Ithute Linthong Tseo Jesu a Ileng a li Etsa Matsatsing a 40 a ho Qetela a le Lefatšeng

1-2. Ho ile ha etsahala’ng ha barutuoa ba babeli ba Jesu ba le tseleng e eang Emmause?

LETSATSI ke la 16 Nisane selemong sa 33, barutuoa ba Jesu ba utloile bohloko bo otlang pelong ba bile ba tšohile haholo. Ba babeli ba tloha Jerusalema ba ea Emmause, motse o ka bang bohole ba lik’hilomithara tse 11 ho tloha Jerusalema. Ba oele moea hobane Jesu eo esale ba mo latela o sa tsoa bolaoa le hoja bona ba ne ba lumela hore o tl’o pholosa Bajuda. Empa ho etsahala ntho eo ba neng ba sa e lebella.

² Ha ba ntse ba le tseleng ho hlaha monna eo ba sa mo tsebeng ’me o tsamaea le bona. Baa mo qoqela hore na ho etsahetse’ng ka Jesu. Monna enoa o ba bolella litaba tse tl’o fetola bophelo ba bona. O ile a ba bolella hore na ke hobane’ng ha Mesia a ile a lokela hore a utloisoe bohloko le ho bolaoa “a qala ka mangolo a ngotsoeng ke Moshe le a Baprofeta kaofela.” Barutuoa bana ha ba fihla Emmause ke hona ba hlokomelang hore monna enoa eo ba ntseng ba tsamaea le eena ke Jesu ea tsositsoeng bafung. U se u ka nahana hore na ba ile ba thaba hakaakang ha ba hlokomela hore Mesia oa phela!—Luka 24:​13-35.

3-4. Ke eng se ileng sa etsahalla barutuoa ba Jesu, hona re tl’o ithuta eng sehloohong see? (Liketso 1:3)

³ Jesu o ile a qeta matsatsi a 40 a le lefatšeng pele a khutlela leholimong. Nakong eo, o ile a hlaha ka makhetlo ho barutuoa ba hae. (Bala Liketso 1:3.) Ka nako ena, Jesu o ile a khothatsa barutuoa ba hae ba neng ba tšohile ba bile ba utloile bohloko. Ba ile ba thaba haholo ’me ba ba le sebete sa ho bolela le ho ruta litaba tse monate tsa ’Muso.a

⁴ Ho ithuta ka lintho tseo Jesu a ileng a li etsa nakong ena ho ka re tsoela molemo haholo. Sehloohong sena re tl’o ithuta hore Jesu o ile a sebelisa nako ena joang (1) ho khothatsa barutuoa ba hae, (2) ho ba thusa hore ba utloisise Mangolo le (3) ho ba koetlisetsa mosebetsi oo ba neng ba tla o etsa nakong e tlang. Re tla boela re bone hore na re ka etsisa mohlala oa hae joang.

KHOTHATSA BA BANG

5. Ke hobane’ng ha barutuoa ba Jesu ba ne ba hloka ho khothatsoa?

⁵ Barutuoa ba Jesu ba ne ba hloka ho khothatsoa. Hobane’ng? Ba bang ba ne ba siile ba malapa a bona, matlo a bona le likhoebo tsa bona e le hore ba latele Jesu. (Mat. 19:27) Ba bang bona ba ile ba tšoaroa hampe hobane e le balateli ba Jesu. (Joh. 9:22) Ba ile ba etsa liphetoho tsena hobane ba ne ba lumela hore Jesu ke Mesia eo esale ba mo lebella. (Mat. 16:16) Empa ka mor’a hore Jesu a bolaoe ba ile ba utloa bohloko haholo ba ba ba nyahama hobane ba ne ba sa tsebe se neng se tla etsahala.

6. Jesu o ile a etsa’ng ka mor’a hore a tsosoe?

⁶ Jesu o ne a utloisisa hore na ke hobane’ng ha barutuoa ba hae ba ne ba utloile bohloko ka mor’a lefu la hae. O ne a tseba hore ha se hobane ba haelloa ke tumelo. Hang ka mor’a hore a tsosoe bafung, o ile a qala ho khothatsa metsoalle ea hae. Ka mohlala, o ile a bua le Maria Magdalena nakong eo a ntseng a lla a le lebitleng la hae. (Joh. 20:​11, 16) O ile a boela a hlaha ho balateli ba hae ba babeli ba neng ba ea Emmause. Ka mor’a moo, o ile a hlaha ho moapostola Petrose. (Luka 24:34) Re ka ithuta eng mohlaleng oo oa Jesu? Nahana ka se ileng sa etsahala ha a hlaha ka lekhetlo la pele ho Maria Magdalena.

