Lintho Tse ka u Thusang ha u Ithuta

Fumana Makhabane a Mang a Jehova a Babatsehang

Ha re bala Bibele, re ka etsa lipatlisiso tse tla re thusa ho utloisisa haholoanyane seo re ntseng re se bala. Leha ho le joalo, ha rea lokela ho balla feela hore re be le tsebo e ngata ea Bibele. Re batla ho fumana makhabane a Jehova a tla etsa hore re mo rate le ho feta. Re ka etsa sena ka ho ipotsa potso ena: ‘Tlaleho ee ea Bibele e nthuta eng ka Jehova?’

Ka mohlala, u ka leka ho fumana kamoo Jehova a bontšitseng lerato, bohlale, toka le matla kateng. Leha ho le joalo, makhabane a Jehova ha se ana feela. O na le makhabane a mang a mangata a babatsehang. U ka fumana makhabane aa hokae?

Bona lethathamo la makhabane a mang a eketsehileng a ka holimo ho 50 a ho Watch Tower Publications Index tlas’a sehlooho se reng “Jehovah” ebe u ea tlas’a sehloohoana se reng “Qualities by Name.” Etsa lipatlisiso ka makhabane a tšoanang le a tlalehong ea Bibele eo u ntseng u e bala. (Haeba puo eo u e utloisisang e na le Tataiso ea ho Etsa Lipatlisiso ea Lipaki Tsa Jehova feela, sheba tlas’a sehlooho se reng “Jehova Molimo” ebe u ea tlas’a sehloohoana se reng “Litšobotsi Tsa Jehova.”)