Jesu o Tla Felisa Tlolo ea Molao

Jesu o tseba hantle hore na re ikutloa joang ha ho e na le tlolo ea molao ebile re tšoaroa ka ho hloka toka, hobane le eena o ile a etselletsoa, a otloa, a hlorisoa, a ahloloa ka ho hloka toka a ba a bolaoa ka sehloho. Le hoja Jesu a ne a se na molato, o ne a ikemiselitse ho fana ka “bophelo ba hae e le tefo bakeng sa ho lopolla batho ba bangata.” (Matheu 20:28; Johanne 15:13) Joalokaha Jesu e se e ntse e le Morena oa ’Muso oa Molimo, haufinyane o tla felisa ho hloka toka lefatšeng lohle a be a felise tlolo ea molao ka ho feletseng.—Esaia 42:3.

Bibele ea hlalosa hore na ho tla ba joang lefatšeng ka mor’a hore Jesu a nke khato:

• “Batho ba khopo ha ba sa tla hlola ba e-ba teng. U tla sheba moo ba neng ba le teng empa ba tla be ba le sieo. Leha ho le joalo, lefatše e tla ba lefa la ba bonolo, ba tla thaba haholo hobane ho tla be ho rena khotso.”—Pesaleme ea 37:10, 11.

Re ka bontša joang hore re ananela lintho tseo Jesu a re etselitseng tsona le tseo a tla li etsa? Tsela e ’ngoe ke ka ho ithuta haholoanyane ka “molaetsa o monate oa ’Muso oa Molimo” e leng molaetsa oo a neng a o bolela. (Luka 4:43) Bala sehlooho se reng “’Muso oa Molimo ke Eng?”