Ho Hlōla Mathata a ho Bolela ka Ntlo le Ntlo
‘Re ile ra iteta sebete ka Molimo oa rōna ho le bolella litaba tse molemo tsa Molimo ka ntoa e khōlō.’—1 BATHES. 2:2.
1. Jeremia o ile a tobana le mathata afe, ’me o ile a a hlōla joang?
JEREMIA e ne e le motho ea neng a e-na le maikutlo a tšoanang le a rōna. Ha Jehova a ne a mo tsebisa hore o tla sebetsa e le “moprofeta ho lichaba,” o ile a meketsa: “Oho, ’Musi Morena Jehova! Bona! ha ke tsebe ho bua, etsoe ke sa le moshanyana.” Leha ho le joalo, kaha o ne a tšepa Jehova, o ile a amohela mosebetsi oo. (Jer. 1:4-10) Ka lilemo tse fetang 40, Jeremia o ile a tobana le ho se thahaselloe ha molaetsa, ho khesoa, ho songoa, esita le ho tšoaroa ka mabifi. (Jer. 20:1, 2) Ka linako tse ling, o ne a utloa eka a ka beha meja fatše. Leha ho le joalo, o ile a mamella ho bolela molaetsa o sa rateheng sechabeng seo ho sona batho ba bangata ba neng ba sa o natse. Ka matla a Molimo, Jeremia o ile a finyella seo eena ka boeena a neng a ke ke a se finyella.—Bala Jeremia 20:7-9.
2, 3. Kajeno bahlanka ba Molimo ba tobana le mathata a tšoanang le a Jeremia joang?
2 Kajeno bahlanka ba bangata ba Molimo ba ka utloisisa kamoo Jeremia a neng a ikutloa kateng. Ha re ne re nahana ka mosebetsi oa ho bolela ka ntlo le ntlo, ba bang ba rōna re ne re e-na le maikutlo a hore, ‘Ho hang eo hase ntho eo nka bang ka e etsa.’ Leha ho le joalo, eitse ha re hlokomela hore e ne e le thato ea Jehova hore re bolele litaba tse molemo, re ile ra tlohela ho tsilatsila eaba re kena khabong. Leha ho le joalo, ka nakoana e itseng, boholo ba rōna re ile ra tobana le maemo a ileng a re thatafalletsa hore re tsoele pele ka boboleli. Ke ’nete hore ke bothata hore re qale ho bolela ka ntlo le ntlo le ho tsoela pele re bolela ho fihlela bofelong.—Mat. 24:13.
3 Ho thoe’ng haeba e se e le nakoana u ntse u ithuta Bibele le Lipaki Tsa Jehova ebile u e-ba teng libokeng tsa phutheho empa u tsilatsila ho qala ho bolela ka ntlo le ntlo? Kapa ho thoe’ng haeba u Paki e kolobelitsoeng e thatafalloang ke ho kopanela mosebetsing oa ho bolela ka ntlo le ntlo, le hoja u phela hantle ’meleng hoo u ka khonang ho o etsa? Kholiseha hore batho ba limelo tsohle ba hlōla mathata a ho bolela ka ntlo le ntlo. Le uena u ka a hlōla ka thuso ea Jehova.
Ho Iteta Sebete
4. Ke eng e ileng ea thusa moapostola Pauluse hore a bue litaba tse molemo ka sebete?
4 Ha ho pelaelo hore ua hlokomela hore mosebetsi oa ho bolela o etsoang lefatšeng lohle ha o etsoe ka matla kapa ka bohlale ba motho, empa o etsoa ka moea oa Molimo. (Zak. 4:6) Ho boetse ho joalo le ka boboleli bo etsoang ke Mokreste ka mong. (2 Bakor. 4:7) Nahana ka moapostola Pauluse. Ha a hopola ka nako eo eena le motsoalle oa hae oa moromuoa ba ileng ba tšoaroa hampe ka eona ke bahanyetsi, o ile a ngola a re: ‘Ka mor’a hore pele re utloe bohloko le ho nyelisoa Filipi, re ile ra iteta sebete ka Molimo oa rōna ho le bolella litaba tse molemo tsa Molimo ka ntoa e khōlō.’ (1 Bathes. 2:2; Lik. 16:22-24) Ho ka etsahala hore re se ke ra nahana hore ka linako tse ling e ne e le ntoa hore ’moleli ea chesehang joaloka Pauluse a bolele litaba tse molemo. Leha ho le joalo, joaloka rōna kaofela, Pauluse o ne a lokela ho tšepa Jehova e le hore a bue litaba tse molemo ka sebete. (Bala Baefese 6:18-20.) Re ka etsisa mohlala oa Pauluse joang?
