Seo Boikokobetso ba Bomolimo bo se Hlokang ho Rōna
“Ka baka leo, ikokobeletseng Molimo.”—JAKOBO 4:7, NW.
1. Ho ka thoe’ng ka mofuta oa Molimo eo re mo rapelang?
JEHOVA ke Molimo o babatsehang hakaakang! Ha ho ea lekanang le eena, ha a na thaka, ha ho ea ka bapisoang le eena, o ikhethile ka litsela tse ngata haholo! Ke eena ea Holimo-limo, ’Musi oa Bokahohle ea nang le matla ’ohle a ’nete. O teng ho tloha ho bo-sa-feleng ho ea ho bo-sa-feleng, o khanya hoo ho seng motho ea ka ’monang eaba oa phela. (Exoda 33:20; Ba-Roma 16:26) Bohlale le matla a hae li ke ke tsa lekanngoa, o phethahetse ka ho feletseng tokeng, ’me ke mothofatso oa lerato. Ke ’Mōpi oa rōna, Moahloli oa rōna, Monehi-molao oa rōna, le Morena oa rōna. Mpho e ’ngoe le e ’ngoe e ntle le neo e phethahetseng li tsoa ho eena.—Pesaleme ea 100:3; Esaia 33:22; Jakobo 1:17.
2. Boikokobetso ba bomolimo bo kopanyeletsa lintho life?
2 Ka baka la sena sohle, ho ke ke ha ba le pelaelo ea hore re tlameha ho ikokobeletsa eena. Empa see se kopanyeletsa eng ho rōna? Se kopanyeletsa lintho tse ngata. Kaha re ke ke ra bona Jehova Molimo, ho ikokobeletsa eena ho kopanyeletsa ho mamela tataiso ea letsoalo la rōna le koetlisitsoeng, ho sebelisana le mokhatlo o hlophisitsoeng oa lefatšeng oa Molimo, ho hlompha balaoli ba lefatše, le ho hlompha motheo oa bohlooho ka lapeng.
Ho ba le Letsoalo le Letle
3. E le hore re be le letsoalo le letle, re tlameha ho mamela lithibelo tsa mofuta ofe?
3 E le hore re be le letsoalo le letle, re tlameha ho mamela melao-motheo eo ho se nang motho ea ka qobellang hore e bolokoe. Ka mohlala, molao oa leshome Melaong e Leshome, o neng o laela khahlanong le ho lakatsa thepa ea motho e mong ka ho sa lokelang, o ne o sa qobelloe ke babusi ba batho hore o bolokoe. Hape, sena se tiisa mohloli oa bomolimo oa Melao e Leshome, hobane ha ho sehlopha sa batho se etsang melao se neng se ka etsa molao o neng o ke ke oa qobelloa ho bolokoa ka likotlo-qobello haeba o tlōloa. Ka molao ona, Jehova Molimo o ile a fa Moiseraele ka mong boikarabelo ba hore e be lepolesa la hae ka boeena—haeba a batla ho ba le letsoalo le letle. (Exoda 20:17) Ka ho tšoanang, har’a mesebetsi ea nama e tla thibela motho ho rua ’Muso oa Molimo ke “mōna” le “mohono”—e leng lintho tseo baahloli ba lefatše ba sa li thibeleng ka ho kenya likotlo-qobello. (Ba-Galata 5:19-21) Empa hore re be le letsoalo le letle, re tlameha ho qoba lintho tsena.
4. E le hore re be le letsoalo le letle, re tlameha ho phela ka melao-motheo efe ea Bibele?
4 E, re tlameha ho phela ka litekanyetso tsa Bibele. Litekanyetso tseo li ka akaretsoa melaong e ’meli eo Jesu Kreste a e boletseng ha a araba potso ea hore na molao o moholo ka ho fetisisa molaong oa Moshe ke ofe. “U tlameha ho rata Jehova Molimo oa hao ka pelo ea hao eohle le ka sephefumolohi sa hao sohle le ka khopolo ea hao eohle. . . . U tlameha ho rata moahelani oa hao joalokaha u ithata.” (Mattheu 22:36-40, NW) Mantsoe a Jesu a ho Mattheu 7:12 a bontša se amehang molaong oa bobeli ho melao ena ha a re: “Ntho tsohle tseo le ratang hore batho ba le etse tsona, ba etseng tsona le lōna; hobane ke oona molao le baprofeta.”
