Armageddone—Neng?

“RE EME Armageddone ’me re loanela Morena.” Ka mantsoe ao, mopresidente oa pele oa U.S. Theodore Roosevelt o ile a sebelisa lentsoe “Armageddone” bakeng sa ntoa ea lipolotiki eo a neng a ameha ho eona. Kahoo, na re lokela ho batlisisa Armageddone tikolohong ea lipolotiki?

Lilemo tse seng kae tse fetileng, makasine ea Canada Business Life e ne e e-na le taba e ’ngoe e nang le sehlooho se reng “Armageddone ea Moruo.” Sehloohoana se seng se ne se botsa tjena: “Na ho hlōleha ha Linaha tse Futsanehileng Moruong ho lefa melato ea lichelete ho ka ’na ha qholotsa ho oa ha moruo oa rōna?” Empa na re lokela ho nahana ka Armageddone e le tlokotsi ea lichelete?

Ho latela koranta e ’ngoe ea litaba Newsweek, bofelo ba lefatše ke taba eo ho neng ho tsuoe letšolo ka eona nakong ea tlhōlisano ea bopresidente ka 1984. Ketsahalong eo, Ronald Reagan eo e neng e le mopresidente oa U.S. ka nako eo “o ile a botsoa hore na o lumela ka ’nete hore lefatše le talimane le ‘Armageddone ea nuclear.’ Reagan o ile a amohela ‘litlhaloso tsa filosofi’ tse buang ka ho tšoana ho pakeng tsa liketsahalo tsa hona joale le lipontšo tsa Bibele tse lelekelang mehla ea qetello, empa molaoli e mong e moholo oa sesole o ile a tsitlallela hore ha ho mohla a kileng a re ‘re tlameha ho rera re ikamahantse le Armageddone.’” Leha ho le joalo, na ha re batlisisa se boleloang ke Armageddone re lokela ho lebisa tlhokomelo ntoeng ea sesole e sokelang ho qhomisa koluoa ea nuclear?

Batho ba bangata ba bolumeli ba re Armageddone ke ntoa. Empa qalong ea lekholo la bo19 la lilemo, seithuti sa Bibele Adam Clarke se ile sa ngola tjena: “Litlhaloso tsa batho tse amanang le ntlha ee e bile tse tšehisang hakaakang! Nakong ea lilemo tse mashome a mabeli tse fetileng ntoa ena e ’nile ea loanoa libakeng tse sa tšoaneng, ho latela linohe tsa rōna tse sefofu le ba ipeileng baprofeta! Ka nako e ’ngoe e ne e le Austerlitz, ka nako e ’ngoe e le Moscow, ka nako e ’ngoe e le Leipsic, ’me hona joale ke Waterloo! Ka hona ba ’nile ba tsoela pele, ’me ba tla ’ne ba tsoele pele, ba ferekanya ’me ba ntse ba ferekana.”

Ho batlisisa se boleloang ke Armageddone ka ho hlakileng ho phahamisa lipotso tse ling tsa bohlokoa. Armageddone ke eng? Haeba e le ntoa, ke bo-mang ba tla kopanela ho eona? E tla loanoa hobane’ng? E tla etsahala hokae? Hona Armageddone e tla etsahala neng?

Armageddone ke Eng?

Lentsoe “Armageddone” le nkiloe lentsoeng le leng le fumanoang bukeng ea Bibele ea Tšenolo, le tsejoang ka puo ea tšoantšetso. Mono moapostola Johanne o ile a ngola: “Eaba ke bona ho e-tsoa molomong oa drakone, le molomong oa sebata, le molomong oa moporofeta oa bohata, meea e litšila e meraro, e kang lihoho. Eo ke meea ea batemona, e etsang mehlolo, e eang ho marena a lefatše le a linaha tsohle tseo ho ahiloeng ho tsona, ho a memela ntoa ea letsatsi le leholo la Molimo o matla ’ohle. . . . ’Me ea ba bokella thoteng e bitsoang Harmagedone, ka seheberu.”—Tšenolo 16:13-16.

Armageddone, kapa Harmagedone, ke lentsoe le fetoletsoeng ka litlhaku tsa Segerike le tšoanang le lentsoe la Seheberu Har Meghid·dohnʹ le bolelang “Thaba ea Megiddo,” kapa “Thaba eo Masole a Khobokanang ho eona.” Le amahanngoa le “ntoa ea letsatsi le leholo la Molimo o matla ’ohle.” Kahoo Armageddone hase toantšano ea lipolotiki, tlokotsi ea moruo, koluoa ea nuclear, kapa khohlano ea batho. Ho fapana le hoo, Armageddone ke ntoa ea Molimo.

