LIPOTSO TSA BIBELE LIA ARAJOA
Jesu o tla etsetsa batho eng nakong e tlang?
Ka selemo sa 33, Jesu o ile a shoa, a tsoha ’me a nyolohela leholimong. Nako e telele ka mor’a moo, Jesu o ile a fuoa Borena. (Daniele 7:13, 14) Nakong e tlang, Jesu joaloka Morena, o tla tlisa khotso lefatšeng ’me a felise bofutsana.—Bala Pesaleme ea 72:7, 8, 13.
E le Morena, Jesu o tla tlosa batho ba sa lokang lefatšeng
Kaha e tla be e le ’Musi, Jesu o tla etsetsa batho lintho tse hlollang. O tla sebelisa matla ao Ntate oa hae a mo fileng ’ona ho etsa hore batho e be ba phethahetseng hape. Ba tla thabela ho phela lefatšeng ba se ba sa tsofale le ho shoa.—Bala Johanne 5:26-29; 1 Bakorinthe 15:25, 26.
Jesu o etsetsa batho eng hona joale?
Hona joale Jesu o laola mosebetsi oa ho ruta batho Bibele o etsoang ke balateli ba hae ba ’nete lefatšeng ka bophara. Ba etela batho ’me ba ba bontša seo Bibele e se rutang ka ’Muso oa Molimo. Jesu o ile a re o tla lula a tšehetsa mosebetsi o etsoang ke barutuoa ba hae ho fihlela ’Muso oa Molimo o felisa mebuso ea batho.—Bala Matheu 24:14; 28:19, 20.
A sebelisa phutheho ea Bokreste ea ’nete Jesu o ruta batho ho phela bophelo bo molemo. O tla tsoela pele a ba tataisa ho fihlela ba pholoha timetso ea tsamaiso ena ea lintho ’me ba kena lefatšeng le lecha leo Molimo a le tšepisitseng.—Bala 2 Petrose 3:7, 13; Tšenolo 7:17.