5. Re ka boloka kamano e ntle le Jehova Molimo joang?
5 Re tlameha ho etsa seo re tsebang hore se nepahetse ’me re qobe ho etsa seo re tsebang hore se fosahetse, ebang ba bang baa re bona kapa che. Ho joalo esita le haeba re ka se ikarabelle bakeng sa sona ebang ke ka ho se etse seo re lokelang ho se etsa kapa ka ho etsa seo re sa tlamehang ho se etsa. Ho bolela ho boloka kamano e ntle le Ntate oa rōna oa leholimo, re hopola taelo eo moapostola Pauluse a faneng ka eona ho Ba-Heberu 4:13: “Ha ho sebopuoa se seng pepeneneng ho oona; empa tsohle li hlobotse, li senohile mahlong a eo re nang le litaba le eena.” Ho phehella ho etsa se nepahetseng ho tla re thusa hore re loane le maqiti a bolotsana a Diabolose, ho hanela khatello ea lefatše, le ho loana le tšekamelo eo re e futsitseng ea boithati.—Bapisa le Ba-Efese 6:11.
Ho Ikokobeletsa Mokhatlo o Hlophisitsoeng oa Molimo
6. Ke mecha efe ea puisano eo Jehova a ileng a e sebelisa linakong tsa pele ho Bokreste?
6 Jehova Molimo ha a re neha tokelo ea ho iketsetsa qeto ka bomong mabapi le kamoo re tla sebelisa melao-motheo ea Bibele bophelong ba rōna. Ho tloha qalong ea histori ea motho, Molimo o sebelisitse batho e le mocha oa puisano. Ka hona, Adama e ne e le ’muelli oa Molimo ho Eva. Taelo ea ho se je tholoana e hanetsoeng e ile ea fuoa Adama pele Eva a ka bōptjoa, kahoo e tlameha ebe Adama o ile a tsebisa Eva seo Molimo a se batlang ho eena. (Genese 2:16-23) Noe e ne e le moprofeta oa Molimo ho lelapa la hae le ho lefatše la mehleng ea pele ho moroallo. (Genese 6:13; 2 Petrose 2:5) Abrahama e bile ’muelli oa Molimo ho lelapa la hae. (Genese 18:19) Moprofeta oa Molimo le mocha oa puisano sechabeng sa Iseraele e bile Moshe. (Exoda 3:15, 16; 19:3, 7) Ka mor’a hae, ho ea fihla ho Johanne Mokolobetsi, baprofeta ba bangata, baprista, le marena ba ile ba sebelisoa ke Molimo ho fetisetsa thato ea hae ho batho ba hae.
7, 8. (a) Tabeng ea ho tla ha Messia, ke bo-mang ba ileng ba sebelisoa e le babuelli ba Molimo? (b) Boikokobetso ba bomolimo bo hloka eng ho Lipaki tsa Jehova kajeno?
7 Ka mor’a hore Messia, Jesu Kreste, a tle, Molimo o ile a mo sebelisa hammoho le baapostola ba hae ba neng ba atamelane haholo le eena le barutuoa ba hae ho sebeletsa e le babuelli ba Hae. Hamorao, balateli ba Jesu Kreste ba tšepahalang ba tlotsitsoeng ba ne ba tla sebeletsa e le “mohlanka ea khabane, ea bohlale” ho fetisetsa ho batho ba Jehova kamoo ba ka sebelisang melao-motheo ea Bibele bophelong ba bona ka teng. Boikokobetso ba bomolimo bo ne bo bolela ho hlompha kofuto eo Jehova Molimo a neng a e sebelisa.—Mattheu 24:45-47; Ba-Efese 4:11-14.
