Ho Lebisa Liithuti Mokhatlong o Tšehetsang Lebitso la Rōna
1 “Ke molaetsa o buuoang ka lipuo tse fetang 200. Ke molaetsa o utluoang linaheng tse fetang 210. Ke molaetsa o isoang ho motho ka seqo hohle moo batho ba ka fumanoang. Kaofela ke karolo ea phutuho e khōlōhali ea ho bolela eo lefatše le e-song ho ka le e tseba, molaetsa o kopanyang limilione lefatšeng ka bophara. Lipaki tsa Jehova li ’nile tsa hlophisoa ho phetha mosebetsi ona ka lilemo tse fetang lekholo!”
2 Ke kamoo ho qalang thapholiso ea video ea Jehovah’s Witnesses—The Organization Behind the Name. E tsoela pele ho arabela lipotso tsena: Hantle-ntle Lipaki tsa Jehova ke bo-mang? Tšebetso ea tsona e hlophisoa joang? E tsamaisoa joang? E tšehetsoa joang ka lichelete? E hatisa ho bashebelli ’nete ea hore “Lipaki tsa Jehova lefatšeng ka bophara li ’nile tsa koetlisoa e le mokhatlo ho thusa baahelani ba tsona ho haha tumelo Bibeleng,” ’me e ba khothalletsa ho iponela ka bobona mokhatlo o tšehetsang lebitso la rōna. Ka mor’a ho bona video ena, mosali e mong ea neng a ithuta o ile a lla ke thabo le kananelo ’me a re: “Ke mang ea ke keng a bona hore ona ke mokhatlo o hlophisitsoeng oa Molimo oa ’nete, Jehova?”—Bapisa le 1 Bakorinthe 14:24, 25.
3 Mosali e mong o ne a ithuta Bibele a tsamaea a tlohela ka nako e telele, empa o ne a sitoa ho amohela ’nete ea hore Boraro-bo-bong ke thuto ea bohata. Joale eena le monna oa hae ba ile ba bontšoa video ea rōna. Ba ile ba khahloa haholo ke pontšo eo ’me ba e shebella habeli bosiung bo le bong. Thutong ea bona e latelang, mosali o ile a bolela takatso ea hae ea hore o batla ho ba Paki. O ile a bolela hore o ’nile a lebisa tlhokomelo ho lumeleng ha hae Boraro-bo-bong ’me a hlōleha ho talima mokhatlong oa rōna o hlophisitsoeng le bathong ba ho oona. Videong eo o ile a hlokomela hore o ne a fumane mokhatlo oa ’nete oa Molimo. O ile a batla ho qala ho bolela ka ntlo le ntlo hang-hang. Ka mor’a ho hlalosetsoa mehato e hlokahalang bakeng sa ho ba mohoeletsi ea sa kolobetsoang, o ile a re: “Ke tla oela temeng ka potlako.” O ile a tsoa kerekeng ea hae, a qala mosebetsing oa tšebeletso ea tšimo, ’me ea e-ba ea atlehang haholo ho hanyetseng Boraro-bo-bong.
4 Ho fumanehile hantle hore liithuti tsa Bibele li tsoela pele hantle moeeng le ho hōla tsebong ka potlako haholo ha li hlokomela mokhatlo oa Jehova o hlophisitsoeng ’me li kopanela le oona. Habohlokoahali, ka mor’a hore ba 3000 ba kolobetsoe ka Pentekonta, “ba tsoela pele ho inehela thutong ea baapostola le ho kopaneleng hammoho.” (Lik. 2:42, bapisa le NW botlaaseng ba leqephe.) Ke habohlokoa hore re thuse liithuti hore li etse se tšoanang le kajeno. Re ka etsa joalo joang?
5 Jara Boikarabelo: E mong le e mong ea etsang barutuoa o tlameha ho hlokomela hore ke boikarabelo ba hae ho lebisa seithuti sa Bibele mokhatlong o hlophisitsoeng oa Molimo. (1 Tim. 4:16) Nako e ’ngoe le e ’ngoe ea thuto e lokela ho talingoa e le mohato o eang pele ho ea letsatsing le thabisang ha motho enoa e mocha a tla be a tšoantšetsa boinehelo ba hae ho Jehova ka kolobetso ea metsing. E ’ngoe ea lipotso tseo a tlang ho li botsoa nakong ea tšebeletso ea kolobetso ke hore: “Na ua utloisisa hore boinehelo ba hao le kolobetso li u khetholla u le e mong oa Lipaki tsa Jehova kamanong le mokhatlo o hlophisitsoeng oa Molimo o tsamaisoang ke moea?” Kahoo, ke habohlokoa hore a hlokomele hore a ke ke a sebeletsa Molimo kantle le hore a kopanele ka mafolofolo le phutheho ea ’nete ea Bokreste.—Mat. 24:45-47; Joh. 6:68; 2 Bakor. 5:20.
