Jehova o Ananela Tšebeletso ea hao ea Moea Oohle
‘Eng kapa eng eo le e etsang, le e sebetse ka moea oohle joalokaha eka le sebeletsa Jehova, eseng batho.’—BAKOLOSE 3:23.
1, 2. (a) Tokelo e khōlōhali eo ho ka etsahalang hore re be le eona ke efe? (b) Ke hobane’ng ha ka linako tse ling re hlōleha ho etsa sohle seo re neng re ka rata ho se etsa tšebeletsong ea Molimo?
HO SEBELETSA Jehova ke tokelo e khōlō ka ho fetisisa eo re ka bang le eona. Ke ka lebaka le letle makasine ena e leng khale e khothalletsa Bakreste ho kopanela tšebeletsong, esita le ho sebeletsa “ka botlalo haholoanyane” neng le neng ha ho khoneha. (1 Bathesalonika 4:1) Leha ho le joalo, hase kamehla re khonang ho etsa sohle seo lipelo tsa rōna li labalabelang ho se etsa tšebeletsong ea Molimo. Morali e mong oabo rōna oa lesoha ea kolobelitsoeng lilemong tse ka bang 40 tse fetileng oa hlalosa: “Maemo a ka a ntlhoka ho sebetsa ka nako e tletseng. Lebaka la ka la ho sebetsa hase ho batla liaparo tsa morao-rao tse turang kapa ho ea phomolong ea leeto la sekepe, empa ke sebeletsa lintho tseo ke hlileng ke li hlokang, ho akarelletsa le litšenyehelo tsa ho kula le tsa meno. Ke ikutloa eka ke fa Jehova ho honyenyane ho setseng.”
2 Ho rata Molimo ho re susumelletsa ho etsa sohle seo re ka se khonang mosebetsing oa ho bolela. Empa hangata maemo a bophelo a lekanyetsa seo re ka se etsang. Ho hlokomela boikarabelo bo bong ba Mangolo, ho akarelletsa le litlamo tsa lelapa, ho ka ’na ha ja nako ea rōna e ngata le ho re qeta matla. (1 Timothea 5:4, 8) ‘Linakong tsena tse mahlonoko tseo ho leng thata ho sebetsana le tsona,’ bophelo e ntse e e-ba bo phephetsang haholoanyane. (2 Timothea 3:1) Ha re sa khone ho etsa sohle seo re neng re ka rata ho se etsa tšebeletsong, lipelo tsa rōna li ka ’na tsa re tšoenya ho ea bohōleng bo itseng. Re ka ’na ra ipotsa hore na ebe Molimo o thabisoa ke borapeli ba rōna.
Botle ba Tšebeletso ea Moea Oohle
3. Jehova o lebeletse eng ho rōna kaofela?
3 Ho Pesaleme ea 103:14, Bibele e re tiisetsa ka mofuthu hore Jehova o “tsebisisa ho bōpjoa ha rōna, o elelloa hoba re lerōle feela.” Ho feta leha e le mang e mong, o utloisisa mefokolo ea rōna. Ha a batle se fetang seo re ka fanang ka sona. O lebeletse eng? Eng le eng eo e mong le e mong, ho sa tsotellehe boemo ba hae bophelong, a ka fanang ka eona: ‘Eng kapa eng eo le e etsang, le e sebetse ka moea oohle joalokaha eka le sebeletsa Jehova, eseng batho.’ (Bakolose 3:23) E, Jehova o re lebeletse—rōna kaofela—hore re mo sebeletse ka moea oohle.
4. Ho sebeletsa Jehova ka moea oohle ho bolela’ng?
4 Ho sebeletsa Jehova ka moea oohle ho bolela’ng? Lentsoe la Segerike le fetoletsoeng e le ‘moea oohle’ ka ho toba le bolela “ho tloha moeeng.” ‘Moea’ o bolela motho kaofela, ka matla a hae a ’mele le a kelello. Ka lebaka leo, ho sebeletsa ka moea oohle ho bolela ho itella ba bang, ho sebelisa tsebo eohle ea rōna le ho sebelisa matla ’ohle a rōna ka hohle kamoo ho ka khonehang tšebeletsong ea Molimo. Habonolo feela, ho bolela ho etsa sohle seo moea oa rōna o ka khonang ho se etsa.—Mareka 12:29, 30.