5. Tsela e ’ngoe eo re ka itetang sebete ka eona hore re bolele litaba tse molemo ke efe?
5 Tsela e ’ngoe e re thusang hore re itete sebete ho bolela litaba tse molemo ke thapelo. Pula-maliboho e mong o ile a re: “Ke rapella hore eke nka bua ka kholiseho, hape ke rapella hore ke finyelle lipelo tsa batho, ebile ke rapella le hore ke thabele boboleli. Etsoe mosebetsi ona ke oa Jehova, hase oa rōna, kahoo ha ho letho leo re ka le etsang ntle ho thuso ea hae.” (1 Bathes. 5:17) Bohle re lokela ho rapela re sa phetse hore moea o halalelang oa Molimo o re thuse ho bolela ka sebete.—Luka 11:9-13.
6, 7. (a) Ezekiele o ile a bontšoa pono ea eng, hona e ne e bolela’ng? (b) Pono ea Ezekiele e na le thuto efe bakeng sa bahlanka ba Molimo kajeno?
6 Buka ea Ezekiele e bontša se seng hape se ka re thusang hore re bue ka sebete. Ponong, Jehova o ile a fa Ezekiele moqolo oo ka mahlakoreng a oona a mabeli ho neng ho ngotsoe “lipina tsa koli-ea-malla le sello le seboko” eaba o mo bolella hore a o je, ka ho re: “Mor’a motho, u lokela ho etsa hore mpa ea hao e je, e le hore u ka tlatsa mala a hao ka moqolo ona oo ke u fang oona.” Pono ee e ne e bolela’ng? Ezekiele o ne a lokela ho amohela ka botlalo molaetsa oo a neng a lokela ho o bolela. Ka tsela ea tšoantšetso, o ne o lokela ho fetoha karolo ea hae, o mo ame maikutlo ka botebo. Moprofeta enoa o tsoela pele ho pheta se latelang: “Ka qala ho o ja, ’me molomong oa ka oa e-ba monate joaloka mahe a linotši.” Ho bolella batho molaetsa oa Molimo phatlalatsa ho ne ho thabisa—ho tšoana le mahe a linotši ho Ezekiele. O ile a utloa hore ke tlotla e khōlō ho emela Jehova le ho etsa mosebetsi ona oo a neng a o filoe ke Molimo, le hoja seo se ne se bolela ho fana ka molaetsa o matla ho batho ba sa mameleng.—Bala Ezekiele 2:8–3:4, 7-9.
7 Pono ena e na le thuto ea bohlokoa bakeng sa bahlanka ba Molimo kajeno. Le rōna re na le molaetsa o matla oo re lokelang ho o fa batho bao hangata ba sa ananeleng boiteko ba rōna. E le hore re tsoele pele ho nka mosebetsi oa boboleli oa Bokreste e le tlotla eo re e filoeng ke Molimo, re lokela ho iphepa hantle moeeng. Ha re kuba lintho ka holimo feela ha re ithuta ebile re sa ithute kamehla re ke ke ra fumana se lekaneng hore re amohele Lentsoe la Molimo ka botlalo. Na u ka ntlafatsa boleng ba tsela eo u balang Bibele ka eona le eo u ithutang Bibele ka eona kapa makhetlo ao u etsang see ka ’ona? Na u ka thuisa khafetsa haholoanyane ka seo u se balang?—Pes. 1:2, 3.
Ho Qala Lipuisano Tsa Bibele
8. Ke mokhoa ofe o thusitseng bahoeletsi ba bang ba ’Muso hore ba qale lipuisano tsa Bibele ha ba bolela ka ntlo le ntlo?
8 Ho bahoeletsi ba bangata, karolo e thata ka ho fetisisa ea mosebetsi oa ho bolela ka ntlo le ntlo ke ho qala moqoqo le mong’a ntlo. Ke ’nete hore masimong a mang ho thata ho qala lipuisano le batho. Joalokaha ho bontšitsoe lebokoseng le leqepheng lena, bahoeletsi ba bang ba phutholoha haholo ho bua le batho malapeng a bona ha ba qala puisano ka mantsoe a seng makae ao ba a lokiselitseng esale pele, ebe ka mor’a moo ba neha mong’a ntlo pampitšana. Sehlooho sa pampitšana kapa setšoantšo sa eona se mebala se ka ’na sa khahla mong’a ntlo, ’me seo se ka re fa monyetla oa ho bolela hakhutšoanyane morero oa leeto la rōna le oa ho botsa potso. Mokhoa o mong o ka ’nang oa sebelisoa ke oa ho bontša mong’a ntlo lipampitšana tse tharo kapa tse ’nè tse sa tšoaneng ebe u mo kōpa hore a khethe e le ’ngoe e mo khahlang. Ha e le hantle, sepheo sa rōna hase ho tsamaisa lipampitšana kapa ho li sebelisa lelapeng le leng le le leng feela, empa ke ho qala lipuisano tsa Bibele tse ka fellang ka lithuto tsa Bibele.
