Koloi ea Jehova ea Leholimo E-ea Tsamaea
“Ha e le mabili, ke ile ka utloa ha a bitsoa, ‘A! tlhophiso ea mabili.’”—EZEKIELE 10:13, “NW.”
1. Jehova o na le sepalangoang sa mofuta ofe?
MEHLENG ena ea lifofane tse ntle, baeta-pele ba lefatše ba ka ’na ba ikutloa hore ba fihlile sehlohlolong sa katleho mekhoeng ea ho tsamaea. Leha ho le joalo, lilemong tse 2 600 tse fetileng, Jehova Molimo o ile a senola hore o na le mofuta o phahameng ka ho fetisisa oa sepalangoang, oo ho seng enjeniere e kileng ea o bona. Ke koloi e khōlō e tšosang! Na ho bonahala ho makatsa hore ’Mōpi oa bokahohle o palama koloi e tšoanang le e huloang ke lipere? Che, hobane koloi ea Jehova ea leholimo e fapane hōle le koloi efe kapa efe e qapiloeng ke batho.
2. Ezekiele khaolo 1 e tšoantša koloi ea Jehova ea leholimo joang, ’me pele moprofeta o re hlokomelisa ka bo-mang?
2 Khaolong ea 1 ea boprofeta ba Ezekiele, Jehova o tšoantšoa a palame koloi e khōlō ea leholimo. Koloi ena e mabili a mane e hlollang e-ea itsamaisa ’me e etsa lintho tse makatsang. Ezekiele o bone koloi ena ea leholimo ponong ka 613 B.C.E., ha a ne a le pel’a o mong oa melatsoana ea Babylona ea boholo-holo. Pele moprofeta o re hlokomelisa ka ba pel’a koloi ea Jehova ea leholimo. Ha re ntse re bala, a re lekeng ho iketsetsa setšoantšo sa se bonoeng ke Ezekiele ka likelellong tsa rōna.
Libōpuoa tse Phelang tse ’Nè
3. Lifahleho tse ’nè tsa kerubime ka ’ngoe ho likerubime tse ’nè li emela eng?
3 Ezekiele oa tlaleha: “Eitse ha ke talima, ka bona moea oa sefefo o tsoang Leboea, ho le leru le leholo le tsoakaneng le mollo, le benyang ka ’nģa tsohle . . . Bohareng ba mollo, ka bona ntho tse kang libopuoa tse utloang tse ’ne.” (Ezekiele 1:4, 5) Sebōpuoa ka seng libōpuoeng tsena tse phelang tse ’nè, kapa likerubime, se ne se e-na le lipheo tse ’nè le lifahleho tse ’nè. Li ne li e-na le sefahleho sa tau, se bontšang toka ea Jehova; sefahleho sa poho, se emelang matla a Molimo; le sefahleho sa ntsu, se tšoantšang bohlale ba Hae. Li ne li boetse li e-na le sefahleho sa motho, se emelang lerato la Jehova.—Deuteronoma 32:4, NW; Jobo 12:13; Esaia 40:26; Ezekiele 1:10; 1 Johanne 4:8.
4. Ke ka baka la’ng ha likerubime li ne li e-na le lifahleho tse ’nè, ’me likerubime li ne li le joang tabeng ea lebelo?
4 Kerubime ka ’ngoe e ne e e-na le sefahleho se shebileng ka lehlakoreng ka leng la mahlakore a mane. Kahoo, likerubime li ne li ka nka tsela e fapaneng hang-hang ’me tsa latela sefahleho se shebileng ka lehlakoreng leo li le batlang. Empa likerubime tseo li ne li le joang tabeng ea lebelo? Li ne li ka tsamaea ka lebelo la lehalima! (Ezekiele 1:14) Ha ho koloi e entsoeng ke motho e kileng ea finyella lebelo leo.