7. Ho ea ka tlaleho e ho Johanne 20:​11-16, Jesu o ile a bona Maria a etsa’ng hoseng ha la 16 Nisane ’me a nka bohato bofe? (Sheba setšoantšo.)

⁷ Bala Johanne 20:​11-16. Hoseng ha la 16 Nisane basali ba bang ba tšepahalang ba ile ba ea lebitleng la Jesu. (Luka 24:​1, 10) Hlokomela se ile sa etsahalla e mong oa basali bana e leng Maria Magdalena. Ha a fihla lebitleng la Jesu, o ile a fumana ho se na letho. O ile a matha a e’o bolella Petrose le Johanne. Ha ba utloa litaba tsena ba ile ba mathela lebitleng la Jesu ’me a ba sala morao. Ka mor’a hore ba fumane Jesu a le sieo ka lebitleng, banna bana ba ile ba khutlela hae. Maria eena o ile a sala moo a ntse a lla a sa tsebe hore Jesu o ntse a mo shebile. Empa Jesu o ne a bona hore mosali enoa ea tšepahalang o ntse a lla ’me sena se ile sa mo ama. Eaba o itlhahisa ho eena oa mo khothatsa le ho mo fa mosebetsi oa bohlokoa oa ho bolella bana babo hore o tsohile.—Johanne 20:​17, 18.

8. Re ka etsisa Jesu joang?

⁸ Re ka etsisa Jesu joang? Ka hore re khothaletse bara le barali ba bo rona hore ba tsoele pele ba sebeletsa Jehova. Joaloka Jesu, re lokela ho elelloa mathata ao ba kopanang le ’ona le ho leka ho utloisisa hore na ba ikutloa joang e be rea ba tšelisa. Nahana ka phihlelo ea morali’abo rona Jocelyn ea ileng a hlokahalloa ke ngoan’abo kotsing ea koloi. O re: “Ke ile ka qeta likhoeli tse ngata ke utloile bohloko haholo.” Mor’abo rona e mong le molekane oa hae ba ile ba mo memela ha bona, ba mo mamela ka hloko ha a ba bolella hore na o ikutloa joang. Ka mor’a moo ba mo tšoara ka mosa le ho mo bolella hore ke oa bohlokoa ho Jehova. O boetse o re: “Ke ile ka utloa eka Jehova o ba sebelisitse ho mpholosa ka leoatleng le befileng. Ba ile ba nthusa hore ke boele ke be le tabatabelo ea ho sebeletsa Jehova.” Le rona re ka khothatsa ba bang ka hore re ba mamele ka hloko ha ba re phetlela sefuba ’me re bue le bona ka mosa. Ka ho etsa joalo, re ka ba tšelisa le ho ba khothatsa e le hore ba tsoele pele ho sebeletsa Jehova.—Bar. 12:15.

THUSA BA BANG HO UTLOISISA BIBELE

9. Barutuoa ba Jesu ba ile ba ikutloa joang ka mor’a hore a bolaoe, hona o ile a ba thusa joang?

⁹ Balateli ba Jesu ba ne ba tšepa Lentsoe la Molimo ’me ba etsa kahohle hore ba phele tumellanong le lona. (Joh. 17:6) Leha ho le joalo ba ile ba ferekana ha ba bona Jesu a khokhotheloa palong joaloka setlokotsebe empa Jesu o ile a hlokomela hore ha se hobane ba se na tumelo kapa ba sa rate Jehova empa ba ne ba hloka ho utloisisa mangolo haholoanyane. (Luka 9:​44, 45; Joh. 20:9) Kahoo, o ile a ba thusa ho utloisisa Mangolo. A re boneng hore na o ile a etsa joang nakong eo a neng a tsamaea le barutuoa ba hae ba babeli ba neng ba ea Emmause.

10. Jesu o ile a etsa’ng ho thusa barutuoa ba hae ho utloisisa boprofeta? (Luka 24:​18-27)

¹⁰ Bala Luka 24:​18-27. Hlokomela hore Jesu ha aa ka a bolella barutuoa ba hae hang ha a kopana le bona hore na ke mang, ho e-na le hoo o ile a qala ka ho ba botsa lipotso. Ebe ke hobane’ng ha a ile a etsa joalo? Mohlomong o ne a batla hore ba mo bolelle maikutlo a bona pele ’me ba ile ba feela ba mo bolella. Ba ile ba mo bolella hore ba ne ba nahana hore e tla ba eena morena oa Iseraele ’me a ba buse ho e-na le ho busoa ke Baroma. Ka mor’a hore ba itlhalose, Jesu o ile a sebelisa Mangolo ho ba thusa ho utloisisa hore na boprofeta bo phethahetse joang.b Mantsiboeeng ao, o ile a kopana le barutuoa ba bang ’me a ba hlakisetsa boprofeta bona. (Luka 24:​33-48) Ketsahalo ee e re ruta’ng?

