Kamoo Jehova a Atlehisang Mosebetsi oa Hae ka Teng

LILEMONG tse mashome tsa moraonyana tjena Lipaki tsa Jehova li bile le khōlo e tsotehang. Lilemong tse leshome tse fetileng, li ile tsa eketseha ho tloha liphuthehong tse 42 600 ho ea ho tse 60 192 ka kakaretso linaheng tse 212. Ka baka la sena, ba bang ba ile ba botsa: Mosebetsi oa Lipaki o tšehetsoa joang ka lichelete? Mokhatlo oa Watch Tower o thabela ho arabela potso ena le tse amanang le eona sehloohong sena.

Na Lipaki tsa Jehova li ntša karolo ea leshome?

Che. Iseraeleng ea boholo-holo, ho ntšoa ha karolo ea leshome ho ne ho laetsoe tlas’a Molao oa Moshe ka morero oa ho tšehetsa basebetsi ba tempele ea Molimo, Balevi le baprista. (Numere 18:21, 24-29) Ba ne ba se na linaha tsa morabe haese metse e itseng, kahoo ba ne ba hloka tšehetso ena e khethehileng. Ho phaella moo, Baiseraele ba tšepahalang ba ne ba lokolohile ho fana ka menehelo ea boithatelo bakeng sa merero e khethehileng, e kang ho ahoa ha tabernakele le tempele hamorao.—Exoda 25:1-8; 1 Likronike 29:3-7.

Leha ho le joalo, ha Jesu a e-shoa, Bibele e bolela hore “o felisitse . . . Molao oa litaelo tse entsoeng ka melaoana.” (Ba-Efese 2:15, NW; Ba-Kolosse 2:13, 14) Ka mantsoe a mang, mahlong a Molimo Molao o ne o se o sa tlame Bajode kapa Bakreste. Kahoo, ho ntša karolo ea leshome ho ne ho se ho sa hlokahale ho ba tšepahalang, hammoho le litšobotsi tse ling tsa Molao, tse kang mahlabelo a etsoang ka mehla tempeleng.

Har’a Bakreste, ho fana ho susumetsoa ke lerato, eseng molao. Moapostola Pauluse o ile a hlalosa molao-motheo ona ha a ne a hlophisa ho bokelloa ha lithuso bakeng sa Bakreste ba hlokang ba Judea. O itse: “E mong le e mong a ntše kamoo a seng a lekantse pele pelong ea hae; e seng ka ho soaba, leha e le ka ho khannoa; hobane Molimo o rata ea fanang a thabile.” (2 Ba-Korinthe 9:7) Mokhoa ona oa Mangolo oa ho fana ka boithatelo o sebelisoa ke Lipaki tsa Jehova.

Na le sebelisa meketjana ea lijo e eketsang chelete, liphutheloana tsa ho bokella lithuso, ho qela chelete, le litsela tse ling tse tšoanang tsa ho eketsa chelete?

Che, Bakreste ba ’nete ha baa lokela ho susutlelloa kapa ho qekoa hore ba fane ka ho ba khalisa meputso e itseng. Lihlopha tsa bolumeli tse sebelisang mofuta o itseng oa papali ea chelete, ’moka eo ho rekisoang thepa ho eona, lirafole, meketjana ea boithabiso, ho hirisa litulo tsa kereke, kapa ho fetisoa ha likotlolo tsa koleke li senola hore ha lia fa batho ba tsona lijo tsa moea, kahoo moea oa Molimo ha o susumetse litho tsa tsona ho nehelana ka chelete ka bolokolohi. Ho ka boleloa ho tšoanang ka ba sebelisang mokhoa o seng o siuoe ke nako oa ho ntša karolo ea leshome.—Mattheu 10:8.

Le tšehetsa joang merero e kang ho ahoa ha Liholo tse ncha tsa ’Muso le liofisi tsa makala ka chelete, hammoho le ho atolosa ha lōna ntlo-khōlō ea lefatše e Brooklyn le e Patterson, New York?

Jehova o tšollela moea oa hae o halalelang ho Lipaki tsa hae, ho li nolofalletsa hore li ‘sebetse se molemo, li ateloe ke mesebetsi e molemo, li abele ba bang, li fane; li ipokellele letlotlo mehleng e tlang, le nang le motheo o molemo, li tle li rue bophelo bo sa feleng.’ (1 Timothea 6:18, 19) Moea ona o susumetsa Lipaki tsa Jehova ho tšehetsa mosebetsi oa ’Muso ka litsela tsohle.