5. Mohlala oa baapostola o bontša joang hore hase tlamo hore bohle ba etse se tšoanang tšebeletsong?
5 Na ho ba ka moea oohle ho bolela hore kaofela re tlameha ho etsa tšebeletso e lekanang? Seo se ka ba thata, hobane maemo le matla a batho aa fapana. Nahana ka baapostola ba Jesu ba tšepahalang. Ba ne ba sa khone ho etsa mosebetsi o lekanang. Ka mohlala, re tseba ho honyenyane haholo ka baapostola ba bang, ba kang Simone Mokanana le Jakobo mor’a Alfiase. Mohlomong mesebetsi ea bona e le baapostola e ne e batla e lekanyelitsoe. (Matheu 10:2-4) Ha ho bapisoa, Petrose o ne a khona ho amohela boikarabelo bo bongata bo boima—ka sebele, Jesu o bile a mo fa “linotlolo tsa ’muso”! (Matheu 16:19) Empa, Petrose o ne a sa phahamisetsoa ka holim’a ba bang. Ha Johanne a ne a e-ba le pono ea Jerusalema e Mocha Tšenolong (hoo e ka bang ka 96 C.E.), o ile a bona majoe a motheo a 12 ’me ho ’ona ho ne ho ngotsoe “mabitso a leshome le metso e ’meli a baapostola ba leshome le metso e ’meli.”a (Tšenolo 21:14) Jehova o ne a nka tšebeletso ea baapostola kaofela e le ea bohlokoa, le hoja ho hlakile hore ba bang ba ne ba khona ho etsa se fetang sa ba bang.
6. Papisong ea Jesu ea mojali, ho etsahala’ng ka peō e jetsoeng “mobung o motle,” ’me ho hlaha lipotso life?
6 Ka ho tšoanang, Jehova ha a batle mosebetsi oa boboleli o lekanang ho rōna kaofela. Jesu o ile a bontša sena papisong ea mojali, e neng e tšoantša mosebetsi oa boboleli le ho jala lipeō. Peō e ile ea oela mobung oa mefuta e sa tšoaneng, e leng ho bontšang boemo ba pelo bo sa tšoaneng bo bontšoang ke ba utloang molaetsa. Jesu o ile a hlalosa: “Ha e le e jetsoeng mobung o motle, enoa ke ea utloang lentsoe ’me a le utloisisa, eo ka sebele a hlileng a behang litholoana ’me a hlahisa, enoa tse lekholo, eane tse mashome a tšeletseng, e mong tse mashome a mararo.” (Matheu 13:3-8, 18-23) Litholoana tsee ke eng, ’me ke hobane’ng ha li hlahisoa ka litekanyo tse sa tšoaneng?
7. Litholoana tsa peō e jetsoeng ke life, ’me ke hobane’ng ha li hlahisoa ka litekanyo tse sa tšoaneng?
7 Kaha peō e jetsoeng ke “lentsoe la ’muso,” ho beha litholoana ho bolela ho jala lentsoe leo, ho bua ka lona ho ba bang. (Matheu 13:19) Palo ea litholoana tse hlahisitsoeng ea fapana—ho tloha ho tse mashome a mararo ho ea ho tse lekholo—hobane matla le maemo a bophelo aa fapana. Motho ea phetseng hantle a bile a le mokoka a ka ’na a khona ho qeta nako e eketsehileng boboleling ho feta eo matla a hae a qetoang ke lefu le sa foleng kapa ke ho hōla. Mocha oa lesoha ea se nang boikarabelo ba lelapa a ka ’na a khona ho etsa se eketsehileng ho feta motho ea tlamehang ho sebetsa ka nako e tletseng bakeng sa ho phelisa lelapa.—Bapisa le Liproverbia 20:29.
8. Jehova o talima ba fanang ka se molemohali seo ba ka se khonang joang?
8 Mahlong a Molimo, na motho ea leng ka moea oohle ea hlahisang litholoana tse mashome a mararo o tšepahala hanyenyane ho feta ea hlahisang tse lekholo? Le hanyenyane! Palo ea litholoana e ka fapana, empa Jehova oa thaba hafeela tšebeletso e nehelanoang e le e molemohali eo re ka fanang ka eona. Hopola, palo e sa tšoaneng ea litholoana kaofela e tsoa lipelong tseo e leng ‘mobu o motle.’ Lentsoe la Segerike (ka·losʹ) le fetoletsoeng e le ‘ntle’ le hlalosa ntho e ’ngoe e “bohehang” le e “thabisang pelo, le ho khahla mahlo.” Ho khothatsa hakaakang ho tseba hore ha re etsa sohle seo re ka se khonang, lipelo tsa rōna lia boheha mahlong a Molimo!
