Ha ho Fana ka Seatla se Bulehileng ho Ata

HAEBA u ne u e-na le monyetla oa ho fa morena mpho, u ne u tla mo fa eng? Ho thoe’ng haeba e ne e le ’musi ea ruileng ka ho fetisisa le ea bohlale ka ho fetisisa lefatšeng? Na u ne u ka nahana ka mpho leha e le efe e neng e ka mo thabisa? Lilemong tse ka bang likete tse tharo tse fetileng, mofumahali oa Sheba o ile a tlameha ho nahanisisa ka lipotso tseo ha a ntse a lokisetsa ho etela ’musi ea joalo hantle—Morena Solomone oa Iseraele.

Bibele e re bolella hore mpho ea hae e ne e akarelletsa litalenta tsa khauta tse 120 “le oli ea balsame e ngata haholo le majoe a bohlokoa.” Ho latela theko ea kajeno, khauta feela e ne e ka ba R242 000 000. Oli ea balsame, e leng oli e monko o monate e phekolang, e ne e nkoa e lekana le khauta ka bohlokoa. Le hoja Bibele e sa bolele hore na mofumahali enoa o ile a fa Solomone oli e kae, e re bolella hore ha ho mohla ho kileng ha e-ba le mpho e lekanang le ea hae.—1 Marena 10:10, NW.

Ho totobetse hore mofumahali oa Sheba e ne e le mosali ea ruileng le ea fanang ka seatla se bulehileng. Ho feta moo, o ile a buseletsoa ka lebaka la ho fana ha hae ka seatla se bulehileng. Bibele e re: “Morena Solomone a fa mofumahali oa Sheba sohle seo a se thabelang seo a neng a se kōpile, ka ntle le se lekanang le seo a neng a se tlisitse ho morena.” (2 Likronike 9:12, NW) Ke ’nete hore e ka ’na eaba e ne e le tloaelo hore marena a fapanyetsane limpho; empa Bibele e bua ka ho khetheha ka “seatla se bulehileng” sa Solomone. (1 Marena 10:13, NW) Solomone ka boeena o ile a ngola: “Moea o fanang ka seatla se bulehileng o tla nona, le ea nosetsang ba bang ka bolokolohi o tla nosetsoa ka bolokolohi.”—Liproverbia 11:25, NW.

Ka sebele, mofumahali oa Sheba le eena o ile a tela nako ea hae e ngata le matla e le hore a ka etela Solomone. Kamoo ho bonahalang kateng, Sheba e ne e le sebakeng sa Rephabliki ea Yemen ea kajeno; ka hona, mofumahali enoa le mokoloko oa hae oa likamele o tsamaile sebaka sa lik’hilomithara tse fetang 1 600 ho ea Jerusalema. Joalokaha Jesu a boletse, “o ile a tla ho tsoa lipheletsong tsa lefatše.” Ke hobane’ng ha mofumahali oa Sheba a ile a ikhathatsa hakaale? O ne a tlile ka ho khetheha “ho tla utloa bohlale ba Solomone.”—Luka 11:31.

Marena a Pele 10:1, 2 (NW) e bolela hore mofumahali oa Sheba o ile “a tla ho tla . . . leka [Solomone] ka lipotso tse qakang. . . . [A] qala ho mo bolella sohle se ka pelong ea hae.” Solomone o ile a arabela joang? “Solomone, le eena, a tsoela pele ho mo bolella litaba tsohle tsa hae. Ho ne ho se taba e patehileng ho morena eo a sa kang a mo bolella eona.”—1 Marena 10:3, NW.

A makalitsoe ke seo a se utloileng le ho se bona, mofumahali enoa o ile a araba ka boikokobetso: “Ho thaba bahlanka bana ba hao ba emeng ka pel’a hao kamehla, ba mametse bohlale ba hao!” (1 Marena 10:4-8, NW) Ha aa ka a re bahlanka ba Solomone ba thabile hobane ba ne ba kena-kene—le hoja ho ne ho hlile ho le joalo. Ho e-na le hoo, bahlanka ba Solomone ba ne ba hlohonolofalitsoe hobane kamehla ba ne ba ka mamela bohlale boo Solomone a bo filoeng ke Molimo. Mofumahali oa Sheba ke mohlala o motle hakaakang ho batho ba Jehova kajeno, ba thabelang bohlale ba ’Mōpi ka boeena le ba Mora oa hae, Jesu Kreste!

