Letsatsi la Bohlokoa ka ho Fetisisa ka 1991
1 Letsatsi la bohlokoa ka ho fetisisa almanakeng ea rōna selemong sena ke Moqebelo, March 30. Ka mor’a shoalane letsatsing leo, re tla be re keteka Sehopotso sa lefu la Jesu. (1 Ba-Kor. 11:20, 24) Ke hobane’ng ha letsatsi la lefu la Jesu le ile la etsoa hore e be letsatsi le hopoloang ka ho khethehileng?
SEHOPOTSO—BOHLOKOA BA SONA
2 Lefu la Jesu e bile ketsahalo ea bohlokoa bokahohleng. Ha moapostola Pauluse a ne a ngolla litho tsa phutheho ea Bokreste e tsoetsoeng ka moea, o itse: “Ka mehla eohle, ha le e-ja bohobe boo, ’me le noela senoelong seo, etlaba le bolela lefu la Morena, a tle a be a fihle.” (1 Ba-Kor. 11:26) Kahoo Sehopotso se lebisa tlhokomelo e khethehileng holim’a bohlokoa ba lefu la Jesu Kreste ho phethahatsoeng ha morero oa Jehova. Se totobatsa se boleloang ke lefu la Jesu la sehlabelo, haholo-holo kamanong le selekane se secha le tsela eo lefu la hae le amang bao e tla ba majalefa hammoho le eena ’Musong oa leholimo.—Joh. 14:2, 3; Ba-Heb. 9:15.
3 Ka hore Jesu a boloke botšepehi ho fihlela lefung la hae, o ile a halaletsa lebitso la Ntate oa hae ’me a bontša hore motho ea phethahetseng a ka ipaka a tšepahala ho Molimo tlas’a teko ea mofuta ofe kapa ofe eo Satane a ka mo tlisetsang eona. Hape lefu la hae le ile la fana ka sehlabelo sa motho ea phethahetseng se neng se hlokahala bakeng sa ho lopolla bana ba Adama ’me la etsa hore ba bangata kamoo ho ka khonehang ba neng ba tla bontša tumelo ba phele ka ho sa feleng lefatšeng la paradeise. Ka baka la sohle se neng se tla finyelloa ka lefu la Jesu, ho ne ho loketse hore a rute barutuoa ba hae ho ikhopotsa lefu la hae.—rsSU maq. 401-2.
KAMOO RE KA BONTŠANG KANANELO KA TENG
4 Lefatše le ba le mekete e mengata har’a selemo, ’me ho etsoa ho hongata ho e ntšetsa pele. Ka lehlakoreng le leng, Sejo sa Morena sa Mantsiboea ke oona feela mokete oo balateli ba inehetseng ba latelang mehlala ea Jesu ba laetsoeng hore ba o keteke. Ntle ho pelaelo, ke mokete o moholo ka ho fetisisa selemong ho Bakreste bohle ba ’nete. Na bohlokoa bo tebileng ba Sejo sa Morena sa Mantsiboea sa sehopotso ha boa lokela ho re susumelletsa ho lebisa tlhokomelo ho sona ka March?
5 Mohlomong beke e ’ngoe le e ’ngoe ka March re ka sebelisa metsotso e seng mekae re buisana le liithuti tsa rōna tsa Bibele ka mangolo a totobatsang bohlokoa ba lefu la Kreste le ho li bontša motheo oa Sehopotso. Hape re ka li khothalletsa hore li latele haufi-ufi ’malo oa Bibele oa Sehopotso bakeng sa March 25-30, joalokaha o bontšitsoe ho Almanaka ea Lipaki tsa Jehova ea 1991. Sena se ka tebisa kananelo ea tsona bakeng sa Sejo sa Morena sa Mantsiboea.
6 Kaha mokete oa Sehopotso o tla ba ka Moqebelo, ho tla ba bonolo haholo hore ba bangata ba lokise litaba tsa bona e le hore ba be teng. Bahoeletsi ba bangata ba sebelisa hamolemo ’nete ea hore ho na le mafelo-beke a mahlano ka March hore ba sebeletse e le bo-pula-maliboho ba thusang. Sena se ba lumella ho ba le karolo e khōloanyane ea ho buella ka matla mokete oa Sejo sa Morena sa Mantsiboea. Se fana ka menyetla e eketsehileng ea ho thusa ba bacha ho itokisa likelellong bakeng sa ketsahalo ena e khethehileng.
7 Ka baka la bohlokoa ba mokete oa Sehopotso, a re etseng sohle seo re ka se khonang ho thusa ba bang hore ba be teng. Likhopotso tse thusang mabapi le boitsebiso bo lokelang ho hlokomeloa ke baholo li ka fumanoa ho Tšebeletso ea Rona ea ’Muso ea March 1989 le ea April 1990.
8 E se eka re ka atamela letsatsi lena la bohlokoa ka ho fetisisa ka 1991 re e-na le temoho e hlakileng le kananelo e tebileng bakeng sa sohle seo lefu la Jesu le se bolelang bakeng sa batho. E, e se eka kaofela ha rōna re ka ba teng mantsiboeeng a March 30 ha barapeli ba ’nete ba Jehova ka botšepehi ba tla be ba boetse ba utloa taelo ea Jesu ea ho “bolela lefu la Morena, a tle a be a fihle.”