5. Ezekiele o ile a hlalosa mabili a koloi le lirimi tsa ’ona joang?
5 Ka ho panya ha leihlo, mabili a koloi a qala ho bonahala. Ke a sa tloaelehang hakaakang! Litemana 16 le 18 li re: “Ponahalo ea ’ona le mokhoa oa ’ona ho ne ho le joale ka hoja lebili le leng le kene ka hare ho le leng. Ha e le lifeleng [“liriming,” NW] tsa ’ona, li ne li phahame, li tšabeha; hape, lifeleng tsa ’ona, mabiling a mane, li ne li tletse mahlo kahohle.” Ho ba teng ha lebili pel’a kerubime ka ’ngoe ho ne ho tla etsa hore ho be le mabili a mane libakeng tse ’nè tse tšoanang. Mabili a ne a benya joaloka krysolithe, lejoe le bonaletsang, le bosehla bo hlakileng kapa le letala. Sena se eketsa khanya le botle ponong ena e khanyang. Kaha lirimi tsa mabili li ne “li tletse mahlo kahohle,” li ne li sa tsamaee feela ka bofofu ho ea ’nģeng efe kapa efe. ’Me mabili a ne a phahame ka ho fetisisa, ka hona a ne a khona ho tsamaea sebaka se selelele ka ho phikoloha hanngoe feela. Le ’ona, joaloka likerubime tse ’nè, a ne a ka tsamaea ka lebelo la lehalima.
Mabili a Keneng ka Har’a Mabili
6. (a) Ke joang koloi e neng e e-na le mabili a keneng ka har’a mabili? (b) Mabili a ne a lumellanya motsamao oa ’ona le oa eng?
6 Ho na le ho hong hape ho neng ho sa tloaeleha. Lebili ka leng le ne le e-na le lebili le leng ka har’a lona—le nang le tekanyo e tšoanang ’me le kentsoe le tšekaletse ka har’a lebili la pele. Ke ka tsela ena feela ho neng ho ka boleloa hore mabili “a na a tsamaea ka lintlha tse ’ne tsa ’ona.” (Temana 17) Hang-hang, mabili a ne a ka nka tsela e fapaneng hobane ho ne ho e-na le lehlakore la lebili le shebileng ’nģeng ka ’ngoe. Mabili a ne a lumellanya motsamao oa ’ona le oa likerubime tse ’nè. Koloi ea Molimo e ne e tsamaea e lutse holim’a mabili ana a mane, e tšehelitsoe ke ntho e sa bonahaleng ho tšoana le sekepe se matla se phahamisitsoeng ke moea ha se ntse se tsamaea holim’a metsi.
7. Mohloli oa matla a mabili ao e ne e le ofe?
7 Mabili ao a fumane matla ana a ho lumellana le metsamao eohle ea likerubime tse ’nè hokae? A a fumane moeeng o halalelang oa Molimo o Matla ’Ohle. Temana ea 20 e re: “Li ne li ea moo moea o ratang ho ea teng . . . Hobane moea oa sebopuoa o no o le mabiling.” Matla a tšoanang a sa bonahaleng a sebetsang a Molimo a neng a le ka hare ho likerubime a ne a le mabiling ao.
8. Mabili a ile a fuoa lebitso lefe, hona hobane’ng?
8 Mabili ao a bitsoa “tlhophiso ea mabili.” (Ezekiele 10:13, NW) Ka ho hlakileng lebitso lena le hlahisitsoe ke seo lebili ka leng le se etsang. Lea bilika kapa lea phikoloha. Ho bitsa karolo ena ea koloi ea leholimo ka lebitso le joalo ho hlokomelisa ka lebelo leo koloi eo ea leholimo e mathang ka lona. Le hoja mabili a eona a ne a phikoloha ka lebelo le leholo hakaalo, ka linako tsohle a ne a ka bona tsela ea ’ona ka lebaka la mahlo a ’ona a tletseng ka hohle.
9. Ezekiele o ile a hlalosa ho neng ho le ka holimo ho mabili a mane a koloi a mathang ka lebelo le leholo joang?
9 Empa joale a re ke re talimeng ’me re bone ho ka holimo ho mabili ao a mane a bophahamo bo tšosang, a tsamaeang ka lebelo le leholo. Temana ea 22 ho Ezekiele khaolo 1 e re: “Ho okametseng lihloho tsa libopuoa e ne e le ntho e kang sebaka se tšoanang le kristale e tsotehang, e aliloeng ka holimo ho lihloho tsa tsona ’nģa holimo.” Le hoja sebaka seo se ne se se na makhalo, se ne se hlakile, e le “se tšoanang le kristale e tsotehang.” Se ne se phatsima joaloka litaemane tse likete ha li le letsatsing. Ka sebele e ne e le se hlollang!