9. Ke hobane’ng ha ho lokisetsa hantle e le habohlokoa?
9 Ho sa tsotellehe hore na u sebelisa mokhoa ofe, ho lokisetsa hantle ho tla u thusa hore u be malala-a-laotsoe u be u etse mosebetsi oa ho bolela ka ntlo le ntlo ka cheseho. Pula-maliboho e mong o ile a re: “Ke thaba haholo ha ke lokiselitse hantle. Ho etsa hore ke utloe ke batla ho bua le batho ka seo ke se lokiselitseng.” Pula-maliboho e mong eena o ile a re: “Ha ke tseba seo lingoliloeng tseo ke tla fana ka tsona li buang ka sona, ke chesehela ho li sebelisa.” Le hoja ho e-na le molemo o itseng oa ho buela ka pelong seo u tla se bua le batho, ba bangata ba re ba thusoa ke ho se pheta ba buela holimo. Ho etsa sena ho ba thusa hore ba fe Jehova se molemohali.—Bakol. 3:23; 2 Tim. 2:15.
10. Ho ka etsoa’ng hore liboka tsa tšebeletso ea tšimo e be tse rutang le tse molemo?
10 Liboka tsa tšebeletso ea tšimo tse rutang li re ekeletsa katleho le thabo mosebetsing oa ho bolela ka ntlo le ntlo. Haeba temana ea letsatsi e amana le mosebetsi oa boboleli, e ka baloa ’me ea tšohloa ka bokhutšoanyane. Leha ho le joalo, mor’abo rōna ea tsamaisang seboka sa tšebeletso ea tšimo o lokela ho ipha nako e lekaneng ea ho tšohla nehelano e khutšoanyane kapa ea hore ho etsoe pontšo e bonolo ea nehelano e loketseng tšimo ea phutheho, kapa a ka bua ka boitsebiso bo bong bo rutang bo ka sebelisoang mosebetsing oa boboleli letsatsing leo. Sena se tla boela se hlomella ba teng hore ba atlehe ha ba fana ka bopaki. Haeba baholo le ba bang ba tsamaisang liboka tsena ba lokisetsa hantle esale pele, ba ka finyella sena ba ba ba phetha seboka ka nako e behiloeng.—Bar. 12:8.
Molemo oa ho Mamela
11, 12. Ho mamela ka qenehelo ho ka re thusa joang ho finyella lipelo tsa batho ka litaba tse molemo? Fana ka mehlala.
11 Tokisetso e ntle hase eona feela e re thusang ho qala lipuisano tsa Bibele le ho finyella lipelo tsa batho mosebetsing oa boboleli, empa re thusoa hape ke ho thahasella batho haholo. Tsela e ’ngoe eo re bontšang thahasello eo ka eona ke tsela eo re mamelang ka eona. Molebeli e mong ea tsamaeang o ile a re: “Ho se fele pelo le ho bontša hore u ikemiselitse ho mamela ho na le matla a hlollang a ho etsa hore batho ba batle ho mamela litaba tse molemo ebile ke tsela e hlollang ea ho bontša hore u thahasella batho haholo.” Ho mamela ka qenehelo ho ka etsa hore mong’a ntlo a phutholohe, joalokaha phihlelo e latelang e bontša.
12 Lengolong le ileng la phatlalatsoa koranteng ea Le Progrès, ea Saint-Étienne, Fora, mosali e mong o ile a hlalosa ketelo eo ho eona batho ba babeli ba ileng ba kokota monyako ha hae nakoana ka mor’a lefu le sehlōhō la morali oa hae ea likhoeli li tharo. O ile a ngola, a re: “Ke ile ka lemoha kapele hore ke Lipaki Tsa Jehova. Ke ne ke le mothating oa ho ba kōpa hore ba tsamaee, empa ke ile ka bona bukana eo ba neng ba fana ka eona. E ne e bua ka lebaka leo ka lona Molimo a lumeletseng ho utloa bohloko. Kahoo, ke ile ka etsa qeto ea hore ba kene ka tlung ka morero oa ho hanyetsa seo ba neng ba bua ka sona . . . Lipaki tseo li ile tsa lula nako e ka holimonyana ho hora. Li ile tsa ’mamela ka qenehelo e khōlō, ’me ha li se li tsamaea, ke ile ka ikutloa ke imolohile hoo ke ileng ka lumela hore li nketele hape.” (Bar. 12:15) Ka mor’a nako, mosali enoa o ile a lumela ho ithuta Bibele. Re ka ithuta ho hongata ntlheng ea hore seo a se hopolang ka ketelo eo ea pele, hase seo Lipaki li ileng tsa se bua, empa ke kamoo li ileng tsa mamela kateng.
