Lihlooho Tsa Malapa—E-bang le Kemiso e Hlophisehileng ea Lintho Tsa Moea
1 Le hoja Daniele a ile a phela ka lilemo tse mashome Babylona e tletseng borapeli ba litšoantšo le tšenyeho, o ne a tsebahala ka ho sebeletsa Jehova “ka tiisetso.” (Dan. 6:16, 20) O ile a boloka bomoea ba hae joang? Tlaleho ea Bibele e bontša hore o ne a e-na le kemiso e hlophisehileng ea ho phetha mesebetsi e amanang le borapeli ba ’nete. Ka mohlala, o ne a tloaetse ho rapela ka makhetlo a mararo ka letsatsi a le ka kamoreng ea hae e marulelong. (Dan. 6:10) Ntle ho pelaelo, o ne a boetse a e-na le kemiso e tsitsitseng ea mesebetsi e meng ea moea, e kang ho bala Molao. Ka hona, ha a ne a tobana le teko e sokelang bophelo ba hae, Daniele ha aa ka a thekesela boinehelong ba hae ho Jehova, ’me o ile a pholosoa ka mohlolo.—Dan. 6:4-22.
2 Ka ho tšoanang le kajeno, re lokela ho ikitlaelletsa ho ‘lula re falimehile ka tiisetso eohle.’ (Baef. 6:18) Lefatše leo re phelang ho lona “le rapaletse matleng a ea khopo.” (1 Joh. 5:19) Khanyetso kapa liteko li ka hlaha ka tšohanyetso ’me tsa beha tumelo ea rōna tekong. Nakong ea matšoenyeho a maholo, bahlanka ba Molimo ba tla hlaseloa ka ho feletseng ke Gogo oa Magogo, ’me ho tla bonahala eka ba ke ke ba phonyoha. Sena se tla hloka hore ba tšepe Jehova ka ho feletseng.—Ezek. 38:14-16.
3 “Thuso e ’ngoe ea bohlokoa ke ho etsa hore ho bala Bibele, ho ithuta le ho ba le puisano e be tsela ea bophelo ea lelapa.” Ke se boletsoeng kenyelletsong ea tšoantšiso ea kopano ea setereke ea 1998 e neng e e-na le sehlooho se reng “Malapa—Etsang Hore ho Bala Bibele Kamehla e be Mokhoa oa Lōna oa Bophelo!” E ile ea tsoela pele: “Ha malapa a latela lenaneo le joalo kamehla le ka mokhoa o etsang hore Bibele e phele, mokhoa ona o thehiloeng Bibeleng o ka ba le phello e molemo haholo lelapeng. O eketsa tsebo ea rōna. O matlafatsa tumelo ea rōna. ’Me o re fa mehlala eo re ka e etsisang ea banna le basali ba boholo-holo ba neng ba tšepahala ka ho tebileng, e leng mehlala e re susumetsang le ho re khannela hore re emele ’nete.” Ha re ntse re hlahloba likarolo tse sa tšoaneng tsa kemiso e hlophisehileng ea lintho tsa moea, lihlooho tsa malapa li lokela ho hlokomela litsela tseo ka tsona li ka ntlafatsang lenaneo la moea la malapa a tsona.
4 Hlahlobang Lentsoe la Molimo Kamehla: “Ha ’Muso oa Molimo o busa o sa hanyetsoe ’me thato ea hae e etsoa lefatšeng joalokaha e etsoa leholimong, ha ho batho ba sehlōhō—che, esita le liphoofolo—ba tla ‘baka tšenyo leha e le efe.’ (Esa. 11:9; Mat. 6:9, 10)” Mantsoe ao a hlahile litlhalosong tsa temana ea la 11 September bukaneng ea Ho Hlahlobisisa Mangolo Kamehla—2001. Khopotso ee e bile e tšelisang hakaakang! Joaloka hlooho ea lelapa, na u tloaetse ho hlahloba temana ea Bibele kamehla le litlhaloso tsa eona le lelapa la hao? Sena se molemo haholo. Haeba ho sa khonehe hore le kopane hammoho hoseng, mohlomong le ka kopana hamorao letsatsing leo. Ntate e mong o ile a re: “Lijo tsa mantsiboea e ’nile ea e-ba nako e loketseng bakeng sa hore re buisane ka temana ea letsatsi ea Bibele.”