Se ileng sa boela sa hlokomeloa ke polelo e latelang ea mofumahali enoa ho Solomone: “Ha ho bokoe Jehova, Molimo oa hao.” (1 Marena 10:9) Ho hlakile hore o ile a bona tataiso ea Jehova bohlaleng ba Solomone le katlehong ea hae. Sena se tumellanong le seo Jehova a ileng a se tšepisa Iseraele pejana. O itse: ‘Ho boloka melao ea ka ea tsamaiso’ “ke bohlale ho lōna le kutloisiso ho lōna ka pel’a mahlo a lichaba tse tla utloa melao ena eohle ea tsamaiso, ’me ka sebele li tla re, ‘Sechaba sena se seholo ntle ho pelaelo ke batho ba bohlale le ba utloisisang.’”—Deuteronoma 4:5-7, NW.

Ho Tla ho Mofani oa Bohlale

Mehleng ea kajeno ba limilione le bona ba huletsoe mokhatlong oa Jehova o hlophisitsoeng hobane ba lemohile hore “Iseraele ea Molimo” ke “batho ba bohlale le ba utloisisang,” eseng ka tlhaho, empa hobane ba tataisoa ke melao le melao-motheo ea Molimo e phethahetseng. (Bagalata 6:16) Lipalo tsa ba kolobetsoang li bontša hore lilemong tsa morao tjena ho tšoana leha barutuoa ba bacha ba likete tse makholo selemo ka seng ba itse ho Iseraele ea moea: “Re tla ea le lōna, hobane re utloile hoba Jehova o na le lōna.” (Zakaria 8:23) Ba bacha ba hlolloa hakaakang ha ba bona mokete oa lijo tsa moea tseo Jehova a li behileng ka pel’a bahlanka ba hae! Le ka mohla ba ne ba e-s’o bone tse tšoanang le tsona malumeling a bona a pele.—Esaia 25:6.

Ho fa Mofani e Moholohali

Ba amohetse se sengata hakana, hoa itlisa hore batho ba ananelang ba ipotse hore na bona, ka ho tšoanang, ba ka fana ka eng ho Morena le Mofani e moholohali, Jehova Molimo. Bibele e bontša hore mpho e molemohali eo re ka e fang Jehova ke “sehlabelo sa thoriso.” (Baheberu 13:15) Hobane’ng? Hobane sehlabelo sena se amana ka ho toba le ho pholosa bophelo, e leng ntho e ka sehloohong eo Jehova a amehileng ka eona nakong ena ea bofelo. (Ezekiele 18:23) Ho ekelletsa moo, hore motho a fane ka matla a hae le nako bakeng sa ho thusa bakuli, ba tepeletseng maikutlong le ba bang ke sehlabelo se amohelehang.—1 Bathesalonika 5:14; Baheberu 13:16; Jakobo 1:27.

Menehelo ea chelete e phetha karolo ea bohlokoa. E etsa hore ho khonehe hore ho hatisoe Libibele le lingoliloeng tse thehiloeng Bibeleng ho be ho fumanoe libaka tseo Bakreste ba ka bokanang ho tsona. (Baheberu 10:24, 25) Menehelo e boetse e etsa hore chelete ea liphallelo e be teng bakeng sa ho thusa ba hlasetsoeng ke lintoa le likoluoa tsa tlhaho.

Bakeng sa ho re tataisa tabeng ea ho fana, Lentsoe la Molimo le thathamisa melao-motheo e molemo. Ka mohlala, le ruta hore Bakreste ha ba fane ka se behetsoeng sekepele, empa ba fana ka seo ba khonang ho fana ka sona ho latela maemo a bona, ba etsa joalo ka ho rata, ka lipelo tse thabileng. (2 Bakorinthe 9:7) Ba bang ba ka fana haholo; ba bang, joaloka mosali oa mohlolohali oa mofutsana oa mehleng ea Jesu, ba ka ’na ba khona ho fana ka se senyenyane feela. (Luka 21:2-4) Na hase ho tsotehang hore ebe mpho e ’ngoe le e ’ngoe le sehlabelo se seng le se seng tse fanoang ka sepheo se setle ka lebitso la Jehova—Mong’a bokahohle bohle—ke tsa bohlokoa ho eena?—Baheberu 6:10.

E le hore ba fane ka thabo, batho ba Jehova ba tsebisoa ka litlhoko tse sa tšoaneng le ka mekhoa e molemo eo litlhoko tseo li ka finyelloang ka eona. Ka lehlakoreng le leng, moea oa Jehova o susumetsa lipelo tse ratang ho arabela. Iseraeleng ea boholo-holo mokhoa ona o ne o sebelisoa ha ho hahuoa tabernakele le hamorao ha ho hahuoa tempele. (Exoda 25:2; 35:5, 21, 29; 36:5-7; 39:32; 1 Likronike 29:1-19) Lekholong la pele la lilemo C.E., mokhoa oona oo o ile oa nolofalletsa Bakreste ho ba le matlotlo ao ba neng ba a hloka bakeng sa ho isa litaba tse molemo tsa ’Muso lichabeng le ho fepa barab’abo bona ba Iseraele nakong ea tlala ea boja-likata.—1 Bakorinthe 16:2-4; 2 Bakorinthe 8:4, 15; Bakolose 1:23.