13. Re ka etsa joang hore tsela eo re bolelang litaba tse molemo ka eona e lumellane le batho bao re kopanang le bona?
13 Ha re mamela ka qenehelo, re hlile re fa batho monyetla oa hore ba re bolelle hore na ke hobane’ng ha ba hloka ’Muso. Sena se re beha boemong bo molemo haholo ba ho ba bolella litaba tse molemo. Mohlomong u bone hore hangata baevangeli ba atlehang ba na le bokhoni ba ho mamela. (Liprov. 20:5) Ba bontša thahasello e khōlō bathong bao ba kopanang le bona mosebetsing oa boboleli. Ha ba thahaselle feela ho ngola mabitso a bona le liaterese tsa bona empa ba boetse ba amehile ka lintho tseo batho bao ba li ratang le tseo ba li hlokang. Ha motho a bolela ntho e mo ammeng ka ho toba, ba etsa lipatlisiso ebe kapele ba khutlela ho ea mo bolella seo ba se fumaneng. Joaloka moapostola Pauluse, ba etsa hore tsela eo ba fanang ka molaetsa oa ’Muso ka eona e lumellane le batho bao ba kopanang le bona. (Bala 1 Bakorinthe 9:19-23.) Ho thahasella batho ka tieo joalo, ho ba hulela litabeng tse molemo ’me ho etsa hore ka tsela e hlollang ba bone “qenehelo e bonolo ea Molimo oa rōna”.—Luka 1:78.
Lula U E-na le Maikutlo a Matle
14. Ha re ntse re etsa mosebetsi oa boboleli, re ka bontša joang hore re na le litšobotsi tsa Jehova?
14 Jehova o re file seriti ka ho re fa bolokolohi ba ho ikhethela. Le hoja e le Molimo ea Matla ’Ohle, ha a qobelle motho hore a mo sebeletse empa o ipiletsa ho batho ka lerato, ’me o hlohonolofatsa ba thabelang ho nka khato ha ba bolelloa ka litokisetso tsa hae tse hlollang. (Bar. 2:4) Joaloka basebeletsi ba hae, nako le nako ha re fana ka bopaki, re lokela ho ba malala-a-laotsoe ho nehelana ka litaba tse molemo ka mokhoa o tšoanelang Molimo oa rōna ea mohau. (2 Bakor. 5:20, 21; 6:3-6) E le hore re etse seo, kamehla re lokela ho lula re e-na le maikutlo a matle ka batho ba tšimong ea rōna. Ke eng e ka re thusang ho etsa see?
15. (a) Jesu o ile a laela baapostola ba hae hore ba etse’ng ha batho ba hana molaetsa? (b) Ke eng e ka re thusang ho tsepamisa maikutlo tabeng ea ho fumana ba tšoanelehang?
15 Jesu o ile a laela balateli ba hae hore ba se ke ba tšoenyeha haholo ha batho ba bang ba hana molaetsa empa ho e-na le hoo, ba tsepamise maikutlo tabeng ea ho fumana ba tšoanelehang. (Bala Matheu 10:11-15.) Ho iketsetsa lipakane tse nyenyane, tseo re ka li finyellang ho ka re thusa hore re etse sena. Mor’abo rōna e mong o itšoantša le motho ea batlang lirafshoa. Lepetjo la hae ke ho re, “ke lebeletse ho fumana khauta neng kapa neng kajeno.” Mora e mong oabo rōna eena o iketselitse pakane “ea hore beke e ’ngoe le e ’ngoe a kopane le motho a le mong ea thahasellang le ho khutlela ho eena ka mor’a matsatsi a seng makae e le hore a ntšetse pele thahasello eo.” Bahoeletsi ba bang ba leka hore ha ho khoneha, ba balle mong’a ntlo ka mong lengolo le le leng. Ebe u ka iketsetsa pakane efe eo u ka e finyellang?
