Kamehla “Moahloli oa Lefatše Lohle” o Etsa se Nepahetseng

1. Abrahama o ile a bontša joang hore o kholisehile hore Jehova o tla ahlola ka toka? (Sheba setšoantšo se qalong.)

“NA MOAHLOLI oa lefatše lohle a ke ke a etsa se nepahetseng?” (Gen. 18:25) Ha Abrahama a botsa potso eo, o ne a bontša hore o kholisehile hore Jehova o tla ahlola Sodoma le Gomora ka toka. O ne a kholisehile hore Jehova a ke ke a sebetsa ka ho hloka toka ka hore a “bolaee motho ea lokileng le ea khopo.” O ne a sa amahanye Jehova le ho hloka toka. Lilemo tse 400 hamorao, Jehova o ile a re ha a itlhalosa: “Ke Lefika, mosebetsi oa hae o phethahetse, etsoe litsela tsohle tsa hae ke toka. Molimo oa botšepehi, eo ho eena ho se nang ho hloka toka; o lokile ’me o khabane.”—Deut. 31:19; 32:4.

2. Ke hobane’ng ha re ka re Jehova a ke ke a ahlola ka ho hloka toka?

² Abrahama o ne a kholisoa ke’ng hore kamehla Jehova o ahlola ka toka? O ne a tseba hore Jehova ke mohloli oa toka le ho loka. Ha e le hantle, mantsoe a Seheberu a fetoletsoeng e le “toka” le “ho loka” hangata a hlaha ’moho ka Mangolong a Seheberu. Ha e le hantle, ha ho na phapang pakeng tsa toka le ho loka. Kaha Jehova ke eena mohloli oa toka, tsela eo a etsang lintho ka eona e tla lula e e-na le toka. Ho feta moo, ho latela Lentsoe la hae, “o rata ho loka le toka.”—Pes. 33:5.

3. Etsa mohlala o bontšang kamoo batho ba tšoaroang ka ho hloka toka kateng.

³ Batho bohle ba lokileng ba tšelisoa ke ho tseba hore kamehla Jehova o etsa lintho ka toka le hoja toka e le sieo lefatšeng. Ka linako tse ling, batho ba bang ba ile ba tšoaroa hampe. Mohlala, ba bang ba ile ba qosoa le ho koalloa teronkong ka leeme. Ba bang ba ileng ba qeta lilemo teronkong ba tšoaretsoe tlolo ea molao eo ba sa e etsang, ba ile ba lokolloa ka mor’a hore ho etsoe lipatlisiso tsa bongaka ’me ba fumanoa ba se molato. Ho hloka toka ho joalo ho ka baka khalefo le pherekano. Leha ho le joalo, Bakreste ba ka tobana le mofuta o mong oa ho hloka toka oo ho leng thata le ho feta ho sebetsana le oona.

KA PHUTHEHONG

4. Tumelo ea Mokreste e ka lekoa joang?

⁴ Rea tseba hore re tla tšoaroa ka ho hloka toka kapa leeme ke batho bao eseng Lipaki. Leha ho le joalo, tumelo ea rona e ka lekoa ha re hlokomela ho hloka toka ka phuthehong kapa re tšoaroa ka ho hloka toka ka phuthehong. U tla etsa’ng ha u bona eka u tšoeroe ka leeme ka phuthehong kapa u tšoeroe ka leeme ke Mokreste-’moho le uena? Na u tla itumella hore u khopehe?

5. Ke hobane’ng ha Bakreste ba sa makale ha ba tšoaroa ka leeme ka phuthehong?

⁵ Kaha kaofela ha rea phethahala, ho ka ba bonolo hore re tšoare Bakreste-’moho le rona ka leeme kapa bona ba re tšoare ka leeme. (1 Joh. 1:8) Le hoja seo se sa etsahale hangata, Bakreste ba ’nete ha ba makale kapa hona ho khopeha ha seo se etsahala. Ka mabaka a utloahalang, Jehova o fane ka likeletso tse hlakileng ka Lentsoeng la hae e le ho re thusa ho lula re tšepahala le ha balumeli-’moho le rona ba re tšoara ka leeme.—Pes. 55:12-14.