Ka mohlala, ka 1989, Lipaki tse 3 787 188 linaheng tse 212 li ile tsa sebelisa lihora tse 835 426 538 li ruta ba bang Lentsoe la Molimo. ’Me li ile tsa khannela batho ba thahasellang lithuto tsa ka mehla tsa mahae tsa Bibele tse 3 419 745. Litšenyehelo leha e le life tse ileng tsa bakoa ke mosebetsi ona li ile tsa jaroa ke batho ka bomong ba o etsang. Jehova o ile a putsa mosebetsi ona oa lerato ka keketseho ea Lipaki tse kolobelitsoeng bocha tse 263 855.

Moea o tšoanang oa ho fana o susumetsa Lipaki le batho ba thahasellang ho tšehetsa mosebetsi ka chelete. Ntle le ho thusa ho koahela litšenyehelo tse tloaelehileng tsa phutheho ea habo tsona, li tšehetsa mosebetsi ofe kapa ofe oa kaho oo ho ka ’nang ha hlokahala hore o etsoe, joaloka ho nchafatsa kapa ho atolosa Holo ea tsona ea ’Muso kapa Holo ea Kopano kapa ho haha e ncha. Selemo ka seng, ka baka la khōlo e potlakileng, ho tlameha ho ahoe Liholo tse ngata tsa ’Muso, tse ling li bile li bitsa liranta tse makholo a likete. Litšenyehelo tsa liholo tsena li jaroa ke Lipaki tsa sebaka ka seng ka menehelo ea tsona ea boithatelo le ka mosebetsi oa tsona.

Ho phaella moo, linaheng tse ngata meaho ea makala ea khatiso le ea liofisi hammoho le meaho ea bolulo e ile ea lokela ho atolosoa—kapa hore ho ahoe e mecha—ho lekana basebetsi ba eketsehileng le meaho e hlokoang ke mokhatlo o hlophisitsoeng o ntseng o hōla. Ena le eona e tšehetsoa ka menehelo ea boithatelo le ka mosebetsi, joaloka merero ea ho aha le ho nchafatsa meaho e Brooklyn le e Patterson, New York. Moo ho khonehang, Lipaki tse haufi li tšehetsa kaho ka chelete. Maemong a mang, Mokhatlo oa Watch Tower o lokisetsa hore makala a fumane thuso—ea chelete le ka mosebetsi oa litsebi—ho tsoa linaheng tse ling. Kahoo, tlas’a tataiso ea Mokhatlo, lintho li etsoa “ka ho lekana.”—2 Ba-Korinthe 8:14.

Ke hobane’ng ha le sa tsamaise lipetlele kapa litliliniki le ho kenela mosebetsi oa liphallelo le litšebeletso tse ling tsa sechaba joalokaha lihlopha tse ngata tsa bolumeli li etsa?

Lipaki tsa Jehova li arabela ka potlako maemong a tšohanyetso a tlisitsoeng ke ntoa kapa koluoa ea tlhaho ha li khona ho etsa joalo. Ha e le hantle, hangata ke tsona tsa pele har’a ba fihlang sebakeng se joalo ka lijo, liaparo, le ka baithaopi ho tla thusa ho busetsa lintho malulong. Leha ho le joalo, Lipaki tsa Jehova ha li tsamaise lipetlele kapa litliliniki, leha e le hona ho thea mafapha a ho tima mollo kapa mabotho a sepolesa, ao le ’ona a reretsoeng ho boloka bophelo.

Ke basebeletsi ba inehetseng ba molaetsa o molemo, ’me mosebetsi oa tsona ke ho bolela le ho ruta litaba tse molemo tsa ’Muso oa Molimo lefatšeng lohle e le bopaki pele bofelo bo e-tla. (Mattheu 24:14) Joalokaha Jesu a boletse, kotulo e khōlō ’me basebetsi baa fokola. E ne e tla ba ntho e ke keng ea tšoareloa hore motho a hlokomolohe mosebetsi ona oa bohlokoahali e le hore a kenele mesebetsi e meng, le hoja e babatseha.—Mattheu 9:37, 38.

