Ho Hlomoha

Tlhaloso: Boemo boo motho a fetang ho bona ha a mamella bohloko kapa ho tepella. Motho a ka ’na a hlomoha ’meleng, kelellong, kapa maikutlong. Ho hlomoha ho bakoa ke lintho tse ngata; ka mohlala, tšenyo e bakiloeng ke ntoa, le meharo ea chelete, bobe bo bakiloeng ke lefutso, ho kula, likotsi, “likoluoa tsa tlhaho,” lintho tse khopo tse etsoang ke ba bang kapa tseo ba li buang, likhatello tsa bodemona, ho hlokomela hore tlokotsi e haufi, kapa bothoto ba motho. Mona ho tla buisanoa ka ho hlomoha ho bakoang ke mabaka ana a sa tšoaneng. Leha ho le joalo, ho hlomoha ho ka ’na hoa bakoa hape ke hore motho a amehe haholo ke mahlomola a batho ba bang kapa ke masoabi a hae a ho bona boitšoaro boo e seng ba bomolimo.

Ke hobane’ng ha Molimo o lumelletse ho hlomoha?

Hantle-ntle ke mang ea molato oa hona?

Batho ba molato oa ho hlomoha ho hongata. Ba loana lintoa, ba etsa bokebekoa, ba silafatsa tikoloho, hangata ba hoeba ka mokhoa o susumetsoang ke meharo ho e-na le ho ameha ka batho ba bang, ’me ka linako tse ling ba kena mekhoeng eo ba tsebang hore ekaba kotsi bophelong ba bona. Ha ba etsa lintho tsena, ba itematsa le ba bang. Na ho ne ho ka lebelloa hore batho ba se ke ba kotula litholoana tsa seo ba se jetseng? (Ba-Gal. 6:7; Liprov. 1:30-33) Na ke ho utloahalang ho jarisa Molimo molato oa lintho tsee tse etsoang ke batho ka bobona?

Satane le bademona ba hae le bona ba jara boikarabelo. Bibele e senola hore ho hlomoha ho hongata ho bakoa ke tšusumetso ea meea e khopo. Ho hlomoha hoo batho ba bangata ba reng Molimo o molato oa hona ha ho tsoe ho oona ho hang.—Tšen. 12:12; Lik. 10:38; bona le maqephe 389, 390, tlas’a sehlooho “Satane Diabolose.”

Ho hlomoha ho qalile joang? Ho hlahloba lisosa ho hlokomelisa ka batsoali ba rōna ba pele ba batho, Adama le Eva. Jehova Molimo o ba bōpile ba phethahetse ’me a ba bea tikolohong ea paradeise. Hoja ba utloa Molimo, ho ne ho se mohla ba tla kula kapa ba shoe. Ba ka be ba ile ba thabela bophelo bo phethahetseng ba botho ka ho sa feleng. Ho hlomoha e ne e se karolo ea morero oa Jehova bakeng sa batho. Empa ka ho hlaka Jehova a bolella Adama hore hore a ’ne a thabele seo A ba fileng sona ho ne ho itšetlehile ka kutlo. Ka ho totobetseng, ba ne ba tlameha ho phefumoloha, ho ja, ho noa, le ho robala e le hore ba ’ne ba phele. ’Me ba ne ba tlameha ho boloka litlhoko tsa Molimo tsa boitšoaro hore ba thabele bophelo ka botlalo le hore ba hauheloe ka bophelo bo joalo ka ho sa feleng. Empa ba ikhethela ho ikela ka tsela ea bona, ho ipeela litekanyetso tsa bona tsa botle le bobe, ’me kahoo ba furalla Molimo, Monei-Bophelo. (Gen. 2:16, 17; 3:1-6) Sebe sa isa lefung. Adama le Eva ba tsoetse bana e se e le baetsalibe, ’me ba ne ba ke ke ba fetisetsa ho bana ba bona seo ba seng ba se na sona. Bohle ba tsoaletsoe sebeng, ba sekametse ho foseng, mefokolong e neng e ka isa ho kuleng, le lefutso la boetsalibe le neng le tla qetella ka lefu. Kaha e mong le e mong ea lefatšeng kajeno o tsoaletsoe sebeng, bohle re hlomoha ka litsela tse sa tšoaneng.—Gen. 8:21; Ba-Roma 5:12.

