Ho Tobana ka Katleho le Phephetso ea Tšebeletso ea Ntlo le Ntlo
1 Khopolo ea ho ea ka ntlo le ntlo, ho etela batho bao u sa ba tsebeng, e fana ka phephetso ea sebele ho ba bangata ba amohelang borapeli bo hloekileng. Empa lerato le tiileng ho Jehova le thusa motho hore a tobane ka katleho le phephetso ena, esita le ba leng lihlong haholo ka tlhaho ba entse tsoelo-pele ho isa ntlheng ea hore e be baboleli ba nako e tletseng ba litaba tse molemo.
2 Ka Bibeleng ho hlakile hore Bakreste ba pele ba ne ba abela ba bang litaba tse molemo tsa ’Muso oa Molimo ka ho ea ka ntlo le ntlo. (Lik. 5:42, NW; 20:20, 21, NW) Joaloka Bakreste lekholong lena la bo20 la lilemo, le rōna re kopanela mosebetsing ona. Lerato la rōna ho Molimo le ho moahisane oa rōna le re susumeletsa hore re etse mosebetsi ona esita le hoja batho ba ka iphapanya, ba khopeha, ba teneha, kapa ba re hanyetsa ka ho tobileng.
3 Se Finyelloang ke ho Tobana ka Katleho le Phephetso: Nako le nako ha re etela batho, re leka ho jala peō e seng kae ea ’nete, re tseba hore qetellong phello e ka ba ho hlaha ha tholoana ea ’Muso. (Moek. 11:6) Maemo aa fetoha. Ho ka ’na ha etsahala ho hong ho tla etsa hore mong’a ntlo a nahane ka seo e mong oa rōna a ileng a se bua ho eena, kapa a ka ’na a re amohela ketelong e latelang.
4 Tšebeletso ea rōna ea ntlo le ntlo e neha ba sekametseng ’neteng le ho lokeng monyetla oa ho ithuta ka Jehova le merero ea hae, ho ba qalisa tseleng e isang bophelong bo sa feleng. Ka hona ba phehellang menate ea lefatše ba lemosoa ka lerato hore ho hlokahala hore ba fetohe e le hore ba ka fumana kamohelo ea Jehova. Tšebeletso ena e boetse e tsebahatsa lebitso la Jehova ’me e mo tlisetsa tlotliso, ebang beng ba matlo baa mamela kapa che.—Ezek. 3:11.
5 Ho ba tšebeletsong ho re thusa hore re hōlise litholoana tsa moea, tse kang lerato le se nang boithati, thabo, khotso, le mamello. (Ba-Gal. 5:22) Ho re thusa hore re ikokobetse ’me re be le kutloelo-bohloko, kaha ho akareletsa ho etsetsa ba bang molemo. Ho lula re tšoarehile mosebetsing oa Jehova ho re sireletsa lefatšeng.—1 Ba-Kor. 15:58.
6 Thuso Bakeng sa ho Tobana ka Katleho le Phephetso: Ho hlokahala hore ba bacha ’neteng ba ithute kamoo ba ka kopanelang ka teng mosebetsing ona o thabisang. Hangata ba haelloa ke kholiseho ’me ba nyahamisoa ke khopolo feela ea ho ea ka ntlo le ntlo. Re ka buisana le bona ka likhanyetso tse tloaelehileng le seo re ka se buang ha re li araba. Re ka itloaetsa ho sebelisa tse ling tsa litlhahiso tse ntle tse leng bukeng ea Ho Bea Mabaka ha re araba ba thibelang moqoqo. Ke hobane’ng ha u sa ithaopele ho ba thusa hore ba itokisetse tšebeletso ea tšimo? Ba ka boela ba fumana thuso e eketsehileng ka ho ba teng ka mehla libokeng tsa tšebeletso ea tšimo ebe ka mor’a moo ba sebetsa le bahoeletsi ba nang le phihlelo e khōloanyane. Ho sebetsa le sehlopha e ka ba ho khothatsang haholo.
7 Ha re ea ka ntlo le ntlo, re na le tokelo ea ho emela Molimo oa rōna, Jehova. Na ho na le tlotla eo leha e le mang a ka bang le eona ho feta ea ho ba mosebetsi-’moho le Molimo? (1 Ba-Kor. 3:9) Haeba re itšetleha ka eena, moea oa hae o tla re thusa hore re tobane ka katleho le phephetso ea tšebeletso ea ntlo le ntlo.—2 Ba-Kor. 3:5.