Le ’Ne le Tsamaee ka ho Tsoelang Pele ka Mokhoa o Laolehileng oa ho Etsa Lintho
1 Moapostola Pauluse o ne a e-na le kameho e lerato e khethehileng ka phutheho ea Filippi, eo a phethileng karolo e khōlō ho thehoeng ha eona. O ne a leboha litokisetso tsa bona tse mosa tsa lintho tse bonahalang ’me o ile a bua ka eona e le mohlala o motle.—2 Ba-Kor. 8:1-6.
2 Lengolo la Pauluse ho Bafilippi le ne le susumetsoa ke lerato le tebileng. Buka Insight, Moqolo 2, leqepheng la 631, ea tlaleha: “Ho pholletsa le lengolo lohle o khothalletsa phutheho ea Filippi hore e tsoele pele tseleng ea eona e ntle—ea ho batla tlhalohanyo e khōloanyane le ho tšoara ka tieo Lentsoeng la bophelo, tumelo e matla haholoanyane, le tšepo moputsong o tlang.” Ba ile ba arabela ka mofuthu, ba tiisa tlamo ea lerato pakeng tsa bona le moapostola. Mantsoe a Pauluse a ba le moelelo o khethehileng ho rōna kajeno, a re fa lebaka le utloahalang la ho nahana keletso ea hae ka hloko, haholo-holo se boletsoeng ho Ba-Filippi 3:15-17.
3 Boikutlo ba Kelello bo Bontšang Khōlo ke ba Bohlokoa: Ho Ba-Filippi 3:15, Pauluse o ngotse joaloka monna ea nang le lilemo tse ngata tsa phihlelo. O ile a lumela hore Bafilippi ba hatela pele moeeng, ’me a ipiletsa ho bona kaha e le Bakreste ba hōlileng ba nang le boikutlo bo nepahetseng ba kelello. Ha feela boikutlo ba bona ba kelello bo bonahatsa boikokobetso le kananelo tse bontšitsoeng ke Jesu, ba ne ba tla tsoela pele ba “sa tšoauoe phoso ’me ba hloka molato, bana ba Molimo ba se nang sekoli . . . , ba tšoareletseng ka matla lentsoeng la bophelo.” (Ba-Fil. 2:15, 16, NW) Ha re bala mantsoe a Pauluse, re lokela ho ikutloa eka o bua le rōna. Kahoo ka tieo re lakatsa ho ba le boikutlo ba kelello bo tšoanang le boo Jesu a neng a e-na le bona le ho bonahatsa kananelo e ikokobelitseng bakeng sa litokelo tsa rōna. Re ipiletsa ho Jehova ka thapelo re sa khaotse, re kōpa thuso litabeng tsena le tse ling.—Ba-Fil. 4:6, 7.
4 Joalokaha Ba-Filippi 3:16 (NW) e bontša, kaofela ha rōna re lokela ho ikitlaelletsa ho hatela pele. Lentsoe “khatelo-pele” le bolela “ho ea pele, ho etsa tsoelo-pele.” Batho ba hatelang pele ba “thahasella likhopolo tse ncha, lintho tse fumanoeng, kapa menyetla.” Pauluse o ne a batla hore Bafilippi ba utloisise hore ha ho mohla Bokreste bo tenang ’me ba ipolelang hore baa bo latela ba tlameha ho lula ba hatela pele. Moea oa bona oa ho etsa khatelo-pele o ne o tla bontšoa ke boikemisetso ba bona ba ho itlhahloba, ho lumela mefokolo ea bona, le ho hahamalla menyetla ea ho etsa ho eketsehileng kapa ho ntlafatsa boleng ba seo ba neng ba se etsa. Kajeno mokhatlo o hlophisitsoeng oa Jehova oa lefatšeng o lula o hatela pele, o ntse o eketsa tekanyo ea mosebetsi oa oona le kutloisiso ea oona ea Lentsoe la Molimo. E mong le e mong oa rōna o tlameha ho boloka mohato le oona, a sebelise hamolemo litokisetso tsohle tsa oona ’me a kopanele ka botlalo mosebetsing oa oona.
