KHAOLO 7

Bua Litaba Tse Nepahetseng

Luka 1:3

NTLHA-KHOLO: Qotsa libuka tseo batho ba li tšepang ho thusa bamameli ba hao ho etsa qeto e nepahetseng.

Sheba libuka tseo batho ba li tšepang. Seo u se buang se lokela ho thehoa Lentsoeng la Molimo, ha ho khoneha le bale. Haeba u bua ka taba ea saense, u qotsa se builoeng litabeng, mecheng e meng ea litaba, kapa u bua ka taba e etsahaletseng motho e mong, batlisisa hore na taba eo e ka tšeptjoa le hore na e sa le joalo.
Sebelisa lintho tseo u li qotsitseng hantle. Hlalosa mangolo ka tsela e lumellanang le seo ho buuoang ka sona, e lumellanang le molaetsa oa Bibele le e lumellanang le lingoliloeng tsa “lekhoba le tšepahalang le le masene.” (Mat. 24:45) Ha u qotsa libuka tse ngotsoeng ke batho ba bang, u se ke oa fetola seo mongoli a se ngotseng le sepheo seo a ngotseng ka sona.

U se ke oa feteletsa litaba kapa oa bala lipalo tse holimo haholo. Ela hloko hore ha ho thoe “batho ba bang” ha ho boleloe “batho ka kakaretso.” Ha ho thoe “ka linako tse ling” ha ho boleloe “kamehla.” Hape ha ho thoe “ntho e ka ’na ea etsahala” ha ho boleloe hore “e tla feela e etsahale.”
Hlalosa mabaka. Ha u qeta ho bala lengolo kapa u qeta ho qotsa buka e itseng, ka bohlale botsa lipotso kapa u etse papiso e tla thusa bamameli hore ba etse qeto e nepahetseng.