Maeto a ho Boela a Atlehang a Hloka ho Ruta ka Katleho
1 Maeto a ho boela ke karolo ea bohlokoa le e thabisang ea tšebeletso ea rōna ea tšimo. Ke hobane’ng ha re lokela ho ba mafolo-folo ho khutlela ho ba bontšitseng thahasello? Lebitso la Jehova lea tsebahatsoa le ho tlotlisoa ka lebaka la mosebetsi ona oa ho etsa barutuoa, ’me ba tšabang Molimo ba thusoa ho fumana tsela e isang bophelong. (2 Ba-Kor. 2:17–3:3) Ho hlokomela hore ho ameha ka bobeli taba ea ho halaletsa lebitso la Jehova le bophelo ba ba bang ho lokela ho re susumelletsa ho lokisetsa hantle pele re khutlela.
2 Tichere e molemo e tla thusa seithuti ho haha motheong o seng o raliloe. Joalokaha tichere sekolong e hahella tsebong eo liithuti li bang le eona letsatsi le letsatsi, ka mokhoa o tloaelehileng re lokela ho latella ketelo ea rōna ea pele ka litlhaloso tse eketsehileng tabeng e tšoanang. Phello ea sena ke mohopolo o hokahaneng le monahano o hōlang.
3 Ha u khutlela ka mor’a ho tsamaisa bukana ea “Na Ruri Molimo oa re Tsotella?” u ka ’na ua fumana sena se atleha:
◼ “Leetong la ka la pele, re ile ra bua ka ‘mehla ea qetello’ e boletsoeng ka Bibeleng le seo e se bolelang ho rōna. U ka ’na ua ipotsa hore na re tseba joang hore re phela mehleng ea qetello. (2 Tim. 3:1) Barutuoa ba Jesu ba ne ba laba-labela ho fumana karabo ea potso ena. [Bala Mattheu 24:3.] Karabong ea hae, Jesu o ile a hlalosa maemo ao re a bonang tikolohong ea rōna kajeno. A akarelletsa matšoenyeho le pefo tse e-s’o bonoe le ka mohla.” Bontša tšobotsi ea pontšo eo ho builoeng ka eona lirapeng tsa 3 le 4 leqepheng la 20. Haeba karabelo e le ntle, supa litšobotsi tse ling tsa pontšo lirapeng tsa 5 ho ea ho 8 leqepheng la 20. Ithaopele ho khutla ho tla araba lipotso tse phahamisitsoeng leqepheng le qalang la bukana.
4 Ha u latella thahasello bukaneng ea “Morero oa Bophelo ke Eng—U ka o Fumana Joang?” u ka ’na ua re:
◼ “Ke ile ka laba-labela ho ntšetsa pele moqoqo oa rōna ka morero oa bophelo. Ke nahana hore ka bobeli rea lumela hore Molimo o ne a rerile hore re phele lefatšeng lena tlas’a maemo a thabisang le a nang le khotso ho e-na le mofere-fere oo re o bonang kajeno. Na u nahana hore o tla phethahatsa tšepiso ea hae?” Emela karabelo. Bala Esaia 55:11, ebe u bua ka mehopolo e leng lirapeng tsa 25 ho ea ho 27 leqepheng la 30. Buella thuto ea botho ea Bibele e le tsela e molemohali ea ho fumana morero oa bohlokoa bophelong.
5 E le ho latella thahasello e ileng ea bontšoa bukaneng ea “Thabela Bophelo Lefatšeng ka ho sa Feleng!” u ka mo bontša litšoantšo tsa eona hape ebe u re:
◼ “Re buisane ka lefatše le letle le bontšitsoeng sekoahelong sa bukana ena. Ke batla ho u bolella hore na ke hobane’ng ha ho le bohlokoa hore batho ba batlang ho phela mona ba be le tumelo ho Jesu Kreste.” Phetla setšoantšong sa 41, ebe u bala Esaia 9:6. Bua ka setšoantšo sa 62, ebe u bala Johanne 3:16, u hatise bohlokoa ba ho mamela. Hlalosa hore Lipaki tsa Jehova li thusa batho hore ba ithute kamoo ba ka bontšang tumelo ka ho ithuta Bibele le ka ho leka ho phela ka keletso ea eona.
6 Ka mor’a leeto le leng le le leng la ho boela, le hlahlobisise ka sepheo sa ho ntlafatsa katleho ea hao. Ipotse: Na ka kelellong ke ne ke e-na le ntho e tobileng eo ke neng ke itokiselitse ho e bua? Na ke ile ka lula ke lebisitse tlhokomelo Bibeleng? Na ke hahile holim’a motheo o raliloeng ketelong ea pele? Na taba ea ka e ne e lokiselitsoe ho lebisa thutong ea Bibele? Haeba u araba ka hore u entse joalo hoo ho tla u kholisa hore u hahamalla ho ba tichere e molemo ea Lentsoe la Molimo.