Joalokaha ho etsahala, Lipaki tsa Jehova tse ngata ke lingaka, baoki, le ba tšoereng molepo lipetlele. Empa li talima mosebetsi ona e le o tlatsetsang mosebetsing oa tsona oa sehlooho, tšebeletso ea Bokreste.

Na basebetsi bafe kapa bafe ba Mokhatlo oa Watch Tower kapa litho tsa ’ona li hlahisa chelete ka mesebetsi ea lōna e meholo ea khatiso?

Ka ho tiileng, che! Ka molao, Mokhatlo ona hase mokhatlo o etsang phaello. Ha ho na bao thepa e leng ea bona, ha ho na likarolelano tsa liphaello, esita le meputso. Mosebeletsi e mong le e mong ea leng ntlo-khōlō, ho akarelletsa le mopresidente le batsamaisi ba Mokhatlo, ba nkile kano ea molao ea bofutsana. O fumana lijo, bolulo, le tlhokomelo e hlokahalang ea bongaka, hammoho le ho buseletsoa chelete bakeng sa ho lefa litšenyehelo. Haeba Paki e itseng e eta ka thōmo ea Mokhatlo, hangata litšenyehelo tsa leeto la eona lia koaheloa.

Ho phaella moo, ha ho kae kapa kae lefatšeng moo basebeletsi ba rōna ba lefisang chelete bakeng sa ho tsamaisa manyalo, likolobetso, kapa mapato. ’Me ha ho na chelete ea ho kena e lefshoang kapa likoleke lipuong tsa phatlalatsa kapa likopanong.

Kaha ha ho mohla ho fetisoang likotlolo tsa koloke, liphutheho tsa sebaka ka seng li amohela menehelo ea ho lefa litšenyehelo tsa tsona joang?

Mabokose a monehelo a bolokoa Liholong tsa ’Muso e le hore batho ka bomong ba ka etsa menehelo ea boithatelo haeba ba lakatsa joalo. (2 Marena 12:9) Menehelo eohle, ebang e meholo kapa e menyenyane, ea ananeloa. (Mareka 12:42-44) Hang ka khoeli, mosebeletsi ea hlokomelang lichelete tsa phutheho o balla phutheho tlaleho e khutšoanyane ho e tsebisa ka menehelo eohle e amohetsoeng, litšenyehelo, le menehelo eo phutheho e e etselitseng Mokhatlo oa Watch Tower ho tšehetsa mosebetsi oa lefatše ka bophara oa ho bolela le merero e meng.

Ha batho ka bomong ba utloisisa tokisetso ena, ba lokolohile ho nka karolo haeba ba lakatsa ho etsa joalo, e mong le e mong “ho ea kamoo a sitsitsoeng kateng.” (1 Ba-Korinthe 16:2, BPN) Sena ke se etsoang phuthehong ka ’ngoe ea liphutheho tse fetang 60 000 lefatšeng ka bophara.

Ka Pentekonta Bakreste ba pele ba ile ba khotlanya lintho tsohle hore ba li arolelane. Na Lipaki tsa Jehova li etsa sena?

Boemo ba tšohanyetso bo ile ba hlaha ka morao ho Pentekonta 33 C.E. ha Bajode ba tsoang libakeng tse hōle ba neng ba sa tsoa sokolohela Bokresteng ba sala Jerusalema ho amohela tsebo e eketsehileng ea moea. Ba ne ba hloka matlo a nakoana, le lijo; kahoo, Bakreste ba moo ba ile ba rekisa thepa ka boithatelo ’me ba arolelana chelete ka ho lekana bakeng sa ho hlokomela litlhoko tsa nako e telele ea ho kopanela botsoalle. (Liketso 2:1, 38-47; 4:32-37) Ha ho lea mong ea ileng a qobelloa ho rekisa kapa ho nehela. (Liketso 5:1-4) Ketso ena ea ho khotlanya lintho hore li arolelanoe e ne e se bokomonisi, joalokaha ba bang ba nahana. E ne e mpa e le tokisetso ea nakoana. Ha Bakreste bao ba khutlela mahaeng a bona, e ile ea khaotsa.

Na le ruta hore ho fana ka lintho tse bonahalang ke mokhoa oa ho tšoarela libe?

Le hanyenyane! Bibele e re: “Le ntse le tseba hobane, hase ka tse bolang, hase ka silevera le ka gauda le lopolotsoeng mokhoeng oa lōna oa lefeela, oo le neng le u rutiloe ke bontat’a lōna; empa e le ka mali a bohlokoa a Kreste, konyana e se nang letheba le sekoli.”—1 Petrose 1:18, 19.