5 Khatelo-pele e Hloka Mokhoa o Laolehileng oa ho Etsa Lintho: Pauluse o ile a tsoela pele ka ho khothalletsa baena ba hae hore ba “tsamaee ka tsela e laolehileng ka mokhoa o tšoanang oa ho etsa lintho.” (Ba-Fil. 3:16, NW) Ho laoleha ho hloka hore re behe batho kapa lintho sebakeng se tšoanetseng ’me re itšoare hantle. Bakreste ba Filippi ba ile ba ipoloka sebakeng sa bona se loketseng, ba lula haufi le mokhatlo o hlophisitsoeng oa Jehova le haufi le ba bang. Bophelo ba bona bo ne bo busoa ke molao oa lerato. (Joh. 15:17; Ba-Fil. 2:1, 2) Pauluse o ile a ba khothalletsa ho “itšoara ka mokhoa o tšoanetseng litaba tse molemo.” (Ba-Fil. 1:27, NW) Tlhokahalo ea ho laoleha le boitšoaro bo botle e ntse e le ea bohlokoa le ho Bakreste kajeno.
6 Mokhoa o tsitsitseng oa ho etsa lintho ke ho etsa lintho ka tloaelo ka mokhoa o itseng o tšoanang. Ka hona ho amana haholo le tsela e tloaelehileng ea ho etsa lintho. Ho ba le mokhoa o tsitsitseng oa ho etsa lintho ho molemong oa rōna hobane ha ho hlokahale hore re etse khefu ’me re nahane ha re etsa liqeto mabapi le mohato o latelang—kaha re se re ntse re thehile mokhoa oo re tla o latela o susumetsoang ke tloaelo.
7 Mokhoa oa puso ea Molimo o laolehileng oa ho etsa lintho o na le litloaelo le mekhoa e hahang, e ruisang molemo, ea bomolimo—ka sepheo sa ho ikaha moeeng, ho thusa ba bang, ’me haeba ho khoneha, ho etsa ho eketsehileng tšebeletsong ea Jehova. Ho atleha ho finyella lipakane tsena ho hloka hore ho thehoe ’me ho bolokoe mokhoa o tsitsitseng oa ho etsa lintho o kopanyelletsang thuto ea botho, ho ba teng kamehla libokeng, le ho kopanela mosebetsing oa boboleli.
8 Lintho tsa Bohlokoa tse Akaretsoang Mokhoeng o Laolehileng oa ho Etsa Lintho: Ntho e ’ngoe ea bohlokoa ke “tsebo e nepahetseng le tlhalohanyo e feletseng.” (Ba-Fil. 1:9, NW) Thuto ea botho e tebisa tumelo ea rōna, e matlafatsa kananelo ea rōna bakeng sa ’nete, ’me e re susumelletsa mesebetsing e metle. Leha ho le joalo, ba bang ba fumane ho le thata ho tsitsa mokhoeng oa bona oa ho ithuta. Le leng la mabaka a ka sehloohong a fanoeng ke ho hloka nako.
9 Melemo ea ho bala Bibele letsatsi le leng le le leng e totobetse. Taeo ea eona e “molemo” ka litsela tsohle. (2 Tim. 3:16, 17) Re ka fumana nako ea thuto ea Bibele mokhoeng oa rōna o tsitsitseng oa letsatsi le letsatsi oa ho etsa lintho joang? Ba bang ba fumane hore ba ka tsoha metsotso e seng mekae pele ho nako e tloaelehileng hoseng ho hong le ho hong, ha likelello tsa bona li falimehile. Ba bang ba fumana hore ba etsa hamolemo ha ba bala metsotso e seng mekae pele ba robala bosiu. Basali ba bang teng hae motšehare ba ka khona ho behella ka thōko nako ea motšehare oa mantsiboea pele ba bang ba fihla hae ba tsoa sekolong kapa mosebetsing. Ho phaella ’malong o tloaelehileng oa Bibele, ba bang ba kopanyellelitse ho bala buka Baboleli kemisong ea bona ea ho ithuta ea beke le beke.
10 Ha re theha mekhoa e mecha, ho ka etsahala hore e tla hohlana le mekhoa ea rōna ea pele. E ka ’na eaba nakong e fetileng re ne re sekametse ho lumella mesebetsi e seng bohlokoa ho qeta nako eo re nang le eona. Ho itšoasolla mokhoeng o joalo ha ho bonolo. Ha ho motho ea tla re bolella hore re be le mekhoa efe ea ho ithuta; leha e le hore ho hlokahala hore re bolele seo re se etsang tabeng ena. Ho tsitsa ha mekhoa ea rōna ea ho ithuta ho itšetlehile haholo ka kananelo ea rōna bakeng sa “lintho tse molemo ka ho fetisisa” le boikemisetso ba rōna ho reka “nako e loketseng” e le ho rua molemo ho tsona.—Ba-Fil. 1:10, NW; Ba-Ef. 5:16, NW.