11-12. (a) Re ka ithuta eng mohlaleng oa Jesu oa ho ruta? (Sheba litšoantšo.) (b) Mor’abo rona ea neng a ithuta Bibele le Nortey o ile a mo thusa joang?

¹¹ Re ka etsisa Jesu joang? Ha u ithuta Bibele le batho, qala ka ho ba botsa lipotso tse tla u thusa ho utloisisa hore na ba ikutloa joang le hore na ba nahana joang. (Liprov. 20:5) Ka mor’a moo, ba thuse ho fumana litemana tse tla ba thusa boemong boo ba leng ho bona. Qoba ho ba bolella hore na ba etse’ng empa ba thuse ho etsa liqeto ba ipapisitse le melao-motheo ea Bibele. Bona kamoo taba ena e ileng ea thusa mor’abo rona Nortey oa Ghana.

¹² Mor’abo rona Nortey o qalile ho ithuta Bibele ha a le lilemo li 16, ho e-so ee le kae eaba lelapa labo le se le qala ho mo hanyetsa. O ile a thusoa ke’ng hore a tsoele pele a ithuta Bibele? Mor’abo rona eo a neng a ithuta Bibele le eena o ne a ile a bua le eena ka lengolo la Matheu khaolo ea 10 le bontšang hore Bakreste ba ’nete ba tla hlorisoa. Nortey o re: “Eitse ha mahloriso a qala, ke ile ka kholiseha hore ke fumane bolumeli ba ’nete.” Mor’abo rona ea neng a ithuta Bibele le eena o ile a boela a mo bontša hore na a ka sebelisa Matheu 10:16 joang hore a be seli le hore a bue ka tlhompho ha a hlalosetsa ba lelapa ka tumelo ea hae. Ka mor’a ho kolobetsoa, Nortey o ne a batla ho ba pula-maliboho empa ntate oa hae o ne a lebeletse hore a ee univesithi. Mor’abo rona ha aa ka a etsetsa Nortey qeto empa o ile a mo tataisa hore a bone kamoo Bibele e ka mo thusang. Nortey o ile a etsa’ng? O ile a etsa qeto ea ho ba pula-maliboho eaba ntate oa hae oa mo tebela. Na Nortey o ikoahlaela qeto eo a e entseng? O re: “Ke kholisehile hore ke entse qeto e nepahetseng.” Ha re bontša ba bang kamoo Bibele e ka ba tataisang ha ba etsa liqeto, re ba thusa hore tumelo ea bona e be matla le hore ba tsoele pele ba sebeletsa Jehova.—Baef. 3:​16-19.

KOETLISA BARA BA BO RONA HORE E BE “LIMPHO”

13. Jesu o ile etsa’ng ho netefatsa hore mosebetsi oa ho bolela o tla tsoela pele le ha a se a khutletse leholimong? (Baefese 4:8)

¹³ Ha Jesu a le lefatšeng o ile a etsa mosebetsi oohle oo Ntate oa hae a neng a mo file oona. (Joh. 17:4) O ne a se na maikutlo a hore ke eena feela ea ka etsang mosebetsi oo Jehova a faneng ka oona. Lilemong tse tharo tseo a li qetileng a etsa mosebetsi ona, o ile a koetlisa le ba bang hore ba o etse. Pele a khutlela leholimong o ile a tšepela barutuoa ba hae ho etsa mosebetsi oa ho bolela, oa ho ruta litaba tse monate le oa ho hlokomela linku tsa Jehova. Ho ka etsahala hore ebe ba bang ba bona ba ne ba le lilemong tse ka tlase ho tse 30. (Bala Baefese 4:8.) Banna bana ba ne ba tšepahala ba bile ba sebetsa ka thata. Pele Jesu a ea leholimong o ile a ba koetlisa ka ho eketsehileng hore e be “limpho.” O ile a ba koetlisa joang?

