Ho Hlahlojoa Litaba Tsa Bophelo Bo Botle

Lefatše

Mokhatlo oa Lefatše oa Bophelo o hakanya hore ka 2035 batho ba limilione tse 24 ba tla tšoaroa ke boloetse ba kankere ka selemo. Batho ba tšoereng ke boloetse bona ba tla be ba eketsehile ka liphesente tse 70 ha ba bapisoa le bao bo ba tšoereng hona joale, ba ka bang limilione tse fetang tse 14. Ho hakanngoa hore halofo ea batho bao, ba tla tšoaroa ke boloetse boo ka lebaka la lintho tse kang, ho noa haholo, ho se ikoetlise, botenya, ho chesoa ke mahlaseli a kotsi a letsatsi le ho tsuba.

Brithani

Ka mor’a hore ’muso oa Brithani o fuoe bopaki ba hore ho na le monyetla oa hore batho ba tšoaetsoe boloetse bo kang ba bohlanya ba likhomo ha ba tšela mali, ’muso oo o ile oa etsa liphuputso ka seo. Andrew Miller, e leng setho sa Paramente, o ile a re: “Re ne re tšoenyehile haholo ha re utloa bopaki bo bontšang hore batho ba kotsing ea ho tšoaroa ke boloetse bona bo sa phekoleheng. Re ile ra bolelloa hore [boloetse bona bo ka jaleha] ka ho tšela mali a nang le maloetse le ho fana ka litho tsa ’mele.”

Norway

Phuputso e entsoeng ka lilemo tse 11 ho batho ba Norway ba ka bang 63 000, e bontša hore ho na le monyetla o etsang liphesente tse 40 oa hore batho ba tšoeroeng ke lefu la ho tepella maikutlo ba tšoaroe ke lefu la pelo. Mokhatlo oa Europe oa Litsebi Tsa Mafu a Pelo o ile oa qotsa e mong oa bangoli ba phuputso eo ha a re, lefu la ho tepella maikutlo le baka khatello ea maikutlo le ho feta e leng se ka bakelang motho lefu la pelo le hore a sitoe ho latela keletso e ka ntlafatsang bophelo ba hae.

United States

Bo-rasaense ba fuputsa likotsi tse ka bakoang ke mosi oa koae, o tsoang moloreng oa eona o salang litafoleng, ka lifoleteng, liphaposing tsa lihotele le ka makoloing. Molora o ntseng o bokellana o ka ba kotsi le ho feta ha nako e ntse e ea.