Ke Bo-mang ba Tla Kopanela ho Eona?

Meea e litšila e meraro e bululetsoeng e kang lihoho e tsoa molomong oa drakone (Satane Diabolose), molomong oa sebata (mokhatlo oa hae oa lefatše oa lipolotiki), le molomong oa moprofeta oa bohata oa Manyesemane le Maamerika. Meea ena e bululetsoeng ke bademona, kapa mangeloi a khopo, e bokella marena a lefatše, kapa babusi, Harmagedone.—Bona khaolo ea 32 ea buka Tšenolo—Tlhōrō ea Eona e Hlollang ka Botle e Haufi! e hatisitsoeng ke Watchtower Bible and Tract Society of New York, Inc.

Ka lehlakoreng la Jehova ntoeng ea Armageddone ke lebotho le leholo la makhotla a sa bonahaleng a moea le etelletsoeng pele ke Morena Jesu Kreste. Moapostola Johanne o ile a tlaleha tjena: “Eaba ke bona leholimo le buloa, ’me ha hlaha pere e tšoeu, ’me ea e kaletseng o bitsoa Motšepehi le Oa ’nete; o [Jesu] ahlola, o loana ka ho loka. . . . Makhotla a leholimo a mo latela . . . Sabole e bohale e tsoa molomong oa hae, a tle a otle lichaba ka eona; o tla li alosa ka lere la tšepe; ’me ke eena ea tla hatisa sehatelong sa veine ea bohale le ea khalefo ea Molimo o matla ’ohle. ’Me o na le lebitso le ngoliloeng seaparong le seropeng sa hae, le reng: Morena oa marena, le ’Musi oa babusi.” (Tšenolo 19:11-16) Sabole e telele e bohale e emela matla a Kreste a ho laela hore bohle ba hanang ho tšehetsa ’Muso oa Molimo ba bolaoe. (Tšenolo 1:16; 2:16) Makhotla a maholo a sa bonahaleng a teng bakeng sa ntoa ea Armageddone.

Bahanyetsi ke Satane, makhotla a hae a bademona, le marena a lefatše lohle leo ho ahiloeng ho lona. Empa ha rea lokela ho nahana ka babusi ba lefatše ba le sebakeng se bonahalang feela, kahobane batho bao ba ba busang le bona baa akarelletsoa. Ho ile ha boleloa tjena esale pele: “Jehova o halefetse lichaba tsohle, o halefetse makhotla a tsona kaofela.”—Esaia 34:2.

E Tla Loanoa Hobane’ng?

Armageddone e tla loanoa hobane Molimo o lokile ’me o ke ke oa hlola o lumella bobe. (Pesaleme ea 11:7) Ka hona mokhatlo oa Satane Diabolose o hlophisitsoeng, o entsoeng ka bademona le batho ba marabele, o ikarabellang ka bokhopo le bomalimabe ba lilemo tse likete-kete, o tlameha ho felisoa. (Bapisa le Genese 3:15.) Bobusi ba Jehova ba bokahohle bo tla phahamisoa ka Armageddone, ’me ntoa eona eo e tla hlakola lebitso la hae thohako e phaelletsoeng ho lona ka makholo-kholo a lilemo. Joalokaha Molimo o phatlalalitse ka moprofeta oa oona Ezekiele: “Ha ke sa tla lumela hore ho hlompholloe lebitso la ka le khethehileng; ’me lichaba li tla tseba hoba ke ’na Jehova.”—Ezekiele 39:7.

Ha e le hantle ntoa ea Molimo ea Armageddone e tla thibela ho felisoa ha batho bohle. Jehova o bōpetse lefatše hore le ahoe, eseng hore le felisoe ntoeng ea thermonuclear har’a batho kapa hore ka tsela e ’ngoe e itseng le etsoe hore le se ke la tšoaneleha bakeng sa bophelo. (Esaia 45:18) O tla “senya ba senyang lefatše.” (Tšenolo 11:18) Empa mopesaleme o ile a phatlalatsa tjena: “Jehova oa busa! lefatše [te·velʹ, ka Seheberu; lefatše, joalokaha le na le matla a ho hlahisa limela le ho ahoa, qitikoe eo ho ka pheloang ho eona] le tiea ke hona, ha le sisinyehe.”—Pesaleme ea 96:10.

