U ka Etsa’ng Hore ho Ithuta Bibele ho U Tsoele Molemo ho be ho U Natefele?

Joshua o bala molao; ha marako a Jeriko aa oela ntlo ea Rahaba ha ea ka ea oa; Joshua o phahamisa matsoho ’me oa rapela

JOSHUA o ne a tlameha ho tataisetsa sechaba sa Iseraele Naheng e Tšepisitsoeng. Bona e ne e le boikarabelo bo boima haholo. Leha ho le joalo, Jehova o ile a mo khothatsa ka hore a be sebete ’me a be matla. A mamele melao ea Hae ’me a e bale bosiu le motšehare e le hore lintho li mo tsamaele hantle.—Josh. 1:7, 8.

Le rona re thulana le maemo a boima haholo ‘matsatsing ana a ho qetela.’ (2 Tim. 3:1) Haeba re mamela keletso eo Jehova a ileng a e fa Joshua, lintho li tla re tsamaela hantle. Re lokela ho bala Bibele kamehla ebe re sebelisa lintho tseo re ithutileng tsona ha re thulana le mathata.

Leha ho le joalo, boholo ba rona rea lumela hore ha re liithuti tse hloahloa hakaalo ebile ha ho bonolo ho ithuta. Empa ho ithuta Bibele ho bohlokoa haholo. Kahoo, sheba lebokose le reng “Leka Lintlha Tsena” e le hore u fumane lintlha tse ka u thusang hore ho bala Bibele ho u natefele ho be ho u tsoele molemo.

Mopesaleme o ile a re: “Etsa hore ke hate tseleng ea litaelo tsa hao, etsoe ke khahliloe ke eona.” (Pes. 119:35) U tla thaba haholo ha u ithuta Lentsoe la Molimo. U tla boela u fumane matlotlo a patiloeng.

Le hoja u sa tl’o tataisa sechaba joaloka Joshua, u na le mathata ao u thulanang le ’ona. Kahoo, ha u ntse u ithuta, hlokomela hore na ke lintho life tse ka u thusang. Ha u etsa joalo, u tla etsa lintho ka bohlale ’me u atlehe.

LEKA LINTLHA TSENA

Rapela pele u ithuta. Ka Bibeleng ho ngotsoe maikutlo a Molimo. Leha ho le joalo, a molemong oa rona. Kahoo, re lokela mo rapela e le hore a re thuse ho e utloisisa, ho hopola lintho tseo re ithutileng tsona le ho mamela litaelo tsa hae.—Esdr. 7:10.
Ha u ntse u bala lingoliloeng tse thehiloeng Bibeleng kapa u bala Bibele ka ho toba, ipotse: Litaba tsee li nthuta eng ka Jehova? Li amana joang le molaetsa o ka Bibeleng? Nka sebelisa lintho tseo ke ithutileng tsona joang ho thusa batho ba bang?
Nahanisisa ka lintho tseo u ithutang tsona. Emisa hanyenyane ka ho bala ’me u nahanisise. Lintho tseo ke li balang li etsa hore ke ikutloe joang? Ke hobane’ng ha li etsa hore ke ikutloe ka tsela ee? Li amana joang le lintho tse ileng tsa nketsahalla nakong e fetileng, tse nketsahallang hona joale le tseo mohlomong li ka nketsahallang nakong e tlang? Nka sebelisa litemana tsee joang bophelong ba ka? (Jobo 23:5; Pes. 49:3) Leka ho bona hore na ke hobane’ng ha Jehova a re bahlanka ba hae ba se ke ba etsa lintho tse itseng kapa hore na ha ba sa mo mamele ba tla khola litholoana life.—Deut. 32:28, 29.
Iketsetse setšoantšo ka kelellong ha u ntse u bala litemana tse hlalosang liketsahalo. Mohlala, nahana ka ketsahalo ea ha Josefa a rekisetsoa Baishmaele ke baholoane ba hae. (Gen. 37:18-28) Ipone u le moo. U bona’ng? U utloa’ng? Ho etsahala’ng? Batho bao ho buuoang ka bona ba ikutloa joang, ba ntse ba nahana’ng? Ha u etsa joalo, u tla utloisisa haholoanyane lintho tseo u li balang.
Etsa lipatlisiso u sebelisa The Watch Tower Publications Index, Tataiso ea ho Etsa Lipatlisiso ea Lipaki Tsa Jehova le tse ling e le hore u rue molemo haholoanyane. Itloaetse tsona haeba li le teng ka puo ea hao. U se ke oa tšaba hore batho ba bang ba u bontše hore na li sebelisoa joang. Li tla u thusa hore u fumane litlhaloso tsa litemana tseo u sa li utloisiseng ’me li u thuse ho fumana lihlooho tse itseng. Sebelisa sehlomathiso sa Phetolelo ea Lefatše le Lecha ea Mangolo a Halalelang haeba se le teng ka puo ea hao kapa ka puo eo u e utloisisang. Se na le limmapa, tatellano ea liketsahalo, mekhoa ea ho bekha, ho metha hammoho le lintho tse ling tse ngata.
Akaretsa lintlha tsa bohlokoa tseo u ithutileng tsona e le hore u hopole lintho tseo u sa tsoa li bala. Li arolelane le batho ba bang. Na ho na le tseo u ka li sebelisang tšimong? Ha u sebelisa lintlha tsena ho thusa batho ba bang, u tla itsoela molemo.