11 Liboka tsa Bokreste li phetha karolo ea bohlokoa khatelo-peleng ea rōna ea moea, li fana ka taeo e hlokahalang le khothatso. Kahoo, ho ba teng libokeng ke karolo e ’ngoe ea bohlokoa mokhoeng oa rōna o laolehileng oa ho etsa lintho. Pauluse o ile a hatisa bohlokoa ba sena. Hase khetho e laoloang ke ho rata.—Ba-Heb. 10:24, 25.
12 Ho laoleha ho ka bontšoa joang ha re lokisetsa kemiso ea rōna ea beke le beke ea mosebetsi? Ba bang ba lokisetsa linako tse tobileng tsa ho hlokomela mesebetsi ea botho ebe joale ba leka ho petelletsa liboka likheong leha e le life tse hlahang, empa ho tlameha ho etsoe ka tsela e fapaneng. Liboka tsa rōna tsa beke le beke li lokela ho tla pele, ’me mesebetsi e meng e lokisetsoe bakeng sa nako e ’ngoe.
13 Ho ba teng libokeng kamehla ho hloka ho lokisetsa hantle le tšebelisano-’moho ea lelapa. Har’a beke ba bangata ba rōna re na le kemiso e phathahaneng ea mosebetsi eo hangata e re sieang re hloka nako. Sena se bolela hore, haeba ho khoneha, lijo tsa mantsiboea li tlameha ho jeoa esale pele e le hore lelapa le ka ba le nako e lekaneng ea ho ja, ho itokisa, le ho fihla libokeng pele li qala. Ho finyella seo litho tsa lelapa li ka sebelisana ka litsela tse sa tšoaneng.
14 Ho ba teng tšebeletsong ea tšimo kamehla ho bohlokoa e le hore re ’ne re tsamaee ka ho tsoelang pele ka mokhoa o laolehileng oa ho etsa lintho. Ka ho hlakileng kaofela ha rōna re hlokomela boikarabelo ba rōna bo matla ba ho bolela molaetsa oa ’Muso. Ke sona se re etsang Lipaki tsa Jehova. (Esa. 43:10) Kaha ke mosebetsi o potlakileng le o molemo ka ho fetisisa o etsoang kajeno, ha ho tsela eo re ka o nkang e le karolo e itlelang ka tsietsi mokhoeng oa rōna o tsitsitseng oa ho etsa lintho. Pauluse o ile a khothatsa: “Ka baka leo, a re hlahiseng ka mehla ho Molimo ka eena sehlabelo sa poko, e leng tholoana ea melomo e bolelang lebitso la hae.”—Ba-Heb. 13:15.
15 Ha re rera mosebetsi oa rōna oa beke le beke, re lokela ho behella ka thōko linako tse tobileng bakeng sa tšebeletso ea tšimo. Ho ka etsahala hore ebe phutheho e na le liboka tsa tšebeletso tse lokiselitsoeng ka makhetlo a ’maloa beke ka ’ngoe, ’me taba ke hore feela re rere hore na re tla tšehetsa life. E tla ba hantle ho hahamalla ho kopanela tšobotsing ka ’ngoe ea tšebeletso, joaloka ho etsa mosebetsi oa ntlo le ntlo ka limakasine le lingoliloeng tse ling, ho etsa maeto a ho boela, le ho khanna lithuto tsa Bibele. Re ka boela ra lokisetsa esale pele ho etsa bopaki bo sa reroang ka ho nka lingoliloeng le ka ho falimehela menyetla ea ho qalisa puisano. Kaha hangata re tsoa le ba bang ha re ea tšimong, ho hlokahala hore re tsebe kemiso ea bona e le hore re ka etsa litokisetso tseo re tla lumellana ka tsona hore li loketse.
16 Mokhoa oa rōna o tsitsitseng oa ho bolela o lokela ho bolokoa ho sa tsotellehe ho iphapanya tšimong. Re tseba esale pele hore ke ba seng bakae ba tla arabela hantle. (Matt. 13:15; 24:9) Ezekiele o ile a laeloa ho bolela ho batho ba ‘manganga, ba ikhantšang, ba itšatalalitseng lipelo.’ Jehova o ile a tšepisa ho thusa Ezekiele ka ho “satalatsa phatla [ea hae], joalo ka liphatla tsa bona,” ke hore, “joalo ka daemane, le ho feta lehakoe.” (Ezekiele 2:3, 4; 3:7-9) Ka hona mokhoa oa kamehla o tsitsitseng oa ho etsa lintho o hloka tiisetso.