Seo Molimo o tla se etsa ka Armageddone se tla lumellana ka botlalo le litšoaneleho tsa oona tsa sehlooho tsa toka, bohlale, matla, le lerato. (Deuteronoma 32:4; Jobo 12:13; Esaia 40:26; 1 Johanne 4:8) O tla nka khato khahlanong le “baetsalibe ba sa tšabeng Molimo,” eseng khahlanong le ba lokileng. (Juda 14, 15, NW) Ke ‘ba babe feela ba tla neeloa lerumo.’ (Jeremia 25:31) Hona ho tla betla tsela bakeng sa hore ho tsosolosoe Paradeise, ho phethahatsa morero oa bomolimo bakeng sa lefatše le batho.—Luka 23:43.

E Tla Etsahala Hokae?

Kaha lentsoe “Armageddone” le tsoa lentsoeng la Seheberu le bolelang “Thaba ea Megiddo,” ba bang ba ka ’na ba etsa qeto ea hore ntoa ena e tla loaneloa thoteng e ’ngoe e phahameng e bitsoang ka lebitso leo. Leha ho le joalo, ha ho mohla ho kileng ha e-ba le thaba e bitsoang Megiddo. Lik’hilomithara tse ka bang 100 ka leboea-bophirimela ho Jerusalema ho ne ho na le toropo e ’ngoe e leralleng, kapa motse, e bitsoang Megiddo, empa hona joale ho na le tutulu ea bophahamo ba limithara tse ka bang 20 feela e tšoaeang sebaka seo sa eona.—Joshua 17:11.

Motse oo oa boholo-holo o ne o okametse ‘lehoatata la Megiddo.’ (2 Likronike 35:22) Ho amahanya Armageddone (kapa Harmagedone) le tikoloho eo ho loketse hobane e ne e le sebaka sa lintoa tsa makhaola-khang. Ka mohlala, mono Molimo o ile oa nolofalletsa Moahloli Barake ho hlasela morena oa Kanana Jabine le makhotla a hae a sesole a laoloang ke Sisera ka ntoa e silakanyang. (Baahloli 4:12-24; 5:19, 20) Tikolohong eo Gideone le lekhotla la hae le lenyenyane ba ile ba hlōla ba-Midiane ka ho felletseng. (Baahloli 7:1–8:35) Morena Akazia le Morena Josiase le bona ba ile ba bolaeloa moo.—2 Marena 9:27; 23:29, 30.

Leha ho le joalo, hoa hlokomeleha hore lehoatata la phula ena, leo hape le bitsoang Lehoatata la Esdraelone, le bolelele ba lik’hilomithara tse 32 feela le bophara ba lik’hilomithara tse 29 ho ea ka bochabela moo le fellang teng. Marena a lefatše lohle leo ho ahiloeng ho lona le makhotla a ’ona a sesole a ne a ke ke a fella sebakeng se senyenyane joalo. Ntle ho moo, tutulu (leralla la Megiddo) kapa lona lehoatata hase thaba. Ka hona, ka ho hlakileng Armageddone e ke ke ea lekanyetsoa sebakeng se seng se itseng se lithaba-thaba Bochabela bo Hare. Ho fapana le hoo, Armageddone (kapa Harmagedone) e tšoantšetsa boemo ba lefatše ka bophara, le hoja e fumana moelelo oa eona o itseng ho Megiddo le ho etsahetseng sebakeng seo.

Armageddone e Tla Etsahala Neng?

Kaha Megiddo e ne e le naheng ea sechaba sa Molimo sa boholo-holo, se etsahalang ka Armageddone se amana le Lipaki tsa Jehova ‘nakong ena ea bofelo.’ (Daniele 12:4) Harmagedone e amana le ‘sebaka’ seo babusi ba lefatše ba lipolotiki ba khobokanang ho sona ba hanyetsa Jehova le ’Muso oa hae ka Jesu Kreste. (Tšenolo 16:14, 16, TLP) Empa ‘sebaka’ seo (toʹpos, ka Segerike) se emela boemo bo itseng ba lefatše. Armageddone e tla etsahala ha ho hlaha boemo bo bong bo itseng bo amang Lipaki tsa Jehova ho pota lefatše.

Ho atleha ha Lipaki tsa Jehova moeeng ho halefisa Satane Diabolose, eo haufinyane a tla etsa tlhaselo e akaretsang khahlanong le Bakreste bana bao ho bonahalang eka ha baa sireletseha. Tlhaselo ena ea lefatše ka bophara ea Satane, kapa Gogo, e hlalosoa ho Ezekiele likhaolo 38 le 39. Tlas’a tšusumetso ea Diabolose, lichaba li tla futuhela batho ba Jehova ba ratang khotso ba bokelletsoeng lichabeng tsohle. E, khanyetso ea bosatane e tla bonahatsoa ke ntoa ea sesole ea lefatše lohle khahlanong le bahlanka ba Jehova ba lefatšeng, mang̀osa a bonahalang le baboleli ba ’Muso oa Molimo.

