Tsa Mona le Mane
◼ “Ho nyametse lipontšuoa tse ka bang 160 000 limusiamong tsa Russia.”—RIA NOVOSTI, RUSSIA.
◼ “Sefofa-sebakeng sa NASA se bitsoang Phoenix Mars Lander se fumane lehloa le theohang marung a Mars.”—“NASA MISSION NEWS,” U.S.A.
◼ “Karolo ea 65 lekholong ea bakhanni le bapalami ba shoang likotsing tsa mebileng Greece, ke ba sa itlammeng ka mabanta ka koloing kapa ba sa roaleng lihelmete ha ba palame lithuthuthu.”—EIKONES, GREECE.
Thoto e Lahlehang
Baeti ba atisa ho lahleheloa ke thoto ha ba tsamaea ka lifofane. Koranta e bitsoang International Herald Tribune e tlaleha hore ka 2007, “ho ile ha lahleha mekotla e limilione tse 42, e leng keketseho ea karolo ea 25 lekholong ho feta ka 2006.” Boholo ba mekotla eo e ile ea khutlisetsoa ho beng ba eona pele ho feta lihora tse 48, empa e etsang karolo ea 3 lekholong ea eona, e leng “mokotla o le mong ho baeti ba bang le ba bang ba 2 000, ha ea ka ea fumanoa.” Ka 2007, lik’hamphani tsa lifofane li ile tsa sebelisa liranta tse limilione tse 38 ho lefella thoto e lahlehileng. Har’a tse ling, sena se bakoa ke “tšubuhlellano ea baeti ba ntseng ba eketseha, linako tse atamelaneng haholo tsa ho tsamaea ha lifofane,” ho fapanya thoto le ho ngola lileibole hampe.
Mak’hatholike a Lulang Hammoho a sa Nyalana
Makasine e bitsoang Population & Sociétés e re phuputso e entsoeng Fora e bontša hore “bolumeli bo ntse bo felloa ke matla” a ho susumetsa batho hore ba fetole tsela eo ba phelang ka eona le mekhoa ea bona, ho sa tsotellehe hore na ke ba bolumeli bofe. Ka mohlala, hoo e ka bang karolo ea 88 lekholong ea bacha ba Fora ba lilemo li pakeng tsa 18 le 24, ba re ke Mak’hatholike, empa karolo ea 80 lekholong ea bona ba ea kerekeng feela ha e le machato, likolobetso kapa mafu. Ho fokolloa ke matla ha setso ho bonahala bophelong ba malapa. Lilemong tse 40 tse fetileng, e ne e le batho ba 2 ho ba 20 ba neng ba lula ’moho pele ba nyalana. Kajeno ke ba 18 ho ba 20. Phuputso eo e bontšitse hore “ho Mak’hatholike a eang kerekeng kamehla, a etsang karolo ea 75 lekholong a lutse ’moho pele a nyalana.”
Seoa sa Lihoai Tse Ipolaeang Tsa India
Koranta e bitsoang The Hindu e tlaleha hore ka selemo ho tloha ka 2002, lihoai tsa India tse fetang 17 000 li ipolaile, tse ngata tsa tsona ka ho noa chefo ea likokoanyana. A mang a mathata ao lihoai li tobanang le ’ona ke komello, theko e phahameng ea peō, litšenyehelo tse holimo tsa temo le ho thatafalloa ho alima chelete libankeng. Ka lebaka leo, lihoai tse ngata li ea ho batho ba alimanang ka chelete, ba batlang phaello e ngata, e leng se sieang lihoai tseo likolotong. E le ho lefella likoloto, lihoai tse ling li bile li rekisa litho tsa tsona tsa ’mele. ’Me ha seo se hlōleha kapa ho bonahala eka ha ho letho leo li ka le etsang, tse likete li khetha ho ipolaea, kaha li nahana hore seo ke sona feela seo li ka se etsang ho tsoa boemong boo.
Likoena Tsa Nile Lia Buisana Pele li Qhotsoa
Koranta ea London e bitsoang The Times e tlaleha hore “malinyane a likoena aa buisana ha a ntse a le ka leheng, e leng se etsang hore a qhotsetsoe hong.” Ho ile ha hatisoa molumo o etsoang ke malinyane a likoena tsa Nile a ntse a le ka maheng. Molumo oo o ile oa bapalloa malinyane a mang a ntseng a e-s’o qhotsoe. Ha malinyane ao a utloa molumo oo a ile a sisinyeha a le ka maheng ho feta a neng a sa o utloe. Tlaleho e re: “A ileng a utloa molumo oa malinyane a mang a e-song ho qhotsoe a ile a tsoa ka khetleng le pele ho feta metsotso e leshome.” Mahe a neng a le sebakeng se khutsitseng kapa a neng a utloa molumo oo ka linako tse itseng, ha aa ka a qhotsetsoa hong.