6 Tsoela pele ho ruta seithuti ka phutheho ea sebaka seo le mokhatlo oa machaba o tšehetsang Lipaki tsa Jehova. Etsa sena nakong e ’ngoe le e ’ngoe ea thuto ea Bibele, ho qala ka ea pele. Ho tloha qalong feela, memela seithuti libokeng, ’me u tsoele pele ho se mema.—Tšen. 22:17.
7 Sebelisa Lithulusi Tse Lokiselitsoeng: Lingoliloeng tsa rōna tse molemohali tse ka sebelisoang bakeng sa ho khanna lithuto tsa mahae tsa Bibele ke bukana ea Ke Eng Seo Molimo a se Hlokang ho Rōna? le buka ea Tsebo e Isang Bophelong bo sa Feleng. Ka bobeli li totobatsa hore hoa hlokahala ho kopanela le phutheho. Qetello ea thuto ea 5 bukaneng ea Seo a se Hlokang e re: “Ho hlokahala hore u tsoele pele ho ithuta ka Jehova le ho mamela lintho tseo a li hlokang. Ho ea libokeng Holong ea ’Muso ea Lipaki tsa Jehova ea sebakeng sa haeno ho tla u thusa ho etsa joalo.” Buka ea Tsebo khafetsa e khothalletsa seithuti ho tloaelana le ba bang libokeng. Khaolo ea 5, serapeng sa 22, e atolosa memo ena: “Lipaki tsa Jehova . . . ka mofuthu li u khothalletsa hore u kopanele le tsona ho rapeleng Molimo ‘ka moea le ’nete.’ (Johanne 4:24)” Khaolo ea 12, serapeng sa 16, e re: “Ha u ntse u tsoela pele ho ithuta ’me u ho etsa tloaelo ea hao ho ba teng libokeng tsa Lipaki tsa Jehova, tumelo ea hao e tla matlafatsoa le ho feta.” Khaolo ea 16, serapeng sa 20, e re: “Itloaetse ho ba teng libokeng tsa Lipaki tsa Jehova.” Ea phaella: “Sena se tla u thusa hore u utloisise ebe joale u sebelisa tsebo ea Molimo bophelong ba hao ’me se tla u tlisetsa thabo. Ho ba karolo ea boena ba Bokreste ba lefatšeng ka bophara ho tla u thusa ho lula haufi le Jehova.” Ka mokhoa o batsi khaolo ea 17 e bua ka kamoo motho a fumanang tšireletso ea ’nete kateng har’a batho ba Molimo. Ha re ithuta le ba bang, ke boikarabelo ba rōna ho hatisa likarolo tsena tsa boitsebiso.
8 Bukana ea Lipaki tsa Jehova—Li Etsa Thato ea Molimo li Kopane Lefatšeng ka Bophara ke thulusi e ntle e hlahisitsoeng hore e tloaelanye batho ka bomong le mokhatlo o le mong o bonahalang oo Jehova a o sebelisang kajeno ho phetha thato ea hae. Boitsebiso bo qaqileng boo e bo fupereng ka tšebeletso ea rōna, liboka tsa rōna le tlhophiso li tla khothalletsa ’mali hore a kopanele le rōna ho rapeleng Molimo. Hang ha thuto ea Bibele e thehiloe, ho buelloa hore re fe seithuti kopi ea bukana ena hore se ipalle eona. Ha ho hlokahale hore u e bale le sona joalokaha ho ne ho etsoa nakong e fetileng.
9 Tse ling tsa livideo tseo Mokhatlo o li hlahisitseng ke lithulusi tse babatsehang bakeng sa ho lebisa liithuti mokhatlong o hlophisitsoeng o tšehetsang lebitso la rōna. Ho ne ho tla ba hotle haeba li ne li ka li shebella: (1) The New World Society in Action, tlhahlobo ea filimi ea 1954 e ileng ea bontša moea o bonolo, o atlehang le o lerato oo ka oona mokhatlo o hlophisitsoeng oa Jehova o sebetsang; (2) United by Divine Teaching, e hlahlobang bonngoe bo nang le khotso bo ’nileng ba bonahatsoa likopanong tsa rōna tsa machaba Europe e ka Bochabela, Amerika Boroa, Afrika le Asia; (3) To the Ends of the Earth, e ileng ea tšoaea ho ketekela lilemo tse 50 Sekolo sa Bibele sa Gileade sa Watchtower se thehiloe le ho bontša tšusumetso eo baromuoa ba bileng le eona mosebetsing oa ho bolela lefatšeng ka bophara; (4) Jehovah’s Witnesses Stand Firm Against Nazi Assault, e phetang histori e hlollang ea sebete sa Lipaki le tlhōlo ea tsona ha li tobane le mahloriso a sehlōhō a Hitler; ’me joalokaha u ne u ka lebella, le (5) Jehovah’s Witnesses—The Organization Behind the Name.
