LIPOTSO TSA BIBELE LIA ARAJOA
Ke hobane’ng ha ho le thata hakaale hore lefatše le be le khotso?
Khotso ea lefatše e tla tlisoa feela ke ’muso o ka fetolang lipelo tsa batho
Bibele e fana ka mabaka a mabeli a ka sehloohong. La pele ke hore le hoja batho ba finyeletse lintho tse babatsehang, ha baa bōptjoa ba e-na le matla a ho tsamaisa mehato ea bona. La bobeli ke hore maano a batho aa hlōleha kaha “lefatše lohle le rapaletse matleng a ea khopo,” e leng Satane Diabolose. Kahoo, batho ba hlōlehile ho tlisa khotso lefatšeng.—Bala Jeremia 10:23; 1 Johanne 5:19.
Kaha batho ke baithati ba bile ba rata botumo, ba entse hore khotso e be sieo lefatšeng. Khotso ea lefatše e tla tlisoa feela ke ’muso o ka rutang batho ho rata ho loka le ho hlokomelana.—Bala Esaia 32:17; 48:18, 22.
Ke mang ea tla tlisa khotso lefatšeng?
Molimo ea Matla ’Ohle o tšepisitse hore o tla hloma ’muso o tla busa batho bohle. O tla nkela mebuso ea batho sebaka. (Daniele 2:44) Jesu, Mora oa Molimo, o tla busa e le Khosana ea Khotso. O tla felisa bokhopo lefatšeng lohle ’me a rute batho ho phela ka khotso.—Bala Esaia 9:6, 7; 11:4, 9.
Hona joale, batho ba limilione lefatšeng lohle, bao Jesu a ba tataisang ba sebelisa Lentsoe la Molimo, Bibele, ho ruta batho hore ba phelisane ka khotso. Haufinyane khotso e tla ba teng lefatšeng.—Bala Esaia 2:3, 4; 54:13.