Mopalami ea Khanyang oa Koloi
10. (a) Terone le Ea lutseng holim’a terone ba hlalosoa joang? (b) ’Nete ea hore Mopalami oa koloi o koahetsoe ke khanya e bontša eng?
10 Ka ho hlakileng, koloi e-ea ema e le hore Mopalami oa eona a bue le Ezekiele. Ka holimo ho sebaka ho na le ntho e tšoanang le terone, e kang lehakoe le safire, kapa e nang le ponahalo e boputsoa bo loileng. Ho na le E Mong holim’a terone, eo ponahalo ea hae e kang ea motho. Setšoantšo sa motho e ne e le ponahalo e molemohali e ka thusang Ezekiele ho utloisisa ponahatso ena ea bomolimo. Empa setšoantšo seo sa motho se koahetsoe ke khanya, hoo se phatsimang joaloka motsoako o benyang oa gauda le silevera. Ke botle bo susumetsang hakaakang! Ho tloha lethekeng la setšoantšo sena se kang motho, khanya ena e hlollang e phatsima ho ea holimo le ho ea tlaase. Ka hona setšoantšo sohle se pota-potiloe ke khanya. Hona ho bontša hore Jehova o khanya ka tsela e ke keng ea hlalosoa. Ho phaella moo, Mopalami oa koloi o pota-potiloe ke mookoli o motle. Mookoli o bontša botsitso le khutso e kaakang ka mor’a sefefo! Jehova a e-na le boikutlo bo joalo bo tsitsitseng, o boloka litšoaneleho tsa hae tsa bohlale, toka, matla le lerato li leka-lekane ka ho phethahetseng.
11. Pono ea koloi le terone ea Jehova e ile ea ama Ezekiele joang?
11 Koloi ea Jehova le terone ea hae li pota-potiloe ke khanya le mebala e metle. Li fapane hakaakang le Satane, morena oa lefifi le bonohe! Sena sohle se ile sa ama Ezekiele joang? O re: “Eitse ha ke bona hoo, ka itiha ka sefahleho sa ka, ’me ka utloa lentsoe la e mong ea buang.”—Ezekiele 1:28.
Seo Koloi e Neng e se Tšoantšetsa
12. Ke eng e tšoantšetsoang ke koloi ea Jehova ea leholimo?
12 Ke eng e tšoantšetsoang ke koloi ee e makatsang? E tšoantšetsa mokhatlo o hlophisitsoeng oa leholimo oa Jehova Molimo. O entsoe ka libōpuoa tsohle tsa hae tse halalelang tsa moea tse sebakeng se sa bonahaleng—lirafime, likerubime, le mangeloi. Kaha Jehova ke Molimo o Phahameng ka ho Fetisisa, libōpuoa tsa hae tsa moea kaofela li ka tlas’a hae, ’me o li khanna ka kutloisiso ea hore o li busa ka mosa le ho li sebelisa tumellanong le morero oa hae.—Pesaleme ea 103:20.
13. (a) Ke hobane’ng ha ho ka thoe Jehova o khanna mokhatlo oa hae o hlophisitsoeng? (b) Pono ea koloi ea Jehova ea leholimo e nang le mabili a mane e ntseng e tsamaea e u ama joang?
13 Jehova o khanna mokhatlo ona o hlophisitsoeng joalokaha eka o holim’a koloi, o o lebisa kae kapa kae moo moea oa hae o o susumelletsang hore o lebe teng. Ha o tsamaee ka ho tlatselela, ka ntle ho taolo kapa tsamaiso e bohlale. Molimo ha o lumelle mokhatlo ona o hlophisitsoeng hore o lebe leha e le kae moo o ka ’nang oa sekamela ho leba teng. Ho e-na le hoo, o latela litaelo tsa Molimo. Kaofela ba hatela pele ba kopane ho ea phethahatsong e felletseng ea merero ea Molimo. Ke mokhatlo o hlophisitsoeng oa leholimo o tsotehang hakaakang o senoloang ke pono ena ea koloi e nang le mabili a mane ea Jehova ea leholimo e ntseng e tsamaea! Tumellanong le sena, mokhatlo o hlophisitsoeng oa Jehova o tšoantšoa e le o nang le mahlakore a mane a lekanang, o e-na le ho leka-lekana ho phethahetseng.