8 Linnete li bontša hore kajeno “mohlanka ea khabane, ea bohlale” o amana le Lipaki tsa Jehova ’me o emeloa ke Sehlopha se Busang sa Lipaki tsena. Sehlopha sena le sona se khetha balebeli ba mesebetsi e sa tšoaneng—joaloka baholo le baemeli ba tsamaeang—ho laola mosebetsi sebakeng seo ba leng ho sona. Boikokobetso ba bomolimo bo hloka hore Paki e ’ngoe le e ’ngoe e kolobelitsoeng e ikokobeletse balebeli bana tumellanong le Ba-Heberu 13:17: “Utloang balisa ba lōna, ’me le ipee ka tlase ho bona, hobane bona ba falimehela meea [“liphefumolohi,” NW] ea lōna, etsoe ba tla e botsoa; ba utloeng, hore ba etse hona ka thabo, e seng ka hlomoho; hobane hoo ho ke ke ha le hlahisetsa molemo.”
Ho Amohela Taeo
9. Hangata boikokobetso ba bomolimo bo akaretsa eng?
9 Hangata boikokobetso ba bomolimo ke taba ea ho amohela taeo ho ba sebeletsang e le balebeli. Haeba ka linako tsohle re sa iphe taeo e hlokahalang, ho ka ’na ha hlokahala hore re khalemeloe ’me re lauoe ke ba nang le phihlelo le matla a ho etsa joalo, joaloka baholo ba rōna ba phutheho. Ho amohela taeo e joalo ke tsela ea bohlale.—Liproverbia 12:15; 19:20.
10. Ba fanang ka taeo ba na le tlamo efe?
10 Ka ho totobetseng, baholo ba fanang ka taeo ba tlameha hore e be mehlala ea batho ba bontšang boikokobetso ba bomolimo. Joang? Ho latela Ba-Galata 6:1, ha baa lokela feela ho ba le mokhoa o motle oa ho fana ka taeo empa ba lokela ho beha mohlala o motle: “Banab’eso, ekare ha motho a oela molatong o mong, lōna bao le leng ba moea, le ke le mo tsose ka moea o mosa; ’me u iponele, e se re ua lekoa le uena.” Ka mantsoe a mang, keletso ea moholo e tlameha ho ba tumellanong le mohlala oa hae. Sena se tumellanong le keletso e fanoeng ho 2 Timothea 2:24, 25 le ho Tite 1:9. E, ba fanang ka khalemelo kapa tokiso ba tlameha ho ba hlokolosi hore le ka mohla ba se khahlapetse ka lipolelo. Ka linako tsohle ba lokela ho ba bonolo, mosa, empa ba tiile ho boloka melao-motheo ea Lentsoe la Molimo. E lokela hore e be bamameli ba se nang leeme, ba khathollang ba khathetseng le ba imeloang.—Bapisa le Mattheu 11:28-30.
Ho Ikokobeletsa Balaoli ba Phahameng
11. Ke eng se hlokoang ho Bakreste litšebelisanong tsa bona le balaoli ba lefatše?
11 Boikokobetso ba bomolimo bo boetse bo re hloka hore re mamele balaoli ba lefatše. Ho Ba-Roma 13:1 (NW) re eletsoa ka hore: “Sephefumolohi se seng le se seng se ikokobeletse balaoli ba phahameng, hobane ha ho bolaoli bo teng ntle le Molimo; balaoli ba teng ba behiloe maemong a bona a lekanyelitsoeng ke Molimo.” Har’a lintho tse ling, mantsoe ana a re hloka hore re utloe melao ea tsela le ho hlokomela ho ntša makhetho le sethaba-thaba, joalokaha moapostola Pauluse a hlokomelisa ho Ba-Roma 13:7.
