseba hore barapeli ba bang ba hae ba ka ’na ba hloka thuso ea barapeli-’moho le bona. (Jak. 1:27) Kahoo, bahlanka ba hae ha baa lokela ho ba leqe ho amohela thuso eo ba e fuoang ke bao Jehova a ba susumelletsang hore ba fane ka eona. Leha ho le joalo, ha re amohela thuso re lokela ho e amohela ka moea o motle.
Ka lehlakoreng le leng, Lentsoe la Molimo le bontša hore batho ba Molimo ba ba le monyetla oa hore ba fane. Hopola ketsahalo ea ‘mohlolohali ea hlokang’ eo Jesu a ileng a mo bona tempeleng ea Jerusalema. (Luka 21:1-4) Ho ka etsahala hore ebe o ile a rua molemo tokisetsong eo ka lerato Jehova a neng a e etselitse bahlolohali. Empa le hoja e ne e le mohlolohali ea hlokang, se hopoloang ka eena ke hore o ile a fana, eseng hore o ile a amohela. E tlameha ebe ho fana ho ile ha mo thabisa, hobane joalokaha Jesu a boletse, “ho fana ho tlisa thabo e khōlō ho feta ho amohela.” (Lik. 20:35) Ka lebaka leo, u ka ‘itloaetsa ho fana’ joang e le hore u tle u fumane thabo?—Luka 6:38.
“Ke Tla Buseletsa Eng ho Jehova?”
Mopesaleme o ile a ipotsa: “Ke tla buseletsa eng ho Jehova bakeng sa melemo eohle ea hae ho ’na?” (Pes. 116:12) O ne a fumane melemo efe? Jehova o ne a ile a mo hlokomela nakong ea “mahlomola le mesarelo.” Ho feta moo, Jehova o ne a “pholositse moea oa [hae] lefung.” Joale o ne a batla ho “buseletsa” Jehova ka tsela e itseng. Mopesaleme o ne a ka etsa eng? O ile a re: “Ke tla phetha boitlamo ba ka ho Jehova.” (Pes. 116:3, 4, 8, 10-14) O ile a ikemisetsa ho phetha likano tsohle tseo a neng a li etselitse Jehova le ho phetha lintho tsohle tseo a neng a itlamme hore o tla mo etsetsa tsona.
Le uena u ka etsa se tšoanang. Joang? Ka hore ka linako tsohle u phele ka tsela e lumellanang le melao le melao-motheo ea Molimo. Ka hona, etsa bonnete ba hore borapeli ba Jehova bo lula e le ba bohlokoa ka ho fetisisa bophelong ba hao ’me u lumelle moea oa Molimo hore o u tataise nthong e ’ngoe le e ’ngoe eo u e etsang. (Moek. 12:13; Bagal. 5:16-18) Ha e le hantle, ka lebaka la sohle seo Jehova a u etselitseng sona, ’nete ke hore le ka mohla u ke ke ua khona ho mo buseletsa ka ho feletseng. Leha ho le joalo, ‘pelo ea Jehova ea thaba’ ha a bona hore u inehela ka pelo eohle tšebeletsong ea hae. (Liprov. 27:11) Ke tlotla e ikhethang hakaakang ho thabisa Jehova ka tsela ee!
Kenya Letsoho ho Etsa Hore Phutheho e Atlehe
Ha ho potang hore ua lumela hore phutheho ea Bokreste e u ruisitse molemo ka litsela tse ngata. Jehova o fane ka lijo tse ngata tsa moea a sebelisa phutheho. U fumane ’nete e u lokolotseng lithutong tse fosahetseng tsa bolumeli le lefifing la moea. (Joh. 8:32) Libokeng tsa phutheho le likopanong tse khōlō le tse nyenyane tse lokiselitsoeng ke “lekhoba le tšepahalang le le masene,” u fumane tsebo e tla etsa hore u phele ka ho sa feleng lefatšeng la paradeise leo ho lona ho se nang bohloko le mahlomola. (Mat. 24:45-47) Na u ka khona le ho lokolisa melemo eohle eo u e fumaneng le eo u sa ntseng u tla e fumana phuthehong ea Molimo? U ka buseletsa phutheho joang?
Moapostola Pauluse o ile ngola a re: “’Mele oohle, ka ho ba o kopantsoeng hammoho ka tumellano le ka ho etsoa hore o sebelisane ka lenonyello le leng le le leng le fanang ka se hlokahalang, ho ea ka tšebetso ea setho se seng le se seng ka tekanyo e loketseng, o sebeletsa khōlo ea ’mele bakeng sa ho ikaha ha oona ka lerato.” (Baef. 4:15, 16) Le hoja lengolo lena le sebetsa haholo-holo ho sehlopha sa Bakreste ba tlotsitsoeng, le ka sebetsa le ho Bakreste kaofela kajeno. Ka sebele, setho se seng le se seng sa phutheho se ka kenya letsoho ho etsa hore phutheho e atlehe ’me e hōle. Ka litsela life?
Re ka etsa sena ka hore ka linako tsohle re leke ka hohle ho khothatsa ba bang ’me re ba thuse hore ba be matla ha ba sebeletsa Molimo. (Bar. 14:19) Re ka boela ra kenya letsoho ‘khōlong ea ’mele’ ka hore re leke ka matla ho bontša tholoana ea moea oa Molimo ha re sebelisana le balumeli-’moho le rōna. (Bagal. 5:22, 23) Ho phaella moo, re ka batla menyetla ea hore ‘re sebetse se molemo ho bohle, empa haholo-holo ho ba amanang le rōna tumelong.’ (Bagal. 6:10; Baheb. 13:16) Bohle ka phuthehong—ebang ke bara kapa barali babo rōna, bana kapa batho ba baholo—ba ka kenya letsoho hore ba ‘hahe ’mele ka lerato.’
