Na Chelete ke Motso oa Mefuta Eohle ea Lintho Tse Mpe?
Karabo ea Bibele
Che. Bibele ha e re ho ba le chelete ho fosahetse kapa hona hore chelete ke eona e bakang lintho tsohle tse mpe. Qotsulo ea Bibele e reng “chelete ke motso oa mefuta eohle ea lintho tse mpe” ha ea fella ebile e etsa hore batho ba be le maikutlo a fosahetseng. Ha e le hantle Bibele e re “lerato la chelete ke motso oa mefuta eohle ea lintho tse mpe.”a—1 Timothea 6:10.
Bibele e re’ng ka chelete?
Bibele e re chelete e ka ba molemo ha e sebelisoa ka bohlale hape e ka ba “tšireletso.” (Moeklesia 7:12) Ho ekelletsa moo, Bibele e babatsa batho ba fanang ho akarelletsa le ba fanang ka chelete.—Liproverbia 11:25.
Leha ho le joalo, Bibele e re re be hlokolosi hore chelete e se ke ea ba eona ntho e tlang pele bophelong ba rona. E re: “Mokhoa oa lona oa bophelo e ke e be o se nang lerato la chelete, ha le ntse le khotsofaletse lintho tse teng.” (Baheberu 13:5) Ntho eo re ithutang eona ke hore chelete le maruo ha li ea lokela ho tla pele bophelong ba rona. Ho e-na le hoo, re lokela ho ikemisetsa ho khotsofalla lintho tseo re nang le tsona e leng lijo, liaparo le bolulo.—1 Timothea 6:8.
Bibele e re hlokomelisa eng ka ho rata chelete?
Batho ba meharo ba ke ke ba fumana bophelo bo sa feleng. (Baefese 5:5) Lebaka ke hobane meharo ke mofuta o mong oa borapeli ba litšoantšo kapa borapeli bo fosahetseng. (Bakolose 3:5) Lebaka le leng ke hobane batho ba meharo ba tsitlella ho fumana lintho tseo ba li batlang, ’me ba hlokomoloha melao-motheo. Liproverbia 28:20 e re: “Ea potlakelang ho fumana maruo a ke ke a lula a hloka molato.” Ba ka ba ba iphumana ba entse litlolo tsa molao tse kang ho qhekella, ho k’hothotsa, bolotsana, ho koetela le ho bolaea.
Le haeba chelete e sa susumelletse motho hore a etse lintho tse mpe, e ka ba le litla-morao tse seng monate. Bibele e re “ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi.”—1 Timothea 6:9.
Keletso ea Bibele e buang ka chelete e ka re tsoela molemo joang?
Haeba re sa etse lintho tse khahlanong le thato ea Molimo hore feela re be le chelete, re tla ba le boitlhompho le kamohelo mahlong a Jehova a be a re tšehetse. Jehova o re ho batho ba batlang ho mo khahlisa e le kannete: “Ho hang nke ke ka u tlohela kapa ka u furalla.” (Baheberu 13:5, 6) O boetse o re tiisetsa hore “motho oa liketso tse tšepahalang o tla fumana litlhohonolofatso tse ngata.”—Liproverbia 28:20.
a Temana ena e ka hlalosoa e le: “Lerato la chelete ke motso oa mefuta eohle ea lintho tse kotsi.”