O Khetheloa ho ba Seboholi
14. Moprofeta Ezekiele o tšoantšetsa mang?
14 Empa moprofeta Ezekiele o tšoantšetsa mang? Ho tsoa linneteng tsa histori, ho hlakile hore sehlopha sa Lipaki tsa Jehova tse tlotsitsoeng ka moea se ’nile sa amahanngoa le koloi ea leholimo. Ka hona, Ezekiele o tšoantšetsa hantle masala a tlotsitsoeng a Lipaki tsa Jehova ho tloha ka 1919. Mokhatlo o hlophisitsoeng oa Jehova oa leholimo o ile oa kopana ka tsela ea moea le masala a tlotsitsoeng ka selemo seo, ho a tsosolosetsa ho ba Lipaki tsa Jehova lefatšeng lohle. (Bapisa le Tšenolo 11:1-12.) Ka nako eo mokhatlo oo o hlophisitsoeng o kang koloi o ne o qalile ho tsamaea, joalokaha o sa ntsane o tsamaea le kajeno. Ha e le hantle, mabili a oona a khatelo-pele a phikoloha ka lebelo le leholo ho feta leha e le neng pele. Jehova o khanna ka lebelo le leholo ho leba pele!
15. Lentsoe la Mopalami oa koloi ea leholimo le re’ng, ’me Ezekiele o amohela thōmo efe?
15 Ezekiele o ne a laba-labela ho tseba hore na ke hobane’ng ha koloi ea leholimo e ile ea fihla pel’a hae eaba ea ema. O ile a fumana lebaka ha a utloa lentsoe le tsoang ho Ea lutseng holim’a koloi. Ezekiele a hloletsoe ke pono ena e hlollang, o ile a itihela fatše ka sefahleho. Mamela ha lentsoe la Mopalami oa koloi ea leholimo le re: “Mor’a motho, ema ka maoto a hao, ke tle ke bue le uena.” (Ezekiele 2:1) Joale Jehova o roma Ezekiele ho ba seboholi le ho lemosa ntlo ea bofetoheli ea Iseraele. O bile o romeloa ho ea bolela ka lebitso la Molimo. Lebitso la Ezekiele le bolela “Molimo oa Matlafatsa.” Kahoo Molimo o matlafalitse sehlopha sa Ezekiele ’me o se romme, o se khethile hore e be seboholi ho Bokreste-’mōtoana.
16, 17. (a) Pono ea koloi ea leholimo e ile ea tsoela Ezekiele molemo joang? (b) Kajeno, kutloisiso ea pono ea koloi ea leholimo e amme sehlopha sa Ezekiele le bongata bo boholo ba batho joang?
16 Pono ea koloi ea leholimo e ne e le e tebileng le e makatsang ho Ezekiele, empa e ile ea boela ea mo hlomella thōmong ea hae ea ho utloahatsa temoso ea timetso e tlang ea Jerusalema joaloka seboholi. Ho bile joalo le ho sehlopha sa seboholi kajeno. Kutloisiso ea bona ka pono ea koloi ea Jehova ea leholimo e ntseng e tsamaea e bile le phello e khōlō ho masala a tlotsitsoeng. Ka 1931 ba ile ba ithuta ho eketsehileng ka pono ea Ezekiele, joalokaha ho senotsoe Bukeng ea Pele ea Vindication. Joale ba ile ba tlala kananelo e tebileng hoo ho tloha ka tokollo ea October 15, 1931, ho ea ho August 1, 1950, leqephe le ka ntle la makasine oa The Watchtower, le ileng la qala ho ba le setšoantšo sa pono ea Ezekiele ea koloi ea leholimo karolong e ka holimo ka letsohong le letona, se neng se entsoe ho latela kutloisiso ea motho ea etsang litšoantšo. Ka hona, sehlopha sa Ezekiele se phethahalitse thōmo eo se e nehiloeng, ’me se ’nile sa sebeletsa e le seboholi, sa utloahatsa temoso ea Molimo. Nako ea timetso e bohale ea Bokreste-’mōtoana e tsoang ho Jehova ea lutseng teroneng ea koloi ea hae ea leholimo e se e atametse ho feta leha e le neng pele!
