nang ho kula, masoabi, meokho, esita le lefu. Nakong eo batho ba tla hōla ho ea phethehong le ho phela ka ho sa feleng ka thabo lefatšeng la paradeise. Khele! esita le ba ileng ba shoa ba tla tsosoa ’me ba tla fumana monyetla oa ho phela ka ho sa feleng!

3, 4. Ke hobane’ng ha batho ba joalo ba kholisehile ka pono ea bona?

³ Na pono ena ea bokamoso e mpa e le toro feela, e leng ho lakatsa ntho e ke keng ea etsahala? Che, le hanyenyane. E thehiloe motheong o tsitsitseng oa tumelo ea hore Paradeise ena e tlang ke ntho ea sebele. (Ba-Heberu 11:1) Ke hobane’ng ha ba kholisehile joalo? Hobane ’Mōpi ea matla ’ohle oa bokahohle ke eena ea e tšepisitseng.

⁴ Mabapi le litšepiso tsa Molimo, Bibele e re: “Ha ho ntho leha e le ’ngoe ea tsohle tse molemo tsee Jehova, Molimo oa lōna, a le baletseng tsona, e hlokahetseng.” “Molimo hase motho hore a ka bua leshano . . . Na hase eena ka sebele ea buileng joalo ’me a ke ke a etsa joalo, ’me na hase eena ea buileng joalo ’me na a ke ke a phethahatsa seo?” “Jehova oa makhotla o hlapantse, a re: Ruri, see ke se hopotseng, se tla etsahala; le see ke se rerileng, se tla hlaha.”—Joshua 23:14; Numere 23:19, NW; Esaia 14:24.

5. Ke lipotso life tse hlokang ho arabeloa?

⁵ Leha ho le joalo, haeba morero oa Molimo e ne e le ho theha paradeise ea lefatšeng hore e be e se nang bohloko, ke hobane’ng ha o lumella lintho tse mpe ho re li etsahale? Ke hobane’ng ha o ile oa leta lilemo tse likete tse tšeletseng ho fihlela hona joale ho lokisa se leng phoso? Na mohlomong lilemo tseo tse makholo tsa bohloko li bontša hore ruri Molimo ha o re tsotelle, kapa le hore ha o eo?

Karolo 3

Kamoo re ka Tsebang Hore Molimo o Teng

1, 2. Ke molao-motheo ofe o re thusang ho tseba hore na Molimo o teng?

TSELA e ’ngoe eo re ka tsebang ka eona hore Molimo o teng ke ho sebelisa molao-motheo ona o tsebahalang: Se entsoeng se hloka hore se be le moetsi. Haeba ntho e entsoeng e rarahane haholoanyane, e lokela hore e be moetsi oa eona o na le tsebo e ngata haholoanyane.

² Ka mohlala, ak’u thalatse mahlo ho potoloha lehae la hao. Litafole, litulo, li-deske, libethe, lipitsa, lipane, lipoleiti le lijana tse ling, mabota, fuluru le lisiling, lintho tsena kaofela li hloka hore li be le moetsi. Leha ho le joalo, ha ho bapisoa, lintho tseo li bonolo hore li ka etsoa. Kaha lintho tsena tse bonolo li hloka hore li be le moetsi, na ha se ho utloahalang hore lintho tse rarahaneng le tsona li hloka hore li be le moetsi ea bohlale haholoanyane?

Bokahohle ba Rōna bo Hlollang

3, 4. Bokahohle bo re thusa joang ho tseba hore na Molimo o teng?

³ Oache e hloka hore e be le moetsi oa lioache. Ho thoe’ng ka litsela tseo lipolanete li tsamaeang ho tsona tse rarahaneng haholoanyane, hammoho le Letsatsi le lipolanete tsa lona tse le potolohang ka mokhoa o nepahetseng hakaale ka mor’a lilemo tse makholo-kholo? Ho thoe’ng ka molala oa linaleli oo re phelang ho oona o bitsoang Milky Way, o nang le linaleli tse fetang libillione tse 100? Na u kile ua ema bosiu le ho bōha molala oa linaleli oa Milky Way? Na u ne u hlolletsoe? Joale nahana ka bokahohle bo boholo bo nang le melala ea linaleli e libillione tse hlokang palo joaloka Milky Way ea rōna! Hape, ho potoloha ha lipolanete tsena ka makholo a lilemo e bile ho nepahetseng hoo li ileng tsa bapisoa le lioache tse tšoarang nako.

⁴ Haeba oache, eo ha ho bapisoa e sa rarahanang haholo e bolela hore ho teng moetsi oa lioache, ka sebele bokahohle bo boholo bo rarahaneng haholoanyane bo bolela boteng ba moqapi le moetsi. Ke ka baka leo Bibele e re memang ho ‘lelala holimo le ho talima,’ ’me joale e be ea botsa: “Ea entseng ntho tseo ke mang?” Karabo: “[Molimo] O tsamaisa makhotla a tsona ka lenaneo, o li thonya kaofela ka mabitso a tsona ka matla a hae a maholo, matla a hae a sa sitoeng ke letho; ha ho le e ’ngoe ho tsona e hlokahalang.” (Esaia 40:26) Kahoo, bokahohle bo boholo bo bile teng ka baka la boteng ba matla a sa bonahaleng, a laolang, a bohlale—Molimo.