17 Mehlala e Metle e ka Etsisoang: Ba bangata ba rōna ba etsa hamolemo tšebeletsong ea tšimo ha ho e-na le ea tla etella pele. Pauluse le metsoalle ea hae ba ile ba beha mohlala o motle, ’me o ile a phehella ba bang ho mo etsisa. (Ba-Fil. 3:17) Mokhoa oa hae o tsitsitseng oa ho etsa lintho o ne o kopanyelletsa lintho tsohle tse hlokahalang bakeng sa ho ipoloka a le matla moeeng.
18 Le kajeno re hlohonolofalitsoe ka mehlala e metle. Ho Ba-Heberu 13:7, Pauluse o ile a phehella: “Hopolang balisa ba lōna, . . . ’me le etsise tumelo ea bona, le ntse le lemoha qetello ea ho phela ha bona.” Ntle ho pelaelo, Kreste ke ’Mehi-mohlala oa rōna, empa re ka etsisa tumelo e bontšitsoeng ke ba etellang pele. Joaloka Pauluse, baholo ba tlameha ho ela hloko tlhoko ea hore e be mehlala e metle ho ba bang. Le hoja maemo a bona a botho a fapana, e mong le e mong o lokela ho khona ho bontša hore o boloka mokhoa o laolehileng oa ho etsa lintho ha a beha lithahasello tsa ’Muso pele. Esita le haeba ba na le litlamo tsa boipheliso le tsa lelapa, baholo ba lokela ho ba le mekhoa e tsitsitseng hantle ea thuto ea botho, ho ba teng libokeng, le ho etella pele tšebeletsong ea tšimo. Ha baholo ba fana ka bopaki ba hore ba ‘busa matlo a bona hantle,’ bohle ba ka phuthehong ba tla khothalletsoa ho lula ba tsamaea ka mokhoa o laolehileng oa ho etsa lintho.—1 Tim. 3:4, 5.
19 Lipakane Bakeng sa Selemo se Secha sa Tšebeletso: Mathoasong a selemo se secha sa tšebeletso ke nako e loketseng ea ho nahana ka mokhoa oa rōna oa botho o tsitsitseng oa ho etsa lintho. Ho hlahloba mosebetsi oa rōna oa selemo se fetileng ho bontša eng? Na re khonne ho boloka, kapa mohlomong ho ntlafatsa, boemo ba mosebetsi oa rōna? E ka ’na eaba re ’nile ra etsa thuto ea botho ka botlalo haholoanyane. E ka ’na eaba re bile teng libokeng kamehla ka tsela e molemo kapa re ekelitse tšebeletso ea rōna ka ho ngolisetsa bopula-maliboho bo thusang. Mohlomong re khona ho supa liketso tse tobileng tsa mosa oa Bokreste tseo re li entseng molemong oa ba bang phuthehong ea rōna kapa lapeng. Haeba ho joalo, re ka thaba hore ebe re tsamaile tseleng e thabisang Molimo, ’me re na le lebaka le letle la ho “etsa joalo ka botlalo haholoanyane.”—1 Ba-Thess. 4:1, NW.
20 Ho thoe’ng haeba mokhoa oa rōna o tsitsitseng oa ho etsa lintho o ne o batla o sa tšoane kapa o etsoa seoelo? See se re amme joang moeeng? Na khatelo-pele ea rōna e sitisitsoe ke lebaka le leng? Ho ntlafatsa ho qala ka ho kōpa thuso ea Jehova. (Ba-Fil. 4:6, 13) Buisana le litho tse ling tsa lelapa ka litlhoko tsa hao, u kōpe thuso ea bona bakeng sa ho lokisa mokhoa oa hao o tsitsitseng oa ho etsa lintho. Haeba u na le mathata, kōpa thuso ea baholo. Haeba re etsa boiteko bo tiileng ’me re arabela tataisong ea Jehova, re ka kholiseha hore re tla qoba “ho se sebetse kapa ho se behe.”—2 Pet. 1:5-8, NW.
21 Ho tsamaea ka mokhoa o laolehileng oa ho etsa lintho ho lebisa litlhohonolofatsong tse tla etsa hore boiteko ba hao e be ba bohlokoa. Ha u ikemisetsa ho tsamaea ka ho tsoelang pele mokhoeng o laolehileng oa ho etsa lintho, ‘se ke ua ba botsoa; u be le cheseho moeeng, u sebeletse Morena.’ (Ba-Roma 12:11)—Bakeng sa moo ho buisanoeng haholoanyane ka sehlooho sena, bona Molula-Qhooa oa May 1, 1985, maqepheng a 13-17.