5 Haeba le se le ntse le e-na le kemiso e hlophisehileng ea ho buisana ka temana ea letsatsi le le lelapa, rea le babatsa. Mohlomong le ka eketsa sena ka hore le bale le karolo e itseng ea Bibele. Ba bang ba tloaetse ho bala khaolo eohle eo temana ea letsatsi e nkiloeng ho eona. Ba bang ba bala ka ho latellana likhaolo tsa buka e itseng ea Bibele eo ba e khethileng. Ho bala Bibele kamehla ho tla thusa lelapa la hao ho hlaolela tšabo e loketseng ea ho se halefise Jehova ’me ho tla totisa takatso ea lona ea ho etsa thato ea hae.—Deut. 17:18-20.
6 Lenaneo la lelapa la hao la ho bala Bibele le la ho hlahloba temana ea letsatsi le tla ba molemo le ho feta haeba le ka ipha metsotso e se mekae le tšohla bohlokoa ba boitsebiso boo. Buka ea Sekolo sa Tšebeletso, leqepheng la 60, e fana ka tlhahiso ena: “Le ka ’na la khetha litemana tse seng kae ’malong oa Bibele oa beke eo, le buisane ka moelelo oa tsona ebe le botsa lipotso tse kang tsena: ‘Taba ee e re thusa joang? Re ka sebelisa litemana tsee joang tšebeletsong? Li senola eng ka Jehova le ka tsela ea hae ea ho etsa lintho, ’me seo se hōlisa kananelo ea rōna bakeng sa hae joang?’” Puisano e joalo ea lintho tsa moea e tla thusa lelapa lohle la hao ho ‘tsoela pele le lemoha seo thato ea Jehova e leng sona.’—Baef. 5:17.
7 Thuto ea Lelapa: Ho tšoara thuto ea lelapa beke e ’ngoe le e ’ngoe le sa phetse ke tsela e molemo eo lihlooho tsa malapa li ka bontšang bana ba tsona hore lintho tsa moea li nka sebaka sa pele. Mohlankana e mong oa hopola: “Ka linako tse ling Ntate o ne a fihla a khathetse haholo ha a e-tsoa mosebetsing hoo a neng a thatafalloa le ke ho lula a sa thibasele, empa ho ntse ho le joalo thuto e ne e tšoaroa, ’me hona ho re thusitse ho ananela botebo ba eona.” Bana le bona ba ka etsa hore tokisetso ena e atlehe. Lelapa le leng le nang le bana ba robong, kamehla le tsoha ka hora ea bohlano e le hore le tšoare thuto ea lelapa hobane ho sa khonehe hore le e tšoare ka nako e ’ngoe.
8 E le hore thuto ea lelapa e atlehe, hlooho ea lelapa e lokela ‘ela hloko kamehla ho ruta ha eona.’ (1 Tim. 4:16) Buka ea Sekolo sa Tšebeletso, leqepheng la 32, e re: “Ho ka boleloa hore thuto e atlehileng ea lelapa e qala ka hore u ithute le lelapa la hao ka bolona. Litho tsa lelapa la hao li tsoela pele joang moeeng? . . . Ha u le tšebeletsong ea tšimo le bana ba hao, na ba ikutloa ba phutholohile ho ipolela hore ke Lipaki Tsa Jehova ka pel’a lithaka tsa bona? Na ba thabela lenaneo la lōna la ho bala le ho ithuta Bibele le le lelapa? Na ruri ba etsa hore tsela ea Jehova e be tsela ea bona ea bophelo? Ho ela lintho seli ho tla bonahatsa seo uena, joaloka hlooho ea lelapa, u lokelang ho se etsa ho tiisa le ho haha litšoaneleho tsa moea ho setho ka seng sa lelapa.”
9 Liboka Tsa Phutheho: Ho lokisetsa liboka tsa phutheho le ho ba teng ho tsona e lokela ho ba karolo ea bohlokoa ea kemiso ea lōna ea beke le beke. (Baheb. 10:24, 25) Ka linako tse ling, le ka ’na la khona ho lokisetsa liboka tse ling le le lelapa. Ho e-na le ho emela motsotso oa ho qetela, na le ka etsa litokisetso tsa hore le lokisetse esale pele? Ho ba le kemiso e hlophisehileng ntlheng ena ho tla ntlafatsa boleng ba tokisetso ea lōna le melemo eo le tla e fumana libokeng.—Liprov. 21:5.
10 Litšobotsi tse khethollang kemiso e atlehang ea lintho tsa moea ke boleng ba eona le ho tsitsa ha eona. Ho thoe’ng haeba maemo a le thatafalletsa ho lokisetsa liboka kaofela? Buka ea Sekolo sa Tšebeletso, leqepheng la 31, e fana ka tlhahiso ena: “Qoba leraba la ho bala boitsebiso boo ka potlako e le hore feela u bo qete kapa ho hobe le ho feta, qoba leraba la ho se ithute bona ho hang hobane u bona hore u ke ke ua bo qeta kaofela. Ho e-na le hoo, lekanyetsa hore na ke boitsebiso bo bokae boo u ka ithutang bona ’me u e etse hoo hantle. Etsa joalo beke le beke. Ha nako e ntse e feta, leka ho ntlafatsa ka ho akarelletsa liboka tse ling.”