Eseng ka ho Ipapisa le ba Bang
9, 10. (a) Lipelo tsa rōna li ka ’na tsa re lebisa monahanong ofe o fosahetseng? (b) Papiso e ho 1 Bakorinthe 12:14-26 e bontša joang hore Jehova ha a re bapise le ba bang ho seo re se etsang?
9 Leha ho le joalo, lipelo tsa rōna tse sa phethahalang li ka ’na tsa ahlola lintho ka tsela e sa tšoaneng. Li ka ’na tsa bapisa tšebeletso ea rōna le ea ba bang. Li ka ’na tsa beha mabaka, ‘Ba bang ba etsa ho hongata haholo tšebeletsong ho mpheta. Jehova a ka thabisoa ke tšebeletso ea ka joang le ka mohla?’—Bapisa le 1 Johanne 3:19, 20.
10 Mehopolo ea Jehova le litsela tsa hae li phahametse tsa rōna hōle. (Esaia 55:9) Re fumana temohisiso e itseng tseleng eo ka eona Jehova a talimang boiteko ba rōna ka bomong ho 1 Bakorinthe 12:14-26, moo phutheho e tšoantšoang le ’mele o nang le litho tse ngata—mahlo, matsoho, maoto, litsebe le tse ling tse joalo. Nahana ka ’mele oa sebele ka motsotsoana feela. E ne e tla ba ho sa utloahaleng hakaakang ho bapisa leihlo la hao le matsoho a hao kapa maoto a hao le litsebe tsa hao! Setho ka seng se sebetsa mosebetsi o fapaneng, empa litho tsohle li molemo ’me li nkoa e le tsa bohlokoa. Ka ho tšoanang, Jehova o ananela tšebeletso ea hao ea moea oohle ebang ba bang ba etsa se fetang seo kapa ba etsa se senyenyane ho sona.—Bagalata 6:4.
11, 12. (a) Ke hobane’ng ha ba bang ba ka ’na ba ikutloa hore ba “fokola haholoanyane” kapa ba “hlompheha hanyenyane”? (b) Jehova o talima tšebeletso ea rōna joang?
11 Ka lebaka la mefokolo e hlahisoang ke ho kula, ho hōla kapa maemo a mang, ka linako tse ling ba bang ba rōna re ka ’na ra ikutloa hore re “fokola haholoanyane” kapa re “hlompheha hanyenyane.” Empa hase tsela eo Jehova a talimang litaba ka eona. Bibele ea re bolella: “Litho tsa ’mele tse bonahalang li fokola haholoanyane lia hlokahala, ’me likarolo . . . tseo re nahanang hore li hlompheha hanyenyane, tsena re li lika-liketsa ka tlhompho e eketsehileng haholoanyane . . . Leha ho le joalo, Molimo o ile a kopanya ’mele, a fana ka tlhompho e eketsehileng haholoanyane karolong e neng e e-na le khaello.” (1 Bakorinthe 12:22-24) Ka hona motho e mong le e mong e ka ba oa bohlokoa ho Jehova. O nka tšebeletso ea rōna e le ea bohlokoa ka har’a meeli ea mefokolo ea rōna. Na pelo ea hao ha e u susumeletse ho batla ho etsa sohle seo u ka se khonang tšebeletsong ea Molimo ea utloisisang le ea lerato hakaalo?
12 Joale, seo e leng sa bohlokoa ho Jehova hase hore u etse se lekanang le seo e mong a se etsang empa ke hore u etse seo uena—moea oa hao—u ka se etsang. Hore Jehova o nka boiteko ba rōna ka bomong e le ba bohlokoa ho ile ha bontšoa ka tsela e amang maikutlo haholo ke tšebelisano ea Jesu le basali ba babeli bao maemo a bona a fapaneng haholo matsatsing a ho qetela a bophelo ba hae lefatšeng.
Mpho “e Theko e Boima Haholo” ea Mosali ea Ananelang
13. (a) Ke maemo afe a neng a potolohile ho tšela ha Maria oli e monko o monate hloohong ea Jesu le maotong a hae? (b) Oli ea Maria e ne e le bokae?