Lipaki tsa Jehova li beha tumelo sehlabelong sa topollo sa Jesu bakeng sa poloko. Ha li etse menehelo ea boithatelo li lebelletse hore sena se tla li tlisetsa poloko. Leha ho le joalo, lia tseba hore ho hlokahala chelete e ngata ho hasa litaba tse molemo tsa lefatše le lecha la Molimo la ho loka. (2 Petrose 3:13) ’Me li ikutloa hore ho etsa menehelo e thusang ho phatlalatsoeng hona ke tokelo e fanoeng ke Jehova.

Ha Morena Davida a ne a ntša monehelo o moholo bakeng sa tempele ea Jehova eo mor’a hae Salomone a neng a tla e haha, o ile a rapela: “Oho, Jehova, boholo, le matla, le letlōtlo, le hlōlo, le khanya, ke tsa hao! Hobane tsohle tse maholimong le lefatšeng ke tsa hao. . . . Hobane ’na ke’ng, ’me sechaba sa ka ke’ng, hore re tle re tsebe ho u ntšetsa ntho tsa rōna joalo ka ho rata? Athe tsohle li tsoa ho uena, ’me ke letsoho la hao le re fileng seo re u neang sona.”—1 Likronike 29:11, 14.

Kajeno, Lipaki tsa Jehova le batho ba bang ba sekametseng ho lokeng ba ikutloa ka tsela e tšoanang le eo Davida a neng a ikutloa ka eona. Li thabetse ho ba le tokelo ea ho ntša menehelo ho tšehetsa mosebetsi oa ho rorisa Jehova, li hlokomela hore ntho e ’ngoe le e ’ngoe eo li e nehelang tšebeletsong ea hae e tsoa ho eena. Jehova o hlohonolofatsa moea ona, ’me ke kamoo a atlehisang mosebetsi oa hae ka teng.

[Lebokose le leqepheng la 23]

KAMOO BA BANG BA ETSANG MONEHELO OA MOSEBETSI OA ’MUSO

◻ LIMPHO: Menehelo ea boithatelo ea chelete e ka ’na ea romelloa ka ho toba ho Watch Tower Bible and Tract Society of Pennsylvania, 25 Columbia Heights, Brooklyn, New York 11201, kapa ofising ea lekala ea Mokhatlo e sebakeng sa heno. Thepa e kang litša, hammoho le mabenyane kapa thepa e ’ngoe ea bohlokoa, le tsona li ka fanoa. Lengolo le lekhutšoanyane le bolelang hore thepa e joalo ke monehelo o tobileng le lokela ho tsamaea le menehelo ena.

◻ TOKISETSO EA MONEHELO O KA BUSELETSOANG MONG’A OONA: Chelete e ka ’na ea fuoa Mokhatlo oa Watch Tower hore o e boloke, ka tokisetso ea hore haeba ho hlaha tlhoko ea botho, e tla khutlisetsoa ho ea faneng ka eona.

◻ INSURANCE: Mokhatlo oa Watch Tower o ka ’na oa ngolisoa e le oona mojalefa oa insurance ea bophelo kapa oa tokisetso ea ha motho a ea phomolong/pencheleng. Mokhatlo o lokela ho tsebisoa ka litokisetso leha e le life tse joalo.

◻ LIKABO TSA LEFA: Thepa kapa chelete e ka ’na ea fuoa Mokhatlo oa Watch Tower e le lefa ka lengolo le entsoeng ka molao la kabo ea lefa. Kopi e lokela ho romeloa ho Mokhatlo.

Bakeng sa boitsebiso bo eketsehileng le keletso mabapi le litaba tse joalo, ngolla Ofisi ea Ramatlotlo, Watch Tower Bible and Tract Society of Pennsylvania, Private Bag 2067, Krugersdorp, 1740, kapa ofising ea lekala ea Mokhatlo e sebakeng sa heno.

[Setšoantšo se leqepheng la 24]

Karolo ea setsi sa thuto ea Bibele sa Lipaki tsa Jehova e ntseng e ahoa Patterson, New York

[Litšoantšo tse leqepheng la 25]

Jehova o atlehisa mosebetsi oa kaho o etsoang ke batho ba hae ba etsang menehelo ea boithatelo