Ho Utloisisa se Boleloang ke Liketsahalo Tsa Joale
1 “Pono ea lefatše lena ea fetoha.” (1 Ba-Kor. 7:31, NW) Sena se bonahala liketsahalong tsa joale tse etsahalang ka potlako. Sena, hammoho le sohle se etsahalang ka har’a mokhatlo o hlophisitsoeng oa Jehova, se bolela’ng ho uena ka bouena?—Luka 21:28.
2 Ho phethahala ha boprofeta ba Bibele lekholong lena la bo20 la lilemo ho tiisa hore tsamaiso eohle e khopo ea lintho e fihlile mehleng ea eona ea qetello. (Matt. 24:3-14; Luka 21:7-11) Jesu o itse “moloko ona o ke ke oa feta, tseo li e-so ho hlahe.” (Luka 21:32) Na u utloisisa se boleloang ke sena ho batho ba leng tšimong ea lōna ba e-s’o khethe ho ema ka lehlakoreng la Jehova? Haeba u utloisisa, sena se ama tšebeletso ea hao ea tšimo joang?—Luka 21:34-36.
3 Thusa ba Bang ha Nako e sa le Teng: Jesu o phehelletse barutuoa ba hae ho sebelisa hamolemo maemo a fanang ka monyetla oa ho tsebahatsa litaba tse molemo. (Joh. 9:4) Moapostola Pauluse o fane ka keletso e tšoanang ha a phehella baena ba Kolosse hore ba ‘tsamaee ka bohlale pel’a ba ka ntle, ba ntse ba lopolla linako.’—Ba-Kol. 4:5.
4 Ba bang ba ile ba mamela keletso ena ea moapostola ea ho lopolla linako ’me ke bo-pula-maliboho ba ka mehla. Bacha ba bangata ba kenetse tšebeletso ea bopula-maliboho ba ka mehla ba ntse ba kena sekolo ’me ba atlehile haholo ho etsa joalo. Bacha ba leng sekolong ba ka lopolla linako ka ho thusa bao ba kenang sekolo le bona ho utloisisa se boleloang ke se etsahalang kajeno le tšepo e khanyang ea bokamoso tlas’a ’Muso oa Molimo.—Moek. 12:1.
5 Re ka sebelisa nako ea rōna hamolemo tšebeletsong ea tšimo ka October ka ho nehelana ka makasine oa Tsoha! ha monyetla o mong le o mong o hlaha. Khatiso ena e hlokomelisa ka se hlileng se boleloang ke liketsahalo tsa joale. Nehelana ka eona ho batho ba amehileng bao u ba fumanang ha u ntse u sebetsa ka ntlo le ntlo. Ikemisetse ho nehelana ka eona ho bao u kenang sekolo le bona kapa batho ba moo u sebetsang teng. Totobatsa lihlooho tse ka hapang thahasello ea batho bao u ba tsebang. Ka mohlala, Tsoha! ea October 8, 1991, e na le lihlooho tse buang ka ho hleka-hlekoa ha bana. Ena ke taba eo batho ba bangata ba amehileng ka eona.
6 Sehlooho sa Puisano sa morao-rao se ka sebelisoa joang? Ka mor’a ho itsebisa, u ka botsa mong’a ntlo: “U nahana hore ke hobane’ng ha re thulana le maemo a mangata hakaale a ferekanyang kajeno?” Ka mor’a hore a arabe u ka phaella ka ho re: “Bibele ea lumela hore ho batho ba bangata bophelo boa nyahamisa ’me boa ferekanya. Hlokomela se boleloang mona ho Moeklesia 2:17. [E Bale.] Na u lumellana le se boleloang moo? [Emela karabo.] U ka re ke eng e ka tšelisang motho ea loanang le mathata a mangata? [Emela tlhaloso.] Lengolo lena le re neha pono e ntle ka bophelo. [Bala Pesaleme ea 37:39, 40.] Lena ke lona lebaka leo Lipaki tsa Jehova li khothalletsang thuto ea Bibele. Ka mohlala, ak’u bone taba eo ho buuoang ka eona tokollong ea makasine oa rōna oa morao-rao oa Tsoha!” Joale u ka fana ka peeletso. Haeba peeletso e sa amoheloe, fana ka limakasine kapa u siee pampitšana.
7 Ha ho pelaelo hore tsena ke linako tse thabisang tsa ho sebeletsa Jehova. E se eka linnete tsena li ka re susumelletsa ho sebelisa monyetla o mong le o mong khoeling ena ho thusa batho ba tšepahalang ba eketsehileng ho utloisisa se hlileng se boleloang ke liketsahalo tsa joale.