14. Matsatsing a 40 a ho qetela Jesu a le lefatšeng o ile a thusa balateli ba hae joang? (Sheba le setšoantšo.)

¹⁴ Ha ho ne ho hlokahala Jesu o ne a khalemela balateli ba hae a sa hlathe koana le koana empa o ne a etsa seo ka mosa. Ka mohlala, ha a hlokomela hore ba bang ba barutuoa ba hae ha ba lumele hore o tsohile, o ile a ba khalema e le hore ba be le pono e nepahetseng. (Luka 24:​25-27; Joh. 20:27) O ile a ba khothaletsa hore ba phathahane ka ho hlokomela linku tsa Jehova ho e-na le ho etsa chelete. (Joh. 21:15) A boela a ba hopotsa hore ba se ke ba ipapisa le ba bang ka phuthehong empa ba amehe ka mosebetsi oo ba o etsetsang Jehova. (Joh. 21:​20-22) Ba bang ba bona ba ne ba e-na le maikutlo a fosahetseng ka ’Muso ’me o ile a ba thusa, hape a ba khothaletsa ho phathahana ka ho bolela litaba tse monate. (Lik. 1:​6-8) Baholo ba ka ithuta’ng mohlaleng oo?

15-16. (a) Hlalosa hore na baholo ba ka etsisa Jesu joang. (b) Keletso eo mor’abo rona Patrick a ileng a e fuoa e ile ea mo tsoela molemo joang?

¹⁵ Baholo ba ka etsisa Jesu joang? Ba lokela ho koetlisa bara ba bo rona hore ba etse mosebetsi oa phutheho le haeba bara bao ba bo rona ba ntse ba le tlase lilemong.c Baholo baa utloisisa hore bara bana ba bo rona ha baa phethahala. Ba lokela ho ba thusa ka bonolo hore ba tsebe mosebetsi, ba ikokobetse, ba tšepahale ba be ba ikemisetse ho sebeletsa ba bang.—1 Tim. 3:1; 2 Tim. 2:2; 1 Pet. 5:5.

¹⁶ Nahana ka keletso e ileng ea thusa mor’abo rona Patrick. Ha a sa le monyenyane o ne a sa tšoare batho hantle a bile a ba buisa hampe ho akareletsa le barali ba bo rona. Moholo e mong o ile a hlokomela bofokoli bona ba mor’abo rona Patrick eaba o toba taba ha a mo eletsa empa a bua ka mosa. Mor’abo rona Patrick o re: “Ke leboha haholo hore ebe o ile a bua le ’na hobane pele ke ne ke lula ke utloile bohloko haholo ha ke bona ba bang ba fumana mosebetsi oo ke o ratang. O ile a nthusa ho bona bohlokoa ba ho ikokobetsa le ho sebeletsa batho ba bang ho e-na le ho ameha ka ho fumana boikarabelo bo itseng ka phuthehong.” Sena se ile sa fella ka hore mor’abo rona Patrick e be moholo le pele a e-ba lilemo li 25.—Liprov. 27:9.

17. Jesu o ile a bontša joang hore o tšepa barutuoa ba hae?

¹⁷ Jesu o file barutuoa ba hae mosebetsi oa ho bolela le ho ruta. (Mat. 28:20) Ho ka etsahala hore ebe ba ne ba utloa eka ba ke ke ba khona ho etsa mosebetsi oo empa Jesu o ne a kholisehile hore ba ka o etsa. O ne a kholisehile hoo a ileng a ba a re ho bona: “Kea le roma feela joalokaha Ntate a nthomile.”—Joh. 20:21.

18. Baholo ba ka etsisa Jesu joang?

¹⁸ Baholo ba ka etsisa Jesu joang? Baholo ba nang le phihlelo ba abela ba bang mosebetsi. (Bafil. 2:​19-22) Mohlala, ba ka kopa bacha hore ba thuse ho hloekisa le ho hlokomela Holo ea ’Muso. Ka mor’a hore baholo ba khethe bara babo rona bao ka ba fang boikarabelo, ba lokela ho ba koetlisa ka ho ba bontša hore na mosebetsi o etsoa joang le ho tšepa hore ba tla o etsa hantle. Mor’abo rona Matthew eo e sa tsoa ba moholo o re o ananela koetliso eo a e fuoang ke baholo ba bang e le hore a etse mosebetsi oo a o fuoeng ka phuthehong. O boetse o ananela hore baa mo tšepa hore a ka etsa mosebetsi oo. O re: “Ha ke ne ke etsa liphoso ba ile ba nthusa hore ke ithute liphosong tseo le ho ntlafatsa bakeng sa nako e tlang.”d

19. Re lokela ho ikemisetsa ho etsa eng?

¹⁹ Jesu o ile a sebelisa matsatsi a ho qetela a 40 a le lefatšeng ho khothatsa, ho ruta le ho koetlisa ba bang. E se eka re ka ikemisetsa ho latela mohlala oa hae haufi-ufi. (1 Pet. 2:21) O tla re thusa ho etsa joalo. Etsoe o ile a re tšepisa a re: “Ke na le lona ka matsatsi ’ohle ho fihlela lefatše le fela.”—Mat. 28:20.