6, 7. Mor’abo rona e mong o ile a tšoaroa ka ho hloka toka joang ka phuthehong, hona ke’ng e mo thusitseng ho sebetsana le boemo boo hantle?

⁶ Nahana ka se ileng sa etsahalla Mor’abo rona Willi Diehl. Mor’abo rona Diehl o qalile ho sebetsa Bethele e Bern, Switzerland ka 1931. Ka 1946, o ile a ba sehlopheng sa borobeli Sekolong sa Gileade se neng le se le New York, U.S.A. Ka mor’a moo, e ile ea e-ba mopotolohi Switzerland. Ha Mor’abo rona Diehl a bua ka pale ea hae ea bophelo o ile a re: “Ka May 1949, ke ile ka tsebisa ntlo-kholo e Bern hore ke batla ho nyala.” Karabo e ile ea re: “Le ke ke la fuoa litokelo leha e le life haese bopula-maliboho ba kamehla.” Mor’abo rona Diehl o re: “Ke ne ke sa lumelloa ho fana ka lipuo . . . Ba bangata ba ne ba se ba sa re lumelise, ba re tšoara joaloka batho ba khaotsoeng.”

⁷ Mor’abo rona Diehl o ile a sebetsana le boemo boo joang? O re: “Re ne re tseba hore ho nyala ha ho khahlanong le Mangolo, kahoo re ile ra rapela ’me ra tšepa Jehova.” Qetellong taba eo e ile ea lokisoa ’me Mor’abo rona Diehl a boela a ba le litokelo ka phuthehong. Jehova o ile a mo putsa kaha o ne a tšepahala.a Re ka ’na ra ipotsa, ‘Na ke ne ke tla mamella ’me ke emele hore Jehova a lokisa lintho kapa ke ne ke tla sebetsa lintho ka tsela ea ka?—Liprov. 11:2; bala Mikea 7:7.

8. Ke hobane’ng ha ka linako tse ling re ka bona eka re tšoeroe ka leeme kapa hore motho e mong o tšoeroe ka leeme?

⁸ Ka lehlakoreng le leng, ka phoso u ka bona eka u tšoeroe ka leeme kapa hore e mong ka phuthehong o tšoeroe ka leeme. Sena se ka etsahala hobane re sa tsebe lintlha kaofela le hore ha rea phethahala ’me re ka bona lintho ka tsela e fosahetseng. Ho sa tsotellehe hore na re nepile kapa che, ha re rapela ’me re tšepahalla Jehova re ke ke ra qetella re “halefela Jehova” maemong ao.—Bala Liproverbia 19:3.

9. Re tla ithuta’ng sehloohong see le se latelang?

⁹ A re bueng ka mehlala e meraro e bontšang kamoo batho ba Jehova ba ileng ba tšoaroa ka ho hloka toka kateng. Sehloohong sena re tl’o bua ka se ileng sa etsahalla setloholoana sa Abrahama e leng Josefa. Sehloohong se latelang, re tla ithuta tsela eo Jehova a ileng a sebelisana le Morena Akabe oa Iseraele ka eona le ka se ileng sa etsahalla moapostola Petrose ha a le Antioke e Syria. Ha re ntse re ithuta ka mehlala ena, sheba lintlha tsa bohlokoa tse tla u thusa hore kamano ea hao le Jehova e lule e le matla, haholo-holo haeba u lumela hore u kile oa tšoaroa ka ho hloka toka.

JOSEFA O ILE A TŠOAROA KA HO HLOKA TOKA

10, 11. (a) Ke joang Josefa a ileng a tšoaroa ka leeme? (b) Josefa o ile a fumana monyetla oa ho etsa’ng ha a ntse a le teronkong?

¹⁰ Josefa, mohlanka oa Jehova, o ile a tšoaroa ka leeme. Empa ho utloisang bohloko le ho feta ke hore le bana babo ba ile ba mo tšoara ka leeme. Ha Josefa a le lilemo li ka tlaase ho 20, bara babo ba ile ba mo koetela ’me ba mo rekisa hore e be lekhoba. O ile a isoa Egepeta a sa rate. (Gen. 37:23-28; 42:21) Ka mor’a nako a le moo, o ile a etselletsoa ka hore o betile ’me a koalloa teronkong empa a se na molato. (Gen. 39:17-20) Josefa e bile lekhoba le teronkong ka lilemo tse ka bang tse 13. Re ka ithuta’ng mohlaleng oa Josefa e ka re thusang ha re tšoaroa ka leeme ke molumeli-’moho le rona?