Ho ekelletsa moo, re ka sebelisa bokhoni, matla le matlotlo a rōna hore re kenye letsoho mosebetsing o etsoang ke phutheho oa ho pholosa bophelo. Jesu Kreste o itse: “Le amohetse ntle ho tefo.” Re lokela ho etsa joang? O itse: “Le fane ntle ho tefo.” (Mat. 10:8) Ka hona, ikakhele ka setotsoana mosebetsing oa bohlokoa oa ho bolela ka ’Muso le oa ho etsa barutuoa. (Mat. 24:14; 28:19, 20) Na ho na le se u sitisang ho etsa see ka hohle kamoo u ka khonang? Hopola mohlolohali ea hlokang eo Jesu a ileng a bua ka eena. O ile a fana ka se fokolang haholo. Leha ho le joalo, Jesu o ile a re o fane ho feta ba bang kaofela. O ile a fana ka sohle seo a neng a ka se khona.—2 Bakor. 8:1-5, 12.
Amohela Thuso ka Moea o Motle
Leha ho le joalo, ho ka ’na ha e-ba le linako tseo ka tsona u ka hlokang ho thusoa ke phutheho. Le ka mohla u se ke ua ba leqe ho amohela thuso leha e le efe eo phutheho e ka batlang ho u fa eona ha u imetsoe ke mathata a tsamaiso ena. Jehova o fane ka banna ba tšoanelehang le ba tsotellang hore ba “lise phutheho”—e le hore ba u thuse ha u oetsoe ke liteko le matšoenyeho. (Lik. 20:28) Baholo le litho tse ling tsa phutheho ba batla ho u tšelisa, ho u tšehetsa le ho u sireletsa ha u le maqakabetsing.—Bagal. 6:2; 1 Bathes. 5:14.
Leha ho le joalo, tiisa hore ha u amohela thuso eo u e hlokang, u e amohela ka moea o motle. Kamehla u ananele thuso eo u e fuoang. Thuso e joalo eo u e fuoang ke balumeli-’moho le uena, u e nke e le tsela eo ka eona Molimo a u bontšang mosa o sa tšoanelang. (1 Pet. 4:10) Ke hobane’ng ha e le habohlokoa? Hobane ha re batle ho tšoana la batho ba bangata lefatšeng, ba sa ananeleng seo ba se fuoang.
Nahanela ba Bang ’me U be le Kutloisiso
Pauluse o ile a ngola tjena ka Timothea lengolong le eang phuthehong ea Filipi: “Ha ke na e mong ea nang le boikutlo bo kang ba hae eo kannete a tla hlokomela lintho tse le amang.” Leha ho le joalo, Pauluse o ile a phaella ka hore: “Ba bang kaofela ba batla lithahasello tsa bona, eseng tsa Kreste Jesu.” (Bafil. 2:20, 21) Ka lebaka la mantsoe a matla ao Pauluse a a buileng, kajeno re ka qoba joang ho ameha ho tlōla ka “lithahasello” tsa rōna?
Le ka mohla ha rea lokela ho ba leqoophe ha re kōpa batho ba bang ka phuthehong hore ba re fe nako ea bona kapa ba re thuse ho lokisa mathata a rōna. Hobane’ng? Nka ka mohlala: Ha ho potang hore re ne re ka thaba haholo ha mor’abo rōna a ne a ka re thusa ka lintho tseo re li hlokang ha re le tsietsing. Empa na re ne re ka mo qophella hore a re thuse? Che. Ka tsela e tšoanang, le hoja barab’abo rōna ba lerato ba ikemiselitse ho re thusa ka linako tsohle, re lokela ho ba le kutloisiso ’me re ba nahanele ha re kōpa hore ba re fe nako ea bona. Etsoe re batla hore barapeli-’moho le rōna ba re thuse ka pelo e tšoeu ha re le tsietsing.
Ha ho pelaelo hore bara le barali beno ba Bakreste ba tla lula ba ikemiselitse ho u thusa. Empa ka linako tse ling ba ka ’na ba sitoa ho u thusa ka lintho tsohle tseo u li hlokang. Haeba seo se etsahala, kholiseha hore ho sa tsotellehe hore na u hlaheloa ke liteko life, Jehova o tla u hlokomela joalokaha a ile a hlokomela mopesaleme.—Pes. 116:1, 2; Bafil. 4:10-13.
Ka hona, u se ke ua ba leqe ho amohela ka kananelo thuso leha e le efe eo Jehova a u fang eona—haholo-holo nakong ea matšoenyeho le mathata. (Pes. 55:22) Ke sona seo a batlang hore u se etse. Leha ho le joalo, o boetse o batla hore u ‘fane u nyakaletse.’ Kahoo, ‘etsa qeto e tiileng pelong ea hao’ hore u fane ka sohle seo u ka se khonang hore u tšehetse borapeli ba ’nete. (2 Bakor. 9:6, 7) Ka tsela eo, u tla khona ho amohela thuso ka kananelo ’me u fane ka pelo eohle.
[Lebokose/Litšoantšo tse leqepheng la 31]
“Ke tla buseletsa eng ho Jehova bakeng sa melemo eohle ea hae ho ’na?”—Pes. 116:12
▪ Batla menyetla ea hore u ‘sebetse se molemo ho bohle’
▪ Khothatsa ba bang ’me u ba thuse hore ba be matla ha ba sebeletsa Molimo
▪ Ikakhele ka setotsoana ka hohle kamoo u ka khonang mosebetsing oa ho etsa barutuoa