Moeklesia 9:11 e re “nako le sebaka sa ntho tseo” le tsona lia ikarabella ka se re hlahelang. Re ka ’na ra lemala, e seng hobane re ho bakeloa ke Diabolose ka ho toba kapa motho e mong ea itseng, empa hobane feela ka tsietsi re e-ba sebakeng se itseng ka motsotso o fosahetseng.

Ke eng ha Molimo o sa etse ho hong ho lopolla batho? Ke hobane’ng ha re ka hlomoha kaofela ka lebaka la se entsoeng ke Adama?

Ka Bibeleng, Molimo o re bolella hore na re ka qoba ho hlomoha ho hongata joang. O fane ka keletso e molemohali bakeng sa ho phela. Ha e sebelisoa, e tlatsa bophelo ba rōna ka molemo, e fella ka bophelo bo thabileng ba lelapa, e re atametsa ho batho ba ratanang ka sebele, ’me e re sireletsa mekhoeng e ka re tlisetsang ho hlomoha ho hongata ’meleng ho sa hlokahaleng. Haeba re hlokomoloha thuso eo, na ke hantle ha re jarisa Molimo molato bakeng sa khathatso eo re itlisetsang eona le ba bang?—2 Tim. 3:16, 17; Pes. 119:97-105.

Jehova o entse tokisetso ea ho felisa ho hlomoha hohle. O bōpile batho ba pele ba babeli ba phethahetse, ’me ka lerato a etsa tokisetso e ’ngoe le e ’ngoe e le hore bophelo bo ba natefele. Ha ba furalla Molimo ka boomo, na Molimo o ne o tlamehile ho kena lipakeng e le hore o ka sireletsa bana ba bona liphellong tsa se entsoeng ke batsoali? (Deut. 32:4, 5; Jobo 14:4) Joalokaha re tsebisisa, batho ba nyalaneng ba ka ’na ba e-ba le thabo e tsamaeang le ho tsoala bana, empa hape ba na le boikarabelo. Boikutlo le liketso tsa batsoali li ama bana ba bona. Leha ho le joalo, Jehova, e le pontšo ea mosa o babatsehang o sa tšoanelang, o ile a romela Mora oa hae ea ratoang haholo lefatšeng ho tla tela bophelo ba hae e le topollo, ho lokisetsa topollo bakeng sa bana ba Adama ba neng ba tla bontša tumelo ka kananelo tokisetsong ena. (Joh. 3:16) Ka baka leo, monyetla o bulehetse batho ba phelang kajeno ho fumana seo Adama a se lahlileng—bophelo bo phethahetseng ba botho, bo lokolohileng ho hlomoheng, lefatšeng la paradeise. Eo ke tokisetso e lerato hakaakang!

Bona le maqephe 416-418, tlas’a “Topollo.”

Empa ke hobane’ng ha Molimo oa lerato o ka lumella ho hlomoha hore ho tsoelepele halelele hakaale?

Na re ruile molemo hobane o ho lumelletse ho tla fihlela joale? “Morena ha a liehise lipallo tsa hae, joale ka ha ba bang ba lekanya hobane tieho e teng; empa o sa mameletse ka baka la rōna; hobane ha a rate ha ba bang ba ka timela, empa o rata hore bohle ba finyelle pakong.” (2 Pet. 3:9) Hoja Molimo oa bolaea Adama le Eva hang kamorao ho sebe sa bona, ha ho lea mong ho rōna ea ka beng a phela kajeno. Ka sebele re ne re ke ke ra lakatsa joalo. Ho feta moo, hoja hamorao Molimo oa timetsa bohle bao e neng e le baetsalibe, re ka be re sa tsoaloa. ’Nete ea hore Molimo o lumelletse lefatše lena la boetsalibe hore le ’ne le be teng ho tla fihlela joale, e re buletse monyetla oa hore ebe rea phela le ho ithuta ka litsela tsa oona, hore re etse liphetoho tse hlokahalang bophelong ba rōna, le ho iphumantša litokisetso tsa oona tse lerato bakeng sa bophelo bo sa feleng. Hore ebe Jehova o re neile monyetla ona ke bopaki ba lerato la hae le leholo. Bibele e bontša hore Molimo o na le nako eo o e beileng ea ho timetsa tsamaiso ena e khopo ’me o tla ho etsa haufinyane.—Hab. 2:3; Sof. 1:14.

