Lebokose la Lipotso

◼ Na batsoali ka bobeli ba ka tlaleha nako ea thuto ea kamehla ea lelapa?

Le hoja bo-ntate ba e-na le boikarabelo bo ka sehloohong ba ho hōlisa bana ba bona “ka taeo le kelello e laoloang ke Jehova,” bana ba koetlisoa ke batsoali ka bobeli. (Baef. 6:4) Bibele e re ho bana: “Mora oa ka, u mamele taeo ea ntat’ao, ’me u se ke ua furalla molao oa ’m’ao.” (Liprov. 1:8) Karolo e ’ngoe ea bohlokoa ea koetliso ea batsoali ke thuto ea lelapa ea Bibele.

Nakong e fetileng, motsoali ea khannelang bana ba sa kolobetsoang thuto ea lelapa ke eena feela ea neng a tlaleha nako, esita leha batsoali ka bobeli ba ne ba kopanela thutong eo. Leha ho le joalo, ho etsoa phetoho tabeng ena. Haeba nakong ea thuto ea lelapa batsoali ka bobeli ba ruta bana ba bona, bobeli ba bona ba ka tlaleha nako eo empa e se ke ea feta hora ka beke. Ha e le hantle, ka tloaelo batsoali ba nka nako e fetang hora ka beke ba ruta bana ba bona. Ho hlokahala hore batsoali ka bobeli ba koetlise bana ba sa khaotse. (Deut. 6:6-9) Leha ho le joalo, tlaleho ea tšebeletso ea tšimo ea khoeli le khoeli e lokela ho bontša hore na ha e le hantle ho finyeletsoe eng tšimong. Ka lebaka leo, ha baa lokela ho tlaleha nako e fetang hora ka beke, esita le haeba thuto e nka nako e fetang hora, e khannoa ka makhetlo a ’maloa ka beke, kapa ngoana e mong e le mong a khanneloa thuto ea hae. Ke motsoali a le mong feela ea lokelang ho tlaleha thuto ea lelapa ea Bibele le leeto le le leng la ho boela ka beke eo thuto eo e khanniloeng ka eona.