Ka ho tšoanang, kajeno Jehova o hlohonolofalitse batho ba hae, ’me o tla tsoela pele ho ba hlohonolofatsa, ka ho ba fa seo ba se hlokang hore ba phethe phutuho e khōlōhali eo lefatše le kileng la e bona ea ho bolela le ho ruta.—Matheu 24:14; 28:19, 20.

Hona Joale ho na le Litlhoko Life?

Lilemong tsa morao tjena Lipaki tsa Jehova li ’nile tsa ngolisoa ka molao linaheng tse ngata moo pele mosebetsi oa tsona o neng o thibetsoe. Ka lebaka leo, ho bile le keketseho e hlollang ea palo ea bahoeletsi linaheng tse ngata ho tsena. Hoa utloahala hore ho hlokahala ka bongata Libibele le lingoliloeng tse thehiloeng Bibeleng.

Ho hlokahala le Liholo tsa ’Muso ka tsela e tšoanang. Hona joale ho hlokahala Liholo tsa ’Muso tse ncha tse 9 000 lefatšeng lohle. Haeba ho ne ho ka hahuoa Holo ea ’Muso e le ’ngoe ka letsatsi, ho ne ho tla hlokahala lilemo tse fetang 24 ho finyella litlhokahalo tsa hona joale! Ho sa le joalo, ho thehoa liphutheho tse supileng ka letsatsi, bongata ba tsona li thehoa likarolong tsa lefatše tse hlokang chelete. Ka lehlakoreng le leng, boholo ba libaka tsena ha bo hloke mehaho e theko e boima. Libakeng tse ling, Holo ea ’Muso e nang le lintho tse hlokahalang le e sebeletsang e le bopaki bo molemo motseng e ka phethoa ka chelete e fokolang e ka bang R36 000.

Lekholong la pele la lilemo, Bakreste ba bang, ba ne ba le boemong bo molemo licheleteng ho feta ba bang, ka hona, moapostola Pauluse o ile a ngola: “Ka ho leka-lekanya botlallo ba lōna hona joale bo ka koala khaello ea bona, e le hore botlallo ba bona le bona bo ka koala khaello ea lōna, e le hore ho leka-lekanya ho ka ba teng.” (2 Bakorinthe 8:14) Kajeno, “ho leka-lekanya” ho tšoanang ho hlahisa chelete e hlokahalang ea ho lokisetsa Libibele, lingoliloeng tse thehiloeng Bibeleng, Liholo tsa ’Muso, liphallelo tsa likoluoa le lintho tse ling likarolong tse ngata tsa lefatše. Ho fana ho joalo ke tlhohonolofatso e kaakang—ka bobeli ho mofani le ho ea amohelang!—Liketso 20:35.

Joalokaha ho bontšoa ke mangolo ao Mokhatlo o a amohelang a tsoang ho batho ba nang le moea oa ho fana ka seatla se bulehileng, babali ba bangata ba makasine ena ba rata ho thusa empa ha baa tiiseha ka mekhoa e sa tšoaneng eo menehelo e ka fanoang ka eona. Ha ho pelaelo hore sehlooho se lebokoseng le amanang le taba ena se tla thusa ho araba lipotso tsa bona.

Pusong ea Solomone e khanyang, “marena ’ohle a lefatše” a neng a utloa ka eena a ne a mo etela. Empa, Bibele e bua ka ’musi a le mong feela—mofumahali oa Sheba. (2 Likronike 9:23) O ile a itela hakaakang! Empa o ile a putsoa ka ho enneng—hoo qetellong ea ketelo ea hae, a ileng a sala a “hloka puo a bile a hloletsoe.”—2 Likronike 9:4, Today’s English Version.

Nakong e tlang, Jehova, Morena le Mofani e moholohali, o tla etsetsa ba itellang Eena se fetang seo Solomone a neng a ka se etsa. Ha ba arabela, bana ba tla ‘hloka puo ba be ba hlolloe,’ hobane hase feela hore Jehova o tla ba boloka letsatsing la hae la kahlolo le susumetsang tšabo, empa ka mor’a moo o tla ‘fuparolla seatla sa hae, a kholise tse utloang kaofela.’—Pesaleme ea 145:16.

[Litšoantšo tse leqepheng la 23]

Mesebetsi ea Lipaki tsa Jehova e lefelloa ka menehelo ea boithatelo