Hangata ntoa e tsejoa ka sebaka seo e loaneloang ho sona. Ka hona, tšireletso e matla ea Molimo ho batho ba oona e ka bitsoa ntoa ea Armageddone. Ha Jehova a ema hore a sireletse bahlanka ba hae khahlanong le tlhaselo ea Gogo, Armageddone e tla be e ntse e tsoela pele! Lipuso tsa batho li tla arohana litsekana. Likhohola tse bakang meroallo, sefako se senyang, malakabe a mollo le sebabole, mafu a seoa a tšabehang—liketso tsa Molimo ka ’nete—li tla etsa hore lefatše le tsielehe ka ntle ho Lipaki tsa Jehova. Lira tsa tsona tsa batho li tla fetohela mabotho a habo tsona ka libetsa. ’Me ba se nang ho bolaoa ke ntoa ena ea batho ba bolaeanang, Jehova o tla ba timetsa.—Ezekiele 38:18-23; Daniele 2:44.

Ka baka la tšabo, letsoho la motho e mong le e mong le tla fetohela moahisani oa hae ntoeng e mabifi empa e le e se nang thuso ea ho pholoha. (Zakaria 14:12, 13) “Tsatsing leo, ba hlabiloeng ke Jehova ba tla ba teng ho nka pheletsong e ’ngoe ea lefatše ho isa pheletsong e ’ngoe ea lefatše, ba sa lleloe, ba sa phutheloe, ba sa epeloe; e tla ba moiteli holim’a lefatše.” (Jeremia 25:33) Boiteko leha e le bofe ba ho lula u sa nke lehlakore ntoeng ea Molimo bo ne bo tla u amoha bophelo ba hao ka Armageddone! ’Me joalokaha ho ’nile ha pakoa hangata koranteng ena ka Mangolo, moloko o teng hona joale o ke ke oa feta pele Armageddone e etsahala!—Mattheu 24:21, 34.

Seo Armageddone e Tla se Finyella

Armageddone e tla tlosa moneketsela oa ho qetela oa mokhatlo o hlophisitsoeng oa Satane oa lefatšeng. Ho feta moo, Diabolose le bademona ba hae ba tla koalloa sekoting. (Tšenolo 20:1-3) Ke mahlohonolo a makaakang a tla tšolohela ho batho ba Jehova ka nako eo, baphonyohi ba thabileng ba ntoa ea hae e khōlō ea Armageddone! Ka thabo ba tla tsoela pele ka mosebetsi oa ho tsosolosa o tla fetola lefatše lohle hore e be paradeise, e lokolohileng tšilafalong, bohlokong, masoabing, ho bokolleng, le lefung. (Tšenolo 11:15, 18; 21:3, 4) ’Me u ka ba moo haeba u tebisa mantsoe ana a mopesaleme pelong: “U itšepise ka Jehova, u tiee litseleng tsa hae, ’me o tla u hōlisa, u tle u je lefa la lefatše; u tla bona le tšenyeho ea ba babe.” (Pesaleme ea 37:34) Ka sebele, u ka ’na ua phelela ho bona ntoa ea letsatsi le leholo la Molimo o Matla ’Ohle ’me u fetohe mophonyohi ea thabileng ha Armageddone e otla!

“Ha e le moo ntho tseo tsohle, li abetsoe ho felisoa, e ka khona le be batho ba matla hakakang liketsong tse halalelang tsa borapeli; le ntse le lebeletse, ’me le akofisa ho tla ha letsatsi la Molimo [“Jehova,” NW].”—2 Petrose 3:11, 12

[Ntlha e Qolotsoeng e leqepheng la 4]

Armageddone hase toantšano ea lipolotiki, hase tlokotsi ea moruo, hase koluoa ea nuclear, kapa khohlano ea batho. Armageddone ke ntoa ea Molimo

[Ntlha e Qolotsoeng e leqepheng la 5]

Ntoa ea Molimo ea Armageddone e tla thibela ho felisoa ha batho bohle

[Ntlha e Qolotsoeng e leqepheng la 6]

Boiteko leha e le bofe ba hore u lule u sa nke lehlakore ntoeng ea Molimo bo tla u amoha bophelo ba hao ka Armageddone!