¹¹ Josefa o ile a bolella motšoaruoa-’moho le eena ka mathata a hae. Motšoaruoa eo e ne e kile ea e-ba mookameli oa baqhatsetsi ntlong ea morena. Ha ba ntse ba le teronkong, moqhatsetsi eo o ile a ba le toro eo Josefa a ileng a e hlalosa. Josefa o ile a hlalosetsa monna eo hore o tla khutlisetsoa boemong ba ho ba moqhatsetsi hape ntlong ea Faro. Ha Josefa a ntse a hlalosa toro eo ka thuso ea Molimo, o ile a sebelisa monyetla oo ho hlalosa mathata a hae. Re ka ithuta lintho tsa bohlokoa ho seo Josefa a se buileng le seo a sa se buang.—Gen. 40:5-13.

12, 13. (a) Seo Josefa a se boleletseng moqhatsetsi se bontša joang hore o ne a sa amohela boemo ba hae? (b) Josefa o ile a qoba ho bolella moqhatsetsi eng?

¹² Bala Genese 40:14, 15. Hlokomela hore Josefa o ile a re o ne a “koetetsoe.” Lentsoe la Seheberu le hlalosang ho koeteloa le bolela hore o ne a “utsoitsoe.” Ho hlakile hore o ile a tšoaroa ka ho hloka toka. Josefa o ile a boela a hlalosa ka ho hlaka hore o koalletsoe a se na molato. Kahoo, o ile a kopa moqhatsetsi hore a mo buelle ho Faro. Hobane’ng? Hobane o ne a batla hore a ‘mo ntše ka tlung eo.’

¹³ Na mantsoe a Josefa a bontša hore o ne a amohetse boemo ba hae? Che. O ne a hlokomela hore o tšoeroe ka ho hloka toka ka makhetlo a mangata. O ile a hlalosetsa moqhatsetsi litaba tsa hae ka ho hlaka, hobane o ne a ka ’na a khona ho mo thusa. Leha ho le joalo, hlokomela hore ha ho letho ka Mangolong le bontšang hore Josefa o ile a bolella batho ba bang, esita le Faro, hore bara babo e ne le bona ba mo koetetseng. Ha e le hantle, ha bara babo Josefa ba tla Egepeta ’me ba boelana le eena, Faro o ile a ba amohela ’me a re ba thabele “karolo e ntle ea naha eohle.”—Gen. 45:16-20.

14. Ke’ng e tla re thusa ho qoba leraba la ho bua ba bang hampe le haeba re tšoeroe ka ho hloka toka ka phuthehong?

¹⁴ Ha Mokreste a lumela hore o tšoeroe ka ho hloka toka, ha aa lokela ho ’na a bua ka taba eo. Ke ’nete hore ho loketse ho kopa thuso ho baholo le ho ba bolella haeba Mokreste a entse sebe se tebileng. (Lev. 5:1) Leha ho le joalo, maemong ao ho se nang sebe se tebileng, e ka ba hantle hore Bakreste ba lokise litaba ba le bang ntle le hore baholo ba kenelle. (Bala Matheu 5:23, 24; 18:15.) Re lokela ho sebelisa melao-motheo ea Bibele ha re kopana le maemo a joalo. Ka nako e ’ngoe, re ka hlokomela hore ha e le hantle re ne re sa tšoaroa ka ho hloka toka. Kahoo re tla thaba haholo haeba re sa ka ra mpefatsa lintho le ho feta ka hore re bue hampe ka Bakreste-’moho le rona. Hopola, ho sa tsotellehe hore na re nepile kapa ka che, ho hlabana ka mantsoe ho ke ke ha lokisa bothata. Ho tšepahalla Jehova le Bakreste-’moho le rona, ho tla re thusa ho qoba phoso eo. Ha mopesaleme a bua ka “ea tsamaeang ka mokhoa o se nang molato,” o ile a re ke “ea sa etselletsang ka leleme la hae. Ea sa etsang letho le lebe ho motsoalle oa hae, ho se nyeliso eo a e boletseng khahlanong le motho eo a mo tloaetseng haholo.”—Pes. 15:2, 3; Jak. 3:5.

