Na U ka Rua Molemo ka ho ba le Tšimo ea Hao?
1. Ho ba le tšimo ea hao ho bolela’ng?
1 Ho ba le tšimo ea hao ho bolela’ng? Liphuthehong tse nang le tšimo e khōlō, u ka ba le tšimo ea hao, mohlomong e haufi le moo u lulang teng. Buka ea Ho Hlophisetsoa, leqepheng la 103, e re: “Ho ba le tšimo e sebakeng se u loketseng ho tla u nolofalletsa hore u sebelise hamolemo nako eo u ka e qetang u le tšebeletsong ea tšimo. Ntle ho moo, mohlomong u ka rata ho mema mohoeletsi e mong hore a sebetse le uena tšimong ea hao.”
2. U ka sebelisa tšimo ea hao joang ho tlatselletsa bopaking bo etsoang ke sehlopha?
2 Ho Tlatselletsa Bopaking bo Etsoang ke Sehlopha: Haeba u abeloa tšimo e haufi le moo u sebetsang teng, u ka etsa boboleli ka nako ea khefu ea motšehare kapa pele u khutlela hae, mohlomong u thusana le mohoeletsi e mong ea sebetsang tikolohong eo. Haeba u abeloa tšimo e haufi le moo u lulang teng, uena le ba lelapa la hao le ka sebelisa monyetla oo hamolemo ka ho paka mantsiboea. Ho hlakile hore haeba u sa ee sebokeng sa tšebeletso ea tšimo, u lokela hore u rapelle tataiso ea Jehova pele u qala ho paka. (Bafil. 4:6) Ho phaella moo, u lokela ho leka-lekanya nako eo u e qetang u sebetsa tšimo ea hao le eo u e qetang u tšehetsa litokisetso tsa phutheho tsa ho paka ka sehlopha. Haholo-holo mafelong a beke, ha bahoeletsi ba bangata ba kopana bakeng sa tšebeletso ea tšimo, hangata ho molemo hore u tšehetse sehlopha sa heno sa tšebeletso ea tšimo.
3. Melemo ea ho ba le tšimo ea hao ke efe?
3 Melemo: Haeba u e-na le tšimo ea hao, u na le moo u ka pakang teng neng le neng ha kemiso ea hao e u lumella. U ka qeta nako e ngata u bolela litaba tse molemo ’me ua qeta nako e fokolang u tsamaea. Kemiso ena e bonolo e lumella ba bang hore e be bo-pula-maliboho ba thusang kapa ba kamehla. Kaha beng ba matlo ba bontšang thahasello ba sebakeng se le seng, ho bonolo ho etsa maeto a ho boela le ho khanna lithuto tsa Bibele. Ba bangata ba fumane hore ha ba paka tšimong ea bona ba tloaelana le beng ba matlo ebile seo se etsa hore beng ba matlo ba ba tšepe, haholo-holo haeba tšimo e ka sebetsoa ka makhetlo a fetang le le leng pele e khutlisetsoa phuthehong hore ba bang ba e kōpe. Na ho sebetsa tšimo ea hao ho tla thusa uena le ba lelapa la hao hore le phethe bosebeletsi ba lōna ka botlalo?—2 Tim. 4:5.