12. Ho ikokobeletsa ha rōna Cesare ho lekanyelitsoe ka kutloisiso efe?
12 Leha ho le joalo, ka ho hlakileng boikokobetso bo joalo ho Cesare bo tlameha ho lekanyetsoa. Ka linako tsohle re tlameha ho hopola molao-motheo oo Jesu Kreste a o boletseng, kamoo o tlalehiloeng ho Mattheu 22:21: “Ntšetsang Cesare tseo e leng tsa Cesare, le ntšetse Molimo tseo e leng tsa Molimo.” Mongolo o botlaaseng ba leqephe ho Ba-Roma 13:1 ho Oxford NIV [New International Version] Scofield Study Bible o re: “Sena ha se bolele hore o tlameha ho mamela melao e sa bontšeng boitšoaro bo botle kapa eo e seng ea Bokreste. Maemong a joalo ke mosebetsi oa hae ho mamela Molimo ho e-na le batho (Lik. 5:29; cp. Dan. 3:16-18; 6:10ff).”
Boikokobetso ba Bomolimo ka Hare ho Tokisetso ea Lelapa
13. Boikokobetso ba bomolimo tokisetsong ea lelapa bo hloka eng ho litho tsa lelapa?
13 Tokisetsong ea lelapa, monna le ntate o sebeletsa e le hlooho. Sena se hloka hore basali ba utloe keletso e fanoeng ho Ba-Efese 5:22, 23: “Lōna basali, le ikokobetse ka tlas’a banna ba lōna, joale ka ha le ikokobetsa ho Morena; hobane monna ke hloho ea mosali, joale ka ha Kreste le eena e le hloho ea Kereke [“phutheho,” NW].”a Ha e le bana, ha ba iketsetse melao empa ba tlameha ho bontša boikokobetso ba bomolimo ho ntate le ’mè, joalokaha Pauluse a hlalosa ho Ba-Efese 6:1-3: “Bana, utloang batsoali ba lōna Moreneng; hobane ke ntho e lokileng. Hlonepha ntat’ao le ’m’ao, ke oo molao oa pele o nang le pallo, u tle u be le lehlohonolo, ’me u phele halelele lefatšeng.”
14. Boikokobetso ba bomolimo bo hloka eng ho lihlooho tsa malapa?
14 Ha e le hantle, ho ba bonolo hore basali le bana ba bontše boikokobetso bo joalo ba bomolimo ha banna le bo-ntate ba bontša boikokobetso ba bomolimo. Ba etsa sena ka ho sebelisa bohlooho ba bona ho boloka melao-motheo ea Bibele, e kang e fumanoang ho Ba-Efese 5:28, 29 le 6:4: “Ke ka mokhoa o joalo le bona banna ba tšoanetseng ho rata basali ba bona joale ka ’mele ea bona. Ea ratang mosali oa hae, eba oa ithata. Hobane ha ho e-so ho be motho ea kileng a hloea nama ea hae le ka mohla o le mong; empa o ee a e fepe, a e baballe, joale ka ha Kreste le eena a etsa Kereke [“phutheho,” NW].” “Bontat’a bana, le se ke la halefisa bana ba lōna; le mpe le ba hōlise ka ho ba laea le ka ho ba rutela Moreneng.”
Lithuso Tsa ho Bonahatsa Boikokobetso ba Bomolimo
15. Ke tholoana efe ea moea e tla re thusa ho bonahatsa boikokobetso ba bomolimo?
15 Re tla thusoa ke eng ho bonahatsa boikokobetso ba bomolimo libakeng tsee tse sa tšoaneng? Pele, ke lerato le se nang boithati—ho Jehova Molimo le ho batho bao a ba behileng hore ba re etelle pele. Ho 1 Johanne 5:3 re bolelloa hore: “Hobane ho rata Molimo, ke ha re boloka litaelo tsa oona, ’me litaelo tsa oona ha li boima.” Jesu o buile taba e tšoanang ho Johanne 14:15: “Ekare ha le nthata, bolokang melao ea ka.” Ka sebele, lerato—tholoana ea moea e ka sehloohong—le tla re thusa hore re ananele sohle seo Jehova a re etselitseng sona ’me ka hona le tla re thusa ho bontša boikokobetso ba bomolimo.—Ba-Galata 5:22.