17 Kajeno, “bongata bo boholo” ba batho ba kang linku bo ikopantse le masala a tlotsitsoeng. (Tšenolo 7:9) Ba kopane, ba utloahatsa temoso ea timetso e tlelang Bokreste-’mōtoana le tsamaiso ena eohle ea lintho ea bodiabolose. Mosebetsi oo oa ho lemosa o tsamaea ka lebelo le leholo, ’me joalokaha ho bontšoa ho Tšenolo 14:6, 7, o tšehelitsoe ke mangeloi.
Ho Tsamaea le Koloi ea Leholimo
18. Re tlameha ho etsa eng hore re fumane tšehetso e tsoelang pele ea mangeloi, ’me re lokela ho arabela ho eng?
18 Mangeloi a ikokobelitseng a tsamaea ka kutloano e le karolo ea mokhatlo o hlophisitsoeng oa leholimo oa Molimo ha a ntse a thusa bahlanka ba Jehova ba lefatšeng ho phethahatsa thōmo ea bona ea ho phatlalatsa litemoso tsa kahlolo ea Molimo. Haeba re lakatsa ho fumana tšireletso le tataiso e tsoelang pele ea bahlanka bana ba matla ba Molimo ba mangeloi, le rōna re tlameha ho tsamaea ka kutloano ’me re boloke mohato le tlhophiso ena ea mabili a tšoantšetso. Ho phaella moo, joaloka karolo ea mokhatlo o hlophisitsoeng o bonahalang oa Jehova o tsamaeang hammoho le koloi ea hae ea leholimo, re lokela ho arabela ketello-peleng ea moea oa Molimo. (Bapisa Ba-Filippi 2:13.) Haeba re Lipaki tsa Jehova, re tlameha ho tsamaea ka tsela eo koloi ea leholimo e tsamaeang ka eona. Ka sebele ha rea lokela ho sebetsa khahlanong le eona. Ha re fuoa tataiso mabapi le tsela eo re lokelang ho e nka, re lokela ho e latela. Ka hona, phutheho ha e arohane.—1 Ba-Korinthe 1:10.
19. (a) Joalokaha mabili a koloi ea leholimo a e-na le mahlo ka hohle, batho ba Jehova ba lokela ho falimehela eng? (b) Re lokela ho nka khato efe linakong tsee tsa mefere-fere?
19 Mahlo a tletseng ka hohle mabiling a koloi ea Molimo a bontša ho falimeha. Joalokaha mokhatlo o hlophisitsoeng oa leholimo o falimehile, le rōna re tlameha ho falimehela ho tšehetsa mokhatlo o hlophisitsoeng oa Jehova oa lefatšeng. Ka phuthehong, re ka bontša tšehetso eo ka ho sebelisana le baholo ba libakeng tsa habo rōna. (Ba-Heberu 13:17) ’Me linakong tsena tsa mefere-fere, ho hlokahala hore Bakreste ba khomarele mokhatlo o hlophisitsoeng oa Jehova haufi-ufi. Ha re batle ho hlalosa liketsahalo ka tsela eo e leng ea rōna, hobane ha re etsa joalo re tla be re sa tsamaee ’moho le koloi ea Jehova ea leholimo. Ka linako tsohle a re ipotseng, ‘Koloi ea leholimo e tsamaea ka tsela efe?’ Haeba re hatela pele le mokhatlo o hlophisitsoeng o bonahalang oa Molimo, re tla be re boetse re tsamaea le mokhatlo o hlophisitsoeng o sa bonahaleng.
20. Moapostola Pauluse o fana ka keletso efe e ntle ho Ba-Filippi 3:13-16?
20 Mabapi le sena, Pauluse o ngotse: “Banab’eso, ha e le ’na, ha ke itekanye hore ke se ke hapile; empa ke etsa ho le hong feela: ke lebala tse kamorao, ’me ke hahamalla ho tse kapele; ke titimela moo ho lekanntsoeng teng, e leng pheo eo re e biletsoang holimo ke Molimo, ka Jesu Kreste. Ka baka leo, rōna bohle ba phethehileng, a re ke re ikutloeng joalo; ’me ha le e-na le boikutlo bosele nthong e ’ngoe, le hona Molimo o tla le senolela hona. Empa ha e le moo re setseng re fihletse teng, re ke re tsamaee ka molao [“ka mokhoa,” NW] o le mong.”—Ba-Filippi 3:13-16.
