E-bang Seli ha le le Tšimong
1. Ke hobane’ng ha re lokela ho ba seli ha re le tšimong?
1 Bahlanka ba Molimo ba “joaloka linku har’a liphiri,” kahoo ba bolela litaba tse molemo “har’a moloko o khopameng le o sothehileng.” (Mat. 10:16; Bafil. 2:15) Re atisa ho utloa litlaleho tse tšosang tsa merusu, liketso tsa mahoohoo a mabifi le ho koeteloa ha batho ka sehlōhō, ’me sena ke bopaki ba hore batho ba khopo ba tsoela pele “ho tloha bobeng ho ea bobeng bo fetisisang.” (2 Tim. 3:13) Ke melao-motheo efe ea Mangolo e ka re thusang ho ba “seli” ha re le tšimong?—Mat. 10:16.
2. Ke maemong afe ao ho ’ona ho ka bang molemo hore re tlohe tšimong eo re e sebetsang re e’o sebetsa e ’ngoe?
2 E-bang Masene: Liproverbia 22:3 e re ha motho a ‘ipatela’ tlokotsi o bohlale. E-bang hlokolosi ka linako tsohle! Maemo a sebaka seo ka tloaelo se sireletsehileng a ka fetoha ka tšohanyetso. Le ka ’na la bona mapolesa a se a phethesela kapa batho ba khobokana seterateng. Ka linako tse ling motho e mong ea mosa a ka le lemosa. Ho e-na le hore le likalike hobane le batla ho tseba litaba, e ka ba bohlale hore le tlohe sebakeng seo hang-hang le e’o sebetsa ho se seng.—Liprov. 17:14; Joh. 8:59; 1 Bathes. 4:11.
3. Molao-motheo oa Moeklesia 4:9 o sebetsa joang ha re le tšimong?
3 Sebetsang Hammoho: Moeklesia 4:9 e re, “Ba babeli ba molemo ho feta a le mong.” Le hoja e ka ’na eaba u tloaetse ho sebetsa u le mong tšimong u sireletsehile, hona joale ho joang? Libakeng tse ling ho sa ntse ho sireletsehile. Empa ho tse ling, ho kotsi hore morali’abo rōna kapa mocha a ee ka ntlo le ntlo a le mong, haholo-holo ka mor’a hore letsatsi le likele. Phihlelo e bontšitse hore ke habohlokoa ho sebetsa le motho e mong ea hlokolosi. (Moek. 4:10, 12) U ’ne u shebe bao u sebetsang le bona. Itloaetse ho bolella ba bang ha u chaisa tšimong.
4. Re ka kenya letsoho joang hore litho tsohle tsa phutheho li sireletsehe?
4 Boikarabelo ba baholo ke ho re tataisa ka tsela e loketseng maemo a sebaka, kaha ‘ba lula ba lebetse meea ea rōna.’ (Baheb. 13:17) Ka sebele Jehova o tla re hlohonolofatsa ha re bontša boinyenyefatso ba Bokreste ’me re sebelisana le bona ka ho feletseng. (Mik. 6:8; 1 Bakor. 10:12) E se eka bahlanka bohle ba Molimo ba ka kenya letsoho ho faneng ka bopaki bo matla tšimong, empa ba lule ba le seli.