16. Ho tšaba Molimo ho na le thuso efe tabeng ea ho bontša boikokobetso ba bomolimo?
16 Taba ea bobeli ke ho tšaba Molimo. Ho tšaba ho khopisa Jehova Molimo ho tla re thusa hobane ho bolela “ho hloea bobe.” (Liproverbia 8:13) Ntle ho pelaelo, ho tšaba ho khopisa Jehova ho tla re thibela hore re se ke ra sekisetsa ka baka la ho tšaba motho. Ho tla boetse ho re thuse ho ela hloko litaelo tsa Molimo ho sa tsotellehe hore na re tlameha ho hlōla mathata afe. Ho feta moo, ho tla re thibela hore re se ke ra inehela tekong kapa tšekamelong ea ho etsa bobe. Mangolo a bontša hore ho tšaba Jehova ho ile ha nolofaletsa Abrahama ho nehelana ka mora oa hae ea ratoang Isaaka e le sehlabelo, ’me ke ho tšaba ho khopisa Jehova ho ileng ha nolofaletsa Josefa hore ka katleho a hanele likeko tsa boitšoaro bo bobe tsa mosali oa Potifaro.—Genese 22:12; 39:9.
17. Tumelo e phetha karolo efe ha re bonahatsa boikokobetso ba bomolimo?
17 Thuso ea boraro ke ho ba le tumelo ho Jehova Molimo. Tumelo e tla re nolofaletsa hore re ele hloko keletso e fanoeng ho Liproverbia 3:5, 6: “U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me o tla u tsamaisa litseleng tsohle tsa hao.” Tumelo e tla re thusa haholo-holo ha re bonahala re utloisoa bohloko ka mokhoa oo e seng oa toka kapa re ikutloa hore rea khetholloa ka baka la morabe oa rōna kapa bochaba kapa ka baka la khohlano ea botho. Ba bang ba ka ikutloa hore ba hlokomolohiloe ka phoso ha ba sa buelloe hore ba sebeletse e le baholo kapa bahlanka ba sebeletsang. Haeba re na le tumelo, re tla emela Jehova hore a otlolle litaba ka nako ea hae e tšoanetseng. Ha re ntse re emetse hore seo se etsahale ho ka hlokahala hore re hlaolele mamello e nang le tiisetso.—Lillo 3:26.
18. Thuso ea bone hore re bonahatse boikokobetso ba bomolimo ke efe?
18 Thuso ea bone ke boikokobetso. Motho ea ikokobelitseng ha a na bothata ba ho bontša boikokobetso ba bomolimo hobane ‘ka boikokobetso, o lekanya hobane ba bang baa mo fetisa.’ Motho ea ikokobelitseng o ikemiselitse ho itšoara joaloka “e monyenyane.” (Ba-Filippi 2:2-4; Luka 9:48) Empa motho ea ikhohomosang ha a batle ho ikokobetsa ebile hoa mo tena. Ho ’nile ha boleloa hore motho ea joalo a ka mpa a senngoa ke ho rorisoa ho e-na le ho bolokoa ka hore a bontšoe liphoso.