Molimo o ka etsolla ’me o tla etsolla kotsi eohle e ka ’nang ea oela bahlanka ba oona tsamaisong ena ea lintho. Hase Molimo o bakang ho hlomoha. Empa ka Jesu Kreste, Molimo o tla tsosa bafu, o phekole maloetse ’ohle a ba mamelang, o fothole mesaletsa eohle ea sebe, o be o re lebatse le masoabi ’ohle a pele.—Joh. 5:28, 29; Tšen. 21:4; Esa. 65:17.

Nako e fetileng e lekane ho lokisa litseko tse ileng tsa hlahisoa Edeneng. Bakeng sa lintlha tse qaqileng, bona maqephe 389, 390, le 65-67.

Rōna ka borōna re chesehela ho lopolloa. Empa ha Molimo o nka bohato, e tlameha ho ba molemong oa bohle ba ratang ho loka, eseng bakeng sa ba seng bakae feela. Molimo ha o ee ka tšobotsi.—Lik. 10:34.

Lipapiso: Na hase ’nete hore motsoali ea lerato a ka ’na a lumela hore ngoana a buuoe ka mokhoa o bohloko ka lebaka la liphello tse molemo tse ka bang teng ka hona? Hape, na hase ’nete hore hangata “liphekolo tsa kapele” tsa maloetse a bohloko ke tsa ka holimo feela? Ka mehla ho felisa sesosa sa boloetse ho hloka nako e ngata.

Ke hobane’ng ha Molimo o sa ka oa tšoarela Adama ’me kahoo oa thibela ho hlomoha ho tšabehang ho utluoang ke batho?

Na hoo ho ne ho tla hle ho thibele ho hlomoha kapa, ho e-na le hoo, ho ne ho tla etsa hore Molimo o ikarabelle ka hona? Ho etsahala joang ha ntate a hlokomoloha phoso ea bana ba hae ka boomo feela ho e-na le hore a ba khalemele ka matla? Hangata bana ba qala ka phoso ea mofuta ona joale ba ee ho e ’ngoe, ’me boikarabelo bo boholo bo ba ho ntate.

Ka ho tšoanang, hoja Jehova o ile a tšoarela sebe sa Adama sa ka boomo, ruri ho ne ho tla etsa Molimo karolo ea phoso. Ho hang hoo ho ne ho sa tl’o ntlafatsa maemo lefatšeng. (Bapisa Moeklesia 8:11.) Ho feta moo, ho ne ho tla fella ka hore bara ba mangeloi ba hlompholle Molimo, ’me ho ne ho tla bolela hore ho ne ho se motheo oa sebele bakeng sa tšepo ea ho hong ho molemonyana. Empa boemo bo joalo bo ka be bo sa etsahala le kamohla, hobane ho loka ke motheo o sa fetoheng oa borena ba Jehova.—Pes. 89:14.

Ke hobane’ng ha Molimo o lumella hore bana ba tsoaloe ba e-na le likoli tse matla ’meleng le kelellong?

Molimo ha o bake likoli tse joalo. O bōpile batho ba pele ba babeli ba phethahetse, ba e-na le matla a ho tsoala bana ba phethahetseng ba tšoanang le bona.—Gen. 1:27, 28.

Re futsitse sebe ho Adama. Lefutso leo le jere matla a likoli tsa ’mele le kelello. (Ba-Roma 5:12; bakeng sa lintlha tse ling bona maqephe 130, 131.) Ho futsa sebe hona ho ho rōna ho tloha ha re emoloa ka popelong. Ke ka lebaka leo Morena Davida a ileng a ngola: “’Mè o nkemoletse sebeng.” (Pes. 51:5) Hoja Adama a se ke a etsa sebe, ho ka be ho neeletsanoa litšobotsi tse lakatsehang feela. (Bakeng sa litlhaloso ka Johanne 9:1, 2, bona leqephe 175.)

