Etsisa Toka ea Jehova
1 “Jehova o rata toka.” (Pes. 37:28) Kahoo, le hoja a entse qeto ea hore lefatše lena le sa lokang le timetsoe, o lokiselitse hore batho ba lemosoe pele. (Mar. 13:10) Sena se fa batho monyetla oa ho baka le ho pholoha. (2 Pet. 3:9) Na re leka ka matla ho etsisa toka ea Jehova? Na masisa-pelo le mahlomola a moloko oa batho a re susumelletsa ho bolella ba bang ka tšepo ea ’Muso? (Liprov. 3:27) Ho rata toka ho tla re susumelletsa ho kopanela boboleling ka mafolofolo.
2 Bolela U sa Khethe: Ka ho bolella e mong le e mong morero oa Molimo re sa khethe, re ‘sebelisa toka.’ (Mik. 6:8) Re lokela ho hanela tšekamelo ea ho se phethahale ea ho ahlola ba bang ka ponahalo ea bona ea ka ntle. (Jak. 2:1-4, 9) “Thato ea [Jehova ke] hore batho ba mefuta eohle ba pholohe ’me ba fihle tsebong e nepahetseng ea ’nete.” (1 Tim. 2:4) Lentsoe la Molimo la ’nete le ka fetola bophelo ba batho ka tsela e tsotehang. (Baheb. 4:12) Ho hlokomela ’nete ena ho ka re susumelletsa ho atamela batho ka kholiseho, esita le ba sa kang ba re mamela nakong e fetileng.
3 Morali e mong oabo rōna ea sebetsang lebenkeleng o ne a tšosoa ke ponahalo ea motho ea tloaetseng ho reka lebenkeleng leo. Leha ho le joalo, ha ho hlaha monyetla o loketseng, o ile a leka ho mo pakela ka Paradeise eo Molimo a e tšepisitseng. Monna enoa a mo kharuma a re ha a lumele litšōmo le hore ke lehipi le lekhoba la lithethefatsi. Empa morali’abo rōna ha aa ka a tela. Ka letsatsi le leng monna eo a botsa morali’abo rōna hore na o nahana eng ka moriri oa hae o molelele, eaba morali’abo rōna o hlalosa ka masene seo Bibele e se buang ka taba ena. (1 Bakor. 11:14) Morali’abo rōna a hlolloa ha letsatsing le latelang monna enoa a beotse litelu a bile a le moriri o mokhutšoanyane! O ile a kōpa ho khanneloa thuto ea Bibele, ’me mor’abo rōna e mong a thabela ho mo khannela eona, ’me a hatela pele ho fihlela a inehela le ho kolobetsoa. Joaloka monna enoa, kajeno ba bangata ba sebeletsang Jehova ba leboha ba ileng ba phehella ho ba tlisetsa molaetsa oa ’Muso ba sa khethe.
4 Haufinyane Jehova o tla felisa ho hloka toka lefatšeng lohle. (2 Pet. 3:10, 13) Ka nako ena e fokolang e setseng, e se eka re ka etsisa toka ea Jehova ka ho fa bohle monyetla oa ho pholoha timetso e tlang ea lefatše la Satane le hlokang toka.—1 Joh. 2:17.