‘Lebitso la Molimo le ke le Halaletsoe’
1. Sehlooho sa kopano ea potoloho ea selemo sa tšebeletso sa 2012 se re’ng, hona se thehiloe hokae?
1 Ruri re na le tlotla e babatsehang ea ho bitsoa ka lebitso la ’Musi oa Bokahohleng, Jehova! Ke Molimo ka boeena ea re fileng lebitso la hae hore re bitsoe ka lona ’me ka ho khetheha ho tloha ka 1931, rōna Lipaki Tsa Jehova, re ’nile ra bitsoa ka lebitso la Jehova le khethehileng. (Esa. 43:10) Mora ea tsoetsoeng a ’notši oa Molimo, e leng Jesu, o ne a nka lebitso la Molimo e le la bohlokoa ka ho fetisisa, hoo a ileng a le etelletsa pele thapelong eo a ileng a e ruta balateli ba hae. (Mat. 6:9) Sehlooho sa lenaneo la kopano ea potoloho ea selemo sa tšebeletso sa 2012 se thehiloe mantsoeng ao a Jesu. Se re, “Lebitso la Molimo le ke le Halaletsoe.”
2. Ke boitsebiso bofe boo re lokelang ho bo lebella?
2 Seo re Tla Ithuta Sona: Ka Moqebelo, puong e reng, “Tsebahatsang Lebitso Molimo le le Basebeletsi ba Nako e Tletseng,” ho tla tšohloa hore na ke hobane’ng ha tšebeletso ea nako e tletseng e le tsela e molemo haholo ea bophelo. Re tla boela re mamele neheletsano e nang le sehlooho se reng, “U se ke Ua Tlisetsa Lebitso la Jehova Thohako,” ’me eona e tla re thusa ho qoba ho tšoasoa ke lintho tse ’nè tseo e ka bang maraba. Puong e reng, “Lebaka Leo Lebitso la Molimo le Lokelang ho Halaletsoa,” ho tla arabeloa lipotso tsena: Ke eng e tla re thusa ho bolela ka cheseho ha ho bonahala eka batho bao re buisanang le bona ha ba thahaselle hakaalo? Ke eng e tla re thusa hore re atlehe tšebeletsong ea rōna? Ka Sontaha re tla mamela neheletsano e nang le lipuo tse ’nè tse mabapi le kamoo re ka halaletsang lebitso la Molimo kateng ka menahano ea rōna, lipuo, liqeto le ka boitšoaro ba rōna. Ka ho khetheha, batho ba sa tsoa kena ka phuthehong ba tla ananela puo ea phatlalatsa e reng, “Jehova o Tla Halaletsa Lebitso la Hae le Leholo ka Armagedone.”
3. Re na le tlotla efe, hona lenaneo la kopano ee le tla re thusa joang?
3 Haufinyane Jehova o tla nka bohato ba ho halaletsa lebitso la hae. (Ezek. 36:23) Pele seo se etsahala, re na le tlotla e babatsehang ea ho phahamisa sohle seo lebitso le halalelang la Jehova le se emelang. Re kholisehile hore lenaneo lena la kopano ea potoloho le tla re thusa kaofela hore re phethahatse boikarabelo ba rōna bo boholo ba ho bitsoa ka lebitso la Molimo.