19. Eo e kileng ea ba mookameli oa Mokhatlo oa Watch Tower o behile mohlala ofe o motle oa boikokobetso?
19 Mohlala o motle oa boikokobetso le boikokobetso ba bomolimo o kile oa behoa ke Joseph Rutherford, mookameli oa bobeli oa Watch Tower Bible and Tract Society. Ha Hitler a thibela mosebetsi oa Lipaki tsa Jehova Jeremane, baena ba moo ba ile ba mo ngolla ba botsa hore na ba lokela ho etsa joang mabapi le ho thibeloa ha liboka le mosebetsi oa bona oa boboleli. O ile a bolela sena ho lelapa la Bethele ’me a sa hlathe koana le koana a lumela hore o ne a sa tsebe hore na a ka re’ng ho baena bao ba Jeremane, haholo-holo mabapi le likotlo tse bohloko tseo baena bao ba neng ba li fumana ’musong oa Hitler. A bolela hore haeba ho ka ba le e mong ea ka tsebang hore na a re’ng, o tla thabela ho utloa seo. Ke boikokobetso bo bokaakang!b
Melemo e Tlisoang ke ho Bonahatsa Boikokobetso ba Bomolimo
20. Ho bonahatsa boikokobetso ba bomolimo ho ba le litlhohonolofatso life?
20 Ke hantle ha ho botsoa, Melemo ea ho bonahatsa boikokobetso ba bomolimo ke efe? E mengata ruri. Re qoba matšoenyeho le mathata a hlahelang batho ba nkang khato ka ho ipusa. Re thabela kamano e ntle le Jehova Molimo. Re na le botsoalle bo molemohali le baena ba rōna ba Bakreste. Ho feta moo, ka ho itšoara tumellanong le molao, re qoba ho ba le mathata a sa hlokahaleng le balaoli ba phahameng. Re boetse re thabela bophelo bo monate ba lelapa re le banna le basali, re le batsoali le bana. Ho feta moo, ka ho bontša boikokobetso ba bomolimo, re nka khato tumellanong le keletso e fanoeng ho Liproverbia 27:11: “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.”
[Mongolo o botlaaseng ba leqephe]
a Mosebeletsi oa pula-maliboho o ile a babatsa tlhompho le tšehetso e lerato ea mosali oa hae ho pula-maliboho ea lesoha. Pula-maliboho ea lesoha e ile ea nahana hore motsoalle oa eona a ka be a boetse a buile ka litšoaneleho tse ling tsa mosali oa hae. Empa lilemo hamorao, ha pula-maliboho ea lesoha e se e nyetse, e ile ea hlokomela hore na tšehetso e lerato ea mosali e phetha karolo ea bohlokoa hakaakang khotsong ea bophelo ba lelapa.
b Ka mor’a hore Joseph Rutherford a rapele ’me a ithute Lentsoe la Molimo ka matla, o ile a bona karabo ka ho hlakileng eo a lokelang ho e fa baena ba Jeremane. E ne e se boikarabelo ba hae ho ba bolella seo ba neng ba lokela ho se etsa kapa seo ba neng ba sa lokela ho se etsa. Ba ne ba na le Lentsoe la Molimo leo ka ho hlakileng le neng le ba bolella hore na ba lokela ho etsa joang tabeng ea ho kopana hammoho le ho fana ka bopaki. Kahoo baena ba Jeremane ba ile ba etsa lintho ka sekhukhu empa ba lula ba utloa litaelo tsa Jehova hore ba kopane hammoho le hore ba pakele lebitso la hae le ’Muso.
Lipotso Tsa Tlhahlobo
◻ Molimo o ile a sebelisa batho bafe e le mecha ea puisano, hona ho ne ho hlokahala hore bahlanka ba hae ba etse joang ho bona?
◻ Boikokobetso ba bomolimo bo sebetsa litšobotsing life tse fapa-fapaneng?
◻ Ke litšoaneleho life tse tla re thusa ho bontša boikokobetso ba bomolimo?
◻ Boikokobetso ba bomolimo bo hlahisa litlhohonolofatso life?
[Setšoantšo se leqepheng la 16]
Molimo o ile a sebelisa tlhophiso ea tempele ea Jerusalema ho fetisetsa thato ea hae ho batho ba hae
[Litšoantšo tse leqepheng la 18]
Libaka tseo ho tsona re ka bonahatsang boikokobetso ba bomolimo