13 Ka Labohlano mantsiboea, ka la 8 Nisane, Jesu o ile a fihla Bethani, motsana o mothuleng o ka bochabela oa Thaba ea Mehloaare, o bohōle ba lik’hilomithara tse ka bang tharo ho tloha Jerusalema. Jesu o ne a e-na le metsoalle e ratoang motseng ona—e leng Maria, Maretha le khaitseli ea bona, Lazaro. Jesu e ’nile ea e-ba moeti lelapeng labo bona, mohlomong hangata. Empa mantsiboeeng a Moqebelo, Jesu le metsoalle ea hae ba ile ba jela lijo tsa mantsiboea lapeng ha Simone, eo e neng e le molepera eo ho ka etsahalang hore ebe o ile a folisoa ke Jesu. Ha Jesu a ntse a otlile ka lehlakore tafoleng, Maria o ile a etsa ketso ea boikokobetso e ileng ea bontša lerato la hae le tebileng bakeng sa monna enoa ea neng a ile a tsosa khaitseli ea hae. O ile a bula flaske e tšetseng oli e monko o monate, “e theko e boima haholo.” Ka sebele e le e theko e boima! E ne e le lidenari tse 300, tseo e ka bang moputso oa selemo. O ile a tšela oli ena e monko o monate hloohong ea Jesu le maotong a hae. O ile a ba a hlakola maoto a hae ka moriri oa hae.—Mareka 14:3; Luka 10:38-42; Johanne 11:38-44; 12:1-3.
14. (a) Barutuoa ba ile ba itšoara joang mabapi le ketso ea Maria? (b) Jesu o ile a emela Maria joang?
14 Barutuoa ba ne ba halefile! Ba ile ba botsa: ‘Tšenyo e kaale molato?’ Judase, a pata takatso ea hae ea ho utsoa ka tlhahiso ea ho thusa ba hlokang, o ile a re: “Ke hobane’ng ha oli ena e monko o monate e ne e sa rekisoe lidenari tse makholo a mararo ’me li fuoe batho ba futsanehileng?” Maria o ile a khutsa. Leha ho le joalo, Jesu o ile a bolella barutuoa bana: “Mo tloheleng. Ke hobane’ng ha le leka ho mo etsetsa khathatso? O entse ketso e ntle [mofuta oa ka·losʹ] ho ’na. . . . O entse seo a neng a ka se khona; o itlamile esale pele ho tšela ’mele oa ka ka oli e monko o monate ka lebaka la lepato. Kannete ke re ho lōna, Kae kapa kae moo litaba tse molemo li boleloang lefatšeng lohle, seo mosali enoa a se entseng le sona se tla boleloa e le seo a hopoloang ka sona.” E tlameha ebe mofuthu oa mantsoe a Jesu o ile oa thoba pelo ea Maria hakaakang!—Mareka 14:4-9; Johanne 12:4-8.
15. Ke hobane’ng ha Jesu a ne a anngoe hakaalo ke seo Maria a neng a se entse, kahoo re ithuta’ng ka tšebeletso ea moea oohle?
15 Jesu o ile a susumetsoa ka ho teba ke seo Maria a neng a se entse. Khakanyong ea hae, o ne a entse ketso e ikhethang. E ne e se theko ea mpho ena eo e neng e le ea bohlokoa ho Jesu empa seo e neng e le sa bohlokoa ke hore “o entse seo a neng a ka se khona.” O ile a sebelisa monyetla ona ’me a fana ka seo a neng a khona ho fana ka sona. Liphetolelo tse ling li fetoletse mantsoe ana tjena, “O entse sohle seo a neng a ka se khona,” kapa, “O entse se neng se le matleng a hae.” (An American Translation; The Jerusalem Bible) Ho fana ha Maria e ne e le ha moea oohle hobane o fane ka se molemohali seo a neng a e-na le sona. Ke seo tšebeletso ea moea oohle e leng sona.
“Licheletana Tsa Tšepe Tse Peli” Tsa Mohlolohali
16. (a) Ho tlile joang hore Jesu a hlokomele monehelo oa mohlolohali oa mofutsana? (b) Lichelete tsa tšepe tsa mohlolohali e ne e le bokae?