NAHANA KA KAMANO EA HAO LE JEHOVA

15. Kamano eo Josefa a neng a e-na le eona le Jehova e bile tlhohonolofatso ka tsela efe?

¹⁵ Re ithuta ntho ea bohlokoa ka kamano ea Josefa le Jehova. Ka lilemo tse 13 tseo Josefa a neng a entsoe lekhoba a bile a le teronkong, o ne a etsa lintho ka tsela ea Jehova. (Gen. 45:5-8) Ha aa ka a beha Jehova molato ka boemo boo a neng a le ho bona. Le hoja a sa ka a lebala maemo ao a fetileng ho ’ona, ha aa ka a a lumella hore a mo nyahamise. Habohlokoa le ho feta ke hore ha aa ka a lumella hore liphoso tsa batho ba bang li senye kamano ea hae le Jehova. Botšepehi ba Josefa bo mo thusitse ho bona ha Jehova a lokisa ho hloka toka hoo ’me a hlohonolofatsa eena le ba lelapa labo.

16. Ke hobane’ng ha re lokela ho atamela ho Jehova le ho feta ha re tšoaroa ka leeme ka phuthehong?

¹⁶ Ka tsela e tšoanang, re lokela ho ananela kamano ea rona le Jehova re be re e sireletse. Le ka mohla re se ke ra lumella liphoso tsa Bakreste-’moho le rona tsa re sitisa ho sebeletsa Molimo. (Bar. 8:38, 39) Ho e-na le hoo, ha re tšoaroa ka leeme ke balumeli-’moho le rona, a re etsiseng Josefa ’me re atamele ho Jehova le ho feta, re etse lintho ka tsela ea Jehova. Ha re entse sohle ho lokisa boemo ho latela melao-motheo ea Bibele, re lokela ho tlohella lintho ho Jehova, re kholisehile hore o tla li lokisa ka nako ea hae le ka tsela ea hae.

TŠEPA “MOAHLOLI OA LEFATŠE LOHLE”

17. Re ka bontša joang hore re tšepa “Moahloli oa lefatše lohle”?

¹⁷ Ha feela re ntse re phela lefatšeng lena, re ka lebella ho tšoaroa ka ho hloka toka. Ka linako tse ling, uena kapa motho e mong eo u mo tsebang le ka tšoaroa ka ho hloka toka kapa la bona eka le tšoeroe ka ho hloka toka ka phuthehong. U se ke oa itumella hore u khopehe. (Pes. 119:165) Ho e-na le hoo, kaha re bahlanka ba Molimo, re lokela ho mo tšepahalla ’me re rapelle hore a re tataise. Ka tsela e tšoanang, rea hlokomela hore ha se kamehla re ka tsebang lintlha kaofela. Rea utloisisa hore ka lebaka la ho se phethahale re ka etsa phoso tseleng eo re bonang lintho ka eona. Ho latela seo re ithutileng sona ka Josefa, re lokela ho qoba ho bua hampe ka Bakreste-’moho le rona kaha re ka mpefatsa litaba le ho feta. Ho e-na le ho sebetsa litaba ka tsela ea rona, a re ikemisetseng ho lula re tšepahala ’me re letele hore Jehova e be eena ea li lokisang. Ha re etsa joalo, Jehova o tla re amohela ’me a re hlohonolofatse joalokaha a ile a etsa ka Josefa. Re kholisehile hore Jehova, “moahloli oa lefatše lohle,” o tla lula a etsa lintho ka tsela e nepahetseng, “etsoe litsela tsohle tsa hae ke toka.”—Gen. 18:25; Deut. 32:4.

18. Re tl’o ithuta’ng sehloohong se latelang?

¹⁸ Sehloohong se latelang, re tl’o ithuta ka mehlala e ’meli ea batho ba Jehova ba mehleng ea Bibele ba ileng ba tšoaroa ka ho hloka. Ha re ntse re ithuta ka mehlala eo, re tla bona hore na boikokobetso le ho ikemisetsa ho tšoarela li amana joang le pono ea Jehova ka toka.