Batsoali ba ka lematsa bana ba bona ba e-song ho hlahe—ka mohlala, ka tšebeliso e mpe ea lithethefatsi kapa ka ho tsuba nakong ea boimana. Haele hantle, hase ’nete hore tabeng e ’ngoe le e ’ngoe ke ’mè kapa ntate ea ikarabellang ka likoli tsa tsoalo kapa ho kula hoa ngoana oa bona.

Ka lerato Jehova o fetisetsa ho bana melemo ea sehlabelo sa topollo sa Kreste. Ka lebaka la ho nahanela batsoali ba sebeletsang Molimo ka bokhabane, o talima bana ba bona ba banyenyane ba halalela. (1 Ba-Kor. 7:14) Hona ho susumelletsa batsoali ba tšabang Molimo hore ba be hlokolosi ka boemo ba bona le Molimo, ka lebaka la kameho e lerato bakeng sa bana ba bona. Ho bana ba baholo ka ho lekaneng hore ba bontše tumelo le ho bontša ho utloa litaelo tsa Molimo, Jehova o fetisetsa tokelo ea hore ba be le boemo bo amohelehang e le bahlanka ba hae. (Pes. 119:9; 148:12, 13; Lik. 16:1-3) Hoa hlokomeleha hore Jesu, eo e neng e le setšoantšo se phethahetseng sa Ntate oa hae, o ile a bontša thahasello e khethehileng boiketlong ba bana, a bile a tsosa ngoana bafung. Ruri o tla ’ne a etse joalo haele Morena oa Messia.—Matt. 19:13-15; Luka 8:41, 42, 49-56.

Ke hobane’ng ha Molimo o lumella “likoluoa tsa tlhaho” tse bakang tšenyo e khōlō ea thepa le bophelo?

Molimo ha o bake litšisinyeho tsa lefatše, lifefo, likhohola, komello, le ho hlatsa hoa lefatše seretse se chesang tse atileng hakana litabeng tsa kajeno. Ha o li sebelise hore o otle lichaba tse itseng. Tsena li bakoa haholo-holo ke matla a tlhaho a ’nileng a sebetsa ho tloha ha lefatše le hloloa. Bibele e hlile ea bolela litšisinyeho tse khōlō tsa lefatše le litlala bakeng sa mehla ea rōna, empa hoo ha ho bolele hore Molimo kapa Jesu o ikarabella bakeng sa tsona, joalokaha molepi oa tsa leholimo a sa ikarabelle ka boemo ba leholimo boo a bo bolelang pele ho nako. Kaha tsena li etsahala le lintho tse ling tse hlileng tsa boleloa pontšong e makala-kala ea bofelo ba tsamaiso ena ea lintho, ke karolo ea bopaki ba hore mahlohonolo a ’Muso oa Molimo a haufi.—Luka 21:11, 31.

Hangata batho ba jara boikarabelo bo boima bakeng sa kotsi e entsoeng. Ka tsela efe? Leha ba lemositsoe ka ho lekaneng, batho ba bangata ba hana ho tsoa sebakeng se kotsi kapa ba hlōlehe ho nka mehato e hlokahalang.—Liprov. 22:3; bapisa Mattheu 24:37-39.

Molimo o ka laola matla a joalo a tlhaho. O ile oa fa Jesu Kreste matla a hore a khutsise sefefo Leoatleng la Galilea, e le mohlala oa seo O tla se etsetsa batho tlas’a ’Muso oa oona oa Messia. (Mar. 4:37-41) Ka ho furalla Molimo, Adama o hanne hore Molimo o ka kenella joalo molemong oa hae le bana ba hae. Ba neoang bophelo Pusong ea Kreste ea Bomessia ba tla latsoa tlhokomelo e lerato joalo, tlhokomelo e ka fanoang feela ke ’muso o filoeng matla ke Molimo.—Esa. 11:9.

Na batho ba hlomohang ke bobe ba otloa ke Molimo ka lebaka la bokhopo?