16 Matsatsi a seng makae hamorao, ka la 11 Nisane, Jesu o ile a qeta letsatsi le lelelele tempeleng, moo matla a hae a ileng a belaelloa ’me ka ho panya ha leihlo o ile a araba lipotso tse thata tse mabapi le makhetho, tsoho le litaba tse ling. Har’a lintho tseo a neng a nyatsa bangoli le Bafarisi ka tsona e ne e le ‘ho harola matlo a bahlolohali.’ (Mareka 12:40) Eaba Jesu o lula fatše, ka ho hlakileng ka Lekhotleng la Basali, moo, ho ea ka tloaelo ea Sejuda, ho neng ho e-na le matlole a polokelo ea matlotlo a 13. O ile a lula fatše ka nakoana, a shebeletse ka hloko ha batho ba ntse ba akhela menehelo ea bona. Barui ba bangata ba ile ba tla, mohlomong ba bang ba bonahala e le ba iketsang ba lokileng, ba bile ba tla ka boikakaso. (Bapisa le Matheu 6:2.) Jesu o ile a tsepamisa mahlo ho mosali e mong ea itseng. Mahlo a tloaelehileng a ka be a sa ka a hlokomela letho le ikhethang ka eena kapa ka mpho ea hae. Empa Jesu, ea neng a tseba lipelo tsa ba bang, o ne a tseba hore ke ‘mohlolohali oa mofutsana.’ Hape o ne a tseba hantle hore na mpho ea hae ke bokae—“licheletana tsa tšepe tse peli, tse nang le bohlokoa bo bonyenyane haholo.”b—Mareka 12:41, 42.
17. Jesu o ile a talima monehelo oa mohlolohali joang, kahoo re ithuta’ng ka ho fa Molimo?
17 Jesu o ile a bitsa barutuoa ba hae, hobane o ne a batla hore ba bone ka mahlo thuto eo a neng a tla tloha a e ruta. Jesu o itse o “akhetse ho hoholoanyane ho feta bohle ba akhelang chelete ka matloleng a polokelo ea matlotlo.” Ho latela khakanyo ea hae o ne a akhetse se fetang sa ba bang kaofela se kopane. O fane ka “sohle seo a neng a e-na le sona”—chelete ea hae ea ho qetela. Ka ho etsa joalo, o ile a ipeha tlhokomelong ea Jehova. Motho ea qoolotsoeng ka tsela eo e le mohlala oa ho fa Molimo ke eo mpho ea hae e neng e batla e se letho. Leha ho le joalo, mahlong a Molimo e ne e le ea bohlokoahali!—Mareka 12:43, 44; Jakobo 1:27.
Ho Ithuta Ponong ea Jehova ea Tšebeletso ea Moea Oohle
18. Re ithuta eng tšebelisanong ea Jesu le basali baa ba babeli?
18 Litšebelisanong tsa Jesu le basali bana ba babeli, re ithuta lithuto tse thobang pelo mabapi le tsela eo ka eona Jehova a talimang tšebeletso ea moea oohle. (Johanne 5:19) Jesu ha aa ka a bapisa mohlolohali le Maria. Ha aa ka a nka lichelete tsa tšepe tse peli tsa mohlolohali e le tseo e seng tsa bohlokoa hakaalo ha li bapisoa le oli ea Maria “e theko e boima haholo.” Kaha mosali ka mong o ile a fana ka ntho ea hae e molemohali, mahlong a Molimo limpho tsa bona ka bobeli e ne e le tsa bohlokoa. Ka hona haeba maikutlo a ho se tšoanelehe a phahama ka ho uena hobane u sa khone ho etsa sohle seo u batlang ho se etsa tšebeletsong ea Molimo, u se ke ua nyahama. Jehova o thabela ho amohela se molemohali seo u ka fanang ka sona. Hopola, Jehova “o talima pelo,” ka hona o hlokomela ka ho feletseng seo pelo ea hao e se labalabelang.—1 Samuele 16:7.
19. Ke hobane’ng ha re sa lokela ho ahlola seo ba bang ba se etsang tšebeletsong ea Molimo?
19 Pono ea Jehova ka tšebeletso ea moea oohle e lokela ho susumetsa tsela eo re talimanang ka eona le ho tšoarana ka eona. E ne e tla ba ho hloka lerato hakaakang ho nyatsa boiteko ba ba bang kapa ho bapisa tšebeletso ea motho e mong le ea e mong! Ka masoabi, Mokreste e mong o ile a ngola: “Ka linako tse ling ba bang ba fana ka maikutlo a hore ntho li peli, u pula-maliboho ho seng joalo ha u letho. Rōna ba ikitlaetsang ka matla ho tsoela pele ka khothalo re le baboleli ba ’Muso ba kamehla ‘feela’ re batla ho ikutloa hore rea ananeloa le rōna.” A re hopoleng hore ha rea lumelloa ho ahlola hore na ke’ng seo e leng tšebeletso ea moea oohle ho Mokreste-’moho le rōna. (Baroma 14:10-12) Jehova o ananela tšebeletso ea moea oohle ea e mong le e mong oa bahoeletsi ba ’Muso ba tšepahalang ba limilione, ka hona le rōna re lokela ho etsa joalo.
