Lebokose la Lipotso

◼ Ho lokela hore ho etsoe joang haeba sebui se abetsoeng ho fana ka puo ea phatlalatsa se sa fihle ka nako sebokeng?

Maemong a mang, ketsahalo e ke keng ea qojoa e thibela mor’abo rōna hore a fihle ka nako ho tla fana ka puo eo a e abetsoeng. Haeba ho e-na le lebaka la ho lumela hore o tla tloha a fihla, baholo ba ka ’na ba etsa qeto ea ho tsoela pele ka Thuto ea Molula-Qhooa; Seboka sa Phatlalatsa se ka latela ka morao. Ho thoe’ng haeba ho hlakile hore sebui ha se na ho fihla? Mohlomong se seng sa libui tsa phutheho se ka fana ka puo leha e le efe eo se neng se se se e lokiselitse.

Hangata ho lokisetsa ka hloko esale pele ho thibela bothata bona. Ea khethetsoeng ho fana ka likabelo tsa lipuo tsa phatlalatsa o lokela ho iteanya le sebui se seng le se seng bonyane beke pele e le hore a se hopotse ka kabelo ea sona. Khopotso ena e lokela ho akarelletsa nako ea seboka, aterese ea Holo ea ’Muso le nomoro ea fono, le litaelo tse hlakileng tsa hore se fumane moo holo e leng teng. Sebui se lokela ho hlokomela makolopetso ana ka hloko. Se lokela ho nka kabelo ena ka botebo, se lokise litaba tsa sona kamoo ho hlokahalang kateng e le hore se ka phethahatsa boikarabelo bona. Haeba ho hlaha ntho e ’ngoe e neng e sa lebelloa, e tla se thibela ho fana ka puo eo, se lokela ho iteanya le motho ea abetsoeng ho fana ka likabelo tsa lipuo tsa phatlalatsa kapele e le hore ho ka etsoa tokisetso e ’ngoe. Ho lokela hore ho etsoe boiteko bo bong le bo bong ho thibela liphetoho tsa motsotso oa ho qetela. Haeba sebui se liehile ’me se tla siuoa ke nako ka metsotso e seng mekae, se ka etsa hore se letsetse Holong ea ’Muso e le hore barab’abo rōna ba ka tseba hore na ba nke bohato bofe.

Ho utloisisa seo likabelo tsa puo ea phatlalatsa li leng sona, ho lokisetsa hantle esale pele le likhopotso, le ho falimehela boemo, li ka tiisa hore phutheho e tla thabela puo ea phatlalatsa e molemo beke le beke.