11 Ha malapa a fihla libokeng pele ho nako, sena se a thusa ho ba le boikutlo bo loketseng ba ho rorisa Jehova le ho rua molemo thupelong eo a fanang ka eona. Na lelapa la hao le tloaetse ho etsa see? Sena se hloka hore lintho li hlophisoe hantle le hore litho tsohle tsa lelapa li sebelisane hammoho. Haeba u hlokomela hore lelapa la hao le atisa ho etsa lintho ka lepotlapotla ebile le imeloa kelellong ka matsatsi a liboka, na le ka fetola kemiso ea lōna? Na ho na le lintho tse ka etsoang pele ho nako? Haeba setho se seng sa lelapa se e-na le mesebetsi e mengata eo se lokelang ho e etsa, na litho tse ling tsa lelapa li ka thusa? Na ho ne ho ka fokotsa ho imeloa kelellong haeba bohle ba ne ba ka itokisetsa ho tloha metsotso e se mekae esale pele ha ba e-ea libokeng? Ho hlophisa lintho hantle ho thusa hore ho be le moea oa khotso ka lelapeng le ka phuthehong.—1 Bakor. 14:33, 40.
12 Tšebeletso ea Tšimo: Ho beha nako ea ho kopanela tšebeletsong ke karolo e ’ngoe ea kemiso e hlophisehileng ea lintho tsa moea. Mohlankana e mong ea bitsoang Jayson oa hopola: “Lapeng leso, Moqebelo o mong le o mong hoseng, e ne e le nako ea ho ea tšebeletsong ea tšimo. Hona ho ne ho le molemo ho ’na hobane ka ho kopanela tšebeletsong haholoanyane, ke ne ke bona molemo oo e o finyellang ’me ke e thabela haholo.” Ba bangata ba hōliselitsoeng malapeng a Lipaki le bona ba hlokometse hore ho beha nako ea ho kopanela tšebeletsong beke e ’ngoe le e ’ngoe ho ba thusitse ho hatela pele e le basebeletsi ba Bakreste.
13 Kemiso e hlophisehileng e boetse e ka thusa ho etsa hore nako eo lelapa la lōna le e qetang tšebeletsong ea tšimo e be e monate ka ho fetisisa le e behang litholoana haholoanyane. See se ka finyelloa joang? Molula-Qhooa oa July 1, 1999, leqepheng la 21, o fane ka tlhahiso e latelang: “Na ka linako tse ling u sebelisa nako e itseng ea thuto ea lelapa bakeng sa ho thusa litho tsa lelapa la hao ho lokisetsa tšebeletso ea tšimo ea beke eo? Ho etsa joalo ho ka ba molemo haholo. (2 Timothea 2:15) Ho ka thusa ho etsa hore tšebeletso ea bona e be le morero ’me e behe litholoana. Ka linako tse ling, u ka ’na ua sebelisa nako eohle ea thuto bakeng sa tokisetso e joalo. Khafetsa-khafetsa, u ka ’na ua sebetsana le likarolo tse itseng tsa tšebeletso ea tšimo ka ho buisana le lelapa ka tsona hakhutšoanyane qetellong ea thuto ea lelapa kapa nakong e ’ngoe e itseng har’a beke.” Na lelapa la hao le lekile see?
14 Le ’Ne le Tsoele Pele: Ho sena seo re sa tsoa se hlahloba, na u hlokometse likarolo tseo lelapa la hao le etsang hantle ho tsona? Le babatse, ’me le leke ho ntlafatsa likarolong tsena. Haeba u hlokomela likarolo tse ’maloa tse lokelang ho ntlafatsoa, khetha e le ’ngoe kapa tse peli tseo le ka qalang ho sebeletsa ho tsona. Haeba li se li fetohile karolo ea kemiso ea lōna ea lintho tsa moea, sebeletsang ho e le ’ngoe kapa tse ling tse peli. E-bang le boikutlo bo nepahetseng le kahlolo e molemo. (Bafil. 4:4, 5) Ho ba le kemiso e hlophisehileng ea lintho tsa moea bakeng sa lelapa la hao ho hloka boiteko bo boholo, empa seo se tšoanelehela boiteko boo, kaha Jehova oa re tiisetsa: “Ha e le ea ipolokang tseleng e behiloeng, ke tla etsa hore a bone poloko ea Molimo.”—Pes. 50:23.