21. Re ka hatela pele moeeng hammoho le mokhatlo o hlophisitsoeng oa Molimo ka ho latela mokhoa ofe?
21 Mona lentsoe “mokhoa” ha le bolele tloaelo e mpe eo re ke keng ra itšoasolla ho eona. Bahlanka ba Jehova ba na le mokhoa o motle oo ka oona ba etsang tsoelo-pele ea moea. Ke mokhoa oa ho etsa thuto ea botho ea Bibele, ho kopanela libokeng tsa phutheho, ho bolela litaba tse molemo tsa ’Muso ka mehla, le ho bonahatsa litšoaneleho tsa mokhatlo o hlophisitsoeng oa leholimo oa Molimo. Mokhoa o joalo o ba nolofaletsa ho latela ketello-pele ea mokhatlo o hlophisitsoeng oa Jehova oa leholimo o kang koloi. Ha re tiisetsa ka mokhoa ona, re tla finyella pakane ea rōna, ebang ke moputso oa bophelo ba ho se shoe maholimong kapa bophelo bo sa feleng lefatšeng la paradeise.
22. (a) Ho lokela ho etsoa eng bakeng sa hore masala a tlotsitsoeng le bongata bo boholo ba linku tse ling e be mokhatlo o hlophisitsoeng o kopaneng? (b) Ke eng seo Jehova a ke keng a hlōleha ho se bona?
22 Joalokaha Johanne 10:16 e bontša, “linku tse ling” le sehlopha sa Ezekiele e ne e tla ba mokhatlo o hlophisitsoeng o kopaneng. Ka hona, ke habohlokoa hore bohle ba ka hare ho mokhatlo o hlophisitsoeng oa Jehova ba utloisise moelelo o felletseng oa pono e tlalehiloeng ho Ezekiele khaolo 1 le bohlokoa ba eona e le hore ba tle ba tsamaee ka kutloano le koloi ea Molimo ea leholimo. Pono ea eona e re thusa ho ananela hore re lokela ho tsamaea tumellanong le mokhatlo o hlophisitsoeng oa Molimo, o bonahalang le o sa bonahaleng. Hopola hape hore mahlo a Jehova “a qamaka lefatšeng lohle hore a emele bao pelo tsa bona e leng tsa hae kaofela.” (2 Likronike 16:9) Ha ho ntho leha e le ’ngoe eo Jehova a sa e boneng, haholo-holo ntho leha e le efe e amanang le morero oa hae oa ho itlotlisa joaloka ’Musi oa Bokahohle.
23. Kaha koloi ea Jehova ea leholimo e-ea tsamaea, re tlameha ho etsa eng?
23 Ka sebele koloi ea Jehova ea leholimo e-ea tsamaea kajeno. Haufinyane ho tla etsoa hore tsohle li khanye tumellanong le Ea khanyang ea palameng koloi eo—’me seo sohle se tla etsetsoa ho mo tlotlisa joaloka Morena ’Musi oa bokahohle. Lirafime tsa hae, likerubime, le mangeloi li re tšehelitse mosebetsing oa rōna o moholo oa ho bolela lefatšeng ka bophara. Joale, a re hateleng pele le mokhatlo o hlophisitsoeng oa Jehova oa leholimo. Empa re ka boloka mohato joang le koloi eo ea leholimo e tsamaeang ka lebelo le leholo?
U ne U Tla Arabela Joang?
◻ Libōpuoa tse phelang tse ’nè tse bonoeng ke Ezekiele li emela litšoaneleho life?
◻ Ke eng e tšoantšetsoang ke koloi ea Jehova ea leholimo?
◻ Moprofeta oa Molimo Ezekiele o tšoantšetsa mang?
◻ Kutloisiso ea koloi ea Jehova ea leholimo e amme sehlopha sa Ezekiele le bongata bo boholo ba batho joang?