20. Hangata ho molemohali ho nahana eng ka barapeli-’moho le rōna?
20 Leha ho le joalo, ho thoe’ng haeba ho bonahala hore ba bang ba etsa se senyenyane ho feta seo ba ka se khonang tšebeletsong? Ho theoha ha mosebetsi oa molumeli-’moho le rōna e ka ’na ea e-ba pontšo ea sebele ho baholo ba amehileng hore ho hlokahala thuso kapa khothatso. Ka nako e tšoanang, re tlameha hore re se lebale hore ho ba bang, tšebeletso ea moea oohle e ka ’na ea tšoana haholo le licheletana tsa tšepe tsa mohlolohali ho e-na le oli ea Maria e theko e boima. Hangata ho molemohali ho nahana hore bara le barali babo rōna ba rata Jehova le hore lerato le joalo le tla ba susumelletsa ho etsa ho hongata—eseng ho honyenyane—ka hohle kamoo ba ka khonang kateng. Ka sebele ha ho mohlanka oa Jehova ea hlokolosi ea neng a ka khetha ho etsa ho honyenyane ho feta kamoo a ka khonang tšebeletsong ea Molimo!—1 Bakorinthe 13:4, 7.
21. Ba bangata ba hahamalla mosebetsi ofe o putsang, ’me ho hlaha lipotso life?
21 Leha ho le joalo, ho batho ba Molimo ba bangata, tšebeletso ea moea oohle e ’nile ea bolela ho hahamalla mosebetsi o putsang ka ho fetisisa—tšebeletso ea bopula-maliboho. Ba fumana mahlohonolo afe? ’Me ho thoe’ng ka rōna ba e-s’o khone ho bula maliboho—re ka bontša moea oa bopula-maliboho joang? Lipotso tsena li tla hlahlojoa sehloohong se latelang.
[Mongolo o botlaaseng ba leqephe]
a Kaha Mathiase o ile a nkela Judase sebaka e le moapostola, lebitso la hae—eseng la Pauluse—ke lona le neng le tla hlaha har’a mabitso a leng majoeng a motheo a 12. Le hoja Pauluse e ne e le moapostola, e ne e se e mong oa ba 12.
b E ’ngoe le e ’ngoe ea lichelete tsena tsa tšepe e ne e le lepton, chelete ea tšepe ea Sejuda e neng e le nyenyane ka ho fetisisa ka nako eo. Li-lepton tse peli li ne li lekana le karolo e le ’ngoe ho tse 64 tsa moputso oa letsatsi. Ho latela Matheu 10:29, ka cheletana ea tšepe e bitsoang assarion (e lekanang le li-lepton tse robeli), motho o ne a ka reka lirobele tse peli, e leng e ’ngoe ea linonyana tse theko e tlaase ka ho fetisisa tse jeoang ke batho ba futsanehileng. Ka hona mohlolohali enoa ka sebele o ne a futsanehile, hobane o ne a e-na le halofo feela ea chelete e neng e hlokahala bakeng sa ho reka serobele se le seng, seo ho hang se sa lekaneng ho ja hanngoe.
U ne U Tla Araba Joang?
◻ Ho sebeletsa Jehova ka moea oohle ho bolela’ng?
◻ Papiso e ho 1 Bakorinthe 12:14-26 e bontša joang hore Jehova ha a re bapise le ba bang?
◻ Re ithuta eng ka ho fana ka moea oohle litlhalosong tsa Jesu mabapi le oli ea Maria e theko e boima le licheletana tsa tšepe tse peli tsa mohlolohali?
◻ Pono ea Jehova ka tšebeletso ea moea oohle e lokela ho susumetsa tsela eo re talimanang ka eona joang?
[Setšoantšo se leqepheng la 15]
Maria o fane ka se molemohali seo a neng a ka se khona, a tšela ’mele oa Jesu ka oli “e theko e boima haholo”
[Setšoantšo se leqepheng la 16]
Lichelete tsa tšepe tsa mohlolohali—tseo e batlang e se letho empa tseo e leng tsa bohlokoahali mahlong a Jehova