Ba tlōlang litekanyetso tsa bomolimo tsa ho phela ba fela ba hlaheloa ke liphello tse mpe. (Ba-Gal. 6:7) Ka linako tse ling ba kotula bohloko kapele. Mabakeng a mang, ho ka ’na hoa bonahala ba atleha ka nako e telele. Ha ho bapisoa, Jesu Kreste, eo ho seng mohla a kileng a etsa bobe, o ile a khahlapetsoa ka sehlōhō ’me a bolaoa. Kahoo, tsamaisong ena ea lintho nala ha e-ea lokela ho talingoa e le bopaki ba tlhohonolofatso ea Molimo, leha e le hore bomalimabe bo ka nkoa e le bopaki ba ho se amohelehe ho oona.

Ha Jobo a lahleheloa ke matlotlo a hae ’me a hlaseloa ke lefu le tšabehang, e ne e se hobane Molimo o sa mo amohele. Bibele e bolela ka ho hlaka hore ke Satane ea neng a ikarabella. (Jobo 2:3, 7, 8) Empa metsoalle e ileng ea etela Jobo e ile ea phea khang hore tsietsi ea Jobo e tlameha ho paka hore o entse bokhopo bo bong bo itseng. (Jobo 4:7-9; 15:6, 20-24) Jehova a ba khalemela, a re: “Bohale ba ka bo tuketse uena . . . hobane ha lea ka la bolela tsa ka hantle, joale ka ha ho entse Jobo, mohlanka oa ka.”—Jobo 42:7.

Haele hantle, ba khopo ba ka ’na ba atleha ka nakoana. Asafe o ile a ngola: “Ke ne ke honohela baikakasi, ha ke bona lehlohonolo la banyefoli. Ba lutse ka ntle ho mahlomola a batho, ’me ha ba otloe joale ka ba bang. Ke basomi, ke ba bolotsana, ba bolela ho tuba; ba bua ka puo tse phahameng. Ba talimeng ba babe bao! Ba iketla ka mehla, ba totisa matlotlo a bona.”—Pes. 73:3, 5, 8, 12.

Ho tla tla letsatsi la ho ikarabella ho Molimo. Ka nako eo o tla otla ba khopo, a ba timetse ka ho sa feleng. Liproverbia 2:21, 22 e re: “Ba lokileng ba tla aha lefatšeng; ba hloekileng ba tla le rua. Empa ba babe ba tla khaoloa holim’a lefatše; ba lonya ba fotholoe ho lona.” Joale ba lokileng, bao ba bangata ho bona ba hlomohileng ke bomalimabe, ba tla thabela bophelo bo phethahetseng le karolo e ntle ea se beoang ka bongata ke lefatše.

Haeba e Mong a Re—

‘Ke hobane’ng ha Molimo o lumelletse ho hlomoha hoo hohle?’

U ka ’na ua arabela: ‘Eo ke taba e re amang ka ho tebileng kaofela. Na nka botsa, Ke eng e etsang hore u bue ka eona kajeno?’ ’Me mohlomong u ka eketsa: (1) ‘(Sebelisa taba e maqepheng a 130-133.)’ (2) ‘(Kenya mangolo a mang a tšoereng topollo boemong bo itseng bo tliselitseng motho eo ho hlomoha.)’

Kapa u ka re (haeba ba amehile ka lebaka la ho hloka toka hoa lefatše): ‘Bibele e bontša hore na ke hobane’ng ha maemo ana a le teng kajeno. (Moek. 4:1; 8:9) Na u ne u tseba hore e boetse e re bontša hore na Molimo o tla etsa joang ho re lopolla? (Pes. 72:12, 14; Dan. 2:44)’

Monyetla o mong: ‘Ho hlakile hore u motho ea lumelang ho Molimo. Na u lumela hore Molimo ke lerato? . . . Na u lumela hore o bohlale le hore o matla ’ohle? . . . Ka hona e tlameha ebe o na le mabaka a utloahalang a ho lumella ho hlomoha. Bibele e bontša hore na mabaka ao ke afe. (Bona maqepheng a 130-133.)’