16. Re na le mabaka afe a hore re tsoele pele ho bolela litaba tse molemo?
16 Katleho ea mosebetsi oa ho bolela ka ntlo le ntlo ha ea itšetleha feela ka bohato bo nkoang ke batho ba tšimong. Ke ’nete hore mosebetsi oa boboleli o phetha karolo ea bohlokoa hore batho ba lipelo li ntle ba pholohe, empa o boetse o finyella merero e meng ea bohlokoa. Mosebetsi oa boboleli oa Bokreste o re fa monyetla oa ho bontša hore re rata Jehova. (1 Joh. 5:3) O re thusa hore re qobe ho ba le molato oa mali. (Lik. 20:26, 27) O lemosa batho ba sa tšabeng Molimo hore “hora ea ho ahlola ha hae e fihlile.” (Tšen. 14:6, 7) Ho phaella moo, ka ho boleloa ha litaba tse molemo, lebitso la Jehova le rorisoa lefatšeng kaofela. (Pes. 113:3) Kahoo, ebang batho baa mamela kapa che, re lokela ho tsoela pele re bolela molaetsa oa ’Muso. Ha ho pelaelo hore boiteko bohle ba rōna ba ho bolela litaba tse molemo bo botle ho Jehova.—Bar. 10:13-15.
17. Haufinyane batho ba tla qobelloa ho lemoha eng?
17 Le hoja batho ba bangata kajeno ba sa natse mosebetsi oa rōna oa ho bolela litaba tse molemo, haufinyane ba tla o utloisisa ka tsela e fapaneng. (Mat. 24:37-39) Jehova o ile a tiisetsa Ezekiele hore ha likahlolo tseo a neng a li bolela li phethahala, batho ba ntlo e tletseng borabele ea Iseraele “ka sebele ba ne ba tla boela ba tsebe hore moprofeta o ne a le har’a bona.” (Ezek. 2:5) Ka tsela e tšoanang, ha Molimo a liha likahlolo tsa hae tsamaisong ea hona joale ea lintho, batho ba tla qobelloa ho lemoha hore molaetsa oo Lipaki Tsa Jehova li neng li o bolela libakeng tsa sechaba le ka ntlo le ntlo o ne o hlile o tsoa ho Molimo a le mong feela oa ’nete, e leng Jehova, le hore Lipaki li ne li hlile li sebeletsa e le baemeli ba hae. Re na le tlotla e khōlō hakaakang ea hore re bitsoe ka lebitso la hae le hore re bolele molaetsa oa hae nakong ee ea bohlokoa! E se eka ka thuso ea hae re ka tsoela pele ho hlōla mathata ao re thulanang le ’ona mosebetsing oa ho bolela ka ntlo le ntlo.
U ka Araba Joang?
• Re ka iteta sebete joang hore re bolele litaba tse molemo?
• Ke eng e ka re thusang ho qala lipuisano tsa Bibele mosebetsing oa ho bolela ka ntlo le ntlo?
• Re ka bontša joang hore re thahasella batho ba bang e le kannete?
• Ke eng e ka re thusang hore re lule re e-na le maikutlo a matle ka batho ba tšimong ea rōna?
[Lebokose/Setšoantšo se leqepheng la 9]
Tsela e ’Ngoe ea ho Qala Lipuisano Tsa Bibele
Qala tjena:
◼ Ha u qeta ho lumelisa mong’a ntlo, u ka ’na ua mo fa pampitšana ebe u re: “Lebaka leo ke u etetseng ka lona kajeno ke ho tla buisana le uena ka taba ena ea bohlokoa e khothatsang.”
◼ Kapa u ka ’na ua fana ka pampitšana eaba u re, “Kajeno ke u etetse ka nako e khutšoanyane feela hobane ke thahasella ho tseba hore na u nahana’ng ka taba ena.”
Haeba a amohela pampitšana:
◼ Ntle le ho senya nako, botsa mong’a ntlo hore na o nahana’ng ka sehlooho sa pampitšana eo.
◼ Mamela ka hloko, u batle ho utloisisa maikutlo a mong’a ntlo. Leboha maikutlo a hae ’me u a kenyelletse puisanong.
Ho ntšetsa puisano pele:
◼ U ka bala ua ba ua tšohla lengolo le le leng kapa a ’maloa, u bua u ipapisitse le thahasello ea mong’a ntlo le litlhoko tsa hae.
◼ Ha mong’a ntlo a bontša thahasello, mo fe sengoliloeng ’me ha ho khoneha, u mo bontše hore na thuto ea Bibele e tšoaroa joang. Etsa litokisetso tsa ho khutlela.