10 Beha Lipakane Tse Eketsehileng Mabapi le Liboka: Ho tlameha ho hlalosetsoe liithuti hore re hloka thupelo e etsetsoang motho boinotšing kemisong ea thuto ea lelapa ea Bibele le lipuisano tsa sehlopha tse fanoang libokeng tsa phutheho. (Joh. 6:45) Ho hlokahala hore e mocha a tsoele pele ka tsela e lekanang kutloisisong ea hae ea Mangolo le ea mokhatlo o hlophisitsoeng. Ho finyella seo, ha ho na se nkelang ho ea libokeng sebaka. (Baheb. 10:23-25) Qala ho memela motho libokeng tsa phutheho li sa tloha feela. Ba bang ba sa tsoa thahasella ba qala ho ea libokeng le pele ba e-ba le thuto ea kamehla ea Bibele ea lehae. Ka ho hlakileng, re batla ho beha mohlala o loketseng ka borōna ka hore re be teng kamehla.—Luka 6:40; Bafil. 3:17.
11 Se fe boitsebiso bo lekaneng ka liboka le hore na li tsamaisoa joang e le hore seithuti se ka ikutloa se phutholohile ha se e-ba teng sebokeng ka lekhetlo la pele. Kaha batho ba bang ha ba phutholohe ha ba e-ea sebakeng se secha ka lekhetlo la pele, ho ka ’na ha e-ba molemo ho tsamaea le seithuti ho ea Holong ea ’Muso ha se qala ho ea sebokeng. Se tla ikutloa se phutholohile haholoanyane ha u e-na le sona ha se kopana le litho tsa phutheho. Ka holim’a tsohle, e-ba moamoheli ea molemo oa moeti oa hao, mo etse hore a ikutloe a amohelehile ’me a phutholohile.—Mat. 7:12; Bafil. 2:1-4.
12 Khothalletsa seithuti ho ba teng kopanong e khethehileng ea letsatsi, kopanong ea potoloho, kapa kopanong ea setereke ha ho hlaha monyetla oa pele. Mohlomong u ka se kopanyelletsa litokisetsong tsa hao tsa sepalangoang.
13 Kenya Kananelo e Tlohang Botebong ba Pelo: Ho Hlophisetsoa ho Phetha Tšebeletso ea Rōna, leqepheng la 92, ea hlalosa: “Haeba meqoqo ea hao le batho ba thahasellang e senola kamoo u ananelang kateng mokhatlo o hlophisitsoeng oa Jehova, ho tla ba bonolo haholoanyane hore ba hlaolele kananelo e joalo ’me ho tla ba khannela ho tsoela pele ba hōla tsebong ea Jehova.” Kamehla bua ka kholiseho, le ka mohla u se ke ua fana ka maikutlo a mabe, ka phutheho ea haeno. (Pes. 84:10; 133:1, 3b) Lithapelong tseo u li etsang thutong ea Bibele, bua ka phutheho le tlhokahalo ea hore seithuti se kopanele kamehla ho eona.—Baef. 1:15-17.
14 Ka sebele re batla hore ba bacha ba hōlise kananelo e tlohang botebong ba pelo bakeng sa botsoalle bo thabisang le tšireletso ea moea tse fumanoang har’a batho ba Molimo. (1 Tim. 3:15; 1 Pet. 2:17; 5:9) Joaloka Lipaki tsa Jehova, a re etseng sohle seo re ka se khonang ho lebisa liithuti tsa Lentsoe la Molimo mokhatlong o hlophisitsoeng o tšehetsang lebitso la rōna.
[Ntlha e Qolotsoeng e leqepheng la 3]
Liithuti li tsoela pele moeeng ka potlako ha li iponela mokhatlo o hlophisitsoeng ka botsona
[Ntlha e Qolotsoeng e leqepheng la 4]
Se ke ua lieha ho memela liithuti ho ea libokeng