Lebokose la Lipotso

◼ Na ha re ntše monehelo habeli bakeng sa lingoliloeng haeba monehelo o ntšoa nakong eo re fumanang lingoliloeng le ha re tšela menehelo e amohetsoeng tšimong ka mabokoseng a menehelo a reretsoeng mosebetsi oa lefatše lohle oa Mokhatlo?

Che. Menehelo e kenang mabokoseng a menehelo bakeng sa mosebetsi oa lefatše lohle oa Mokhatlo hase ea lingoliloeng feela. Bahoeletsi le batho ba hlileng ba thahasellang tšimong ba fumana lingoliloeng ntle ho tefo. Ha bahoeletsi ba ntša menehelo ea bona, ke bakeng sa ho tšehetsa ho hlokomela liofisi tsa makala, mahae a Bethele, sekolo sa boromuoa le sa bosebeletsi, baromuoa, balebeli ba tsamaeang, litsi tsa ho ajoa ha lingoliloeng le litšebeletso tse ling tse ngata tse tlatsetsang tse hlokahalang bakeng sa ho finyella kabelo eo Jesu a e fileng barutuoa ba hae. Ho hatisa lingoliloeng ke karolo e nyenyane feela ea sena.

Ka hona, ha ho amoheloa menehelo e tsoang ho batho ba thahasellang tšimong, ha rea lokela ho re monehelo oo ke “bakeng sa lingoliloeng.” Joalokaha re ba hlalosetsa, ba hlileng ba lakatsang ho bala lingoliloeng tsa rōna ba li amohela ntle ho tefo. Menehelo leha e le efe e fanoang ke ba joalo e tla sebelisetsoa ho hlokomela litšenyehelo tse amehang mosebetsing ona oa lefatše lohle. Hoa tšoana le ka menehelo e etsoang ke bahoeletsi.

Kahoo ha ho na lebaka la hore bahoeletsi ba se ke ba kōpa monehelo bakeng sa mosebetsi oa lefatše lohle, ba beha lebaka la hore ba se ba lefelletse lingoliloeng tseo.