Na Likhopotso Tsa Jehova Lia re Tsosolosa Moeeng?
1 Mopesaleme o ile a roka Jehova, a re: “Ke amehile ka likhopotso tsa hao.” (Pes. 119:99, NW) Lentsoe la Seheberu bakeng sa “likhopotso” le fetisa mohopolo oa hore Jehova o khutlisetsa mohopolong oa rōna se boletsoeng melaong ea hae le litaelong tsa hae. Haeba re nka khato ka tsona, li tla re tsosolosa moeeng ’me li re thabise.—Pes. 119:2, NW.
2 Joaloka batho ba Jehova, kamehla re amohela khalemelo le keletso. Boholo ba khalemelo ena ke eo re seng re kile ra e utloa. Le hoja re ananela khothatso ena, re na le tšekamelo ea ho lebala. (Jak. 1:25) Ka mamello Jehova o fana ka likhopotso tse lerato. Moapostola Petrose o ile a tlaleha tse ling tsa likhopotso tsena e le ho ‘tsosa maikutlo a rōna a hloekileng re tle re hopole melao ea Morena.’—2 Pet. 3:1, 2.
3 Nako le nako re hopotsoa ka bohlokoa ba thuto ea botho le ho ba teng libokeng. Sena se etsoa hobane mesebetsi ena e le ea bohlokoa haholo hore re phele hantle moeeng.—1 Tim. 4:15; Ba-Heb. 10:24, 25.
4 Phephetso e khōlō ka ho fetisisa ho ba bang ke ho phetha thōmo ea Bokreste ea ho bolela. Ho hlokahala boiteko, boikemisetso le tiisetso. Le hoja ho re hloka ho eketsehileng, re thusoa hore re ‘tiee’ ka hore ‘maotong a rōna re roale mafolo-folo a Evangeli.’—Ba-Ef. 6:14, 15.
5 Tšebeletso ea rōna e lokela ho susumetsoa ke ho fetang feela ho tseba ka kelellong lintho tseo Jehova a li hlokang. Moapostola Pauluse o re hopotsa hore pelo e fana ka tšusumetso eo re e hlokang bakeng sa ho ‘bolela ka molomo, hore re bolokehe.’ (Ba-Roma 10:10) Haeba re e-na le tumelo e matla ’me pelo ea rōna e sekametse likhopotsong tsa Jehova, re tla qobelleha ho bua le ho rorisa lebitso la hae.—Pes. 119:36; Matt. 12:34.
6 Ha re sebetsa ka thata ho phetha mesebetsi e molemo, ka nepo re lebella hore sena se re tlisetse thabo. (Moek. 2:10) Pauluse o khetholla thabo e le tholoana ea moea oa Jehova, ’me re lokela ho batla ho e bonahatsa ka bongata. (Ba-Gal. 5:22) Petrose o ile a phaella ka ho bontša hore “boiteko bo tiileng” bo tla putsoa ka tšebeletso e behang haholo, e hlahisang thabo.—2 Pet. 1:5-8, NW.
7 Ha re tobane le phephetso, re lokela ho hopola boemo bo tiileng ba baapostola ha ba ne ba re: “Ha ho kamoo re ka lesang kateng, ho bolela tseo re li boneng le tseo re li utloileng.” (Lik. 4:20) Re matlafatsoa hore re tsoele pele ha re hopola hore ‘ka ho etsa joalo, re tla ipholosa, re pholose le ba re utloang.’—1 Tim. 4:16.
8 Ha re tenehe leha e le hona ho khopisoa ke ho amohela likhopotso joalo-joalo. Ho e-na le hoo, re ananela ka botebo molemo oa tsona o fetisisang. (Pes. 119:129) Linakong tsena tse bohloko, rea leboha ha Jehova a ntse a re romela likhopotso ho re tsosolosa moeeng le ho re susumelletsa ho cheseha mesebetsing e metle!—2 Pet. 1:12, 13.